ཨོ་གླིང་གྲོས་ཚོགས་ནང་བོད་རྒྱའི་དཀའ་རྙོག་སེལ་སླད་རྒྱ་ནག་གཞུང་གིས་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་དང་ཞི་བའི་གྲོས་མོལ་ཞུ་དགོས་པའི་འབོད་སྐུལ་གནང་འདུག
ཟླ་འདིའི་ཕྱི་ཚེས་ ༡༠ ཉིན་བོད་མིའི་རང་དབང་སྒེར་ལངས་ཐེངས་ ༦༧ པ་དང་བསྟུན། ཨོ་གླིང་གྲོས་ཚོགས་གོང་མའི་ནང་རྒྱལ་སྤྱིའི་གྲོས་ཚོགས་འཐུས་མི་མཉམ་འབྲེལ་ཚོགས་པའི་(Inter-Parliamentary Alliance on China) ཚོགས་གཙོ་གཞོན་པ་ལྕམ་ཌེ་བྷོ་རཱ་ཨོ་ནིལ་ (Deborah O’Neill) ལགས་ཀྱིས།ཆབ་སྲིད་ཚོགས་པ་ཁག་གི་གྲོས་ཚོགས་འཐུས་མི་རྣམས་མཉམ་འབྲེལ་ཐོག་བོད་ནང་གི་འགྲོ་བ་མིའི་གནས་སྟངས་དང་། བོད་ཀྱི་ཆོས་དང་རིག་གཞུང་། ངོ་བོ་བཅས་སྲུང་སྐྱོབ་བྱེད་པར་རྒྱལ་སྤྱིའི་ཐོག་ཐུགས་འཚབ་གསལ་སྟོན་ གནང་བའི་གྲོས་འཆར་དོན་ཚན་བཞི་ཅན་ཞིག་བཏོན་ཡོད་འདུག
གྲོས་ཆོད་དེའི་ནང་༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ཚེ་གང་བོར་འགྲོ་བ་མི་གཅིག་མཚུངས་དང་། འཚེ་མེད་ཞི་བ། འགྲོ་བ་མིའི་ཐོབ་ཐང་། ཆོས་ལུགས་མཐུན་སྒྲིལ། ཁོར་ཡུག་སྲུང་སྐྱོབ་དང་དམངས་གཙོ་གོང་འཕེལ་བཅས་ཀྱི་སླད་བླ་ན་མེད་པའི་མཛད་རྗེས་བསྐྱངས་གནང་མཛད་པར་ཆེ་བསྟོད་ཞུས་ཡོད་ཅིང་། འཛམ་གླིང་སྲིད་གཞུང་ཁག་གིས་ཆོས་ལུགས་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་དང་། ལྷག་པར་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ངོས་འཛིན་ཐོག་ཐེ་བྱུས་བྱེད་པའི་དབང་ཆ་མེད་པ་བསྐྱར་ནན་གནང་། རྒྱ་ནག་གཞུང་གིས་བོད་ནང་དྲག་གནོན་གྱི་སྲིད་བྱུས་ལག་བསྟར་བརྒྱུད་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། ངོ་བོ་དང་བཅས་རྩ་མེད་གཏོང་བཞིན་ཡོད་པ་མ་ཟད། བོད་བརྒྱུད་ནང་བསྟན་གྱི་སྲོལ་རྒྱུན་རིག་གཞུང་ལའང་ཐེ་བྱུས་བྱེད་བཞིན་པའི་ཐོག་ཐུགས་འཚབ་བསྟན་ཡོད། དེ་བཞིན་རྒྱ་ནག་གཞུང་གིས་བོད་ནང་གི་བོད་མི་ཚོའི་གཞི་རྩའི་འགྲོ་བ་མིའི་ཐོབ་ཐང་ལ་བརྩི་འཇོག་བྱེད་དགོས་པ་དང་། བོད་རྒྱའི་དཀའ་རྙོག་སེལ་ཐབས་སླད་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་དང་ལྷན་དུ་ཞི་བའི་གྲོས་མོལ་གནང་དགོས་པའི་འབོད་སྐུལ་ཞུས་ཡོད་འདུག
ཐེངས་འདིའི་གྲོས་འཆར་ནི་འདས་ལོར་སྦེལ་ཇེམ་གྱི་རྒྱལ་ས་སྦར་སིལ་དུ་འཚོགས་པའི་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ལྷན་ཚོགས་ཐོག་གྲོས་ཚོགས་འཐུས་མི་ཕན་ཚུན་མཉམ་ལས་ཀྱིས་བོད་དོན་དང་འབྲེལ་བའི་ལས་འགུལ་སྤེལ་རྒྱུར་སྤྱི་མོས་བྱུང་བ་ལྟར། ད་ལན་ཨོ་གླིང་གྲོས་ཚོགས་གོང་མའི་ནང་གྲོས་འཆར་འདོན་སྤེལ་གནང་བ་ཞིག་ཡིན་འདུག་ལ། དེ་ནི་རྒྱལ་སྤྱིའི་གྲོས་ཚོགས་འཐུས་མི་མཉམ་འབྲེལ་ཚོགས་པའི་ཁྲོད་ནས་བོད་དོན་ཐོག་གྲོས་ཚོགས་ནང་གྲོས་འཆར་འདོན་མཁན་གྱི་རྒྱལ་ཁབ་ཐོག་མ་དེ་ཆགས་ཡོད་པ་མ་ཟད། ཨོ་གླིང་གྲོས་ཚོགས་ཀྱི་སྲིད་དོན་ཚོགས་པ་ཁག་གི་གྲོས་ཚོགས་འཐུས་མི་རྣམས་ཀྱིས་རྒྱབ་སྐྱོར་ཤུགས་ཆེན་གནང་ཡོད་འདུག
དེ་བཞིན་གསུམ་བཅུའི་དུས་དྲན་ཉིན་ཨོ་གླིང་གྲོས་ཚོགས་འོག་མའི་གྲོས་ཚོགས་ཐོག་གྲོས་ཚོགས་འཐུས་མི་ཌི་ཝི་ཌི་སི་མི་ཐི་ (Divid Smith) ལགས་ཀྱིས་བོད་དོན་ཐོག་གཏམ་བཤད་གནང་ཡོད་པའི་ནང་། དེ་རིང་ནི་བོད་མིའི་རང་དབང་སྒེར་ལངས་ཐེངས་ ༦༧ འཁོར་བའི་དུས་དྲན་ཡིན། ཕྱི་ལོ་ ༡༩༥༩ ལོར་རང་དབང་ཆེད་སྒེར་ལངས་བྱེད་མཁན་རྣམས་དང་ད་ལྟ་གཞི་རྩའི་འགྲོ་བ་མིའི་ཐོབ་ཐང་ཆེད་འཐབ་རྩོད་བྱེད་མཁན་རྣམས་ལ་དྲན་གསོ་ཞུ། ༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པ་དང་བསྟུན། ང་ཚོས་འཛམ་གླིང་ཡོངས་སུ་བྱམས་བརྩེའི་ལོ་ཞིག་ལ་སྲུང་གཙི་ཞུ་བཞིན་ཡོད། ཁོང་གིས་མི་ཚེ་གང་བོར་འགྲོ་བ་མིའི་ཐོབ་ཐང་དང་། ཆོས་ལུགས་མཐུན་སྒྲིལ། དམངས་གཙོ། མི་ཚང་མའི་ཆེ་མཐོང་བཅས་ལ་བཅངས་པའི་ལྷག་བསམ་ལ་ཆེ་མཐོང་ཞུ་བཞིན་ཡོད། བོད་མི་རྣམས་ཀྱིས་རིག་གཞུང་དང་ཆོས་ལུགས་ཀྱི་ངོ་བོར་དྲག་གནོན་བྱེད་བཞིན་པའི་སྲིད་ཇུས་ལ་གདོང་ལེན་བྱེད་བཞིན་ཡོད། རྒྱ་ནག་གཞུང་གི་ཐེ་བྱུས་མེད་པའི་ཐོག་ནས་༧གོང་ས་མཆོག་གི་༧སྐུའི་ཡང་སྲིད་དེ་བོད་མིའི་རིག་གཞུང་གི་ཉམས་ལེན་བརྒྱུད་ནས་ཐག་གཅོད་བྱ་རྒྱུ་གལ་ཆེན་པོ་ཆགས་ཡོད། རྒྱ་གཞུང་གིས་བོད་མིའི་གཞི་རྩའི་འགྲོ་བ་མིའི་ཐོབ་ཐང་དང་ཆེ་མཐོང་ངོས་འཛིན་བྱེད་དགོས་པ་མ་ཟད། ༧གོང་ས་མཆོག་དང་ལྷན་དུ་དྲང་བདེན་གྱི་ཐོག་ནས་གྲོས་མོལ་ཞུ་དགོས། ཅེས་བརྗོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
