༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་དབྱར་ཆོས་ཆེན་མོ་ཐེངས་བཅུ་གཉིས་པའི་ཚོགས་མགོན་དུ་ཆིབས་བསྒྱུར་བསྐྱངས།

༧གོང་ས་རྒྱལ་བ་རིན་པོ་མཆོག་ནས་ལ་དྭགས་དབྱར་ཆོས་ཆེན་མོ་ཐེངས་བཅུ་གཉིས་པའི་ཚོགས་མགོན་དུ་སངས་རྒྱས་ཀྱི་བསྟན་པ་བོད་དུ་བསྒྱུར་ཅིང་རིགས་ལམ་གྱི་སྒོ་ནས་སློབ་གཉེར་བྱས་པ་ནི་དུས་རབས་ཉེར་གཅིག་པར་ཡང་ཕན་ཐོགས་ཆེན་པོ་ཡོད་པར་གསུངས་སོང་།

ཁ་སང་ཕྱི་ཚེས་ ༢༣  ༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་མང་སྤྲོ་དགོན་པར་གོ་སྒྲིག་ཞུས་པའི་ལ་དྭགས་དབྱར་ཆོས་ཆེན་མོ་ཐེངས་བཅུ་གཉིས་པའི་ཚོགས་མགོན་དུ་ཆིབས་བསྒྱུར་བསྐྱངས་གནང་མཛད་པ་དང། སྔ་དྲོའི་ཆུ་ཚོད་ ༡༠།༠༠ ཙམ་གྱི་ཐོག་དབྱར་ཆོས་ཆེན་མོ་མགོ་འཛུགས་དང་བསྟུན། ༧གོང་ས་རྒྱལ་བ་རིན་པོ་ཆེ་མཆོག་ནས་སངས་རྒྱས་བཅོམ་ལྡན་འདས་ཀྱིས་ཆོས་འཁོར་རིམ་པ་མང་པོ་བསྐོར་ནས་གསུངས་པའི་ཆོས་ནི་བོད་གངས་ཅན་ལྗོངས་ལ་ལེགས་སྦྱར་སྐད་ནས་བོད་སྐད་དུ་བསྒྱུར་ཅིང་། བོད་པ་ཚོས་བོད་ཡིག་གི་ཐོག་ནས་སློབ་སྦྱོང་བྱས་པ་དང་། སློབ་སྦྱོང་དེ་ཡང་ཚིག་ཙམ་ལ་མ་བཞག་པར་མཐའ་ཆོད་པ་ཞིག་ལ་རྩོད་པ་བརྩད་ནས་སྦྱངས་པ་རེད། དཔེར་ན་ངོས་རང་ལ་མཚོན་ན་ཆུང་ཆུང་སྐབས་ནས་བསྡུས་གྲྭ་དང་། དབུ་མའི་གཞུང་བསླབས་པ་རེད། བོད་ལ་ནཱ་ལེནྡྲའི་གཞུང་ཆེན་རྣམས་རྩ་བ་བློ་ལ་འཛིན་ཞིང་། འཕགས་བོད་ཀྱི་མཁས་པ་ཚོས་མཛད་པའི་གཞུང་འགྲེལ་རྣམས་ལ་བལྟ་བ་རེད། ངོས་རང་ཆུང་ཆུང་སྐབས་ནས་གཞུང་ཆེན་རྣམས་ཀྱི་རྩ་བ་བློ་ལ་བཟུང་བ་དང་། འགྲེལ་བ་ལ་གྲྭ་སའི་ཡིག་ཆར་གཞིར་བཞག་གིས་འཆད་རྩོད་རྩོམ་གསུམ་གྱིས་ཕྱིན་པ་རེད། དེ་ལྟ་བུའི་སློབ་སྦྱོང་ནི་དཔལ་ནཱ་ལེནྡྲ་ནས་བརྒྱུད་པ་རེད། ཕྱིས་སུ་ནཱ་ལེནྡྲ་ནི་མིང་སྐམ་པོ་ཞིག་མ་གཏོགས་ཡོད་པ་མ་རེད། ང་ཚོ་བོད་པས་གཞུང་དེ་རྣམས་ལ་བདག་པོ་བརྒྱབ་པ་རེད། ངོས་རང་ལ་མཚོན་ན་མཚན་ཞབས་བདུན་བརྒྱད་ཅིག་ཡོད་པ་རྣམས་དང་མཉམ་དུ་རྟགས་གསལ་གཏོང་བ་དང་། རྩ་འགྲེལ་སྦྲགས་ནས་འགྲེལ་བཤད་རྒྱག་པ་སོགས་བྱས་པ་ཡིན། སྐབས་ཐོག་དེར་ཁྲལ་སྣང་ལྟ་བུ་ཤར་གྱི་འདུག་ཀྱང་། དོན་གྱི་ཆ་ནས་རིགས་ལམ་གྱི་ཐོག་ནས་གཞུང་དེ་དག་ལ་སློབ་སྦྱོང་བྱས་པ་ནི་ཧ་ཅང་བློ་གྲོས་ཀྱི་མིག་འབྱེད་པ་དང་། ཤེས་རབ་ཀྱི་སྣང་བ་མེ་ལྟར་འབར་བའི་ཐབས་ཤེས་དམིགས་བསལ་ཞིག་རེད། ཅེས་གསུངས།

ཡང་བོད་དུ་གཞུང་ཆེན་ལ་སློབ་སྦྱོང་བྱེད་སྟངས་ཀྱི་ཐད་ནས་༧གོང་ས་མཆོག་གིས།  རྒྱ་ནག་ལ་ནང་པའི་ཆོས་དར་གྱི་ཡོད་ཀྱང་རིགས་ལམ་གྱི་འགྲོ་སྟྔངས་སམ། བཤད་སྦྱངས་བྱ་རྒྱུ་དེ་ཙམ་ཤུགས་ཆེན་པོ་མི་འདུག ང་ཚོ་བོད་ཆོལ་ཁ་གསུམ་དུ་ཚད་མ་རིག་པ་དང་། དབུ་མ། ཕར་ཕྱིན་བཅས་ཆ་ཚང་བ་ཞིག་སློབ་ཀྱི་ཡོད། དེ་ཡང་རྟགས་གསལ་དང་སྦྲགས་ནས་སློབ་སྦྱོང་བྱེད་སྲོལ་ཞིག་ཡོད། སེ་འབྲས་དགའ་གསུམ་གཙོས་འཆད་རྩོད་རྩོམ་གསུམ་གྱི་ཐོག་ནས་སྦྱང་བ་བྱེད་པ་ནི་ཧ་ཅང་ཡག་པོ་ཞིག་རེད། ངོས་རང་ཡང་ཆུང་ཆུང་སྐབས་ནས་བསྡུས་གྲྭ་དང་བློ་རིག རྟགས་རིགས། གཞན་གཞུང་ཆེན་རྣམས་ཁ་ཡོད་ལག་ཡོད་ཀྱིས་སློབ་སྦྱོང་བྱས་པ་ཡིན། བོད་ཀྱི་ཆོས་ཕྱོགས་ཀྱི་རིག་གཞུང་རྣམས་ཧ་ཅང་རྒྱ་ཆེན་པོ་དང་ཞིབ་ཚགས་རེད། བོད་ལ་བོད་ཀྱི་སློབ་སྦྱོང་བྱེད་པ་ནི་ཧ་ཅང་སྤུས་དག་པོ་རེད། བར་སྐབས་བོད་དུ་ཉམས་ཆག་ཆེན་པོ་ཕྱིན་ཡོད་ཀྱང་། རྒྱ་གར་དུ་སླེབས་ནས་བོད་ལ་ཉམས་ཆག་ཕྱིན་པ་དེ་ག་ཚོད་ཐུབ་ཐུབ་ཀྱིས་བདག་པོ་བརྒྱབ་ནས་མུ་མཐུད་གཞུང་ཆེན་རྣམས་ཀྱི་རྩ་བ་བློ་འཛིན་བྱེད་པ་དང། འགྲེལ་བ་རྣམས་ལ་ཧུར་ཐག་བྱས་པ་རེད། ང་ཚོའི་མི་རབས་གོང་མ་ཚོས་ཧུར་ཐག་འབད་ཐག་བྱས་པ་རེད། དངོས་གནས་བཀའ་དྲིན་རྗེས་སུ་དྲན་དགོས་པ་རེད་འདུག་ཅེས་གསུངས།

མཐར་རིག་ཚན་གཞན་གྱིས་ཚད་མ་རིག་པ་ལ་དོ་སྣང་སྤྲོད་ཀྱི་ཡོད་ཕྱོགས་སྐོར་ནས། ༧གོང་ས་མཆོག་གིས་དེང་སང་ནང་པའི་གཞུང་ནས་སེམས་ཁམས་རིག་པའི་སྐོར་དང་། ཚད་མ་རིག་པ་ལ་ཚན་རིག་པའི་ནང་ནས་དམིགས་བསལ་དོ་སྣང་བྱེད་བཞིན་འདུག ངོས་རང་འཛམ་གླིང་ས་ཕྱོགས་གང་སར་སླེབས་པའི་སྐབས་སུ་སེམས་ཁམས་རིག་པ་དང་། ཚད་མ་རིག་པའི་སྐོར་ནས་ཚན་རིག་པ་ཚོར་ཐུག་འཕྲད་དུ་ཡོང་གི་འདུག ང་ཚོས་བགྲོ་གླེང་བྱས་པ་ཡིན། མང་པོ་ཞིག་གིས་རིགས་པ་གསར་པ་རྙེད་ནས་ཧ་ཅང་དགའ་བོ་བྱེད་བཞིན་འདུག ནུབ་ཕྱོགས་རྒྱལ་ཁབ་ཁག་གི་ནང་དུ་ཚད་མ་རིག་པ་དང་འབྲེལ་ནས་ཡོང་དུས་ཐུན་མོང་གི་རིག་གནས་ཆགས་ཡོད། ཚད་མ་རིག་པའི་འགྲོ་སྟངས་དང་མཐུན་པར་དེང་སང་ང་ཚོར་གོ་བསྡུར་བྱེད་པ་ཡོང་གི་ཡོད། རྒྱ་ནག་ལ་མཚོན་ནའང་ཚད་མ་རིག་པའི་སྐོར་ལ་དོ་སྣང་ཆེན་པོ་སླེབ་ཡོང་གི་འདུག ང་ཚོ་བོད་པས་ལོ་སྟོང་ཕྲག་རིང་བདག་པོ་བརྒྱབ་པ་དེ་ད་ལྟ་དུས་རབས་ཉེར་གཅིག་པའི་ནང་དུའང་བེད་སྤྱོད་བྱེད་རྒྱུ་ཡོད་པ་ཞིག་དང་། བསམ་བློ་གཏོང་རྒྱུ་ཡོད་པ་ཧ་ཅང་ཡག་པོ་རེད། ཐུག་རྗེ་ཆེ་ཞུ་བཞིན་ཡོད། ཅེས་གསུངས་སོང་།

འདི་ལོའི་ཟླ་ ༦ ཚེས་ ༢༨ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་སུ་ཞབས་སོར་འཁོད་ནས་འདས་པའི་ཟླ་གཉིས་ཙམ་རིང་། བདུན་རེའི་རེས་གཟའ་ཟླ་བ་ནས་པ་སངས་བར་ཉིན་ལྟར་ཞི་བའི་ཚལ་གྱི་ཕོ་བྲང་དུ་ཕྱོགས་མཐའ་ཁག་ནས་ཕེབས་པའི་དད་ལྡན་མང་ཚོགས་རྣམས་ལ་མཇལ་ཁ་དང་བཀའ་སློབ་བསྩལ་མུས་ཡིན་པ་རེད།

གསར་འགོད་པ། ཆོས་རྒྱལ་སྐྱབས།