༸དཔལ་ས་སྐྱ་གོང་མ་ཁྲི་ཆེན་རྡོ་རྗེ་འཆང་མཆོག་གིས། འཛམ་གླིང་ས་ཕྱོགས་གང་སར་བཞུགས་པའི་སེར་སྐྱ་ཡོངས་ལ་ཞུ་རྒྱུ། བོད་རྒྱལ་ལོ་རབ་གནས་མེ་རྟ་ལོའི་གནམ་ལོ་གསར་པ་ཚེས་ལ་ཉེ་དུས། ཚང་མ་ལ་ལོ་གསར་ལ་འཚམས་འདྲི་བཀྲ་ཤིས་བདེ་ལེགས་ཞུ་ཡི་ཡོད། ལོ་གསར་པ་འདིའི་ནང་ཚང་མའི་སྐུ་ཚེ་རིང་ཞིང་སྐུ་གཟུགས་བདེ་ཐང་། ཁྱིམ་ཚང་འཆམ་མཐུན། འགྲོ་ཀུན་ཞི་བདེའི་དཔལ་ལ་ལོངས་སུ་སྤྱོད་ཐུབ་པའི་སྨོན་ལམ་ཞུ་ཡི་ཡོད། ང་ཚོ་ནང་པ་སངས་རྒྱས་པའི་ལུགས་ལ་དེ་ཚོ་ཚང་མ་རང་རང་གི་ལས་ལས་བྱུང་བ་མ་གཏོགས། འཇིག་རྟེན་བཀོད་པ་པོ་ལ་སོགས་པས་བཀོད་པ་བཤད་ཀྱི་མེད་སྟབས། ཡག་པོ་ཡོང་བར་ང་ཚོ་ཚང་མས་ལས་བཟང་པོ་གསོག་དགོས། སྒོ་གསུམ་དགེ་བའི་ལས་ལ་ཞུགས་པ་ཡིན་ན། རང་བཞིན་གྱིས་དེའི་འབྲས་བུ་བཟང་པོ་ཡོང་གི་ཡོད་པ་སྨྲོས་མ་དགོས་པ་རེད། དེར་བརྟེན། ལོ་གསར་པ་འདིའི་ནང་ཚང་མས་མི་དགེ་བའི་ལས་མཐའ་དག་སྤངས་ནས་དགེ་པའི་ལས་གང་ཐུབ་ཐུབ་ཀྱིས་བསྒྲུབ་ཐུབ་བྱུང་ན། བདེ་སྐྱིད་ཀྱི་རྩ་བ་དེ་ནས་ཚུགས་ཐུབ་པ་ཞིག་ཡོང་གི་ཡོད། ཚང་མས་དེ་བཞིན་ཐུགས་ལ་བཞག་རོགས་གནང་ཞུ་རྒྱུ་ཡིན།
ད་ལོའི་ལོ་འདིར་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་དགུང་གྲངས་ ༩༠ ཕེབས་པའི་བྱམས་བརྩེའི་ལོར་སྲུང་བརྩི་ཞུ་བཞིན་ཡོད་དུས། ང་ཚོས་དུས་ཆེན་བྱས་པ་ཙམ་མ་ཡིན་པར་ཉིན་ཞག་རེ་རེའི་ནང་སོ་སོའི་ཁྱིམ་ཚང་དང་ཁྱིམ་མཚེས། རྒྱ་ཆེ་ས་ནས་བཤད་ན་ལུང་པ་ཡོངས་རྫོགས་ལ་བྱམས་བརྩེའི་བློ་ཡང་ནས་ཡང་དུ་སྐྱེ་དགོས་པ་གལ་ཆེན་པོ་རེད། བདེ་སྐྱིད་ཀྱི་རྩ་བ་དེ་བྱམས་བརྩེ་ནས་ཡོང་གི་ཡོད། དེ་བས། སྲོག་ཆགས་གྲོ་འབུ་ཚུན་ཆད་ནས་མིའི་བར་ཚང་མར་བྱམས་པ་དང་བརྩེ་བ་བྱས་པ་ཡིན་ན། ༸གོང་ས་སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བརྟན་པ་དང་ཐུགས་ཀྱི་བཞེད་དོན་འགྲུབ་པར་ཞབས་རིམ་ཡང་དེ་ལས་ལྷག་མེད་པ་རེད། དེ་བརྟེན། ཚང་མས་དེ་དོན་གནང་ཐུབ་པ་གནང་རོགས་ཞུ་རྒྱུ་ཡིན་ལ། ང་རང་གི་ངོས་ནས་ཚང་མའི་རྐྱེན་ངན་བར་ཆད་ཐམས་ཆད་ཞི་བ་དང་མཐུན་རྐྱེན་ལེགས་ཚོགས་གོང་འཕེལ། བསམ་པའི་དོན་ཐམས་ཆད་ཆོས་དང་མཐུན་པར་ཡིད་བཞིན་དུ་འགྲུབ་ཐུབ་པའི་སྨོན་འདུན་ཞུ་རྒྱུ་ཡིན། ཞེས་གསུངས།
དགའ་ལྡན་ཁྲི་ཐོག་ ༡༠༥ བ་ ༸རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་གིས། ༄༅། །ལྷར་བཅས་སྲིད་ཞིའི་གཙུག་རྒྱན། འཛམ་གླིང་ཞི་བདེའི་དེད་དཔོན། བོད་མིའི་བླ་ན་མེད་པའི་དབུ་ཁྲིད། སྤྱི་ནོར་༸གོང་ས་༧སྐྱབས་མགོན་༸རྒྱལ་དབང་ཡིད་བཞིན་ནོར་བུ་མཆོག་གིས་གཙོས་བོད་གངས་ཅན་གྱི་ཆོས་བརྒྱུད་རིས་སུ་མ་མཆིས་པའི་སྐྱེས་ཆེན་དམ་པ་རྣམས་དང་། བོད་གཞིས་བྱེས་གཉིས་སུ་གནས་པའི་བོད་རིགས་ སྤུན་ཟླ་རྣམས་དང༌། ཧི་མ་ལ་ཡའི་མི་རིགས། ཕྱི་རྒྱལ་ཡུལ་ལུང་གང་སར་གནས་པའི་བོད་མི་དང་འབྲེལ་ཡོད་ཡོངས་ལ་བོད་རྒྱལ་ལོ་ ༢༡༥༢ རབ་གནས་མེ་ཕོ་རྟའི་ལོའི་གནམ་ལོ་གསར་དུ་བཞད་པའི་དགའ་སྟོན་ལ་འཚམས་འདྲི་བཀྲས་ཤིས་བདེ་ལེགས་ཞུ།
ལོ་གསར་པ་འདིའི་ནང་འཛམ་གླིང་ཡོངས་ལ་དམག་འཁྲུགས་དང༌། ནད་མུག་འཁྲུགས་རྩོད། འབྱུང་བཞིས་གནོད་སྐྱོན་སོགས་སྙིགས་ལྔའི་རྒུད་ཚོགས་མཐའ་དག་ཞི་ཞིང་། འགྲོ་རྣམས་ཆོས་འབྱོར་བདེ་སྐྱིད་ཀྱིས་འཚོ་བ་སོགས་བསྟན་འགྲོའི་བདེ་ཐབས་སྤྱི་དང༌། ལྷག་པར་༸རྒྱལ་བའི་སྐུ་ཕྱྭ་དང་བོད་བསྟན་སྲིད་བདེ་ཐབས་སོགས་ཀྱི་ཆེད། སྤྱི་མཐུན་བསོད་ནམས་གོང་མཐོར་གཏང་རྒྱུར། རང་ཅག་བོད་མི་ནང་ཁུལ་མཐུན་ལམ་རྡོག་རྩ་གཅིག་སྒྲིལ་ཐོག་༸རྒྱལ་བ་ཡིད་བཞིན་ནོར་བུའི་བཀའ་དགོངས་ཚུལ་བཞིན་བསྒྲུབ་རྒྱུ་ལས་ལྷག་པ་ཞིག་མེད་པར་སོང་། ཚང་མས་བསྟན་སྲིད་སྤྱི་ལ་དགོངས་བཞེས་ཀྱིས། ༸རྒྱལ་བའི་ཐུགས་དགོངས་འཁྲུགས་གཞི་མི་འགྲོ་བ་དང་། སྤྱི་ཚོགས་བརྟན་བརླིང་ཡོངས་ཐབས། དགེ་སྦྱོར་ལ་འབད་བརྩོན་གང་ཐུབ་གནང་རོགས་གནང་ཞེས་གསོལ་འདེབས་དང་བཅས། སྨོན་འདུན་ཞུ་རྒྱུར། སྲིད་ཞིའི་གདུང་སེལ་ཡོངས་རྫོགས་ཐུབ་པའི་བསྟན། །འཛམ་གླིང་ཡངས་པའི་ཕན་བདེའི་དཔལ་དུ་རྒྱས། །དེ་འཛིན་མཁས་དང་གྲུབ་པའི་སྐྱེས་བུ་རྣམས། །ཆོས་སྤྱོད་རྣམ་བཅུའི་བྱ་བ་འཕེལ་བར་མཛོད། ། ཅེས་གསུངས།
སྨན་རིའི་ཁྲི་འཛིན་༸སྐྱབས་རྗེ་ལུང་རྟོགས་ཟླ་བ་དར་རྒྱས་མཆོག་གིས། བོད་མེ་ཕོ་རྟ་ལོའི་གནམ་ལོ་གསར་ཚེས་ལ་ངོས་ནས་གཞིས་བྱེས་བོད་མི་སྤྱི་དང་ཧི་མ་ལ་ཡའི་གཙོས་བོད་རིགས་ཡོངས་ལ་ཁམས་བདེའི་འཚམས་འདྲི་ཞུ། ལོ་གསར་པ་འདིའི་ནང་ལ་ལྷན་རྒྱས་ཡོངས་ནད་མེད་ཚེ་རིང་དང་བསམ་པ་བོན་བཞིན་འགྲུབ་པའི་སྨོན་ལམ་ཞུ་རྒྱུར་མ་ཟད་འཛམ་བུ་གླིང་འདིར་ནད་མུག་མཚོན་གསུམ་གྱི་རྐྱེན་ངན་མཐའ་དག་ཞི་ནས། སྐྱེ་འགྲོ་ཀུན་བདེ་སྐྱིད་དཔལ་ལ་རོལ་བའི་སྨོན་འདུན་གྲངས་མེད་ཞུ། ཞེས་གསུངས།
དཔལ་ཇོ་ནང་རྒྱལ་ཚབ་ངག་དབང་ཆོས་ཀྱི་སྣང་བ་མཆོག་གིས། དེ་རིང་བོད་རྒྱལ་ལོ་ ༢༡༥༣ རབ་གནས་མེ་རྟ་ལོའི་དགའ་སྟོན་རྟེན་འབྲེལ་གྱི་བཀྲ་ཤིས་པའི་ཉིན་མོར་བོད་གཞིས་བྱེས་གཉིས་སུ་བཞུགས་པའི་བོད་མི་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ། ལོ་གསར་པ་འདིའི་ནང་བོད་གངས་ཅན་ལྗོངས་གཞིས་བྱེས་གཉིས་ཀྱི་སྐྱེ་འགྲོ་ཡོངས་ཚེ་རིང་ནད་མེད་དང་བདེ་སྐྱིད་ཕུན་སུམ་ཚོགས་པ་ཡོང་བ་དང་བྱ་བ་ཐམས་ཅད་གེགས་མེད་ལྷུན་འགྲུབ་ཡོང་བ་སོགས་ཀྱི་སྨོན་འདུན་ཞུ་རྒྱུ་ཡིན། ལོ་གསར་པ་འདིའི་ནང་། ང་ཚོ་རང་གཞན་ཚང་མས་བྱ་བ་ཐམས་ཅད་ཀྱི་གཙོ་བོ་བོད་གངས་ཅན་ལྗོངས་ལ་ཡིད་བཞིན་གྱི་ནོར་བུ་གཉིས་ཡོད་པ་ལས། དང་པོ་འཛམ་གླིང་ཞི་བདེ་དེད་དཔོན་དང་འཛམ་གླིང་ན་མེད་པའི་ཞི་བདེའི་སྟོན་པ་ཆེན་པོ་༸གོང་ས་ལྷ་མིའི་རྣམ་འདྲེན་མཆོག་གིས་གཞིས་བྱེས་བོད་མི་ཡོངས་ལ་བསྩལ་བའི་བཀའ་དགོངས་ཁག་ཡིད་ལ་བཟུང་སྟེ། ཉིན་རེའི་འཚོ་བའི་ཁྲོད་ཉམས་ལེན་གང་ཐུབ་བྱ་རྒྱུ་དེ་ཧ་ཅང་གི་གལ་ཆེན་པོ་རེད། ནོར་བུ་གཉིས་པ་དེ་ཆོས་དང་རིག་གཞུང་། སྐད་ཡིག་སོགས་འཛམ་གླིང་གི་རིག་གཞུང་ནང་ནས་ནོར་བུ་མཆོག་ཏུ་གྱུར་བ་ཆགས་བསྡད་ཡོད་སྟབས། བོད་གངས་ཅན་ཀྱི་སྐད་ཡིག་སོགས་འཛིན་སྐྱོང་སྤེལ་གསུམ་བྱ་རྒྱུ་དང་ལྷག་པར་དུ་ཚེ་འདི་དང་ཕྱི་མར་འགྲོ་བར་བྱེད་པའི་གཙོ་བོ་དེ་བསྟན་པ་རིན་པོ་ཆེ་ཆགས་བསྡད་ཡོད། དེ་དག་ཐོས་བསམ་སྒོམ་གསུམ་གྱི་ཐོག་ནས་ཉིན་རེ་བཞིན་ཉམས་ལེན་བྱ་རྒྱུ་ཧ་ཅང་གལ་ཆེན་པོ་རེད། ལོ་འདིའི་ནང་ལ་ང་ཚོ་ཚང་མའི་ཆོས་དང་སྲིད་སོགས་ཀྱི་བྱ་བ་གང་ཞིག་ཡིན་ཡང་ཡག་པོ་ཡོང་བ་དང་མཐར་སྐྱེ་བུ་དམ་པོ་རྣམས་ཀྱི་སྐུ་ཚེ་བརྟན་ཞིང་མཛད་འཕྲིན་ཡུན་ནས་ཡུན་དུ་རྒྱས་པའི་སྨོན་འདུན་ཞུ་རྒྱུ་ཡིན། ཞེས་གསུངས།
སྐྱབས་རྗེ་མཁན་སྤྲུལ་གྱང་ཁང་རིན་པོ་ཆེ་མཆོག་གིས། གཞིས་བྱེས་བོད་མི་ཡོངས་དང་ཆོས་དང་རིག་གཞུང་གཅིག་པའི་ཧི་མ་ལ་ཡའི་རི་རྒྱུད་པ་ཡོངས་ལ་བོད་རྒྱལ་ལོ་ ༢༡༥༣ རབ་གནས་མེ་རྟ་ལོའི་གནམ་ལོ་གསར་དུ་བཞད་པའི་དགའ་སྟོན་ལ་ཁྱེད་རྣམ་པ་ཐམས་ཅད་ལ་སྙིང་ནས་བརྩེ་བའི་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། ལོ་གསར་པ་འདིའི་ནང་ཁྱེད་རྣམ་པ་ཐམས་ཅད་ཀྱི་ཚེ་བསོད་དབང་ཐང་འཕེལ། ཕྱིའི་ལུས་ལ་ནད་ཚ་མ་ཡོང་བ་དང་ནང་སེམས་ལ་སྡུག་བསྔལ་མེད་པ། བྱ་བ་མཐའ་དག་བསམ་དོན་ཡིད་བཞིན་དུ་འགྲུབ་པའི་སྨོན་འདུན་ཞུ་ཡི་ཡོད། ད་ལྟ་དུས་སྙིགས་མ་ལྔ་འདུས་པའི་དུས་ཡིན་དུས། གུ་རུ་རིན་པོ་ཆེའི་ཞལ་ནས། སྙིགས་མའི་སེམས་ཅན་ཐམས་ཅད་ང་ཡིས་སྐྱོབས།། དུས་གསུམ་རིན་ཆེན་མེད་པར་ང་ཡིས་གཟིགས།། ཞེས་དང་། དུས་ངན་སྙིགས་མའི་མཐའ་ལ་ཐུག་པའི་ཚེ།། ནངས་རེ་དགོང་རེ་བོད་ཀྱི་དོན་ལ་འབྱོན།། ཞེས་གསུངས་པ་ལྟར། ཁྱེད་རྣམ་པ་ཐམས་ཅད་ཀྱིས་སེམས་པ་བཟང་པོ་དང་དད་པ་མོས་གུས་གཙང་མའི་ཐོག་ནས་གུ་རུ་རིན་པོ་ཆེ་ལ་གསོལ་བ་རྩེ་གཅིག་ཏུ་བཏབ་བཞག་ན། བསམ་པའི་དོན་ཐམས་ཅད་འགྲུབ་པ་དང་རྐྱེན་ངན་བར་ཆད་ཐམས་ཅད་སེལ་ཐུབ་པ། དེ་ལས་ལྷག་པ་མེད་སྟབས། ཁྱེད་རྣམ་པ་ཐམས་ཅད་ཀྱིས་གུ་རུ་རིན་པོ་ཆེ་ལ་སྨོན་ལམ་དང་གསོལ་འདེབས་ཡག་པོ་འདེབས་རོགས་གནང་། མཐའ་དོན་དུ་༸གོང་ས་ལྷ་མེད་རྣམ་འདྲེན་སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་གཙོས་རིས་མེད་བསྟན་པའི་སྒྲོན་མེ་གང་ན་སུ་བཞུགས་པ་ཐམས་ཅད་སྐུ་ཚེ་སྐལ་བརྒྱར་བརྟན་ཅིང་མཛད་འཕྲིན་ཕྱོགས་མཐར་ཁྱབ་པ་དང་། དེའི་ཁྲོད་འཛམ་གླིང་ཡུལ་གྲུ་ཀུན་ཏུ་འབྱུང་གཞིའི་གནོད་པ་དང་ནད་ཡམས། མུ་གེ དམག་འཁྲུག་སོགས་རྒྱུན་ཆད་དེ་སྐྱེས་འགྲོ་ཐམས་ཅད་ཞི་བདེའི་ངང་གནས་ཐུབ་པའི་སྨོན་ལམ་གྲངས་མེད་ཞུ་བཞིན་ཡོད། ལོ་གསར་པ་ལ་འཚམས་འདྲི་བཀྲ་ཤིས་བདེ་ལེགས། ཞེས་གསུངས།
༸དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གིས། བོད་མེ་རྟ་ལོའི་གནམ་ལོ་གསར་དུ་བཞད་པའི་དུས་བཟང་ལ་བོད་གཞིས་བྱེས་གཉིས་སུ་ཡོད་པའི་བོད་རིགས་སྤུན་ཟླ་ཡོངས་དང་ཧི་མ་ལ་ཡའི་རི་རྒྱུད་ཀྱི་ཆོས་དང་རིག་གཞུང་རིག་གཅིག་པའི་སྤུན་ཟླ་ཡོངས་ལ་ལོ་གསར་བའི་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། ལོ་གསར་བའི་ནང་རྣམ་པ་ལྷན་རྒྱས་ཚང་མ་སྐུ་གཟུགས་གསལ་ཐང་ཡོང་བ་དང་བསམ་དོན་ཡིད་བཞིན་དུ་འགྲུབ་པ། ཕྱི་ནང་གི་རྐྱེན་བར་ཆད་ཐམས་ཅད་ཉེ་བར་ཞི་བའི་སྨོན་འདུན་ཞུ་རྒྱུ་ཡིན། ལྷག་པར་དུ་ལོ་གསར་བའི་ནང་རང་ཅག་བོད་འབངས་ཡོངས་ཀྱི་མགོན་སྐྱབས་༸གོང་ས་མཆོག་སྐུ་ཚེ་ཞབས་པད་བརྟན་པ་དང་གང་གི་ཐུགས་ཀྱི་བཞེད་དོན་ཐམས་ཆད་གེགས་མེད་མྱུར་དུ་འགྲུབ་པ། ལྷག་པར་དུ་རང་ཡུལ་གངས་ཅན་ལྗོངས་ལ་ཞབས་ཀྱི་པད་མོ་མྱུར་དུ་བསྐྱོན་ནས་ཟབ་རྒྱས་ཆོས་ཀྱི་འཁོར་ལོ་མྱུར་དུ་བསྐོར་ཐུབ་པའི་སྨོན་འདུན་ཞུ་རྒྱུ་ཡིན། བོད་གངས་ཅན་ལྗོངས་ཀྱི་གྲུབ་མཐའ་རིས་མེད་ཀྱི་བསྟན་འཛིན་གྱི་སྐྱེས་བུ་དམ་པ་ཐམས་ཆད་ཀྱང་སྐུ་ཚེ་ཞབས་པད་བརྟན་པ་དང་ཐུགས་ཀྱི་བཞེད་དོན་ལྷུན་གྱིས་འགྲུབ་པ། གཞིས་བྱེས་མཉམ་འཛོམས་ཀྱི་ཉི་མ་མྱུར་དུ་ཤར་བའི་སྨོན་འདུན་གྲངས་མེད་ཞུ་རྒྱུ་ཡིན། ཞེས་གསུངས།
གསར་འགོད་པ། སྐལ་བཟང་སྦྱིན་པ།
