བོད་ཀྱི་དུས་བབ་སྤྱིའི་འདོན་ཐེངས་ ༤༢༠ པའི་སྟེང་གི་རྩོམ་སྒྲིག་པའི་གཏམ།
འཛམ་གླིང་གི་རྨི་ལམ་གཅིག་དེ་བདུན་ཕྲག་གཅིག་གི་རྗེས་ནས་མངོན་འགྱུར་ཡོང་གི་ཡོད། རྨི་ལམ་འདི་ནི་རང་དབང་གི་སྐོར་ལ་རྨིས་པ་རེད། རང་དབང་གིས་འཁྱེར་ཡོང་བའི་མཛའ་བརྩེའི་སྐོར་རེད། འཛམ་གླིང་ཡོངས་ཁྱབ་ཀྱིས་འདི་གཅིག་རང་རྨིས་པ་རེད། རྨི་ལམ་འདི་མངོན་འགྱུར་ཡོང་ས་ནི་གནམ་བདེ་སྒོ་མོ་ཆེའི་ཐང་ཆེན་རེད། སྐར་ལྔའི་དར་དམར་གྱི་འོག་རེད། འདི་རྒྱ་ནག་གིས་ཐག་བཅད་པ་རེད།
སྐབས་འདིར་རྨི་ལམ་འདི་སླར་ཡང་ངའི་རྨི་ལམ་ལ་འཁོར་བྱུང་། ངའི་རྨི་ལམ་དེ་བྱེའུ་ཚང་ཞིག་གི་ནང་དུ་རེད། བྱེའུ་ཚང་དེའི་ནང་དུ་ཧུའུ་ཅིན་ཐའོ་འདུག བྷུ་ཤུ་འདུག བྷུ་ཤུའི་གཡས་གཡོན་གཉིས་ན་ཛིམ་བྷ་ཝའི་སྲིད་འཛིན་མུ་གྷ་བྷེ་དང་། ཁུ་བྷ་ཡི་སྲིད་འཛིན་ཁ་སི་ཊུ་རོ་གཉིས་ལངས་འདུག ངས་འདི་ཡ་མཚན་དུ་མཐོང་། ད་དུང་འབར་མའི་དམག་སྤྱི་སོགས་འཛམ་གླིང་གི་དབུ་ཁྲིད་མཐའ་དག་བྱེའུ་ཚང་འདིའི་ནང་འཛུལ་འདུག ཁོང་ཚོ་གད་མོ་བགོད་གིན་འདུག འོན་ཀྱང་། བྱེའུ་ཚང་འདིའི་མཐའ་དམག་གིས་སྐོར་འདུག
འཛམ་གླིང་གི་རྨི་ལམ་གཅིག་དེ་མངོན་འགྱུར་མ་བྱུང་གོང་དུ་ངས་འདི་ལྟར་རྨི་ལམ་གྱི་གོ་བ་ལྡོག་ནས་རྨིས། ངས་བྱེའུ་ཚང་འདི་སྔར་ལས་ཀྱང་འཇིགས་ཡེར་བ་དང་གུ་དོག་པོར་མཐོང་ཞིང་། ངའི་རྨི་ལམ་དེ་བྱེའུ་ཚང་གི་ནང་ནས་ཕྱི་ལ་ཐོན། པེ་ཅིན་གྱི་མཁར་གྲོང་དང་ལམ་མདོ་དག་བརྒྱུད་ནས་སླེབས། ང་གང་དུ་ཕྱིན་ནའང་ངའི་རྒྱབ་ན་དམག་མི་ཞིག་གིས་བལྟས་བསྡད་འདུག ང་དོན་མེད་ལ་དངངས་སྐྲག་ཅིག་གིས་དེད་ནས་འགྲོ་གི་འདུག ངས་རང་དབང་མ་མཐོང་ལ་མཛའ་བརྩེའང་མ་ཚོར།
ངའི་རྨི་ལམ་མུ་མཐུད་ནས་འཁྲིག ང་ཕ་ཡུལ་བོད་དུ་ཕྱིན་འདུག ལྷ་སའི་ཇོ་ཁང་དང་པོ་ཏ་ལའི་མདུན་ཐང་། གདན་ས་ཁག་ཚང་མ་དམག་གིས་སྐོར་འདུག སྔར་གྱི་དམག་ལྭ་ལྗང་ཁུ་གྱོན་པའི་དམག་མི་དེས་ཡང་བསྐྱར་ངའི་རྒྱབ་ན་བལྟས་འདུག ང་སྡོད་བཟོད་མ་བདེ་བར་ཕྱིན། ང་བླ་བྲང་དང་རེབ་གོང་དུ་ཕྱིན། རྔ་པ་དང་རྨ་ཆུ་རུ་ཕྱིན། དཀར་མཛེས་དང་མགོ་ལོག་ཕྱོགས་སུ་ཕྱིན། ང་གང་དུ་སོང་ན་དེ་རུ་དམག་གིས་ཁེངས་འདུག དམག་སྒར་གྱི་འདབ་ན་བོད་མི་སྐོར་ཚོགས་རེས་ཞབས་བྲོ་འཁྲབ་གི་འདུག འོན་ཀྱང་། དམག་མི་འགས་པར་རྒྱག་པ་མ་གཏོགས་ཕྱི་རྒྱལ་གྱི་གསར་འགོད་པ་མི་འདུག བོད་ས་ཁུལ་གྱི་གསར་འགོད་པ་ཚང་མ་དམག་མི་རེད། འགྲིམ་འགྲུལ་གྱི་ཁ་ལོ་བ་ཡང་དམག་མི་རེད། བོད་མིའི་ཞབས་བྲོ་ལ་ལྟ་མཁན་ཡང་དམག་མི་རེད། ང་གང་དུ་ཕྱིན་ནའང་སྣེ་ལེན་བྱེད་མཁན་དང་སྐྱེལ་མ་བྱེད་མཁན། གཞུག་ནས་ལྟ་མཁན་ཚང་མ་དམག་མི་རེད།
འདིའི་རྐྱེན་གྱིས་ང་རྨི་ལམ་ནང་སླར་ཡང་བཙན་བྱོལ་དུ་ཡོང་གི་འདུག ས་མཚམས་དང་འགག་སྒོ་ཚང་མ་དམག་གིས་སྐོར་འདུག ངས་ཐར་ལམ་ཞིག་རྩ་ནས་མ་རྙེད། དེ་ལྟར་ང་རི་མགོ་སྐོར་ནས་ཡོང་གི་འདུག ནང་པ་ལར་བསླེབས་མ་ཐག་ཏུ་གློ་བུར་ལ་ངའི་རྒྱབ་ནས་མེ་མདའི་སྐད་གྲགས་སོང་། མཚམས་འདི་ནས་སྐྲག་དངངས་ཤིག་དང་མཉམ་དུ་ང་གཉིད་ལས་སད། ངའི་སྙིང་གི་འཕར་སྒྲ་ཤུགས་ཆེར་ལྡིང་གི་འདུག ངས་འདི་རྨི་ལམ་ཐུན་གཅིག་ཡིན་པ་ཤེས་བཞིན་དུའང་མངོན་སུམ་གྱི་ཚོར་བ་ཞིག་འགོག་ཏུ་མེད་པར་སྐྱེས།
བདུན་ཕྲག་གཅིག་གི་རིང་འདིར་པེ་ཅིན་གྱི་མགོ་ཁྲིད་ཚོས་འཛམ་གླིང་གཅིག་ལ་རྨི་ལམ་གཅིག་ཅེས་པའི་འབོད་ཚིག་འོག་ཨོ་ལིམ་པིག་རྩེད་འགྲན་ལ་གྲ་སྒྲིག་བྱེད་སྐབས། ངའི་རྨི་ལམ་ནི་འདི་ལྟར་འཇིགས་ཡེར་བ་ཞིག་རེད་ལ། འཛམ་གླིང་གིས་སྐྱོབ་མ་ཐུབ་པར་ཡོད་པའི་ངའི་བོད་རིགས་སྤུན་ཟླ་ཚོས་ཀྱང་ཕལ་ཆེར་རྨི་ལམ་འདི་ལྟ་བུ་ཞིག་རྨི་གིན་ཡོད་ཚོད་ཡིན།
ངས་རྨི་ལམ་གཞན་ཞིག་རྨིས། དེའི་ནང་དུ་མི་སྐོར་ཞིག་འདུག ཐོག་མར་གདོང་ཁེབ་ནག་པོ་གཡོག་པའི་མི་སྐོར་ཞིག་གིས་བྱང་ཤར་ས་ནས་འབམ་དང་མེ་མདའ་ཁྱེར་ནས་རྒྱུག་གི་འདུག ཁོང་ཚོས་བྱེའུ་ཚང་དེ་གཏོར་གི་ཡོད་པ་རེད་ཟེར། དེ་ཕྱི་ཚེས་ ༨ ཀྱི་ཉིན་རེད། དེ་བཞིན་ཉིན་དེར་རྒྱ་ནག་གི་ནུབ་ཕྱོགས་ས་ནས་བོད་པ་ཚོས་རྒྱལ་དར་ཁྱེར་ནས་རྒྱུག་གི་འདུག འབྲོག་ཕྱོགས་ནས་རྟ་ལ་ཞོན་ནས་རྒྱུག་གི་འདུག གློ་བུར་དུ་སྔོན་མ་ནང་བཞིན་རྒྱ་དམག་གིས་སོད་སོད་གཏུབ་གཏུབ་ཀྱི་མེ་སྒྱོག་ཁྱེར་ནས་སླེབས་ཐལ། མཐོ་སྒང་འདི་ཐན་ཁེ་ཡིས་ཁེངས་འདུག རྒྱ་ནག་གཞུང་གིས་སླར་ཡང་ནུབ་ཕྱོགས་ཀྱི་གསར་འགོད་པ་དག་བཀག་འདུག ཡིན་ནའང་གནས་ཚུལ་དེ་ག་ས་གང་ནས་ཁ་ཤོར་ཏེ་འཛམ་གླིང་ཡོངས་ནས་གོ་ཐལ། ནུབ་ཕྱོགས་ཀྱི་མི་དམངས་ནི་ཧ་ལས་པ་ཞིག་ངར་འདུག བྱེའུ་ཚང་ནང་གི་ལུས་རྩལ་བ་མང་པོ་ཞིག་སོ་སོའི་རྒྱལ་ཁབ་ཀྱིས་ཕྱིར་འཐེན་བྱེད་ཀྱི་འདུག་ལ། ཁག་ཅིག་གིས་བྱེའུ་ཚང་ནང་ནས་སྐད་བརྒྱབས་སོང་། བྷུ་ཤུ་ཕྱིར་ཨ་རིར་ཕེབས་སྐབས་ཨ་རིའི་མང་ཚོགས་ཀྱིས་ངོ་རྒོལ་བྱེད་ཀྱིན་འདུག ཨོ་བྷ་མས་དུས་སྐབས་འདི་དང་བསྟུན་ནས་ཆབ་སྲིད་ཀྱི་བསྒྲགས་གཏམ་ཤུགས་ཆེན་པོ་ཞིག་བསྒྲགས་སོང་། ཁོང་གིས་ཡུ་རོབ་རྒྱལ་ཁབ་ཁག་ཨ་རིའི་མཉམ་དུ་ལངས་དགོས་པར་བཤད། འཇར་མན་དང་ཧྥ་རན་སིའི་མང་ཚོགས་ནི་ཟླ་སྔོན་མར་ཨོ་བྷ་མའི་རྒྱབ་རྩར་ལངས་པ་བཞིན། སོ་སོའི་རྒྱལ་ཁབ་ཀྱི་དབུ་ཁྲིད་དག་གིས་ཨོ་བྷ་མའི་སྐད་ཆར་ཉན་དགོས་སྐོར་བཤད། འདི་ལྟར་ངའི་རྨི་ལམ་ཧ་ལས་པ་ཞིག་འཁྲིག་སོང་།
ད་ནི་རྨི་ལམ་ཐུན་གཅིག་མ་གཏོགས་རྨི་ཁོམ་མི་འདུག བདུན་ཕྲག་གཅིག་གི་རྗེས་ནས་འཛམ་གླིང་གཅིག་དང་རྨི་ལམ་གཅིག་དེ་མཇུག་སྒྲིལ་གི་རེད། རྒྱ་ནག་དང་དཔལ་འབྱར་གྱི་ཚོང་འབྲེལ་ཆེས་བཟང་བའི་རྒྱལ་ཁབ་དག་དང་ཨོ་ལིམ་པིག་རྩེད་འགྲན་ཚོགས་གཙོ། ཐེངས་འདིའི་རྩེད་འགྲན་གྱི་སྦྱིན་བདག རྒྱ་ནག་གི་དཔོན་རིགས་ཚོ་བཅས་ཀྱི་འཇིགས་ཡེར་ཞིང་གདུག་རྩུབ་ཆེ་བའི་རྨི་ལམ་འདི་མཇུག་སྒྲིལ་གྱི་རེད། ཡིན་ནའང༌། ཆེས་མཐའ་མཇུག་གི་རྨི་ལམ་ཐུན་གཅིག་དེ་ཁོང་ཚོར་མཚོན་ན་སྐྲག་སྣང་ཧ་ཅང་ཆེ་ཞིང་གཉིད་ཉལ་མི་ཕོད་པའི་རྨི་ལམ་ཞིག་དང༌། དུས་ཚོད་སྐར་ཆ་རེ་རེ་དང་ཐག་སྒྲ་རེ་རེ། སྙིང་ཁམས་ཀྱི་འཕར་ལྡིང་རེ་རེ་འགྲན་དུ་ཞུགས་པའི་རྨི་ལམ་ཞིག་ཡིན་ཨང༌།
རྣམ་པ་གཉིས་ཀྱིས་འདིར་བསམ་ཚུལ་བཏོན་པར་ཐུགས་རྗེ་ཆེ།
བྱེའུ་ཚང་ནང་གི་རྨི་ལམ་འདི་བྲིས་རྗེས་ཀྱི་ཉིན་ ༤ པ་དེར་བྱེའུ་ཚང་འདི་བཟོ་མཁན་གྱིས་སྐད་ཆ་རེ་ཟུང་བཤད་འདུག དེའི་ནང་ནས་རྨི་ལམ་འདིར་ཁ་སྣོན་ལྟ་བུ་རེ་ཡོད་པ་ནི། ༼རྒྱ་ནག་གཞུང་གིས་པེ་ཅིན་གྱི་ཨོ་ལིམ་པིག་རྩེད་འགྲན་སྐབས་ཉེན་རྟོག་པ་ ༡༠༠༠༠༠ དང་། པར་ཆས་ ༣༠༠༠༠༠ བཙུགས་ཡོད་ལ། བྱེའུ་ཚང་ར་བའི་གཤམ་དུ་བར་སྣང་འཕུར་མདེལ་འགོག་བྱེད་བཙུགས་ཡོད་འདུག གྲོང་ཁྱེར་ནང་དུ་འཛུལ་སར་ཞིབ་བཤེར་ས་ཚིགས་ཕྱི་ནང་གསུམ་ཡོད་ལ། ངོ་རྟགས་ལག་འཁྱེར་ཞིབ་བཤེར་གྱི་ལས་དོན་མུ་མཐུད་ནས་བཟོ་བཞིན་ཡོད་ཚུལ་འདུག༽ཞེས་པ་འདི་དང་། ༼ངས་བལྟས་ན་འདི་ནི་ངོ་ཚ་ཞིག་རེད། འདི་ནི་མཐོང་ཤོར་བ་ཞིག་རེད། ཐོག་མའི་བསམ་ཚུལ་ནི་རྒྱལ་སྤྱིའི་སྤྱི་ཚོགས་མགྲོན་འབོད་བྱས་ཏེ། འགྲོ་བ་མིའི་གུས་བརྩི་དང་རིན་ཐང་མཉམ་སྤྱོད་བྱེད་པ། ཞི་བདེ་དང་འཆམ་མཐུན་གླེང་གི་ཡོད་པ་རེད། ཡིན་ནའང་དེ་རིང་། ཁྱེད་ཀྱིས་ཉེན་རྟོག་པ་ག་ས་གང་ནས་མཐོང་གི་རེད། གྲོང་པ་ཁྱིམ་མཚེས་གང་དུ་ཕྱིན་ནའང་དེ་རུ་བདེ་འཇགས་ཀྱི་ལས་དོན་ཤུགས་ཆེར་སྤེལ་གྱི་ཡོད་པ་རེད། འདི་པེ་ཅིན་གཅིག་པུ་མ་རེད། རྒྱ་ནག་གི་ཡུལ་ལུང་གང་སར་ཁྱབ་ཡོད་པ་རེད། མི་རྣམས་ནི་དངོས་གནས་ཉེན་རྟོག་པའི་སྲིད་གཞུང་ཞིག་གི་འོག་ན་བསྡད་ཡོད་པ་རེད༽ འདི་ཚོ་རེད། འདིའི་སྐོར་གྱི་གནས་ཚུལ་ནི་དུས་བབ་དྲ་རྒྱའི་སྟེང་ཉེན་རྟོག་པའི་རྒྱལ་ཁབ་དང་དེའི་ངོ་ཚ་ཞེས་པའི་ནང་བཀོད་ཡོད།
ད་ཆར་བྱེའུ་ཚང་ནང་གི་རྨི་ལམ་འདི་རྨི་མཁན་བོད་པ་གཅིག་པོ་མ་རེད། ཞིན་ཅང་དུའང་འདུག དཔེར་ན། བྱེའུ་ཚང་འདི་དངོས་སུ་བཟོ་མཁན་ ཨི་ཝེ་ཝེ་རེད།རྒྱ་ནག་གི་མི་སེར་ཚང་མར་འདི་ལྟའི་རྨི་ལམ་ཞིག་ཡོད་པ་འདྲ། གལ་སྲིད་དེ་ལྟར་ཡིན་ཚེ་མི་གྲངས་དུང་ཕྱུར་ ༡༣ གྱི་རྨི་ལམ་འཁྲིག་པའི་དབང་གིས། རྒྱ་ནག་གི་དཔོན་རིགས་ཚོ་ལའང་རྨི་ལམ་སྐྱིད་པོ་ཞིག་མེད་ཚོད་ཡིན།
རྨི་ལམ་འདི་ང་ཚོ་ཐུན་མོང་ལ་ཡོད་པའི་རྨི་ལམ་ཞིག་རེད། འོན་ཀྱང༌། ང་ཚོའི་རེ་བ་དང་ཕུགས་བསམ་ཡོད་ཚད་ཡང་རྨི་ལམ་འདིའི་འཇིགས་སྐྲག་འོག་ནས་རྒས་སོང། ད་ནི་ང་ཚོའི་རྨི་ལམ་མ་གཏོགས་བོད་ལ་ལོག་མི་ཐུབ་པའི་མཚམས་ཤིག་ལ་སླེབས་ཀྱི་ཡོད་པ་འདྲ།
དུས་བབ་རྩོམ་སྒྲིག་པ་ལགས་ནས་བྱེའུ་ཚང་ནང་གི་རྨི་ལམ་ཞེས་པའི་རྩོམ་ཡིག་ཅིག་སྤེལ་འདུག་པ་དེ་བཀླགས་ནས་ང་ལ་ངས་ཚར་བརྒྱ་ཕྲག་ཁ་ཤས་རྨིས་པའི་རྨི་ལམ་འཇིགས་པོ་དེ་དག་ཡང་སྐྱར་སེམས་གཏིང་ནས་སྔོགས་འདོན་ཐེངས་ཤིག་བྱེད་དགོས་པའི་གཟུགས་མེད་ཀྱི་་སྒུལ་ཤུགས་ཤིག་བསླེབས་སོང་། ཨ་མདོ་ནས་ལྷ་ས་དང་དེ་ནས་གཙང་དང་ས་དགའ། རྒྱལ་མཚམས་རྡོ་རིང་གི་རྒྱབ་མདུན་དང་བལ་ཡུལ་ས་ཐོག་ཏུ་བསླེབས་པ་སོགས་མུ་ཁྱུད་རིང་མོ་འདིའི་ཀློང་དུ་འཇིགས་སྐྲག་དང་དངངས་འཚབ། རེ་བ་དང་ཡི་ཆད་སོགས་ལུ་གུ་བརྒྱུད་དུ་བསྟར་བའི་ལོ་ཟླ་དེ་དག་ལོ་ངོ་འདི་ཚོའི་རིང་ལ་ཡང་ནས་སྐྱར་དུ་རྨི་ལམ་དུ་འཁོར་བཞིན་འདུག་ལ། རྨི་ལམ་འདི་དག་གི་ཁྲོད་ནས་སྐབས་རེར་རྒྱ་དམག་དང་ལན་རེར་བལ་བོའི་ས་སྲུང་དམག་མི། ཡང་སྐབས་རེར་རྒྱ་གར་གྱི་ས་མཚམས་ཉེན་རྟོག་པ་སོགས་མིའི་ལུས་ལ་སྤྱང་ལྟོགས་ཀྱི་རྣམ་ཤེས་ཞུགས་པ་དེ་ཚོའི་རྗེས་འདེད་དང་འཇིགས་སྐུལ། གཅར་རྡུང་དང་འཕྲོག་བཅོམ་སོགས་བྲོས་བྱོལ་བ་ཞིག་ལ་སྤྱོད་པའི་གདུག་རྩུབ་ཀྱི་བྱ་སྤྱོད་རེ་རེས་མཚན་རིང་གི་རྨི་ལམ་སྐྱིད་པོ་དག་གི་གོ་སྐབས་ཡོངས་སུ་འཕྲོགས་པ་དེ་ནི། ང་རང་གཅིག་པོ་མ་ཡིན་པར་གྲོགས་པོ་གང་མང་ཞིག་ལ་ཡང་དེ་བཞིན་གྱི་འཇིགས་རུང་རྨི་ལམ་འདི་དག་ལུས་པོ་རྒྱ་བལ་དང་ཨ་རི་ཡོ་རོབ་གང་དུ་ཡོད་མིན་ལ་མ་ལྟོས་པར་ཡང་ནས་སྐྱར་དུ་རྨིས་དང་རྨི་བཞིན་འདུག་པས། ང་ཚོར་མཚོན་ན་རྨི་ལམ་རྨི་སྟངས་གཅིག་པོའི་ཆ་ནས་ཀྱང་རྒྱལ་ཁབ་ཡོད་པའི་མི་མང་དག་དང་ཤིན་ཏུ་མི་འདྲ་བའི་ལོ་རྒྱུས་རིང་མོ་ཞིག་འདུག་ཅེས་དབང་མེད་དུ་ཐལ་ལོ། །