ཆོས་ལུགས་རིག་གནས་ཀྱི་དབང་བསྒྱུར་བསྐྱར་གསོ།

རྒྱ་ནག་གིས་བཤད་དོན། ཏཱ་ལའི་ཤོག་ཁག་གིས་བོད་ལ་རིག་གཞུང་རང་སྐྱོང་གི་དགོས་འདུན་ཞིག་འདོན་བཞིན་པ་འདི་ནི། རིག་གནས་རང་སྐྱོང་ལ་ཁ་གཡར་ཏེ། བོད་ལྗོངས་དང་བོད་ཀྱི་ས་ཁུལ་གཞན་དག་ཏུ་ཆོས་ལུགས་རིག་གནས་ཀྱི་དབང་བསྒྱུར་བསྐྱར་གསོ་དང༌། ལོ་རྒྱུས་ཀྱི་འཕེལ་རིམ་དང་ལྡོག་པའི་བོད་ཁུལ་ཡོངས་རྫོགས་རང་བཙན་བྱེད་རྒྱུའི་ཆབ་སྲིད་ཀྱི་གཡོ་ཇུས་ཤིག་ཡིན་སྟབས། ནམ་ཡང་འགྲུབ་ཐབས་མེད་པ་ཞིག་རེད་ཟེར།

རྒྱ་ནག་རྒྱལ་སྲིད་སྤྱི་ཁྱབ་ཁང་གསར་འགྱུར་ཚན་ཁག་ནས་ཕྱི་ཚེས་ ༢༥ ཉིན་༼བོད་ལྗོངས་ཀྱི་རིག་གནས་སྲུང་སྐྱོབ་དང་དར་སྤེལ་ལ་བཏོན་པའི་ཡིག་ཆ་༽ཞེས་པའི་རྒྱབ་ཤ་དཀར་པོའི་དེབ་ཅིག་བཏོན་ཡོད་པ་དང་། འདི་ནི་རྒྱ་ནག་གིས་བཙན་བྱོལ་བོད་གཞུང་གི་སྲིད་བྱུས་ལ་ལན་འདེབས་བྱས་པ་མཐའ་མ་དེ་ཆགས་ཡོད་ཅིང་། ཡིག་ཆ་དེ་ནི་ཏག་ཏག་བོད་མི་རྣམས་ཀྱིས་བོད་ཀྱི་མ་འོངས་པའི་ཆབ་སྲིད་ཀྱི་གནས་བབ་ཐག་གཅོད་ཕྱོགས་ལ་གོ་བསྡུར་བྱེད་ཀྱིས་པའི་སྐབས་སུ་འཁེལ་ཡོད་ལ། གོ་བསྡུར་འདིའི་སྐབས་ཀྱི་ཟུར་ལྟའི་ཡིག་ཆ་གལ་ཆེན་ཞིག་ཏུའང་གྱུར་ཡོད།

རྒྱ་ནག་གི་རྒྱབ་ཤ་དཀར་པོའི་དེབ་དེའི་ནང་འཁོད་དོན། ཡིག་ཆ་འདི་ནི་དུས་རབས་ཕྱེད་ཀའི་རིང་དང༌། ཡང་ན་བཅོས་བསྒྱུར་སྒོ་འབྱེད་བྱས་ཚུན་ནས་ཀྲུང་གོ་གུང་ཁྲན་ཏང་གིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང༌།མི་རིགས་ས་གནས་རང་སྐྱོང་གི་ཁྲིམས་ལུགསགཏན་འབེབས་བཞིན་བོད་ཀྱི་རིག་གནས་སྲུང་སྐྱོབ་དང་དར་སྤེལ་ཐད་ལ་བཏོན་པའི་ཡིག་ཆ་ཞིག་ཡིན། འདི་ནི་ཀྲུང་གོའི་སྲིད་གཞུང་གིས་བོད་ཀྱི་རིག་གཞུང་ལ་མི་ཤུགས་རྒྱུ་གསུམ་ནས་དོ་སྣང་ཆེན་པོ་བྱེད་བཞིན་པའི་རྟགས་མཚན་ཞིག་ཡིན་པ་དང༌། དེ་དང་ཆབས་ཅིག་ཚན་རིག་དང་མཐུན་པའི་རིག་གནས་སློབ་གསོ་ལ་མཐོང་ཆེན་བྱས་ཏེ་བོད་ལྗོངས་ཀྱི་སློབ་གསོ་ལ་སྔར་མེད་དར་སྤེལ་དང་སྲུང་སྐྱོབ་བྱས་ཡོད་པའི་གནས་ཚུལ་བཀོད་ཡོད། 

ཡིག་ཆ་འདི་ནི་རྒྱ་ནག་གཞུང་གིས་བོད་ལྗོངས་ལ་བཏོན་པའི་ཡིག་ཆ་ཐེངས་ ༧ པ་དེ་ཡིན་ལ།  དེར་ཡིག་འབྲུ་ཁྲི་གཅིག་སྟོང་གསུམ་ཡོད་ལ་སྔོན་གླེང་དང༌། བོད་ཀྱི་སྐད་ཡིག་སློབ་སྦྱོང༌། བཀོལ་སྤྱོད། དར་སྤེལ། ཤུལ་བཞག་རིག་གནས་རྒྱུད་འཛིན་དང་སྲུང་སྐྱོབ་ཁྱབ་སྤེལ་སྐོར། ཆོས་ལུགས་དད་མོས་དང་མི་རིགས་ཀྱི་ཡུལ་སྲོལ་ལ་བརྩི་བཀུར་བྱེད་དགོས་པའི་སྐོར། དེང་རབས་ཚན་རིག་སློབ་གསོ་དང་གསར་འགྱུར་ལས་རིགས་ཕྱོགས་ཡོངས་ནས་འཕེལ་རྒྱས་གཏོང་དགོས་པའི་སྐོར་དང་མཇུག་བྱང་བཅས་དུམ་མཚམས་དྲུག་ཡོད་འདུག

རྒྱལ་སྲིད་སྤྱི་ཁྱབ་ཁང་གསར་འགྱུར་ཚན་ཁག་ནས་གནས་ཚུལ་སྤེལ་བ་ལྟར་ན། འཛམ་གླིང་རྒྱལ་ཁབ་ཁག་གིས་བོད་ཀྱི་རིག་གནས་སྲུང་སྐྱོབ་བྱེད་དགོས་པའི་དགོས་འདུན་ལ་སྐུལ་འདེད་བྱ་ཆེད་དང༌། ཏཱ་ལའི་རུ་ཚོགས་ཀྱིས་བོད་ཀྱི་རིག་གནས་རྩ་མེད་བཟོ་བཞིན་འདུག་ཅེས་པའི་རྫུན་གཏམ་དང༌། བོད་ཀྱི་རིག་གནས་རང་སྐྱོང་བྱེད་དགོས་པའི་དངོས་ཡོད་དགོས་འདུན་གསལ་འདོན་བྱ་ཆེད་དང༌། དེ་དང་དུས་མཚུངས་བོད་ལྗོངས་རིག་གནས་འཕེལ་རྒྱས་ལ་སྐུལ་འདེད་བྱ་ཆེད་དམིགས་བསལ་གྱི་ཡིག་ཆ་འདི་བཀྲམས་པ་ཡིན།

ཏཱ་ལའི་རུ་ཚོགས་དང་ནུབ་ཕྱོགས་ངོ་རྒོལ་བ་ཚོས་དེང་རབས་ཀྱི་དཔལ་ཡོན་དང་རིག་གནས་ཁོ་ན་ལོངས་སུ་སྤྱོད་བཞིན་བོད་ལྗོངས་རིག་གནས་སྲུང་སྐྱོབ་ལ་ཁ་གཡར་ཏེ། བོད་མི་རིགས་དང་བོད་ཀྱི་རིག་གནས་དེ་ད་དུང་ཡང་དུས་རབས་བར་མའི་རྣམ་པར་གནས་ཡོད་ཚུལ་བརྗོད་བཞིན་ཡོད། འདི་དག་ལ་གཞིགས་ཚེ་ཁོང་ཚོའི་སེམས་པ་རྣམ་དག་མིན་པ་གསལ་བོར་རྟོགས་ཐུབ། གནས་སྟངས་འདི་དག་བོད་ལྗོངས་མི་དམངས་འདུས་པའི་ཀྲུང་གོའི་མི་རིགས་ཡོངས་ཀྱིས་ངོས་ལེན་བྱེད་ཐབས་བྲལ།

འདས་བའི་དུས་རབས་ཕྱེད་ཀའི་ནང༌། ཀྲུང་གོའི་སྲིད་གཞུང་གིས་བོད་ལྗོངས་མི་དམངས་ལ་རང་ཉིད་ཀྱི་སྐད་ཡིག་བཀོལ་སྤྱོད་ཀྱི་བདག་དབང་སྲུང་སྐྱོབ་གཙིགས་སུ་བཟུང་སྟེ། བོད་སྐད་ཡིག་སློབ་སྦྱོང་ལ་སྐུལ་སློང་དང༌། ལག་ལེན། དར་སྤེལ་ཐད་ནུས་པ་ཆེན་པོ་བཏོན་ཏེ་གྲུབ་འབྲས་མངོན་གསལ་བླངས། བོད་སྐད་ཡིག་གི་སློབ་སྦྱོང་དང་བཀོལ་སྤྱོད་ཐད་ཁྲིམས་ལུགས་ཀྱི་འགན་སྲུང་བྱས་ཏེ། སྐད་ཡིག་སློབ་སྦྱོང་ཁྱབ་ཁོངས་རྒྱ་བསྐྱེད་དང་རྒྱུན་འཁྱོངས་ཡུན་གནས་གནང་སྟེ་ཕྱོགས་ཡོངས་ནས་འཕེལ་རྒྱས་ཆེན་པོ་ཕྱིན་ཡོད།

བོད་ལྗོངས་ཀྱི་ཤུལ་བཞག་རིག་གནས་ནི་ཀྲུང་གོའི་ཤུལ་བཞག་རིག་གནས་ཀྱི་གྲུབ་ཆ་གལ་ཆེན་ཞིག་ཡིན། ཀྲུང་དབྱང་མི་དམངས་སྲིད་གཞུང་གིས། བོད་ཀྱི་སྲོལ་རྒྱུན་རིག་གནས་སྲུང་སྐྱོབ་ལ་གཙིགས་ཆེན་གནང་སྟེ། དངོས་ཤུགས་རྒྱུད་གསུམ་དང༌། ཁྲིམས་དང༌། དཔལ་འབྱོར། སྲིད་འཛིན་སོགས་ཀྱི་ཐད་ལམ་འདྲ་མིན་སྤྱད་དེ། བོད་ལྗོངས་ཀྱི་ཕུལ་བྱུང་སྲོལ་རྒྱུན་རིག་གནས་གྲུབ་འབྲས་ལྡན་པའི་སྲུང་སྐྱོབ་རྨང་གཞིའི་འོག་རྒྱུན་འཁྱོངས་དང་དར་སྤེལ་བྱས་ཡོད།

ཡིག་ཆའི་ནང་གསལ་དོན། དད་ལྡན་མང་ཚོགས་ཀྱིས་ཆོས་ལུགས་དད་མོས་དགོས་མཁོ་སྐོང་ཆེད་རྒྱལ་ཁབ་ཀྱི་ཐབས་ལམ་འདྲ་མིན་སྤྱད་དེ། དགོན་སྡེ་དང་གནའ་ཤུལ་རིག་གནས་འོས་མཐུན་སྲུང་སྐྱོབ་གནང་ཡོད། བོད་ལྗོངས་ཆོས་ལུགས་ཀྱི་བྱེད་སྒོ་ཕུན་སུམ་ཚོགས་པ་དང༌། རྣམ་པ་འདྲ་མིན་གྱི་རྒྱུན་ལྡན་གྱི་ཆོས་ལུགས་བྱེད་སྒོ་དང༌། དད་མོས་ལ་ཁྲིམས་ཀྱི་སྲུང་སྐྱོབ་བྱས་ཡོད། བོད་ལྗོངས་ཞི་བའི་བཅིངས་འགྲོལ་གྱི་རྗེས་སུ། ཀྲུང་གོའི་སྲིད་གཞུང་གིས་བོད་ལྗོངས་དང་མི་རིགས་གཞན་པའི་སྲོལ་རྒྱུན་གྱི་ཡུལ་སྲོལ་གོམས་གཤིས་ལ་དམིགས་བསལ་གྱི་ལྟ་རྟོག་དང་བརྩི་འཇོག་གནང་ཡོད། མི་རིགས་སོ་སོའི་འདོད་མོས་ལྟར་ཆོལ་ལུགས་དང་དམངས་ཁྲོད་ཀྱི་སྲོལ་རྒྱུན་བྱ་འགུལ་ལ་རང་དབང་སྤྲད་ཡོད།

གཞན་ཡང༌། ཞི་བའི་བཅིངས་འགྲོལ་རྗེས་སུ། དེང་རབས་འཕེལ་རྒྱས་དང་བསྟུན་ཏེ། བོད་ཀྱི་ཕུལ་བྱུང་སྲོལ་རྒྱུན་རིག་གནས་རྒྱུད་འཛིན་དང་སྲུང་སྐྱོབ། ཁྱབ་སྤེལ་བཅས་གནང་བ་མ་ཟད། དེང་རབས་ཚན་རིག་སློབ་གསོ་དང་གསར་འགྱུར་རིག་པའི་ཐད་ལའང་ཕྱོགས་ཡོངས་ནས་འཕེལ་རྒྱས་བྱུང་ཡོད།

འདས་པའི་དུས་རབས་ཕྱེད་ཀའི་ནང༌། བོད་ཀྱི་རིག་གནས་ཉམ་ཆག་སོང་མེད་པ་ནི་དངོས་མཐོང་ལག་ཟིན་ཡིན་པ་མ་ཟད། དེ་ལས་ལྡོག་སྟེ། མི་རིགས་ཁྱད་ཆོས་ལྡན་པའི་སྲོལ་རྒྱུན་རིག་གནས་འོས་མཐུན་གྱི་རྒྱུད་འཛིན་དང༌། གྲུབ་འབྲས་ལྡན་པའི་སྒོ་ནས་སྲུང་སྐྱོབ་རྒྱ་ཆེར་དར་སྤེལ་བྱས་ཏེ། དུས་རབས་གསར་བར་ཁ་ཕྱོགས་པ་དང༌། མ་འོངས་པར་ཁ་ཕྱོགས་པ། འཛམ་གླིང་ལ་ཁ་ཕྱོགས་ཏེ། བོད་ལྗོངས་སྤྱི་ཚོགས་ཀྱི་དཔལ་འབྱོར་འཕེལ་རྒྱས་དང་བཅོས་བསྒྱུར་སྒོ་འབྱེད་ཐད་ཕྱོགས་ཡོངས་ནས་མགྱོགས་མྱུར་ངང་འཕེལ་རྒྱས་སུ་བཏང་ཡོད།

དུས་རབས་གསར་བའི་ནང་བོད་ལྗོངས་རིག་གནས་ལ་སྔར་མེད་ཀྱི་གསོན་ཤུགས་དང༌། ནང་དོན་ཕུན་སུམ་ཚོགས་ལ་གསར་གཏོད་ཀྱི་རྣམ་པ་མངོན་ཡོད། བོད་ལྗོངས་མི་མང་གི་འཚོ་བ་དང་དེང་རབས་ཅན་འཕེལ་རྒྱལ་ལ་ཤུགས་རྐྱེན་ཟབ་མོ་བཞག་པ་མ་ཟད། ཁྱད་འཕགས་ཡིད་འགུག་གི་ནུས་པས་རྒྱལ་ཁབ་ཕྱི་ནང་གི་མི་རྣམས་ཀྱི་མིག་དབང་འཕྲོག་ཡོད་པ་དང༌། ཀྲུང་ཧྭ་མི་རིགས་ཀྱི་སྣ་མང་གཅིག་བསྡུས་རིག་གནས་ཕུན་སུམ་ཇེ་ཚོགས་སུ་བཏང་སྟེ། འཛམ་གླིང་རིག་གནས་ལ་ཤུགས་རྐྱེན་ཟབ་མོ་བཞག་ཡོད། ད་ལྟའི་བོད་ལྗོངས་རིག་གནས་ཀྱི་སྲུང་སྐྱོབ་དང་ཁྱབ་སྤེལ། འཕེལ་རྒྱས་ཀྱི་གནས་སྟངས་དེ་ནི་བོད་ལྗོངས་ཀྱི་འདས་བའི་ལོ་རྒྱུས་དུས་སྐབས་གང་གིས་ཀྱང་འགྲན་ཐབས་མེད་པ་ནི་འུར་བསྟོད་བྱས་པ་ཞིག་མ་ཡིན་པར་དངོས་ཡོད་ལ་བརྩི་བཀུར་བྱེད་པའི་མི་སུས་ཀྱང་ངོས་ལེན་བྱེད་ངེས་རེད།

ཏཱ་ལའི་རུ་ཚོགས་ཀྱིས་དངོས་ཡོད་གནས་ཚུལ་ལ་བརྩི་མཐོང་མ་བྱས་པར་རྒྱལ་སྤྱིའི་སྟེང་ལ་བོད་ལྗོངས་རིག་གནས་ཉམ་ཆག་སྐོར་ལ་དཔྱད་གླེང་རྒྱ་ཁྱབ་སྤེལ་བཞིན་པ་དེ་ནི་བསམ་ཞིབ་ནན་མོ་གནང་དགོས་པ་ཞིག་རེད། དོན་དངོས་ར་འཕྲོད་བྱུང་ཐུབ་པ་ལྟར།  ཏཱ་ལའི་རུ་ཚོགས་ནི་བོད་ལྗོངས་ཀྱི་རིག་གནས་རྙིང་བའི་ཚབ་མཚོན་པ་དང་རྗེས་སྐྱོང་མཁན་ཡིན་ལ། ཀྲུང་གོའི་ཀྲུང་དབྱང་སྲིད་གཞུང་དང་བོད་རང་སྐྱོང་ལྗོངས་མི་དམངས་སྲིད་གཞུང་ནི་བོད་ལྗོངས་རིག་གནས་སྲུང་སྐྱོབ་མཁན་དང་དར་སྤེལ་གཏོང་མཁན་ངོ་མ་དེ་ཡིན།

ཡིག་ཆའི་ནང་བྲིས་དོན།  ཏཱ་ལའི་རུ་ཚོགས་ཀྱིས་བཏོན་པའི་བོད་ལྗོངས་རིག་གནས་རང་སྐྱོང་ཞེས་པའི་དགོས་འདུན་དེ་རིག་གནས་རང་སྐྱོང་ལ་ཁ་གཡར་ཏེ། བོད་ལྗོངས་དང་བོད་ཀྱི་ས་ཁུལ་གཞན་དག་ཏུ་ཆོས་ལུགས་རིག་གནས་ཀྱི་དབང་བསྒྱུར་བསྐྱར་གསོ་དང༌། ལོ་རྒྱུས་ཀྱི་འཕེལ་རིམ་དང་ལྡོག་པའི་བོད་ཁུལ་ཡོངས་རྫོགས་རང་བཙན་གྱི་ཆབ་སྲིད་གཡོ་ཇུས་དེ་ནི་ནམ་ཡང་འགྲུབ་ཐབས་བྲལ་བ་ཞིག་རེད། ཅེས་སོགས་བྲིས་ཡོད་པ་རེད།