དབུས་འོས་བསྡུ་ལས་ཁང་གིས་མི་གཅིག་ལ་ཉེས་ཆད་དང་མི་གཉིས་ལ་ཉེན་བརྡ་བཏང་འདུག

དབུས་འོས་བསྡུ་ལས་ཁང་གིས་སྨན་པ་ངག་དབང་བློ་གྲོས་ཀྱི་མི་ལོ་བརྒྱད་ཀྱི་གདམ་བྱ་འདེམས་བྱེད་ཀྱི་ཐོབ་ཐང་ཕྲོགས་པ་དང་། སྲིད་སྐྱོང་འོས་མི་སྐལ་བཟང་རྡོ་རྗེ་ལགས་དང་གནས་ཆུང་སྐུ་གཞོགས་རྡོ་རྗེ་ལགས་གཉིས་ལ་འོས་བསྡུའི་སྒྲིག་གཞི་དང་འགལ་ཉེན་ཡོད་པའི་ཉེན་བརྡ་བཏང་བ། དགོས་ངེས་ཅན་ཡིན་ན་མ་གཏོགས་ལས་ཐོག་སྲིད་སྐྱོང་མཆོག་གི་གཞུང་འབྲེལ་ཕྱོགས་ཕེབས་དག་ཕྱིར་འགྱངས་ཡོང་བའི་རེ་སྐུལ་ཞུས་ཡོད་འདུག

དེ་རིང་སྔ་དྲོའི་ཆུ་ཚོད་ ༡༡ ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། དབུས་འོས་བསྡུ་ལས་ཁང་གིས་སྲིད་སྤྱི་གཉིས་ཀྱི་འོས་བསྡུ་ཆེན་མོ་དང་འབྲེལ་བའི་གསར་འགོད་ལྷན་ཚོགས་ཐེངས་གསུམ་པ་དེ་གནང་སོང་། སྐབས་དེར་འོས་བསྡུའི་འགན་འཛིན་བློ་བཟང་ཡེ་ཤེས་ལགས་ཀྱིས། སྨན་པ་རྟ་རའམ་ངག་དབང་བློ་གྲོས་ཀྱིས་སྐབས་བཅུ་བདུན་པའི་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་སུ་སྒྲོ་བཏགས་དང་གཞི་མེད་སྐྱོན་འཛུགས་བྱས་པར་མི་ལོ་བརྒྱད་རིང་གི་གཞུང་འབྲེལ་གདམ་བྱ་འདེམས་བྱེད་ཀྱི་ཐོབ་ཐང་ཕྲོགས་པ་དང་། སྲིད་སྐྱོང་འོས་མི་དབུ་དཀར་ཚང་སྐལ་བཟང་རྡོ་རྗེ་ལགས་ཀྱིས་གསར་འགོད་གསལ་བསྒྲགས་སྐབས་ཀྱི་སྐད་ཆ་ཞིག་ལ་མང་ཚོགས་ནང་གླེང་སློང་དང་སྐྱོན་བརྗོད་རིགས་ཡོང་གི་ཡོད་སྟབས། བཅའ་སྒྲིག་དགོངས་དོན་དང་འགལ་ཉེན་ཡོད་པའི་ཉེན་བརྡ་བཏང་། དེ་བཞིན་གནས་ཆུང་སྐུ་གཞོགས་རྡོ་རྗེ་ལགས་ཀྱིས་སྲིད་སྤྱི་གཉིས་ཀྱི་འོས་བསྡུའི་དྲིལ་བསྒྲགས་འགྲོ་བཞིན་པའི་སྐབས། འཕྲོས་བཤད་ཀྱིས་ཆབ་སྲིད་ཀྱི་བཀའ་མོལ་མང་པོ་ཞིག་གི་རྐྱེན་གྱིས་སྤྱི་ཚོགས་འཁྲུག་རྐྱེན་སློང་བའི་ཉེན་བརྡ་བཏང་ཡོད་འདུག

དེ་འབྲེལ་བསྒྲགས་གཏམ་ནང་དུ། སྦེལ་ཀོབ་ལུགས་བསམ་གཞིས་མི་ངག་དབང་བློ་གྲོས་( ཨམ་རྗེ་རྟ་ར)ནས་ཕྱི་ལོ་ ༢༠༢༥ ཟླ་ ༡༡ ཚེས་ ༢ ཉིན་རང་གི་སྤྱི་ཚོགས་དྲ་རྒྱ་(Youtube, Dr.Tara Medicine) ཞེས་པའི་ནང་སྐབས་ ༡༧ པའི་བོད་མི་མང་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་སུ་སྒྲོ་བཏགས་དང་། གཞི་མེད་སྐྱོན་འཛུགས་བྱེད་པར་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ཉེར་བཞི་པའི་ནང་གསེས་  ༣ དང་ ༡༡ དང་འགལ་འཛོལ་བྱུང་ཡོད་བྱུང་བའི་ར་འཕྲོད་ཀྱིས་སྒྲིག་གཞི་དོན་ཚན་ཉེར་ལྔ་པའི་ནང་གསེས་ ༣ དང་ ༡༡ དགོངས་དོན་ལྟར། ཕྱི་ལོ་ ༢༠༢༦ ཟླ ༡ ཚེས་ ༢༧ ནས་ལོ་བརྒྱད་ཀྱི་རིང་གཞུང་འབྲེལ་གདམ་བྱ་འདེམས་བྱེད་ཀྱི་ཐོབ་ཐང་འཕྲོག་རྒྱུའི་ཐག་གཅོད་ཞུས། ཅེས་གསལ་འདུག

ཡང་གསར་འགོད་བསྒྲགས་གཏམ་ནང་། ལོ་ ༢༠༢༥ ཟླ་ ༡༢ ཚེས་ ༢༧ ཉིན་གདན་ས་ཆེན་པོ་དཔལ་ལྡན་འབྲས་དཀར་སྤུངས་པའི་བླ་སྤྱི་ནས་གཞུང་བསྙེན་དགྲ་ལྷ་གནས་ཆུང་ཆོས་རྒྱལ་ཆེན་པོ་སྤྱན་འདྲེན་ཞུ་སྐབས་ཀྱི་བཀའ་ལུང་དང་འབྲེལ་བོད་ཀྱི་རླུང་འཕྲིན་ཁང་ནས་སྐུ་གཞོགས་རྡོ་རྗེ་ལགས་ལ་ཟླ་ ༡༢ ཚེས ༣༠ ཉིན་བཅར་འདྲི་ཞུས་པའི་ལན་འདེབས་སུ། གཞུང་བསྟེན་དགྲ་ལྷའི་བཀའ་ལུང་ཇི་བཞིན་འགྲེལ་བརྗོད་གནང་འོས་གནང་ཡོད་ཀྱང་། ཕྱི་ལོ་ ༢༠༢༥་་༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྤྱི་གཉིས་ཀྱི་འོས་བསྡུའི་ལས་རིམ་འགྲོ་བཞིན་པའི་སྐབས་འདིར་ཁོང་ནས་འཕྲོས་བཤད་ཀྱིས་ཆབ་སྲིད་དང་འབྲེལ་བའི་བཀའ་མོལ་མང་དག་གནང་ཐལ་གྱི་རྐྱེན་པས་སྤྱི་ཚོགས་འཁྲུག་གཞི་དང་། འོས་བསྡུའི་ལས་རིམ་ལ་དོ་ཕོག་འགྲོ་ཉེན་ཡོད་པར་སོང་། བཙན་བྱོལ་བོད་མིའི་འོས་བསྡུའི་སྒྲིག་གཞི་དང་། རྩ་འཛིན་ལམ་སྟོན་བཅས་དང་འགལ་འཛོལ་བྱུང་བའི་ཁོང་ལ་ཉེན་བརྡ་བཏང་ཡོད་པ་དང་། ཨ་རིའི་སྐུ་ཚབ་དོན་ཟུར་དབུ་དཀར་ཚང་སྐལ་བཟང་རྡོ་རྗེ་ལགས་ནས་ཕྱི་ལོ་ ༢༠༢༥ ཟླ་ ༡༡ ཚེས་ ༢༡ ཉིན་དྷ་ས་ལྷ་རྒྱལ་རིར་ཕྱི་ལོ་ ༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་འོས་མིར་བཞེངས་རྒྱུའི་གསར་འགོད་གསལ་བསྒྲགས་ཤིག་སྤེལ་སྐབས། “་༧རྒྱལ་བ་རིན་པོ་ཆེ་ནང་བཞིན་སུ་གང་གིས་གནང་ཐུབ་ཀྱི་མ་རེད་། ཡིན་ནའང་། ༸རྒྱལ་བ་རིན་པོ་ཆེ་གཙོས་པའི་ང་ཚོ་ཚང་མ་ལ་སྐྱོན་མེད་པ་དང་། ག་རེ་ཡིན་ནའང་མི་གཅིག་གིས་ག་ཚོད་འཇོན་ཐང་དང་། ཤེས་འཇོན་དང་། རྒྱབ་ལྗོངས་ཡོད་པ་ཡིན་ནའང་མི་གཅིག་གི་ནུས་པ་དེ་མི་མང་པོ་དང་བསྡུར་རྒྱུ་ཡོད་པ་མ་རེད་ཅེས་གསུངས་ཡོད་པར་མང་ཚོགས་ནང་བསམ་ཚུལ་དང་། སྐྱོན་བརྗོད་རིགས་བྱུང་ཡོད་པར་སོང་། འདི་ལས་ནས་ཕྱི་ལོ་ ༢༠༢༥ ཟླ་ ༡༢ ཚེས ༡༦ ཉིན་སྲིད་སྐྱོང་འོས་མི་དབུས་དཀར་ཚང་སྐལ་བཟང་རྡོ་རྗེ་ལགས་སུ་བཅའ་སྒྲིག་དགོངས་དོན་དང་འགལ་ཉེན་ཡོད་པས་སླད་ཕྱིན་འདི་རིགས་མི་ཡོང་བར་ཐུགས་གཟབ་དགོས་པའི་ཉེན་བརྡ་བཏང་བ་བྱུང་ཡོད། ཅེས་གསལ་འདུག

དེ་བཞིན་དབུས་འོས་བསྡུ་ལྷན་ཁང་གིས། འོས་བསྡུའི་དུས་ཡུན་ནང་སྲིད་སྐྱོང་སྤེན་པ་ཚེ་རིང་མཆོག་གིས་དགོས་ངེས་ཅན་ཡིན་ན་མ་གཏོགས། གཞུང་འབྲེལ་གྱི་ཕྱོགས་ཕེབས་རྣམས་འོས་བསྡུ་མ་ཚར་བར་དུ་ཕྱིར་འགྱངས་གནང་དགོས་པའི་རེ་སྐུལ་དང་། གཞུང་སྒེར་མཛད་སྒོ་སོགས་སུ་འོས་བསྔུའི་དུས་ཡུན་ནང་བོད་མི་མང་སྤྱི་འཐུས་ཚོགས་གཙོ་སྦྲེལ་པོ་དང་། སྲིད་སྐྱོང་སོགས་སྐུ་མགྲོན་གཙོ་བོ་མི་གནང་བའི་ལམ་སྟོན་ཡང་ཞུས་ཡོད་འདུག

སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་བྱ་རྒྱུར་ཉིན་གྲངས་ ༣ ལས་ལྷག་མེད་ལ། དབུས་འོས་བསྡུ་ལས་ཁང་གིས་བཙན་བྱོལ་བོད་མིའི་འོས་བསྡུའི་སྒྲིག་གཞི་དགོངས་དོན་ལྟར་འོས་ཤོག་རྣམས་འཛམ་གླིང་རྒྱལ་ཁབ་ ༢༧ གྱི་ས་གནས་འོས་བསྡུ་ལས་ཁང་ ༨༧ འོག འོས་བསྡུ་བྱ་ཡུལ་གྱི་སྡེ་ཚན་གྲངས་ ༣༠༩། ཚོགས་ཆུང་དང་ལས་བྱེད་ཁྱོན་གྲངས་ ༡༧༣༧ སུད་ཚོང་ཁག་གྲངས་ ༣༡ བཅས་ལ་བཏང་ཟིན་ཡོད་འདུག་ལ། ཕྱི་ལོ་ ༢༠༢༦ ཟླ་ ༢ ཚེས་ ༢༥ ཉིན་སྔོན་འགྲོའི་འོས་བསྡུའི་གྲུབ་འབྲས་གསལ་བསྒྲགས་གནང་རྒྱུ་ཡིན་འདུག དེ་བཞིན་ཕྱི་ལོ་ ༢༠༢༦ ཟླ་ ༤ ཚེས་ ༣ ཉིན་དངོས་གཞིའི་འོས་གཞི་གསལ་བསྒྲགས་གནང་རྒྱུ་དང་། དངོས་གཞིའི་འོས་བསྡུ་ཕྱི་ལོ་ ༢༠༢༦ ཟླ་ ༤ ཚེས་ ༢༦ ཉིན་གནང་རྒྱུ་ཡིན་པ་རེད།  ཕྱི་ལོ་༢༠༡༦ ཟླ་ ༥ ཚེས་ ༡༣ ཉིན་སྲིད་སྤྱི་གཉིས་ཀྱི་དངོས་གཞིའི་འོས་བསྡུའི་གྲུབ་འབྲས་གསལ་བསྒྲགས་གནང་རྒྱུ་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།