ཡུ་གུར་མི་རིགས་ཀྱི་གསོན་གནས་ཆེད་དུ་འཐབ་རྩོད་བྱེད་དགོས་བའི་གནད་དོན་རེད།

ལྕམ་རིའི་པིས་ཡ་ལགས་སུ་བཅར་འདྲི། ས་དཀར་བཀྲ་ཤིས་ཀྱིས་བསྒྱུར།

དྲི་བ། ཉེ་ཆར་རྒྱ་ནག་གཞུང་འབྲེལ་གསར་འགྱུར་བརྒྱུད་ལམ་ཁག་ཏུ་གནས་ཚུལ་བཀོད་པ་ལྟར་ན། རྒྱ་ནག་གཞུང་གིས་ཞིན་ཅང་ལྷོ་ཕྱོགས་ས་ཁུལ་དུ་ཁོ་ཚོས་ངོས་འཛིན་བྱས་པའི་ཤར་ཏུར་ཀི་སི་ཐན་རང་བཙན་རྩོད་ལེན་པའམ་དྲག་སྤྱོད་པའི་སྦྱོང་བརྡར་ལྟེ་གནས་ཤིག་གཏོར་ཕམ་བཏང་ཡོད་ཚུལ་བསྒྲགས་པ་དང༌། གཏོར་ཕམ་བཏང་སྐབས་དྲག་སྤྱོད་པ་མི་སྣ་༡༧ བསད་པ་དང༌། མི་སྣ་༡༨ འཛིན་བཟུང་བྱས་པ་མཟད། ད་དུང་ལག་འབོམ་ཁ་ཤས་ཤིག་ལག་སོན་བྱུང་ཡོད་པ་དང༌། རྒྱ་ནག་ཕྱོགས་ནས་ཀྱང་སྤྱི་བདེ་མི་སྣ་ཞིག་འདས་གྲོངས་ཏུ་ཕྱིན་ཡོད་ཚུལ་བརྗོད་ཡོད། དེ་ན་དོན་རྐྱེན་འདི་ནི་ཤིན་ཅང་རང་བཙན་དང་དྲག་སྤྱོད་པ་དང་འབྲེལ་བ་ཡོད་པ་ཞིག་ཡིན་པར་བརྗོད་པས། ལྕམ་རི་པིས་ཡ་ལགས་ནས་གནས་ཚུལ་འདི་ལ་ལྟ་སྟངས་དང་རྒྱུས་ལོན་ཅི་འདྲ་ཞིག་ཡོད་དམ།
ལན། གནད་དོན་འདི་ངས་ཀྱང་གསལ་བོ་ཞིག་ཤེས་མ་སོང་ལ་ངས་ཤེས་བ་ཡང་རྒྱ་ནག་གཞུང་གིས་ཁྱབ་བསྒྲགས་བྱས་པ་དེ་རེད། ཡིན་ན་ཡང༌། ང་རང་རྒྱ་ནག་གཞུང་གིས་ཁྱབ་བསྒྲགས་བྱས་པ་དེ་ལ་བརྒྱ་ཆ་བརྒྱ་ཐམ་པའི་ཡིད་ཆེས་མེད། ང་ཚོའི་ཤར་ཏུར་ཀི་སི་ཐན་དུ་མི་རིགས་ཀྱི་གནད་དོན་ཡོད་པ་རེད། ཡིན་ན་ཡང་ང་ཚོས་ལས་འགུལ་ཅི་ཞིག་སྤེལ་ན་ཡང་རྒྱ་ནག་གཞུང་གིས་དྲག་སྤྱོད་པའི་ལས་འགུལ་ཞིག་ཏུ་ངོས་འཛིན་བྱེད་ཀྱི་ཡོད་པ་རེད། སྔོན་མ་རྒྱ་ནག་གཞུང་གིས་དེ་ནི་མི་རིགས་ཁ་བྲལ་རིང་ལུགས་ཀྱི་ལས་འགུལ་ཞིག་ཡིན་པར་བརྗོད་མོད། ཨ་རིའི་དགུ་བའི་བཅུ་གཅིག་གི་དོན་རྐྱེན་རྗེས་ནས་བཟུང་ཡུ་གུར་མི་རིགས་ཀྱི་ལས་འགུལ་ཚང་མ་ཡང་དྲག་སྤྱོད་པའི་ལས་འགུལ་ཞིག་ཏུ་བརྩིས་བ་རེད། གལ་སྲིད་སྲིད་གཞུང་ཞིག་གིས་མི་རིགས་གང་ཞིག་ལ་གཉའ་གནོན་བྱས་ན་མི་རིགས་དེས་གཞུང་ལ་ངོ་རྒོལ་བྱེད་ངེས་བ་རེད། ཡིན་ན་ཡང་དེརིང་གི་གནས་སྟངས་ནི་ཡུ་གུར་མི་རིགས་ལ་སྨྲ་བརྗོད་རང་དབང་ཅི་ཡང་མེད་པས་ཁོ་ཚོས་སེམས་ནང་གི་སྐད་ཆ་བརྗོད་ཐུབ་ཀྱི་མེད་པ་རེད།  སྤྱིར་བཏང་རྒྱ་ནག་ནང་དུ་ཡུ་གུར་མི་རིགས་གཅིག་པུ་ལ་སྨྲ་བརྗོད་རང་དབང་དང་འགྲོ་བ་མིའི་ཐོབ་ཐང་མེད་པ་མིན་པར་རྒྱ་མི་རིགས་ལ་ཡང་རྩ་བའི་ཆ་ནས་མེད་པ་རེད། རྒྱ་ནག་ནང་རྒྱ་མི་རིགས་ཀྱིས་ཀྱང་སྐབས་རེ་རྔམ་སྟོན་ཁྲོམ་སྐོར་བྱེད་ཆོག་མོད་ཡིན་ན་ཡང་རྒྱ་ནག་གཞུང་གིས་ཁོ་ཚོ་ལ་ལྟ་སྟངས་མི་གཅིག་པ་རེད།
དྲི་བ། རྒྱ་ནག་གཞུང་གིས་ནམ་རྒྱུན་ཤིན་ཅང་རང་བཙན་ནམ་ཤར་ཏུར་ཀི་སི་ཐན་རང་བཙན་དང་དྲག་སྤྱོད་པའི་དབར་འབྲེལ་བ་ཡོད་ཚུལ་ནན་བརྗོད་བྱེད་ཀྱི་ཡོད་པ་རེད། རྩ་བའི་ཆ་ནས་ཁྱེད་རང་དང་ཁྱེད་ཀྱིས་དབུ་ཁྲིད་པའི་འཛམ་གླིང་ཡུ་གུར་འཐུས་མིའི་ཚོགས་ཆེན་སྒྲིག་འཛུགས་ཀྱིས་དྲག་སྤྱོད་རིང་ལུགས་ཀྱི་གནད་དོན་ལ་ལྟ་ཚུལ་ཅི་འདྲ་ཞིག་ཡོད་དམ།
ལན། རྩ་བའི་ཆ་ནས་ང་ཚོས་རྩ་དོན་ནི་ཞི་བའི་ཐབས་ལམ་བརྒྱུད་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་དང་དམངས་གཙོས་ཆེད་དུ་འཐབ་རྩོད་བྱ་རྒྱུ་དེ་ཡིན། རྒྱ་རིགས་དང་ཡུ་གུར་མི་རིགས་སུ་ཡིན་ནའངཡང་འདྲ་ང་ཚོས་ལངས་ཕྱོགས་ནི་དྲག་སྤྱོད་དང་འཇིགས་སྐུལ་ལ་ངོ་རྒོལ་བྱེད་རྒྱུ་དེ་ཡིན། དོན་དངོས་སུ་ང་ཚོས་འཐབ་རྩོད་བྱེད་བཞིན་པ་ནི་ཤིན་ཅང་གི་བརྟན་ལྷིང་དང་མཐུན་སྒྲིལ་གྱི་ཆེད་དུ་ཡིན།
དྲི་བ། ཡིན་ན་ཡང་ང་ཚོས་གོ་ཐོས་ལྟར་ན་ཁྱེད་རང་ཚུད་པའི་ཕྱི་རྒྱལ་གྱི་ཡུ་གུར་བའི་སྒྲིག་འཛུགས་ཁག་གི་རྩ་དོན་ནི་ཡུ་གུར་མི་རིགས་ཀྱིས་རང་ཐག་རང་གཅོད་ཀྱི་ཐོབ་ཐང་བརྩོན་ལེན་བྱས་ཏེ་མཐར་ཤིན་ཅང་རང་བཙན་བྱེད་རྒྱུ་ཡིན་ཚུལ་བརྗོད་ཀྱི་ཡོད་པ་རེད། དེའི་ཐད་ཁྱེད་རང་གིས་ལྟ་ཚུལ་ཅི་འདྲ་ཡིན་ནམ།
ལན། ད་ལྟ་ཤར་ཏུར་ཀི་སི་ཐན་རང་བཙན་སྐོར་གྱི་གནད་དོན་མ་བརྗོད་གོང༌། བཤད་དགོས་བ་ཞིག་ནི་ད་ལྟ་ཡུ་གུར་མི་རིགས་ལ་རང་དབང་ཅི་ཡང་མེད་ལ། ཁོ་ཚོ་ལ་སྨྲ་བརྗོད་ཀྱི་རང་དབང་མེད་དང་དཔལ་འབྱོར་གྱི་རང་དབང༌མེད། སློབ་གསོའི་རང་དབང་མེད། རིག་གནས་སྟེང་དུ་ཡང་ཁོ་ཚོ་ལ་ཡར་རྒྱས་གཏོང་བའི་རང་དབང་ཅི་ཡང་མེད། རྒྱ་ནག་སྲིད་དབང་གིས་༡༩༤༩ ལོ་ནས་བཟུང་ཡུ་གུར་མི་རིགས་ཀྱི་རིག་གཞུང་དང༌། འགྲོ་བ་མིའི་ཐོབ་ཐང༌། སྐད་ཡིག དཔལ་འབྱོར་བཅས་ག་ལེར་རྩ་མེད་བཏང་བ་རེད། ད་ལྟའི་གནད་དོན་གཙོ་བོ་ནི་འདི་ཚོ་རེད་ལ། ཡུ་གུར་མི་རིགས་ཀྱི་གསོན་གནས་ཆེད་དུ་འཐབ་རྩོད་བྱེད་དགོས་བའི་གནད་དོན་རེད། གལ་སྲིད་ཡུ་གུར་མི་རིགས་ལ་དོན་ངོ་མའི་རང་དབང་དང་འདྲ་མཉམ། དམངས་གཙོ་ལྡན་པའི་ཆ་རྐྱེན་འོག་འོས་འདེམས་ཀྱི་དབང་ཆ་ཡོད་ཚེ། ཁོ་ཚོས་ཆབ་སྲིད་ཀྱི་ལས་དབང་ལ་ཐག་གཅོད་བྱེད་རྒྱུའི་དབང་ཆ་ཡོད་པ་དང༌། གཅིག་བྱས་ན་ཁོ་ཚོས་རང་བཙན་གདམས་སྲིད་ལ། གཅིག་བྱས་ན་ཁོ་ཚོ་རྒྱ་ནག་གི་ཆ་ཤས་ཤིག་ཏུ་གྱུར་ཏེ་རྒྱ་ནག་མི་དམངས་དང་མཉམ་དུ་འཚོ་བ་སྐྱེལ་བར་གདམ་སྲིད། དེ་ནི་ཁོ་ཚོ་རང་ཉིད་ཀྱིས་ཐག་གཅོད་རེད།
དྲི་བ། གོང་དུ་ཁྱེད་ཀྱིས་ཡུ་གུར་མི་རིགས་ཀྱི་སྨྲ་བརྗོད་རང་དབང་གི་ཐོབ་ཐང་དང་གསོན་གནས་རང་དབང་གི་ཐོབ་ཐང་བརྩོད་ལེན་བྱེད་ཀྱི་ཡོད་པར་བརྗོད། ཡིན་ན་ཡང་རྒྱ་ནག་གཞུང་གིས་བརྗོད་པ་ལྟར་ན་ཁོ་ཚོས་ཤིན་ཅང་གི་འཛུགས་སྐྲུན་ཆེད་འབད་བརྩོན་མང་པོ་བྱས་པ་དང་གྲུབ་འབྲས་ཀྱང་ཆེན་པོ་བླངས་ཡོད་ལ། ཤིན་ཅང་གི་དཔལ་འབྱོར་འཕེལ་རྒྱས་ཤིན་ཏུ་མགྱོགས་ཚུལ་བརྗོད་ཀྱི་ཡོད།  གྲོང་ཁྱེར་བོའུ་ལོན་མོན་ཆི་རུ་ཁང་པ་ཐོག་བརྩེགས་ཅན་མང་པོ་བསྐྲུན་ཡོད་པས་ཕར་བལྟས་ཚེ་ཧ་ཅང་ཡར་རྒྱས་ཀྱི་རྣམ་པ་མངོན་ཞིང༌། དགོང་མོ་ཡང་རྟག་པར་གླུ་གར་གྱི་སྒྲ་འཁྱིལ་ཞིང་གློག་འོད་སྣ་ལྔའི་ཁྲ་ཁྲ་ཟིང་ཟིང་གི་རྣམ་པ་མངོན་པས་ཨེ་ཤ་ཡའི་གྲོང་ཁྱེར་གཞན་དང་གཅིག་མཚུངས་ཡིན་པ་དང༌། ཤིན་ཅང་དུ་བཅར་དྲིར་བསྐྱོད་པའི་ང་ཚོའི་ཨ་རི་རླུང་འཕྲིན་ཁང་གི་གསར་འགོད་པས་ཀྱང་གྲོང་ཁྱེར་བོན་ལི་མོན་ཆི་དེ་ཧ་ཅང་ཡར་རྒྱས་དང་འཁྲུགས་ཆ་ཆེ་བའི་གྲོང་ཁྱེར་ཞིག་ཡིན་པའི་ཚོར་བ་སྟེར་ཚུལ་བརྗོད་ཀྱི་ཡོད་པས། དེའི་ཐད་ཁྱེད་རང་ལ་དགོངས་ཚུལ་ཅི་ཞིག་ཡོད་དམ།
ལན། ཁྱེད་ཀྱིས་དྲི་བ་འདི་བཏོན་པར་ཐུགས་རྗེ་ཆེ་ཞུ། ཡིན་ན་ཡང་ལྟ་སྐོར་དང་བཅར་དྲིར་བསྐྱོད་མཁན་ཚོས་ནང་ལོགས་མཐོང་ཡོད་པ་མ་རེད། ཕྱི་ལོགས་ནས་བལྟས་ཚེ་ཤིན་ཅང་ཧ་ཅང་མཛེས་པ་རེད། ལྟ་སྐོར་ལ་བསྐྱོད་མཁན་ཚོས་སུའི་ཁང་པ་ཐོག་བརྩེགས་ཅན་དེ་ལོངས་སུ་སྤྱོད་པ་དང༌། སུའི་བདེ་སྐྱིད་དང་ཁེ་ཕན་ལོངས་སུ་སྤྱོད་ཀྱི་ཡོད་པ་ཤེས་ཀྱི་མེད། ལྟ་སྐོར་ལ་འགྲོ་མཁན་ཚོས་དེ་རུ་ཡ་ང་བའི་འཚོ་བ་རོལ་བཞིན་པ་ནི་ཡུ་གུར་བ་ཡིན་པ་ཤེས་ཀྱི་མེད་པ་རེད། ང་ཚོའི་ལངས་ཕྱོགས་ནི་མི་རིགས་ཚང་མ་བདེ་ཞིང་སྐྱིད་པའི་ངང་འཚོ་བ་རོལ་ཐུབ་རྒྱུ་དེ་ཡིན། དེ་དང་ལྷན་ང་ཚོས་བསམ་པར་ཕྱི་ནས་ཡོང་བའི་རྒྱ་མི་རིགས་གཅིག་པུ་མིན་པར་ས་གནས་ཀྱི་མི་རིགས་ཀྱང་བདེ་སྐྱིད་ཀྱི་འཚོ་བ་རོལ་ཐུབ་དགོས་བ་རེད། རྒྱ་ནག་དབུས་གཞུང་གིས་ལོ་ངོ་༥༧ རིང་གྲངས་ཉུང་མི་རིགས་འདྲ་མཉམ་དང་མཐུན་སྒྲིལ། གྲངས་ཉུང་མི་རིགས་ལ་བདེ་སྐྱིད་སྐྲུན་རྒྱུ་བཅས་བརྗོད་བཞིན་པ་དེ་ནི་ང་ཚོའི་རེ་སྨོན་ཡིན་ལ་ང་ཚོ་ལ་མི་ལོ་༥༧ རིང་མ་རག་པའི་དངོས་པོ་ཡང་རེད། ཡུ་གུར་མི་རིགས་ཀྱིས་སྔོན་ཆད་ནས་རྒྱ་ནག་གཞུང་གི་བརྗོད་སྟངས་འདི་ལ་ཡིད་ཆེས་བྱེད་ཀྱི་ཡོད་ལ་ང་ཡང་ཡིད་ཆེས་བྱེད་ཀྱི་ཡོད། ཤིན་ཅང་ཡར་རྒྱས་ཤིན་ཏུ་ཆེ་བ་དེ་ངོ་མ་རེད། ཤིན་ཅང་དུ་ཁང་པ་ཐོག་བརྩེགས་ཅན་མང་པ་དང་གཞུང་ལམ་སྣ་ཚོགས་ཡོད་པ་བདེན་པ་རེད། ཡིན་ན་ཡང་ཤིན་ཅང་དུ་བདེ་སྐྱིད་ལོངས་སུ་སྤྱོད་མཁན་ནི་ཕྱི་ནས་ཡོང་བའི་རྒྱ་རིགས་ཡིན་པ་ལས་ཡུ་གུར་མི་རིགས་མ་རེད། གལ་སྲིད་རྒྱ་ནག་གཞུང་གིས་རེ་བར་ཤིན་ཅང་མི་རིགས་དབར་མཐུན་སྒྲིལ་ཡོང་འདོད་ཚེ་དེ་ན་ཡུ་གུར་མི་རིགས་ལ་ཡང་ཕྱི་ནས་ཡོང་བའི་རྒྱ་མི་རིགས་དང་འདྲ་བར་འདྲ་མཉམ་གྱི་ལྟ་ཚུལ་འཛིན་དགོས་བ་དང༌། དེ་ལྟར་བྱེད་ཚེ་ཡུ་གུར་མི་རིགས་ཀྱིས་འཁང་ར་བྱེད་མི་སྲིད་པ་རེད། དེ་རིང་གི་གནས་ཚུལ་ནི་ཡུ་གུར་མི་རིགས་ལ་རང་དབང་ཅི་ཡང་ཡོད་པ་མ་རེད། ཡིན་ན་ཡང༌། གལ་སྲིད་རྒྱ་ནག་གཞུང་གིས་ཤིན་ཅང་ནི་གནའ་སྔ་མོ་ནས་བཟུང་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཤིག་ཡིན་པ་རེད་ཅེས་བརྗོད་བཞིན་པ་ལྟར། ཡུ་གུར་མི་རིགས་ལ་སྨྲ་བརྗོད་རང་དབང་སྤྲད་དེ་ཁོ་ཚོའི་སེམས་གཏམ་བརྗོད་དུ་བཅུག་ཚེ།  ཡུ་གུར་མི་རིགས་ཏེ་དེ་རིང་བརྗོད་བཞིན་པ་ལྟར་མི་རིགས་ཁ་བྲལ་རིང་ལུགས་པ་དང་མི་རིགས་ལར་ཞེན་རིང་ལུགས་པ། ཐ་ན་དྲག་སྤྱོད་རིང་ལུགས་པ་ཞིག་ཀྱང་ཡིན་མི་སྲིད་པར། ཁོ་ཚོ་རྒྱ་ནག་རྒྱལ་ཁབ་ཀྱི་སྤྱི་འབངས་ཡག་པོ་ཞིག་ཡིན་ངེས་རེད།་ རྒྱ་ནག་གཞུང་གིས་ཡུ་གུར་མི་རིགས་ལ་དྲི་བ་འདི་བཏོན་པ་ལས་རང་ཉིད་ལ་དྲི་བ་འདི་འདོན་དགོས་ཏེ་ཅིའི་ཕྱིར་ཁོ་ཚོས་ཡུ་གུར་མི་རིགས་དེ་བཙན་གྱི་ལེང་ཧྲན་སྟེང་འདེད་པ་རེད་དམ། གཅིག་བྱས་ན་རང་སྐྱོང་ལྗོངས་ཀྱི་འགོ་ཁྲིད་མི་སྣའི་ཁྲོད་ང་ཚོའི་གནད་དོན་ཐད་རྒྱ་ནག་དབུས་གཞུང་ལ་མགོ་སྐོར་གཏོང་སྟེ་བརྗོད་མཁན་ཡོད་སྲིད་པ་རེད། ད་ལྟ་ང་ཚོའི་གནད་དོན་དང་ང་ཚོ་ལ་གཉའ་གནོན་མྱོང་བཞིན་པ་དེ་ཤིན་ཏུ་ཚབས་ཆེན་རེད། ཕྱི་ལོ་༢༠༠༢་ ལོ་ནས་བཟུང་རྒྱ་ནག་གཞུང་གིས་ང་ཚོའི་སློབ་གསོ་རྩ་མེད་བཏང་བ་རེད།
དྲི་བ། མི་ཁ་ཤས་ཤིག་གིས་དམངས་གཙོ་དང་འགྲོ་བ་མིའི་ཐོབ་ཐང་རྩོད་ལེན་བྱེད་པར་ཐུགས་ཁུར་དང་རྒྱབ་སྐྱོར་གནང་གི་ཡོད་ནའང༌། ཁོ་ཚོས་རྒྱལ་ཁབ་ཁ་བྲལ་གྱི་ལས་འགུལ་དཔེར་ན་ཤིན་ཅང་རང་བཙན་ལྟ་བུ་ལ་རྦད་དེ་ངོ་རྒོལ་བྱེད་ཀྱི་ཡོད་པས། དེའི་ཐད་ཁྱེད་རང་ལ་ལྟ་ཚུལ་ཅི་འདྲ་ཡོད་དམ།
ལན། ༡༩༤༩ ལོའི་ཡར་སྔོན་དུ་ཤིན་ཅང་གནད་དོན་གཉིས་པ་ནི་རྒྱ་ནག་གཞུང་གིས་ཤིན་ཅང་རང་སྐྱོང་ལྗོངས་བཙུགས་རྗེས་རང་སྐྱོང་གི་མིང་ཐོག་ནས་ཡུ་གུར་མི་རིགས་ལ་མགོ་བསྐོར་གཏོང་གི་ཡོད་པ་ནི་དངོས་ཡོད་གནས་ཚུལ་རེད། གནད་དོན་གསུམ་པ་ནི་རྒྱ་ནག་གཞུང་གིས་ཡུ་གུར་མི་རིགས་ལ་མགོ་བསྐོར་བཏང་བ་མ་ཟད་ད་དུང་རྒྱ་ནག་མི་དམངས་ལ་མགོ་སྐོར་བཏང་དེ་རྒྱ་དང་ཡུ་གུར་མི་རིགས་དབར་ལ་འགལ་ཟླ་བཟོས་བ་རེད། གལ་སྲིད་རྒྱ་ནག་གཞུང་གིས་དོན་ངོ་མའི་རང་སྐྱོང་གི་ཐོབ་ཐང་ལ་བརྩི་བཀུར་བྱས་ཏེ་ཡུ་གུར་མི་རིགས་ཀྱིས་རང་ཉིད་ཀྱི་ས་ཁུལ་ཏུ་་རང་སྐྱོང་ངོ་མ་ལོངས་སུ་སྤྱོད་བཅུག་ཡོད་ཚེ་དེ་རིང་གི་གནས་སྟངས་ནི་མི་འདྲ་བ་ཞིག་ཡིན་ངེས། ཉེ་ཆར་རྒྱ་ནག་གཞུང་གིས་ཤིན་ཅང་སྐོར་གྱི་རྒྱབ་ཤ་དཀར་པོའི་དེབ་ཅིག་འགྲེམས་སྤེལ་བྱས་པ་དང༌། རྒྱབ་ཤ་དཀར་པོའི་ནང་ས་ཆ་ནི་ཁོང་ཚོའི་ཡིན་པ་དང༌། ཐོན་ཁུངས་ནི་ཁོང་ཚོའི་ཡིན་པ། དངོས་པོ་ཡོད་ཚད་ཁོང་ཚོའི་ཡིན་པ་བརྗོད་ཡོད་པས། ཡུ་གུར་མི་རིགས་ལ་ཅི་ཡང་མེད་པས་ས་ཆ་འདིར་གཏོགས་པ་ཞིག་མིན་པ་རེད། རྒྱ་ནག་གཞུང་གིས་ང་ཚོས་ས་ཆ་བཙན་བཟུང་དང་ཐོན་ཁུངས་འཕྲོག་བཅོམ་བྱས་པ་མ་ཟད། ལོ་ངོ་༥༧ རིང་རྒྱ་ནག་དམར་ཤོག་ཚོགས་པས་དབང་བསྒྱུར་འོག་ང་ཚོའི་མི་དམངས་ལ་གཞི་རྒྱ་ཆེ་བའི་གཉའ་གནོན་དང་དམར་གསོད་ཚབས་ཆེན་བྱས་ཡོད། དེ་ལས་གཞན་རྒྱ་ནག་གཞུང་གིས་བསམ་པར་ཡུ་གུར་མི་རིགས་གནས་ཡོད་པ་ནི་རྒྱ་ནག་གི་ས་ཁྱོན་ལ་ཉེན་ཁ་སྤྲད་ཀྱི་ཡོད་པར་འདོད་པས་རྡུང་རྡེག་ཚ་ནན་གཏོང་གི་ཡོད་པ་རེད། དེར་བརྟེན་རྒྱ་ནག་གཞུང་གི་སྲིད་ཇུས་ནི་འདྲ་མཉམ་འོག་ཡུ་གུར་མི་རིགས་འཕེལ་རྒྱས་གཏོང་རྒྱུ་དེ་མིན་པར་ཡུ་གུར་མི་རིགས་རྩ་མེད་དུ་གཏོང་རྒྱུ་དེ་རེད།
དྲི་བ། རྒྱ་ནག་གཞུང་གིས་ཁྱེད་རང་འཇུ་བཟུང་མ་བྱས་པའི་སྔོན་དེར། ཁྱེད་རང་ནི་ཤིན་ཅང་གི་ཕྱུག་པོ་ཆེ་ཤོས་ཡིན་པ་མ་ཟད་ད་དུང་སྲིད་གྲོས་ཀྱི་ཨུ་ཡོན་ཡང་ཡིན་པ་རེད། དེ་ན་ཅིའི་ཕྱིར་ཁྱེད་རང་རྒྱ་གཞུང་དང་སོ་སོར་གྱེས་པ་དང༌། གཞནད་ལྟའི་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཡིས་སྔོན་མ་ཁྱེད་རང་གིས་ཐ་མག་ནག་པོའི་ཚོང་བརྒྱབ་པ་དང་རང་གི་བུ་ཕྲུག་ལ་སློབ་གསོ་ཡག་པོ་བརྒྱབ་ཐུབ་མེད་པ་རེད་གསར་འགྱུར་ཁག་ཏུ་ཁྱབ་བསྒྲགས་བྱེད་ཀྱིན་ཡོད་པས་དེའྀ་ཐད་ཁྱེད་རང་ལ་ལྟ་ཚུལ་ཅི་ཞིག་ཡོད་དམ།
ལན། ང་རང་གིས་རྒྱ་ནག་མི་དམངས་ཀྱིས་ང་ཚོའི་གནད་དོན་ངོ་མ་གསལ་རྟོགས་ཐུབ་པར་རེ་བ་བྱེད་ཀྱི་ཡོད། འདིར་ངའི་ཁོ་ཚོ་ལ་གནད་དོན་ངོ་མ་དེ་གསལ་བཤད་བྱེད་ཀྱི་ཡིན། ང་རང་ཕྱུག་པོ་དང་སྲིད་གྲོས་ཀྱི་ཨུ་ན་ཆགས་པ་དེ་བདེན་པ་རེད་ལ་སྐབས་དེར་ངའི་རྒྱ་གཞུང་གི་ཁེ་ཕན་ལྡན་པའི་སྲིད་ཇུས་བེད་སྤྱོད་བཏང་པ་དང༌། རྒྱ་གཞུང་གིས་ཀྱང་ང་ལ་རྒྱབ་སྐྱོར་བྱས་པ་རེད། སྐབས་དེར་ང་རང་ཕྱུག་པོ་ཆགས་པ་དེ་ནི་རྒྱ་གཞུང་གིས་ངའི་ཚོང་ལས་ལ་རྒྱབ་སྐྱོར་བྱས་པ་དང་གློག་སྔོན་པོ་སྤར་པ་རེད། དོན་དངོས་སུ་རྒྱ་གཞུང་གིས་ཡུ་གུར་མི་རིགས་ལ་དཔལ་འབྱོར་སྟེང་ཡར་རྒྱས་འགྲོ་བར་འགག་འགོག་བྱེད་ཀྱི་ཡོད། རྒྱ་ནག་གཞུང་གིས་ཐབས་ཤེས་འདྲ་མིན་སྤྱད་དེ་ང་ཚོ་དཔལ་འབྱོར་སྟེང་ཡར་རྒྱས་འགྲོ་བའི་ལམ་ཁ་བཀག་གི་ཡོད།