རབ་རྒྱལ་ས་གླང་ལོའི་གནམ་ལོ་གསར་ཚེས་ལ་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་གཞིས་བྱེས་བོད་རིགས་ཡོངས་ལ་བསྩལ་བའི་གསུང་འཕྲིན།
༄༅། །བོད་རྒྱལ་ལོ་ ༢༡༣༦ རབ་བྱུང་བཅུ་བདུན་པའི་ས་གླང་གནམ་ལོ་གསར་ཚེས་ཀྱི་དུས་ཚིགས་འདིར་ངོས་ནས་བོད་ཕྱི་ནང་དུ་འཁོད་པའི་བོད་རིགས་ཡོངས་ལ་བཀྲ་ཤིས་བདེ་ལེགས་ཀྱི་འཚམས་འདྲི་དང་། ལོ་འདི་ཆོས་འབྱོར་བདེ་སྐྱིད་ཀྱིས་འཚོ་ཞིང་བདེན་མཐའ་རིམ་པས་གསལ་བའི་མཆོག་གསུམ་ལ་སྨོན་ལམ་བྱེད་ཀྱི་ཡོད།
ས་ཡི་གོ་ལ་འདིར་ཉི་ཟླ་གཟའ་སྐར་གྱི་འགྲོས་དང་བསྟུན་ཏེ། ཉིན་ཞག་ལོ་ཟླའི་འཁོར་ལོ་རྒྱུན་མར་འཁོར་བའི་འཁྱུན་ཐག་ལ་གསར་རྙིང་གི་རྣམ་དབྱེ་མེད་ཀྱང་། འཛམ་གླིང་གི་ཡུལ་གྲུ་ཡོངས་སུ་ལོ་འཁོར་སོ་སོར་གནམ་ལོ་གསར་ཚེས་ཀྱི་དུས་སྟོན་བྱེད་སྲོལ་རྒྱ་ཁྱབ་ཏུ་ཡོད་པ་བཞིན། གངས་ལྗོངས་བོད་ཀྱི་ཡུལ་དུའང་ཧོར་ཟླ་དང་པོར་གནམ་ལོ་གསར་ཚེས་ཀྱི་དུས་སྟོན་ལ་ལུགས་གཉིས་ཀྱི་དགའ་སྟོན་རྒྱ་ཆེ་བྱེད་སྲོལ་ཡུལ་གོམས་གཤིས་ལུགས་ཡོད། འོན་ཀྱང་འདས་པའི་ས་བྱི་ལོ་དེ་བཞིན་ཆོལ་གསུམ་བོད་ས་ཡོངས་སུ་བོད་རིགས་རྣམས་ཀྱིས་རྒྱ་ནག་གཞུང་གི་དབང་འཛིན་པའི་སྲིད་བྱུས་ལ་ཡི་མ་རང་བའི་ཞི་བའི་ངོ་རྒོལ་རྒྱ་ཁྱབ་ཏུ་བྱས་ཡོད། དེར་བརྟེན་བོད་མི་བརྒྱ་ཕྲག་མང་པོིའི་ལུས་སྲོག་ཤོར་བ་དང་། སྟོང་ཕྲག་མང་པོ་ཞིག་བཙོན་འཇུག་གིས་མནར་གཅོད་མྱོང་དགོས་བྱུང་བ་སོགས་དཀའ་སྡུག་ཚད་མེད་བྱུང་བའི་དབང་གིས་འདི་ལོ་གནམ་ལོ་གསར་ཚེས་སྐབས་རྒྱུན་ལྡན་བཞིན་སྤྲོ་སྐྱིད་བྱ་རྒྱུའི་གོ་སྐབས་ཤིག་གཏན་ནས་མིན་སྟབས། བོད་ཕྱི་ནང་དུ་གནས་པའི་བོད་རིགས་ཚང་མས་ལོ་གསར་གྱི་སྤྲོ་སྐྱིད་མི་གཏོང་བའི་ཆོད་སེམས་ལ་ཡི་རངས་བསྔགས་བརྗོད་དང་འབྲེལ་དུས་ཚིགས་འདི་སྡིག་སྤོང་དགེ་སྒྲུབ་དང་། རྣམ་དཀར་ཚོགས་གསོག་གི་བྱ་བར་འབད་དེ་སྔ་ལོའི་བྱུང་རྐྱེན་ནང་ལུས་སྲོག་ཤོར་བ་རྣམས་ཀྱིས་མཚོན་བོད་བསྟན་སྲིད་ཀྱི་དོན་དུ་ལུས་སྲོག་བཏང་བའི་འདས་པོ་ཚང་མ་དལ་རྟེན་རིམ་བརྒྱུད་རྒྱལ་བའི་གོ་འཕང་མྱུར་དུ་འཐོབ་པ་དང་། ད་ལྟ་མནར་གཅོད་མྱོང་བཞིན་པ་རྣམས་ཀྱང་འཕྲལ་དུ་རང་དབང་བདེ་དགའི་དཔལ་ལ་སྤྱོད་ཐུབ་པ། བོད་སྤྱི་མཐུན་གྱི་བསོད་ནམས་གོང་འཐོར་འཕེལ་ཏེ་བོད་དོན་བདེན་མཐའ་མྱུར་དུ་གསལ་བའི་ཐབས་ཚུལ་ལ་ཚང་མས་འབད་འབུངས་བྱ་དགོས།
ང་ཚོར་སྔོན་ནས་བློ་དོགས་ཡོད་པ་ལྟར་ཉེ་བའི་ཆར་བོད་ནང་རྡུང་རྡེག་ཚ་ནན་ཟེར་བའི་ལས་འགུལ་བསྐྱར་དུ་འགོ་བཙུགས་པ་དང་འབྲེལ་ཆོལ་གསུམ་བོད་ཀྱི་གྲོང་ཁྱེར་ཕལ་མོ་ཆེར་དྲག་ཆས་ཉེན་རྟོག་པ་དང་དཔུང་དམག་ཧ་ཅང་པོ་བཀོད་སྒྲིག་བྱས་པ་དང་། ས་ཁུལ་གང་སར་ཞི་འཇམ་གྱི་སྒོ་ནས་རང་གི་མངོན་འདོད་ཟུར་ཙམ་སྟོན་མཁན་ལ་ཡང་ཉེས་རྡུང་གཏོང་བ་དང་། བཙོན་དུ་འཇུག་པ། ལྷག་པར་དགོན་སྡེ་ཁག་ལ་དམིགས་བསལ་དམ་དྲག་སུན་གཙེར་གྱིས་རྒྱལ་གཅེས་ཆོས་གཅེས་ཀྱི་སློབ་གསོ་དང་། ལོ་གསར་སྔར་ལྷག་རྒྱས་སྤྲོས་ཀྱིས་གཏོང་དགོས་པའི་བཙན་བཀའ་བཏང་བ། ཕྱི་མི་ཡུལ་སྐོར་སྤྲོ་འཆམ་པ་ཚུན་བཀག་འགོག་བྱས་པ་སོགས་གནས་ཚུལ་གང་ལ་གཞིགས་ཀྱང་། བོད་མི་རིགས་རྣམས་ལ་བཟོད་ཐབས་དཀའ་བའི་གདུག་རྩུབ་བརྙས་བཅོས་སྣ་ཚོགས་ཀྱིས་བཟོད་བསྲན་མ་ཐུབ་པའི་མཚམས་སུ་ངོ་རྒོལ་བྱེད་མཁན་བྱུང་ན། སྔར་ལས་ཆེས་དྲག་པའི་དྲག་གནོན་བྱ་རྒྱུའི་འཆར་གཞི་དང་དམིགས་ཡུལ་ཡོད་པ་གསལ་བོ་ཡིན་སྟབས། བོད་རིགས་ཚང་མས་དེ་དག་ལ་སྡུག་སྒོམ་བཟོད་བསྲན་གྱི་ཐོག་ནས་རྩ་ཆེའི་ལུས་སྲོག་ཆུད་ཟོས་སུ་མི་འགྲོ་བ་དང་། སྡུག་སྦྱོང་མནར་གཅོད་མྱོང་མི་དགོས་པ་གཙོ་འདོན་བྱེད་དགོས་པའི་འབོད་སྐུལ་ནན་པོ་བྱེད་རྒྱུ་ཡིན། གཞིས་ལུས་བོད་མི་རྣམས་ཀྱི་སྙིང་སྟོབས་དང་། ཆོད་སེམས། བློས་གཏོང་བཅས་ནི་ཧ་ཅང་ཡི་རང་བསྔགས་བརྗོད་བྱེད་ཡུལ་ཡིན་པ་སྨོས་མ་དགོས་ཀྱང་། ད་ལྟའི་གནས་སྐབས་སུ་ལུས་སྲོག་བློས་གཏོང་བྱས་ཀྱང་སྤྱི་དོན་ལ་ཕན་རླབས་ཆེན་པོ་ཞིག་ཐོབ་དཀའ་བས་དེ་ལུགས་ཚང་མས་སོ་སོའི་ལུས་སྲོག་དང་། བདེ་འཇགས་ལ་སྲུང་སྐྱོབ་བྱེད་གལ་ཆེ་བ་དང་། དེ་བཞིན་འཚེ་མེད་ཞི་བའི་ལམ་ནི་ང་ཚོའི་འདོར་དུ་མེད་པའི་དམ་བཅའ་ཞིག་ཡིན་པས་དེ་ལས་ནམ་ཡང་མ་འགལ་བ་བྱ་རྒྱུ་ཤིན་ཏུ་གལ་ཆེ། སླར་ཡང་། ད་རེས་གསར་དུ་ཚེས་པའི་གནམ་ལོ་འདིའི་ནང་བོད་མི་རྣམས་བཙན་དབང་མནར་གཅོད་ལས་གྲོལ་ནས་རང་དབང་བདེ་དགའི་དཔལ་ལ་སྤྱོད་ཐུབ་པ་དང་། འགྲོ་ཀུན་བདེ་དགས་འཚོ་བའི་སྨོན་འདུན་བཟང་པོ་བཅས། ཤཱཀྱའི་དགེ་སློང་ཆོས་སྨྲ་བ་ཏཱ་ལའི་བླ་མ་བསྟན་འཛིན་རྒྱ་མཚོས།
ཕྱི་ལོ་ ༢༠༠༩ ཟླ་ ༢ ཚེས་ ༢༥ བོད་ས་གླང་ཧོར་ཟླ་ ༡ ཚེས་ ༡ དགེ་བ་ལ།
མགོན་པོ་མཆོག་སྐུ་ཚེ་བསྐལ་བརྒྱར་བརྟན་ཅིང་།་་བོད་ཀྱི་བདེན་མཐའ་མྱུར་དུ་བསལ་ཏེ་མགོན་པོ་མཆོག་་ཕོ་བྲང་པོ་ཏཱ་ལར་ཞབས་འཁོད་ཀྱིས་གཞིས་བྱེས་མཉམ་འཛོམས་ཡོང་བའི་སྨོན་འདུན་ཞུ།
བཀའ་དྲིན་ཆེའོ་མགོན་པོ་ལགས།།
བཀའ་དྲིན་ཆེའོ་སྐྱབས་གཅིག་ལགས།།
ཡང་དག་བཀའ་དྲིན་དྲན་པ་འདིས།།
ཡང་དག་ལམ་ལ་འཇུག་པར་ཤོག།།
མཐའ་གཅིག་འགྲོ་བའི་དོན་ལ་རབ་བརྩོན་པའི།།
མི་འགྱུར་དམ་བཅའ་དབྱིངས་སུ་མ་བཏང་པར།།
ལག་ལེན་འཛམ་གླིང་འགྲོ་བའི་མཐོང་ཡུལ་དུ།།
མངོན་པར་བསྟར་ཁྱོད་བློ་ཡི་ཡུལ་ལས་འགོངས།།
༧མགོན་པོ་གང་གི་སྐུ་ཚེ་བརྟན་མཛད་འཕྲིན་རྒྱས་པའི་སྨོན་འདུན་ཞུ།
ཁྱེད་ནི་བླ་མ། ཁྱེད་ནི་ཡིད་དམ། ཁྱེད་ནི་མཁའ་འགྲོ དེང་ནས་ཇི་སྲིད་བར་དུ་སྐུ་ཉིད་ཀྱིས་རྗེས་སུ་འཛིན་པ་དང་བོད་འབངས་ཡོངས་ཀྱི་རེ་སྒུག་གི་ཉིན་མོ་དེ་མྱུར་དུ་ཤར་བ་དང་གང་སྐུའི་ཉི་མའི་འོད་ཟེར་ལ་ནག་ནོག་དྲི་མས་མ་གོས་ཤིང་སྐུ་ཚེ་ཡུན་རིང་དུ་བརྟན་གྱུར་ཅིག
མགོན་པོ་ཁྱེད་ལ་ལོ་གསར་གྱི་འཚམས་འདྲི་ཞུ།
ལོ་གསར་པ་འདིའི་ནང་དུ། གང་གི་ཐུགས་ཀྱི་བཞེད་དོན་མཐའ་དག་འགྲུབ་པའི་རྒྱུ་ཕུན་སུམ་ཚོགས་པར་ཤོག གང་གི་སྐུ་གཟུགས་བདེ་ཞིང་མཛད་པ་འཕྲིན་ལས་སྔར་ལས་རྒྱས་པའི་སྨོན་ལམ་འདེབས།
ལོ་གསར་པ་འདིའི་ནང་དུ། གང་གི་ཐུགས་ཀྱི་བཞེད་དོན་མཐའ་དག་འགྲུབ་པའི་རྒྱུ་ཕུན་སུམ་ཚོགས་པར་ཤོག གང་གི་སྐུ་གཟུགས་