ཕྱི་ཚེས་ ༦ ཉིན་གྱི་ཕྱི་དྲོ། གོང་ས་མཆོག་གིས་ཧྥ་རན་སིའི་གྲོས་ཚོགས་འཐུས་མི་ཁག་ཅིག་དང་མཇལ་འཕྲད་གྲུབ་རྗེས། གྲོང་ཁྱེར་ཕཱ་རེ་སིའི་ས་གནས་ vendome དུ་ཧྥ་རན་སིར་གནས་སྡོད་རྒྱ་རིགས་ཁག་ཅིག་དང་ལྷན་དུ་མཇལ་འཕྲད་གནང་ཡོད་ལ། དུས་ཚོད་གསུམ་རིང་གི་མཇལ་འཕྲད་སྐབས་༧གོང་ས་མཆོག་གིས་གཙོ་བོ་རྒྱ་རིགས་ཚོའི་བསམ་ཚུལ་ལ་གསན་བཞེས་དང་དྲི་བར་ལན་འདེབས་གནང་ཡོད།
མཇལ་འཕྲད་གནང་སའི་PARK HYATT PARIS ནི་གྲོང་ཁྱེར་ཕཱ་རེ་སའི་མགྲོན་ཁང་དྲགས་གྲས་མིན་པ་ལྟར་མཇལ་འཕྲད་གནང་ཡུལ་གྱི་ཚོམས་ཁང་ཡང་ཆེས་སྤྱིར་བཏང་བ་ཞིག་རེད། འོན་ཀྱང་ཐེངས་འདིར་མཇལ་འཕྲད་གནང་བར་ཕེབས་མཁན་ཚོ་ནི་དུས་རྒྱུན་ལྟར་རྒྱའི་དམངས་གཙོ་དོན་གཉེར་བ་དང་། དྲུག་བཞིའི་ལས་འགུལ་བ། རང་དབང་ཅན་གྱི་རྩོམ་པ་པོ་སོགས་བོད་དང་ཆེས་སྤྱིར་བཏང་གི་འབྲེལ་བ་ཡོད་པའི་རྒྱ་རིགས་གཅིག་བུ་མིན་པར་དམིགས་བསལ་དང་དོ་སྣང་བྱུང་ས་ཞིག་ཡོད་པ་ནི། འདས་ལོར་བོད་དང་༧གོང་ས་མཆོག་ལ་ངོ་རྒོལ་སྐད་འབོད་བྱེད་མཁན་གྱི་རྒྱ་རིགས་སློབ་ཕྲུག་བདུན་མངོན་གསལ་མིན་པའི་འོག་མཇལ་འཕྲད་དུ་བཅར་ཡོད་པ་དེ་ཡིན་ལ། ཐོག་མའི་འཆར་གཞི་ལྟར་ན་ཕྱི་སྡོད་རྒྱ་རིགས་སློབ་ཕྲུག་བརྒྱ་ལྷག་བཅར་འཆར་ཡོད་ནའང་མཇལ་འཕྲད་གནང་ཡུལ་གྱི་ཚོམས་ཁང་ཆུང་དྲགས་པའི་དབང་གིས་ཁོ་ཚོ་བདུན་སློབ་ཕྲུག་བྱིངས་ཀྱི་འཐུས་ཚབ་ལྟར་བཅར་བ་ཞིག་འདུག དྲི་བ་དྲིས་གནང་སྐབས་སློབ་ཕྲུག་ཅིག་གིས་ ༼ འདས་ལོར་བོད་ནང་གི་དོན་རྐྱེན་བྱུང་སྐབས་དང་པེ་ཅིན་ཨོ་ལིམ་པཀི་དཔལ་འབར་བསྐོར་བསྐྱོད་སྐབས་རྒྱ་རིགས་སློབ་ཕྲུག་གཙོས་པའི་གཞོན་སྐྱེས་ཚོས་བོད་དང་སྐུ་ཉིད་ལ་ངོ་རྒོལ་བྱས་པ་རེད། སྤྱིར་བཏང་ངོ་རྒོལ་དེ་དག་གི་སྐབས་སློབ་ཕྲུག་ཚོ་རྒྱ་གཞུང་གི་དྲིལ་བསྒྲགས་ཀྱི་འོག་ཏུ་ཤོར་བའམ། སློབ་ཕྲུག་ཚོས་གནས་སྟངས་དངོས་མ་ཤེས་པའི་གོ་ལོག་ཐེབས་ཡོད་ནའང་སྐབས་དེར་ཧ་ཅང་གིས་ཚོར་ཤུགས་རྣོན་པོའི་ཐོག་ངོ་རྒོལ་བྱས་པ་རེད། སྐབས་དེར་སྐུ་ཉིད་ཀྱིས་ངོ་རྒོལ་འདིར་དགོངས་ཚུལ་གང་འདྲ་ཞིག་བྱུང་ཞིང་། དམིགས་བསལ་དེའི་རྐྱེན་པས་སྐུ་ཉིད་རྒྱ་ནག་གི་ཕྱི་སྡོད་སློབ་ཕྲུག་ཚོའི་ཐོག་སེམས་ཤུགས་ཆགས་པ་འདྲ་བྱུང་ཡོད་དམ་། ༽ཞེས་བཀའ་འདྲི་ཞུས་པར། ༧གོང་ས་མཆོག་གིས་ ༼ ངས་དུས་རྒྱུན་རྒྱ་གར་ནང་གི་བོད་རིགས་སློབ་ཕྲུག་ཚོ་དང་ལྷག་པར་བོད་ནས་རྒྱ་གར་ནང་སློབ་སྦྱོང་དུ་ཡོང་མཁན་གཞོན་སྐྱེས་ཚོར་འདི་འདྲ་ཞིག་བཤད་སྡོད་ཀྱི་ཡོད། རྒྱ་ནག་དང་བོད་ནང་ནས་ཚང་མས་མིག་གཅིག་དང་རྣ་བ་གཅིག་གིས་གནས་ཚུལ་ལ་ལྟ་གིན་དང་ཉན་གིན་ཡོད་པ་རེད། ད་ལྟ་ཕྱིའི་རང་དབང་ལུང་པར་སླེབས་ཚར་དུས་ཚང་མས་མིག་གཉིས་དང་རྣ་བ་གཉིས་ཀྱིས་ལྟ་དགོས་པ་དང་ཉན་དགོས་པ་དེ་གལ་ཆེན་པོ་རེད། མ་ཟད་མིག་གཉིས་དང་རྣ་བ་གཉིས་ཀྱིས་གང་མཐོང་ཞིང་ཐོས་པའི་གནས་སྟངས་གཞིར་བཞག་ནས་རང་ཉིད་ཀྱིས་ཡང་དག་པའི་བསམ་བློས་ཐག་གཅོད་བྱེད་རྒྱུ་དེ་གལ་ཆེན་པོ་རེད་ཅེས་བཤད་བསྡད་ཡོད། རྒྱ་ནག་གི་དྲིལ་བསྒྲགས་ནི་ཕྱོགས་གཅིག་རང་ཆགས་བསྡད་ཡོད། སོང་ཙང་རྒྱ་རིགས་གཞོན་སྐྱེས་ཚོ་དང་ལྷག་པར་དུ་ཕྱི་སྡོད་སློབ་ཕྲུག་ཚོས་ཀྱང་མིག་གཉིས་དང་རྣ་བ་གཉིས་ཀྱིས་བལྟས་ནས་ཉན་དགོས་པ་དེ་གལ་ཆེན་པོ་རེད། རྒྱ་ནག་གཞུང་གིས་བོད་ཕྱོགས་ནས་གང་བཤད་པ་དེ་མེས་རྒྱལ་ཁ་བྲལ་དང་མི་རིགས་སྲིད་ལ་གཏོར་བརླག་གཏོང་གི་ཡོད་པ་དང་། ཕྱི་རྒྱལ་གྱིས་གང་བཤད་པ་དེ་རྒྱ་ནག་དགྲ་འཛིན་རིང་ལུགས་ཀྱི་ལྟ་སྟངས་རེད་ཟེར་གྱིན་ཡོད་རེད། བོད་པས་གང་བཤད་པ་དེ་གཅིག་བྱས་ན་ཕྱོགས་གཅིག་ཏུ་ལྷུང་ཡོད་འགྲོ། འོན་ཀྱང་ཡར་རྒྱས་ཅན་གྱི་ཕྱི་རྒྱལ་བ་ཚོར་མཚོན་ན་ཧ་ཅང་གི་བློ་གཟུ་བོར་གནས་པ་རེད་བསམ་གྱིན་འདུག སོང་ཙང་ཕྱི་སྡོད་རྒྱ་རིགས་སློབ་ཕྲུག་ཚོར་མཚོན་ན་རང་དབང་ལུང་པར་སླེབས་ཚར་དུས་མིག་གཉིས་དང་རྣ་བ་གཉིས་སྤྱད་ནས་གང་མཐོང་ཤིང་ཐོས་པ་དེའི་སྟེང་ནས་ལངས་ཕྱོགས་འཛིན་དགོས་པ་དེ་གལ་ཆེན་པོ་ཆགས་པ་རེད་། ༽ ཅེས་བཀའ་ལན་གནང་བ་དང་། དེ་བཞིན་འདས་ལོར་བོད་ནང་བྱུང་བའི་ཞི་རྒོལ་ནི་གསུམ་པའི་ཚེས་བཅུ་བཞི་ནས་མགོ་བཙུགས་པ་མིན་པར་ཚེས་བཅུའི་ཉིན་རྒྱབ་ནས་མགོ་བཙུགས་པའི་དངོས་ཡོད་གནས་ཚུལ་ཐད་འགྲེལ་བརྗོད་གནང་ཡོད།
ཡང་སློབ་ཕྲུག་གཞན་ཞིག་གིས་༼ ད་ལྟའི་ཆར་ཕྱི་སྡོད་རྒྱ་རིགས་སློབ་ཕྲུག་སྤྱི་ཡོངས་ཀྱི་ངོས་ནས་བཤད་ན་རྒྱ་ནག་གི་ཛ་དྲག་གནས་སྟངས། དམངས་གཙོའི་དགོས་འདུན། དམིགས་བསལ་བོད་ཀྱི་གནས་སྟངས་ཐད་མིག་གཉིས་ཀྱིས་མ་མཐོང་བ་དང་རྣ་བ་གཉིས་ཀྱིས་མ་ཐོས་པའི་དཀའ་ངལ་དང་འཇིགས་སྣང་གང་ཡང་མི་འདུག ཁོ་ཚོར་དཀའ་ངལ་དང་འཇིགས་སྐྲག་གཞན་ཞིག་ཡོད་པ་ནི་རང་གིས་གང་མཐོང་ཞིང་ཐོས་པ་རྣམས་ལག་ལེན་བྱེད་མ་ཐུབ་པ་དེ་ཡིན། དཔེར་ན། ང་ཚོས་འདི་ནས་དམངས་གཙོའི་ལས་འགུལ་འདྲ་སྤེལ་སྐབས་རང་ཉིད་ལ་ཉེན་ཁ་མེད་ནའང་ནང་མི་ནི་སེམས་ཁྲལ་གྱི་གཞི་ཞིག་ཆགས་ཡོད་ལ། དེ་བཞིན་རྒྱ་ནག་གཞུང་གིས་ཀྱང་ཁོ་ཚོ་ཁུ་སིམ་པར་མི་འཇོག སྐུ་ཉིད་ཀྱིས་འདིའི་ཐད་ལམ་སྟོན་ཞིག་གནང་རོགས། ༽ཞེས་ཞུས་པར། ༧གོང་ས་མཆོག་གིས་ ༼ སྤྱིར་བཏང་ཕྱི་ལོག་ནས་ལས་ཀ་བྱ་རྒྱུ་དེ་དཀའ་ལས་མེད་པ་ཞིག་རེད། ཡིན་ནའང་རང་ཉིད་ལ་ཕྱིར་ལོག་རྗེས་ལས་ཀ་གང་ཞིག་བྱེད་ཐུབ་པའི་གདེང་ཚོད་ཡོད་ཚེ་དེ་ལས་ལེགས་པ་ཞིག་ཡོད་པ་རེད། འོན་ཀྱང་ཕྱིར་ལོག་རྗེས་དང་པོ་ནས་ཆབ་སྲིད་བྱས་ན་ཉེན་ཁ་ཚ་བོ་དང་ཕུགས་ལ་ཕན་ཐོགས་ཀྱི་མ་རེད། ལས་ཀ་གང་ཞིག་བྱེད་སྐབས་དང་པོ་ཐབས་ཤེས་དེ་གལ་ཆེན་པོ་རེད། དེ་ནས་རྒྱུན་བསྲིངས་རྒྱུ་དེ་རེད། བར་དེར་རང་ཉིད་ཀྱི་རང་ཚུགས་དགོས་རྒྱུ་གལ་ཆེན་པོ་རེད། དེང་སང་རྒྱ་ནང་ན་དཔལ་འབྱོར་ལ་མགོ་འཁོར་མཁན་མང་པོ་ཡོད་པའི་གནས་ཚུལ་འདུག དེ་འདྲ་ཡིན་ན་ཡོང་ཐབས་ཁག་པོ་རེད། གོ་སྐབས་དང་དུས་ཚོད་ལ་བསྟུན་དགོས་རྒྱུ་དེ་བས་ཀྱང་གལ་ཆེན་པོ་རེད། སྔོན་མ་དྲུག་བཞི་དོན་རྐྱེན་བྱུང་སྐབས་ང་ངྷ་རམ་ས་ལར་ཡོད། ང་ལ་དེ་དུས་དོན་རྐྱེན་དེ་བྱུང་བར་ཅུང་སྔ་དྲགས་པའམ། ཡང་མིན་ན་ཕྱི་དྲགས་པའི་སེམས་ཚོར་ཞིག་བྱུང་། དུས་ཚོད་ཏག་ཏག་མེད་ན་གང་ཡང་ཕན་གྱི་མ་རེད། ༽ཅེས་གསུངས།
མཇལ་འཕྲད་འདིའི་སྐབས་རྒྱ་རིགས་དམངས་གཙོ་དོན་གཉེར་བ་ཁག་ཅིག་གིས་བོད་རྒྱའི་དཀའ་རྙོག་སེལ་ཐབས་ལ་རང་ཉིད་ཀྱི་བསམ་ཚུལ་ཕུལ་ཡོད་པ་དང་། དེ་བཞིན་ཧྥ་རན་སིའི་ནང་རྟེན་གཞི་བྱས་པའི་བརྒྱུད་ལམ་ཁག་གི་རྒྱ་རིགས་གསར་འགོད་པ་ཚོས་བོད་རྒྱའི་འབྲེལ་ལམ་དང་། ༧གོང་ས་མཆོག་གི་མ་འོངས་པའི་དགོངས་ཕྱོགས་ཐད་བཀའ་འདྲི་ཞུས་ཡོད།
གསར་འགོད་པ། ཟླ་བ་ཚེ་རིང་།
རྒྱ་རིགས་སློབ་ཕྲུག་ཚོ་དང་རྒྱ་ནག་གཞུང་དབར་བསམ་ཚུལ་མི་མཐུན་པ་སོགས་ཀྱི་གནས་ཚུལ་ཡོང་བཞིན་པ་དེ་ནི་རྒྱ་ནག་ནང་ཁུལ་གྱི་གནད་དོན་རེད་བསམ། ང་རང་ཚོའི་དམིགས་ཡུལ་དང་དགོས་མཁོ་མཐར་ཐུག་པ་དེ་བོད་དོན་ཐག་གཅོད་ཡོང་རྒྱུ་དེ་ཡིན་པ་ལས། རྒྱ་ནག་གཞུང་དམངས་གཙོར་བསྒྱུར་རྒྱུ་དང་ཡང་ན་རྒྱ་ནག་གཞུང་མགོ་རྟིང་བསློག་རྒྱུ་དེ་མ་རེད། ལམ་དབུ་མ་གཞིར་བཟུང་རྒྱ་གཞུང་དང་གྲོས་མོལ་གྱི་ལམ་ནས་བོད་དོན་ཐག་གཅོད་བྱེད་དགོས་ན་རྒྱ་ནག་ནང་ཁུལ་གྱི་ཆབ་སྲིད་གནད་དོན་ལ་ཇུས་གཏོགས་མ་བྱས་ན་ཡག་པོ་ཡོད་པ་རེད་བསམ། ཕྱི་སྡོད་རྒྱ་རིགས་མང་གཙོ་དོན་གཉེར་བྱེད་མཁན་དང་སློབ་ཕྲུག་དེ་དག་ལ་སྟོབས་དང་ནུས་པ་གང་ཡང་ཡོད་པ་མ་རེད། ང་ཚོས་ཉེ་ཆར་དྲུག་བཞིའི་དོན་རྐྱེན་ལ་གདུང་སེམས་མཉམ་སྐྱེད་སོགས་ཀྱི་ལས་འགུལ་སྤེལ་བ་དེ་དེག་བོད་ཀྱི་རྩ་དོན་ལ་དེ་ཙམ་ཕན་ཐོགས་ཨེ་ཡོད་སེམས།
རྒྱ་ནག་གཞུང་དང་རྒྱ་མི་རིགས་དབྱེ་འབྱེད་བྱེད་པ་དེ་ཡང་ཧོབ་སྟེ་བལྟས་ན་སྙིང་རྗེ་བོ་འདྲ་ཞིག་འདུག་ཀྱང་དེ་ནི་རྒྱ་གཞུང་གིས་བོད་མི་རིགས་ཡག་པོ་དང་འདོད་པ་ཚིམ་ཡོད་པ་དང་ཁ་བྲལ་དང་རྙོག་ཟིང་བཟོ་མཁན་ཡོད་ཚད་ཏཱ་བླའི་བླ་མ་དང་བཙན་བྱོལ་བོད་གཞུང་ཡིན་པར་ཉེས་འཛུགས་བྱེད་པ་དང་གཅིག་མཚུངས་མ་ཡིན་ནམ། རྒྱ་རིགས་མི་དམངས་བརྒྱ་ཆ་མང་ཆེ་བས་འདོད་བློ་མེད་པའི་གཞུང་ཞིག་གནས་ཐུབ་བམ། སྔོན་ལོའི་ས་ཡོམ་གྱི་གནས་ཚུལ་ནས་རྟོགས་མ་སོང་ངམ།
༧གོང་ས་མཆོག་ལ་མཇལ་བཅར་ཞུ་སའི་ཚོམས་ཁང་དེ་ཆུང་དྲགས་དོན་ག་རེ་ཡིན་ནམ། ག་དུས་ཡིན་ན་ཡང་ང་ཚོ་ལ་མ་འགྲིག་པ་ཞིག་ཡོད་ཡོད་པ་ཡིན། མ་གཞི་ནས་ང་ཚོ་རྒྱ་ཕྱོགས་ལ་སེམས་ཁྲལ་ཆེ་ཡང་རྒྱ་ཕྲུག་ཚོ་བོད་ཕྱོགས་ལ་སེམས་ཁྲལ་དང་གདུང་སེམས་ནམ་ཡང་མེད། སྤྱང་ཀའི་རྣ་བར་ཆོས་བཤད་དང་འདྲ་བར་རྒྱ་ཕྱོགས་ནི་བོད་ཐད་ལ་ཇེ་མཁྲེགས་དང་ཇེ་སྡུག་རེད། བོད་དོན་ལ་རྒྱབ་སྐྱོར་ལྟ་བུ་བྱེད་མཁན་རྒྱ་རིགས་ཁ་ཤས་ཡོད་པ་དེ་ཚོས་ཀྱང་རྩ་བའི་ལངས་ཕྱོགས་དང་ལྟ་བ་ནི་རྒྱ་རིགས་ཆེན་པོ་དང་འབྲེལ་ཡོད། བོད་རང་ངོས་ལ་ལངས་ཕྱོགས་དང་ཆོད་སེམས་བརྟན་པོ་ཞིག་མ་བྱུང་ན་བོད་དོན་ནི་འདས་ཟིན་པའི་ལོ་ངོ་མང་པོ་དེ་ལྟར་ད་དུང་མུ་མཐུད་ནས་ལྷག་ངེས་ཡིན།