ཚན་རིག་དང་མཐུན་པ་ཞིག་ཅིས་ཀྱང་འབད་བརྩོན་བྱེད་དགོས།

བོད་ཀྱི་དུས་བབ་གསར་ཤོག་རྩོམ་སྒྲིག་པ་མཆོག་གི་དྲུང་དུ།
                                             ཆེད་ཞུ།
        བོདཀྱི་དུས་བབ་གསར་ཁང་བཙུགས་ནས་ལོ་བཅུ་འཁོར་བའི་དུས་དྲན་སྲུང་བརྩི་བྱེད་པའི་སྐབས་དང་བསྟུན། ལོ་བཅུའི་དུས་བབ་གསར་ཤོག་བཀླགས་པའི་ཚོར་སྣང་དང་འབྱུང་འགྱུར་སྐོར་རྩོམ་འཕྲིན་ཐུང་ངུ་ཞིག་འབྲི་དགོས་པའི་འབོད་སྐུལ་གནང་བ་དང་ཆབས་ཅིག   བསམ་ཚུལ་གཅིག་གཉིས་ཤིག་ཞུ་འདོད་བྱུང༌།  གཞུང་འབྲེལ་དང་གཞུང་མ་ཡིན་པའི་བོད་ཀྱི་གསར་འགོད་པ་དང༌།  བོད་ཀྱི་དུས་བབ་གསར་ཁང་གི་ལས་བྱེད་ཐུན་མོང་ལ་ཁམས་བཟང་གི་འཚམས་འདྲི་དང་སྤྲགས།  བོད་ཀྱི་དུས་བབ་ལོ་ཧྲིལ་བོ་བཅུ་མཇུག་སྐྱོང་ཐུབ་པ་ལ་རྗེས་སུ་ཡི་རངས་དང་རྒྱབ་སྐྱོར་ཡོད།  གསར་འགོད་པ་ནི་རྒྱལ་མཚམས་དང་ཆབ་སྲིད་ཀྱི་ལངས་ཕྱོགས་མེད་པའི་རྒྱལ་ཁབ་དང་མི་མང་གི་མགྲིན་ཚབ་པ་ཡིན། སྤྱིར་གསར་འགོད་པ་འདྲ་མིན་དང་གསར་འགྱུར་འདྲ་མིན།  གསར་འགྱུར་མཁོ་སྤྲོད་པ་འདྲ་མིན། ཀློག་མཁན་ཡང་འདྲ་མིནཡིན།  སེམས་ཅན་མོས་པ་སྣ་ཚོགས་ཏེ། ཐམས་ཅད་མགུ་བ་སུས་ཀྱང་དཀའ།  གསར་འགོད་པའི་ཆ་རྐྱེན་ནི་ཕྱོགས་མི་འཛིན་པ་དང༌། ལས་འགན་གསར་འགྱུར་ངོ་མ་དང་གནས་ཚུལ་ངོ་མ་འདོན་སྤྲོད་བྱ་རྒྱུ་དེ་ཡིན། དེ་ལས་ལོག་པར་སོང་ན་གསར་འགོད་པ་ཚད་ལྡན་ཞིག་ཏུ་བརྩི་མཐོང་བྱེད་མི་སྲིད།  རང་ཉིད་གསར་འགོད་པ་ཚད་དང་ལྡན་པ་ཞིག་བྱེད་མིན་རང་ལགས་དང༌།  སྤྱིར་གསར་འགོད་པ་བྱེད་རྒྱུ་ལས་སླ་བོ་མེད་ལ།  ཡང་སྒོས་གསར་འགོད་པ་ཚད་ལྡན་ཞིག་དེ་ལས་ཀྱང་ཡོང་དཀའ།  བྱ་ལས་བྱེད་ལས་གང་ཡིན་ཡང༌།      བསམ་པ་དཀར་ལ་སྦྱོར་བ་ནག་པའི་ལས། སྦྱོར་བ་དཀར་ལ་བསམ་པ་ནག་པའི་ལས།  བསམ་སྦྱོར་གཉིས་ཀ་དཀར་བའི་ལས།    བསམ་སྦྱོར་གཉིས་ཀ་ནག་པའི་ལས་ཅི་རིགས་་ཡོང་སྲིད།  གསར་འགོད་པ་ནི་གཡུལ་སར་ཞུགས་པའི་དམག་མི་དང་གཅིག་མཚུངས་ཡིན། དཔེར་ན།  ༢༠༠༦ལོ་གཅིག་པུར་རྒྱལ་སྤྱིའི་ཐོག་གསར་འགོད་པ་༨༨ཀྱི་ཚེ་སྲོག་ཤོར་ཡོད་པར་གྲགས།  གཞན་ཡང་ཁྲིམས་ལ་སྦྱར་བ་དང་ཉེས་འཛུགས་བྱས་པར་གྲངས་ལས་འདས།  བཙན་བྱོལ་གཞུང་གི་གསར་འགོད་པ་རྣམས་ལ་མཚོན་ན་ཚེ་སྲོག་གི་འཇིགས་པ་བྱུང་ཡོད་པ་མ་རེད་དེ། ཁྲིམས་སར་ཐུག་པ་དང་ཁ་མཆུ་བཙུགས་པ་ཉུང་ཉུང་མིན།  དེ་ཚོ་གསར་འགོད་པར་འཕྲད་པའི་དཀའ་རྙོགས་ཆེ་ཤོས་ཡིན།
   གསར་འགྱུར་ནི་ཆབ་སྲིད་འཚོ་བའི་བླ་སྲོག་དང་དཔྱད་རྩོམ་ནི་ཤེས་རིག་མ་ལག་གི་ཁྱད་ཆོས། ༧གོང་ས་མཆོག་གི་བཀའ་སློབ་དང་མཛད་རྗེས་འགྲེམ་སྤེལ་ནི་བོད་མིའི་རེ་འདུན། དྲི་བ་དྲིས་ལན་ནི་ཐེ་ཚོམ་དང་དོགས་གཅོད། གལ་ཡོད་གསལ་བསྒྲགས་ནི་ཉེར་མཁོ། སྐྱོན་བརྗོད་བྱེད་པ་ནི་ནོར་བཅོས་དང་ཉེས་འགོག   ཐམས་ཅད་ཀྱི་རྩ་བ་ཀུན་སློང་ལ་ཐུག   ནང་ཆོས་ཁས་ལེན་མཁན་ཞིག་གི་ངོས་ནས་བཤད་ན།  ཚེ་འདི་ཕྱི་གཉིས་ཀྱི་དོན་ཆེན་ཕན་གནོད་དང་འབྲེལ་བ་ཡོད།  མདོར་ན་དུས་རབས་ཉེར་གཅིག་པའི་གསར་འགོད་པ་ཚན་རིག་དང་མཐུན་པ་ཞིག་ཅིས་ཀྱང་འབད་བརྩོན་བྱེད་དགོས།  ད་ལྟའི་ཆར་བོད་གཞིས་ལུས་མི་མང་ལ་ཁ་ཡོད་ཀྱང་བཤད་དབང་དང་མིག་ཡོད་ཀྱང་ལྟ་དབང༌། ལག་ཡོད་ཀྱང་འབྲི་དབང་མེད་པ་དངོས་ཡོད་གནས་ཚུལ་མིག་མཐོང་ལག་ཟིན་ཡིན་ན། བོད་གཞིས་བྱེས་གཉིས་རླངས་པས་དྲོས་དུས།  མ་འོངས་པར་ཡང་དགའ་བཞིན་འདུས་པའི་ཚོགས་པ་བཞིན་དེའི་མཇུག་བསྐྱང་བའི་ཕུགས་བསམ་མ་བརླག་པ་ཞིག་མ་བརྗིད་པར་གྱིས།  བྱ་བ་ལམ་འགྲོ་ཡོང་བའི་སྨོན་འདུན་དང་བཅས།
འགུ་ལོག་དམ་ཆོས་དཔལ་བཟང་གིས༢༠༠༧ཟླ༡ཚེས་༧ལ།