མི་རིགས་མཐུན་སྒྲིལ་ཡར་ཐོན་ཟེར་བར་ངོས་ལེན་མེད་པའི་གྲོས་ཆོད་འདོན་རྒྱུའི་འབོད་སྐུལ་ཞུས།

བྷོལ་ཊིཀ་ (Baltic) རྒྱལ་ཁབ་གསུམ་གྱི་གྲོས་ཚོགས་འཐུས་མི་རྣམས་ཀྱིས་ཡུ་རོབ་མཐུན་ཚོགས་ཀྱི་བོད་དོན་དམིགས་བསལ་འབྲེལ་མཐུད་པ་བསྐོ་གཞག་གནང་རྒྱུར་འབོད་སྐུལ་ཞུས།

Richard Gere speaks at a Tibet conference hosted by Latvian MP Juris Viļums, Chair of the Group for the Support of Tibet.

ཟླ་འདིའི་ཕྱི་ཚེས་ ༡༦ ཉིན་ལ་ཊི་ཝི་ཡའི་རྒྱལ་ས་རི་གྷ་ (Riga) རུ་བོད་དོན་ཚོགས་ཆེན་ཞིག་འཚོགས་ཡོད་ཅིང་། བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ལེ་ཊི་ཝི་ཡའི་གྲོས་ཚོགས་འཐུས་མི་ཇུ་རི་སི་ (Juris Vilums) ལགས་ཀྱིས་ལས་རིམ་གཙོ་སྐྱོང་གནང་བ་མ་ཟད། བོད་དོན་རྒྱབ་སྐྱོར་བ་དང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ། གློག་བརྙན་འཁྲབ་སྟོན་པ་གྲགས་ཅན་རི་ཆར་ཌི་གྷེ་རི་ (Richard Gere) ལགས་ཀྱིས་གཏམ་བཤད་གནང་ཡོད་འདུག སྐབས་དེར་བོད་དོན་ཚོགས་ཆེན་སྟེང་རི་ཆར་ཌི་གྷེ་རི་ལགས་ཀྱིས། ཡུ་རོབ་ཀྱི་དམངས་གཙོའི་རྒྱལ་ཁབ་ཁག་གིས་བོད་མིའི་ཐོབ་ཐང་དང་རང་དབང་གི་ཆེད་དུ་ཐག་གཅོད་རང་བཞིན་གྱི་ལས་འགུལ་སྤེལ་དགོས་པའི་འབོད་སྐུལ་གནང་བ་དང་། བྷོལ་ཊིཀ་མི་རིགས་ཀྱིས་འདས་པའི་ལོ་བཅུ་ཕྲག་མང་པོའི་རིང་དམར་ཤོག་གི་སྲིད་དབང་སྒེར་གཅོད་འོག་མྱངས་པའི་ལོ་རྒྱུས་ཀྱི་ཉམས་མྱོང་དང་། བོད་མི་རྣམས་ཀྱིས་སོ་སོའི་རིག་གཞུང་སྲུང་སྐྱོབ་དང་རང་ཐག་རང་གཅོད་ཀྱི་ཆེད་དུ་འཐབ་རྩོད་མུ་མཐུད་དུ་བྱེད་བཞིན་པའི་བར་གྱི་འདྲ་མཚུངས་ལ་ཤུགས་སྣོན་རྒྱག་དགོས། ཞེས་བརྗོད་འདུག

ཚོགས་ཆེན་ཐོག་ལེ་ཊི་ཝི་ཡ་ (Latvia) དང་ཨེ་སི་ཊོ་ནི་ཡ་ (Estonia)། ལི་ཐུ་ཝེ་ནི་ཡ་ (Lithuania) བཅས་བྷོལ་ཊིཀ་རྒྱལ་ཁབ་གསུམ་གྱི་གྲོས་ཚོགས་འཐུས་མི་རྣམས་ཀྱིས་མཉམ་འབྲེལ་བསྒྲགས་གཏམ་ཞིག་སྤེལ་བའི་ནང་། འདི་ལོའི་ཕྱི་ཟླ་ ༧ ཚེས་ ༡ ཉིན་ནས་བཟུང་རྒྱ་ནག་གཞུང་གིས་བོད་ནང་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དངོས་སུ་ལག་བསྟར་བྱ་རྒྱུ་ཡིན་ལུགས་བསྒྲགས་ཡོད་ཅིང་། ཁྲིམས་ཡིག་དེས་རྒྱ་ནག་གི་སྐད་ཡིག་དང་རིག་གཞུང་གོང་སྤེལ་གཏོང་བར་དམིགས་པ་ལས། བོད་ཀྱི་སྐད་ཡིག་ཚུད་པའི་གྲངས་ཉུང་མི་རིགས་ཀྱི་སྐད་ཡིག་བཀོལ་སྤྱོད་ལ་དམ་དྲག་ཇེ་ཆེར་གཏོང་བ་དང་རྩ་མེད་བཟོ་ཐབས་ཀྱི་སྲིད་ཇུས་ཤིག་ཡིན་པ་མ་ཟད། རྒྱ་ནག་གི་རྩ་ཁྲིམས་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ཡིག་དང་འགལ་གྱི་ཡོད་པར་བརྟེན། ཕྱི་ཟླ་ ༧ ཚེས་ ༡ གི་གོང་ལ་ཡུ་རོབ་གྲོས་ཚོགས་འཐུས་མི་རྣམས་ཀྱིས་སོ་སོའི་རྒྱལ་ཁབ་ཀྱི་གྲོས་ཚོགས་ནང་རྒྱ་ནག་གི་ཁྲིམས་དེ་ལ་སྐྱོན་བརྗོད་བྱེད་པའི་གྲོས་ཆོད་འདོན་རྒྱུའི་འབོད་སྐུལ་ཞུས་ཡོད་པ་མ་ཟད། ཡུ་རོབ་མཐུན་ཚོགས་ཀྱི་བོད་དོན་སྲིད་ཇུས་ཐད་མཉམ་འབྲེལ་གྱི་ནུས་པ་ཤུགས་ཆེ་རུ་གཏོང་དགོས་པ། ཡུ་རོབ་མཐུན་ཚོགས་ཀྱི་བོད་དོན་དམིགས་བསལ་འབྲེལ་མཐུད་པ་གསར་བསྐོ་གནང་རྒྱུའི་ཐད་ཤུགས་སྣོན་རྒྱག་དགོས་པའི་འབོད་སྐུལ་ཡང་ཞུས་ཡོད་འདུག ད་དུང་ཚོགས་ཆེན་དེའི་ཐོག་རྒྱལ་སྤྱིའི་ཚོགས་སྡེ་ཁག་གིས་བོད་མིའི་རང་དབང་ལ་རྒྱབ་སྐྱོར་དང་། བོད་ནང་གི་བོད་མིའི་རང་དབང་གི་གནད་དོན་ལ་དོ་སྣང་སྔར་ལྷག་གནང་དགོས་པ་མ་ཟད། རྒྱ་ནག་གིས་བོད་ཐོག་འཛིན་པའི་སྲིད་ཇུས་ཁག་གི་ཐད་གནོན་ཤུགས་ཆེ་རུ་གཏོང་དགོས་པའི་འབོད་སྐུལ་ཞུས་འདུག

མཉམ་འབྲེལ་གྱི་བསྒྲགས་གཏམ་དེ་ལ་ཐོག་མར་བྷོལ་ཊིཀ་རྒྱལ་ཁབ་གསུམ་གྱི་གྲོས་ཚོགས་འཐུས་མི་ ༡༨ ཀྱིས་རྒྱབ་སྐྱོར་ཡོད་པའི་མཚན་རྟགས་བསྐྱོན་ཡོད་ཅིང་། དེའི་ནང་ལེ་ཊི་ཝི་ཡ་ནས་གྲོས་ཚོགས་འཐུས་མི་ ༩ དང་། ལི་ཐུ་ཝེ་ནི་ཡ་ནས་གྲོས་ཚོགས་འཐུས་མི་ ༧། དེ་བཞིན་ཨེ་སི་ཊོ་ནི་ཡ་ནས་གྲོས་ཚོགས་འཐུས་མི་ ༢ བཅས་ཡོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།