འདི་ལོའི་ནོ་བྷེལ་རྩོམ་རིག་གཟེངས་རྟགས་དེ་ཁ་ན་ཌའི་སྙན་ངག་པ་དང་། རྩོམ་འབྲི་བ། ལོ་ཙྭ་བ་ཨན་ཁར་སོན་ལ་ཐོབ་འདུག
ཁ་སང་ཕྱི་ཚེས་༨ ཉིན། སི་ཝེ་ཌན་གྱི་རྒྱལ་ས་སི་ཊོག་ལམ་ (Stockholm) དུ་སི་ཝེ་ཌན་ཞིབ་འཇུག་ཁང་གིས་ཡོང་ཁྱབ་གསལ་བསྒྲགས་ཤིག་སྤེལ་ཏེ། འདི་ལོའི་ནོ་བྷེལ་རྩོམ་རིག་གཟེངས་རྟགས་དེ་ཁ་ན་ཌའི་སྙན་ངག་པ་དང་། རྩོམ་འབྲི་མཁན། ལོ་ཙཱ་བ་བཅས་ཡིན་པའི་ཨན་ཁར་སོན་ལ་གནང་རྒྱུ་གཏན་འཁེལ་ཡོད། ཁོང་གི་སྤོབས་པ་ཆེ་ཞིང་གསར་གཏོད་ལྡན་པའི་བརྩམས་ཆོས་རྣམས་ཀྱིས་གནའ་རབས་སྲོལ་རྒྱུན་ལ་གཞི་བཅོལ་ནས་དེང་རབས་རྩོམ་རིག་ལ་རྣམ་པ་གསར་པ་ཞིག་བསྐྲུན་ཡོད་ཅེས་བསྔགས་བརྗོད་ཞུས་འདུག ཁོང་ལ་«དམར་པོའི་རང་རྣམ།» (Autobiography of Red) སོགས་བརྩམས་ཆོས་དུ་མ་འདུག
ཁོང་མོར་གཟེངས་རྟགས་འདི་སྤྲད་པ་དེས་འདས་པའི་བགྲང་བྱ་བཞིའི་རིང་སྙན་ངག་དང་། རྩོམ་ཡིག ཟློས་གར། སྒྲུང་གཏམ། ལོ་རྒྱུས་ཡིག་སྒྱུར་བཅས་ཀྱི་བྱ་བ་དབྱེར་མེད་དུ་བསྒྲུབས་པ་དང་། སཕ་ཕོ་ (Sappho) དང་ཡུ་རི་པི་ཌི་སི་ (Euripides) ལྟ་བུའི་གནའ་བོའི་གྷི་རིག་གི་རྩོམ་པ་པོ་རྣམས་དེང་རབས་ཀྱི་ཉམས་འགྱུར་སྣ་ཚོགས་ཐོག་ཡང་བསྐྱར་གསོན་པོར་བཏོན་པའི་རྩོམ་རྩལ་ལ་ངོས་འཛིན་བྱས་པ་རེད། རྩོམ་པ་པོ་ཁར་སོན་ནི་ཕྱི་ལོ་ ༢༠༡༩ ནས་རྩོམ་རིག་དཔྱད་བརྗོད་པ་རྣམས་ཀྱིས་ནོ་བྷེལ་རྩོམ་རིག་ཐོབ་འོས་པའི་ཁོངས་སུ་མིང་འདོན་བྱས་ཡོད་ལ། ད་ལོ་མར་གྷ་རེཊ་ཨཊ་ཝུཌ་ (Margaret Atwood) དང་། ཧ་རུ་ཀི་མུ་ར་ཀ་མི་ (Haruki Murakami)། ཚན་ཞུའེ་ (Can Xue) བཅས་དང་མཉམ་དུ་ནོ་བྷེལ་རྩོམ་རིག་གཟེངས་རྟགས་ཀྱི་འོས་མིའི་ཁོངས་སུ་ཡོད་པ་དང་། ལོ་འདིའི་གཟེངས་རྟགས་གསལ་བསྒྲགས་མ་བྱས་གོང་ཁོང་དང་ཚན་ཞུའེ་གཉིས་རེ་བ་ཆེ་ཤོས་སུ་བརྩིས་ཡོད་འདུག
སི་ཝེ་ཌན་ཞིབ་འཇུག་ཁང་གི་དྲུང་ཆེ་ཨིང་གྷིརཌ་ཀར་ལ་བྷེརག་ (Ingrid Carlberg) གིས་བཤད་པ་ལྟར་ན། ཁར་སོན་གྱིས་གཟེངས་རྟགས་ཐོབ་པའི་གནས་ཚུལ་གོ་སྐབས་ཁོང་ཨའི་སི་ལེནཌ་ (Iceland) རུ་རླུང་གི་སྒྲ་ལ་ཉན་བཞིན་འདུག་ཅེས་བརྗོད་འདུག ཁར་སོན་ལགས་ནི་དགུང་ལོ་ ༧༦ ཡིན་ཞིང་། ཊོ་རོན་ཊོ་ (Toronto) རུ་འཁྲུངས། ཁོང་ཨའི་སི་ལེནཌ་དུའང་གནས་སྡོད་བྱེད་ཀྱི་ཡོད་ཅིང་། ཁོང་དང་ཁོང་གི་ཁྱོ་ག་རོ་བྷརཊ་ཀུ་རི་ (Robert Currie) གཉིས་ལ་ཕྱི་ལོ་༢༠༢༢ ལོར་ཨའི་སི་ལེནཌ་ཡི་མི་སེར་གྱི་ཐོབ་ཐང་སྤྲད་ཡོད་འདུག
གཟེངས་རྟགས་དང་མཉམ་དུ་སི་ཝེ་ཌན་གྱི་སྒོར་མོ་ (Krona) ས་ཡ་ ༡༢ ཡོད་ཅིང་། ཨ་སྒོར་ས་ཡ་ ༡.༢ ཙམ་རེད། ཁར་སོན་ནི་ནོ་བྷེལ་རྩོམ་རིག་གཟེངས་རྟགས་ཐོབ་མཁན་མི་སྣ་ ༡༢༢ ཡི་ནང་ནས་བུད་མེད་ ༡༩ པ་དེ་ཡིན་པ་དང་། ཕྱི་ལོ་༢༠༡༣ ལོར་སྒྲུང་ཐུང་རྩོམ་པ་པོ་ཨེ་ལིསི་མོན་རོ་ (Alice Munro) ལགས་ཀྱི་རྗེས་སུ་ཁ་ན་ཌར་འཁྲུངས་པའི་རྩོམ་པ་པོ་གཟེངས་རྟགས་ཐོབ་མཁན་གཉིས་པ་དེ་ཡིན། ཕྱི་ཟླ་༡༢ ཚེས་༡༠ ཉིན་སི་ཊོག་ལམ་དུ་གཟེངས་རྟགས་དངོས་སུ་འབུལ་རྒྱུ་རེད།
དུས་བབ་གསར་ཁང་གིས་སྤེལ།
