བཙན་བྱོལ་ནང་ལ་བོད་ཡིག་བེད་སྤྱོད་གཏོང་སའི་ཁོར་ཡུག་རྒྱ་ཆུང་བའི་དབང་གིས་བོད་ཡིག་གི་གོ་ས་ཡང་ཧ་ཅང་གི་དམའ་བོ་རེ། དཔེར་ན་གཞུང་གི་སྡེ་ཚན་ཁག་ལ་སྙན་ཞུ་ཞིག་འབུལ་སྐབས་དབྱིན་ཡིག་གི་ཐོག་ནས་འབྲི་དགོས་པ་མ་ཟད་བྱི་བ་སེའུ་བཅུ་པ་ཡན་གྱིས་ཀྱང་དབྱིན་སྐད་དང་ཧིན་སྐད་བེད་སྤྱོད་བྱེད་བཞིན་ཡོད། དེར་བརྟེན་བོད་ཡིག་གི་གནས་སྟངས་ཧ་ཅང་གི་སྐྱོ་བོ་ཡིན། ཚོགས་པ་ག་གེ་མོ་དག་གིས་གསལ་བསྒྲགས་དང་གསར་འཕྲིན་རེ་སྤེལ་དུས་དེའི་ནང་ལ་ཡིག་ནོར་མང་བ་མ་ཟད་བྱེད་འབྲེལ་བེད་སྤྱོད་གཏོང་སྟངས་ཀྱང་ནོར་བ་མང་དག་ཅིག་ཡོང་གིན་ཡོད་པ་ནི་རྒྱུན་སྲོལ་དུ་གྱུར་ཡོད། རང་གི་ཕ་མེས་ཀྱི་རིག་གཞུང་ལ་གདུང་བའི་གངས་ཅན་པ་དག་གིས་ལྷག་བསམ་རྣམ་དག་གི་སྒོ་ནས་ཁོང་ཚོའི་ནོར་འཁྲུལ་དེ་དག་ཡོ་བསྲང་ཡོང་རྒྱུའི་ཆེད་དུ་སྐྱོན་བརྗོད་བྱེད་རྒྱུ་དེ་ནི་ཤིན་ཏུ་ནས་གལ་ཆེན་ཞིག་ཏུ་མཐོང༌། འོན་ཀྱང་བོད་ཀྱི་དུས་བབས་སྤྱིའི་འདོན་ཐེངས་ ༤༥༤ ནང་དར་ཐང་བ་ཨོ་རྒྱན་བཀྲ་ཤིས་མིང་ཅན་གྱི་དཔྱད་གཏམ་མགོ་བརྗོད་ལ། བོད་དོན་ལ་ཕན་ཆེད་གླེང་བ་རེད་དམ། ཞེས་པའི་རྩོམ་ཡིག་དེ་ཁོ་བོས་ཐེངས་ཁ་ཤས་ཤིག་བཀླགས་པ་ཡིན། དེས་ཕྲན་ལ་ཚོར་བ་སྐྱུར་མོ་ཞིག་སྦྱིན་བྱུང༌། བོད་དོན་ཆེད་དུ་ལས་འགུལ་སྤེལ་བ་མཐའ་དག་བོད་དོན་ལ་ཕན་པའི་ཆེད་དུ་ཡིན་པ་ཡོངས་གླིང་སློབ་གྲྭའི་བྱིས་པ་ཚོས་ཀྱང་ཧ་གོ་ཡི་ཡོད་ཀྱང་ཁྱོད་ཀྱི་ཀླད་པ་ཅི་ཞིག་གིས་སྒྲིབ་སོང་བ་ཡིན་ནམ། རྩོམ་ཡིག་དེ་རང་གི་ཕ་མེས་ཀྱི་རིག་གཞུང་ལ་གདུང་བའི་ངུ་ངག་རྣལ་མ་ཞིག་མ་ཡིན་པར་གང་ཟག་གཞན་ལ་ཟུར་ཟ་དང་འཕྱ་སྨོད་ཀྱི་བརྗོད་ཚིག་འབའ་ཞིག་ཏུ་མངོན། གལ་ཏེ་ཁྱོད་ལ་རང་གི་རིག་གཞུང་ལ་བཅངས་པའི་དྲང་བདེན་གྱི་ལྷག་བསམ་ཞིག་ཡོད་ན་ཁྱོད་ཀྱང་བོད་པ་ཡིན་པས་ཁོང་ཚོའི་ལས་དོན་དང་གསལ་བསྒྲགས་སོགས་སྤེལ་རྒྱུར་རོགས་རམ་བྱས་ན་ཆོག་པ་ལས། ཨ་ཕོ་ཧོར་གྱིས་ལ་བརྒྱབ་པ་མ་མཐོང་བར། ཐུད་བཟས་པ་མཐོང་ཞེས་པའི་དཔེ་ལྟར་ཧོར་གྱིས་ལ་བརྒྱབ་པའི་སྐོར་མ་གླེང་བར་ཐུད་བཟས་པ་ཁོ་ནའི་སྐོར་གླེང་ན་དོན་སྙིང་མི་འདུག་སྙམ། བོད་དོན་གླེང་བ་ཞེས་པའི་ཚོགས་པ་དེ་ནི་བོད་གཞུང་དང་ཕྱི་རྒྱལ་གྱི་བོད་དོན་རྒྱབ་སྐྱོར་ཚོགས་པ་དག་གིས་འགྲོ་གྲོན་བཏང་ནས་བཙུགས་པ་ཞིག་མ་ཡིན་པར་རང་གི་མི་རིགས་ལ་གདུང་ཞེན་ཟབ་པའི་གངས་ཕྲུག་དཀྱུས་མ་འགའ་ཞིག་གིས་༧གོང་ས་མཆོག་གི་བཀའ་སློབ། བོད་བསྟན་པ་ཆབ་སྲིད་ཀྱི་གནད་དོན་འདི་བོད་མི་རེ་གཉིས་ཤིག་ལ་འཁྲི་བའི་ལས་འགན་ཞིག་མ་ཡིན་པར་བོད་མི་རེ་རེའི་ཕྲག་སྟེང་ན་ཡོད་པའི་ལས་འགན་ཞིག་ཡིན་ཞེས་པའི་བཀའ་སློབ་ཀྱི་དགོངས་དོན་ཇི་བཞིན་གསར་དུ་བཙུགས་པ་ཞིག་རེད། ཁོང་ཚོས་རེ་གཟའ་སྤེན་པ་ནམ་ཡིན་ལ་རང་ཉིད་སྒེར་གྱི་ལས་དོན་རྣམས་དོར་ནས་བོད་མིའི་མ་འོངས་པའི་བདེན་དོན་གྱི་ཆེད་དུ་ལས་འགུལ་རབ་དང་རིམ་པ་སྤེལ་ནས་ཟླ་བ་བཅུ་ལྷག་ཙམ་འདས་ཟིན། ཁྱོད་ཀྱིས་བོད་དོན་གླེང་བ་འདི་བདུན་ཕྲག་གཅིག་གི་ནང་ནས་གཟའ་སྤེན་པ་གཅིག་པུ་ལ་གོ་སྒྲིག་བྱེད་ཀྱི་ཡོད་པ་ཞིག་རེད། འོ་ན་བདུན་གཅིག་གི་ཆུ་ཚོད་བརྒྱ་དང་དྲུག་ཅུ་ལྷག་གི་ནང་ནས་སྐར་མ་འགའ་ཡང་གསལ་བསྒྲགས་དེའི་སྒང་ལ་གཏོང་མི་ཐུབ་པ་རེད་དམ་ཞེས་དྭང་བླངས་ཀྱི་ལས་འགུལ་བ་ཚོར་དམའ་འབེབ་དེ་ལྟར་བྱས་འདུག་པས་བློ་རྣལ་ལ་ཕབ་ནས་བསམ་དུས་དངོས་གནས་ཡིད་སྐྱོ་དགོས་པ་ཞིག་རེད། ཁོང་ཚོས་བདུན་ཕྲག་གཅིག་གི་ནང་ནས་གཟའ་སྤེན་པ་གཅིག་པུར་བོད་དོན་གྱི་ཆེད་དུ་ལས་འགུལ་ཞིག་སྤེལ་གྱི་ཡོད་ན། འོ་ན་ཁྱོད་ཀྱིས་ཞག་མ་སུམ་བརྒྱ་དྲུག་ཅུ་དང་ཆུ་ཚོད་བཞི་སྟོང་ལྔ་བརྒྱ་ལྷག་ཙམ་ནང་བོད་དོན་ཆེད་དུ་ལས་འགུལ་ལམ་རྩོམ་ཡིག་གང་འདྲ་ཞིག་སྤེལ་མྱོང་ཡོད་དམ། ཁྱོད་ཀྱི་གཏམ། སྤྱི་ཚོགས་འདིའི་མི་བུ་རེ་ཟུང་དང་ཚོགས་པ་རེ་འགས་བོད་ཀྱི་སྐད་ཡིག་འདི་བསམ་བཞིན་འཆི་ལམ་ལ་ཕུད་རྒྱག་བྱེད་བཞིན་པ་འདིས། ཞེས་བསམ་བཞིན་དུ་འཆི་ལམ་ལ་ཕུད་རྒྱག་རྒྱག་མཁན་དེའི་ནང་ངའི་བསམ་པར་ཁྱོད་ཀྱང་ཚུད་འདུག་སྙམ། རང་ཅག་བོད་པའི་ཁ་དཔེ་ལ་གཞན་ལ་བལྟ་བའི་མིག་ཡོད་ཀྱང༌། རང་ཉིད་བལྟ་བར་མེ་ལོང་དགོས་ཞེས་པ་ལྟར། ཁྱོད་ཀྱི་རྩོམ་ཡིག་ཐུང་ཐུང་དེའི་ནང་ལའང༌། ཡིག་འབྲུ་ལ་ཡིག་འབྲི་དང༌། བྱ་ཚིག་མ་འོངས་པ་གཏང་རོགས་ཞེས་པར་གཏོང་རོགས་དང༌། ངའི་བསམ་པར་ཞེས་པར་ངས་བསམ་པར་ཞེས་དང༌། ཁོའི་བྱེད་སྟངས་ཞེས་པར་ཁོས་བྱེད་སྟངས་དང༌། མ་བརྒྱབ་སྔོན་ལ་ཞེས་པར་མ་རྒྱབ། ཅེས་པ་སོགས་རང་ཉིད་བྱ་ཚིག་དང༌། བྱེད་འབྲེལ་གྱི་རྣམ་བཞག་ལ་རྨོངས་བཞིན་དུ་གཞན་ལ་དག་ཐེར་བྱེད་ཁུལ་འདི་དགོད་བྲོ་བ་རང་རེད། མ་གཞི་ནས་རང་ཉིད་ལ་བོད་དོན་གྱི་ཆེད་དུ་ལས་ཀ་བྱེད་རྒྱུར་སྤོབས་པ་དང་ནུས་པ་སོགས་གང་ཡང་མེད་བཞིན་དུ་ད་དུང་གང་ཟག་གཞན་གྱིས་བྱས་པའི་ལས་ཀར་རྒྱབ་སྐྱོར་དང་རོགས་རམ་མི་བྱེད་པར་ག་དུས་ཡིན་ནའང་གང་ཟག་གཞན་ལ་མཐོང་ཆུང་དང་དམའ་འབེབ་བྱེད་རྒྱུར་དགའ་བའི་མི་རིགས་འདི་འགྱེལ་ས་དེ་ནས་ག་དུས་ཡར་ལངས་ཐུབ་བམ། སྤུན་ཟླ་ཚོ།
གུས་པའི་ལག་ཐོག་ཁ་པར་ཨང་གྲངས་ནི། ༩༨༨༢༣༡༠༥༥༦ གློག་འཕྲིན་ཁ་བྱང་ནི། gangtrug_gyaltsen@yahoo.com ཡིན།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།