ཚོགས་སྡེ་གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས། 

བརྟན་བཞུགས་བསྟར་འབུལ་ཞུ་མཁན་གྱིས་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན་ཤར་སྐྱོད་བྱ་རྒྱུ་དེ་གལ་ཆེན་པོ་ཡིན་པ་ལས་དམ་ཚིག་གཙང་མ་མེད་ན་བརྟན་བཞུགས་ཕུལ་མ་ཕུལ་མེད་སྐོར་སོགས་བརྗོད་བྱུང་།

དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། མདོ་སྟོད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་དང་བལ་ཡུལ་སྤོག་ར་གློ་སྒྲིག་བདེ་དོན་ཚོགས་པ་གཉིས་ཀྱིས། སྒྲོལ་དཀར་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུས་སོང་ལ། བརྟན་བཞུགས་བསྟར་འབུལ་ཞུ་ཆེད་བལ་ཡུལ་གློ་སྒྲིག་བདེ་དོན་ཚོགས་པའི་ཚོགས་མི་ ༢༧༠ ལྷག་བཞུགས་སྒར་དྷ་རམ་ས་ལར་བཅར་འདུག

བརྟན་བཞུགས་གྲུབ་རྗེས་མདོ་སྟོད་ཆོལ་ཁའི་དབུས་རྒྱུན་གྱི་ཚོགས་གཙོ་བསྟན་འཛིན་ལགས་ཀྱིས་གསར་འགོད་པར།  ང་ཚོས་ད་ལན་༧གོང་ས་རྒྱལ་བ་རིན་པོ་ཆེ་མཆོག་ལ་གཟའ་ལྷག་པའི་ཉིན་བརྟན་བཞུགས་ཕུལ་རྒྱུ་བྱུང་བ་ཡག་པོ་ཞེ་དྲགས་བྱུང་སོང་། ད་ལན་གྱི་བརྟན་བཞུགས་ཆེད་མི་གྲངས་ ༡༨༠ ཆེད་བཅར་ཞུས་ཡོད་ལ། ད་ལན་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༡༣༥ བར་བཞུགས་རྒྱུ་དང་། གང་མགྱོགས་བོད་ལ་ཞབས་སོར་བདེ་བར་འཁོད་ཆེད་སྨོན་ལམ་བཏབ་ནས་བརྟན་བཞུགས་བསྟར་འབུལ་ཞུས་ཡིན། ཞེས་དང་། ཁ་སང་མདོ་སྟོད་ཆོལ་ཁའི་བརྟན་བཞུགས་ནང་མཉམ་ཞུགས་གནང་མཁན་རྣམས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ཏེ། མགོན་པོ་གང་ཉིད་དགུང་གྲངས་ ༡༣༥ ལྷག་བཞུགས་པ་དང་བོད་ལ་མྱུར་དུ་ཕེབས་རྒྱུའི་སྐྱབས་འཇུག་ཞུས་པ་ཡིན་ལ། ཐུགས་མཉེས་པོ་ཞེ་དྲགས་གནང་བྱུང་། ཞེས་བརྗོད་བྱུང་། 

ཡང་ཁོང་གིས། དང་ཐོག་བརྟན་བཞུགས་དེ་གང་འདྲ་ཡོང་མིན་དང་། གྲ་སྒྲིག་གང་འདྲ་ཡོང་གི་ཡོད་ན་བསམས་ནས་སེམས་ཁྲལ་ཞེ་དྲགས་བྱུང་ནའང་། བརྟན་བཞུགས་དེ་གྲ་འགྲིག་པོ་དང་ཡག་པོ་ཞེ་དྲགས་ཆགས་སོང་། ༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཞབས་པད་བརྟན་དགོས་ཀྱི་ཡོད་ན། བོད་མི་ཚང་མའི་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན་བྱས་ན་ཡག་པོ་ཞེ་དྲགས་རེད། བརྟན་བཞུགས་ཕུལ་བ་ལས་གལ་ཆེ་བ་དེ་དམ་ཚིག་བསྲུང་རྒྱུ་དེ་གལ་ཆེན་པོ་རེད། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་གཞིར་བཟུང་འགྲོ་ཐུབ་པ་དང་། གང་གསུངས་པ་དེ་བཞིན་ཤར་སྐྱོད་གནང་ཐུབ་རྒྱུ་སོགས། དམ་ཚིག་དགོས་རྒྱུ་དེ་དཔེ་གལ་ཆེན་པོ་རེད། དམ་ཚིག་མེད་པ་ཡིན་ན་བརྟན་བཞུགས་ཕུལ་མ་ཕུལ་ཡོད་མ་རེད། ཅེས་བརྗོད་བྱུང་།

གློ་སྒྲིག་བདེ་དོན་ཚོགས་པའི་ཚོགས་གཙོ་བྱམས་པ་ཚེ་རིང་ལགས་ཀྱིས། ད་ལན་བརྟན་བཞུགས་ཆེད་གློ་སྒྲིག་འཛུགས་ནས་མི་གྲངས་ ༢༧༥ ཡོང་ཡོད་པའི་ཁྲོད།  བལ་ཡུལ་སྤོག་ར་ས་གནས་ནས་ཕེབས་མཁན་ ༡༠༥ ཡོད། ད་ལྟ་བརྟན་བཞུགས་དེ་ཕུལ་ཚར་རྗེས་བློ་བདེ་པོ་ཞེ་དྲགས་བྱུང་། བརྟན་བཞུགས་དེ་ལས་དོན་གལ་ཆེན་པོ་ཞིག་ཡིན་པས་གང་འདྲ་ཆགས་ཡོང་བསམ་པའི་སེམས་ཁྲལ་བྱུང་ལ། ལྷག་པར་ང་ཚོ་ས་ཐག་རིང་པོ་ནས་ཡོང་དགོས་པ་དང་། འདིར་བསླེབས་རྗེས་མི་མང་པོ་ཞིག་ལ་བཞུགས་ས་སོགས་གྲ་སྒྲིག་བྱ་དགོས་པས་སེམས་འཚབ་ཞེ་དྲགས་བྱུང་ནའང་། ཕྱོགས་ཡོངས་ནས་གྲ་སྒྲིག་ཡག་པོ་ཞིག་བྱུང་བ་མ་ཟད། དེ་རིང་བརྟན་བཞུགས་དེའང་ལེགས་འགྲུབ་ཟིན་སོང་། ད་ལན་གློ་སྒྲིག་གིས་རྒན་འཁོགས་རྣམས་ཀྱིས་རེ་བ་དང་སྨོན་འདུན་ཞུས་པ་བཞིན། རྒན་འཁོགས་དཔེ་མང་པོ་ཞིག་འཁྲིད་ཡོང་ཡོད་པས། ཁོང་ཚོའི་རེ་བ་དང་སྨོན་འདུན་དེ་འགྲུབ་ཐུབ་པས་དགའ་པོ་ཞེ་དྲགས་བྱུང་། ཞེས་དང་། སྤྱིར་བརྟན་བཞུགས་ནི་བླ་མ་སྐུ་ཚེ་ཡུན་རིང་བརྟན་ཆེད་གསོལ་འདེབས་ཞུ་ཡི་ཡོད་རེད། དེང་སང་འཛམ་གླིང་ནང་ཞི་བདེ་བསྐྲུན་རྒྱུ་མཚོན་པའི་ཕྱོགས་གང་ཅིའི་ཐད་ནས་༧གོང་ས་རྒྱལ་བ་རིན་པོ་ཆེ་མཆོག་མེད་པ་ཡིན་ན་དཔེ་མི་སྲིད་པའི་དཀའ་ལས་ཁག་པོ་ཞིག་ཆགས་བསྡད་ཡོད་རེད་ལ། ལྷག་པར་བོད་བསྟན་པ་ཆབ་སྲིད་དང་། གཉན་འཕྲང་ཅན་གྱི་དུས་སྐབས་འདི་འདྲ་ཞིག་ལ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚེ་ཡུན་རིང་བརྟན་དགོས་པས། ངའི་ངོས་ནས་བརྟན་བཞུགས་ཕུལ་བ་དེ་རྒྱུ་མཚན་ལྡན་པ་དང་གལ་ཆེན་པོ་ཞིག་ཡིན་པ་ངོས་འཛིན་བྱེད་ཀྱི་ཡོད། ཅེས་བརྗོད་བྱུང་། 

ཁ་སང་ཕྱི་ཚེས་ ༢༣ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་བརྟན་བཞུགས་ལ་བཅར་བའི་གློ་སྒྲིག་གི་ཚོགས་མི་རྣམས་ཀྱིས་མཇལ་བཅར་ཞུ་རྒྱུ་ཡིན་འདུག དེ་བཞིན་དགའ་ལྡན་ཕོ་བྲང་གི་དྲ་རྒྱར་གསལ་བའི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན། ཕྱི་ཟླ་ ༥ ཚེས་ ༢༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་དང་། ཧི་མ་ལ་ཡ་ནང་པའི་རིག་གཞུང་མཐུན་ཚོགས་གཉིས་ཀྱིས་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།