བོད་ས་གླང་ལོའི་བོད་ཟླ་ ༨ ཚེས་ ༣༠ ཉིན་ནི་རྗེ་ཙོང་ཁ་པ་ཆེན་མོས། འབྲོག་རི་བོ་དགའ་ལྡན་རྣམ་པར་རྒྱལ་བའི་གླིང་ཕྱག་འདེབས་གནང་ནས་མི་ལོ་ཧྲིལ་བོ་ ༦༠༠ འཁོར་བ་དང་། ལྷ་ལྡན་སྨོན་ལམ་ཆེན་མོ་གསར་འཛུགས་གནང་ནས་མི་ལོ་ཧྲིལ་བོ་ ༦༠༠ འཁོར་བའི་དུས་ཚིགས་ཀྱི་ཉིན་མོ་ཡིན་འདུག
ཕྱི་ཚེས་ ༡༨ སྟེ། བོད་ཟླ་ ༨ པའི་ཚེས་ ༣༠ ཉིན་ནས་བཟུང་ཉིན་གསུམ་རིང་འབྲོག་རི་བོ་དགའ་ལྡན་རྣམ་པར་རྒྱལ་བའི་གླིང་ཕྱག་བཏབས་གནང་ནས་མི་ལོ་ ༦༠༠ འཁོར་བའི་དུས་དྲན་གྱི་མཛད་སྒོ་ཆེན་པོ་ཞིག་དགའ་ལྡན་དགོན་པར་ཚུགས་ཡོད་འདུག
མཛད་སྒོ་དེར་བོད་རང་སྐྱོང་ལྗོངས་ཀྱི་ལས་ཁུངས་ཁག་གི་མཛད་གཙོ་རྣམས་ཀྱང་མཉམ་ཞུགས་བྱས་ཡོད་པ་མ་ཟད། སྟག་རྩེ་རྫོང་དང་། སྟོད་ལུང་བདེ་ཆེན་རྫོང་། འཕན་པོ་ལྷུན་འགྲུབ་རྫོང་། མལ་དྲོ་གུང་དཀར་རྫོང་། ཆུ་ཤུར་རྫོང་སོགས་ཀྱི་ཡུལ་མི་གཙོས་མདོ་སྟོད་སྨད་ཀྱི་མི་མང་སྟོང་ཕྲག་མང་བོ་ཡང་མཛད་སྒོའི་སྟེང་མཉམ་ཞུགས་བྱས་ཡོད་འདུག
འབྲོག་རི་བོ་དགའ་ལྡན་དགོན་པའི་དུས་དྲན་གྱི་མཛད་སྒོའི་ཉིན་མོ་འདིར། མཆོད་མེ་ཁྲི་མཆོད་དང་། ཡོན་ཆབ་ཁྲི་མཆོད། མེ་ཏོག་ཁྲི་མཆོད། གདུག་སྤོས་ཁྲི་མཆོད་སོགས་ཀྱི་ལམ་ནས་དུས་དྲན་དེར་སྲུང་གཙི་བྱས་ཡོད་པ་དང་། དམིགས་བསལ་གྱིས་མི་མང་གིས་དད་གུས་ཆེན་པོའི་ངང་ནས་འབྲོག་རི་བོ་དགེ་ལྡན་རྣམ་པར་རྒྱལ་བའི་གླིང་བཙུགས་ནས་མི་ལོ་ཧྲིལ་བོ་ ༦༠༠ དང་། ལྷ་ལྡན་སྨོན་ལམ་ཆེན་མོ་གསར་འཛུགས་གནང་ནས་མི་ལོ་ ༦༠༠ འཁོར་བར་སྐྱ་སེར་གཉིས་ཀྱིས་སྲུང་གཙི་རྒྱ་ཆེན་པོ་གནང་ཡོད་འདུག
ཐེངས་འདིའི་དུས་དྲན་འདི་དགའ་ལྡན་དགོན་པ་གཅིག་པུ་མ་ཡིན་པར། ལྷ་སའི་གཙུག་ལག་ཁང་དང་ར་མོ་ཆེ། པོ་ཏ་ལ་སོགས་སུའང་མཆོད་འབུལ་གྱི་ལམ་ནས་དུས་དྲན་སྲུང་གཙི་བྱས་ཡོད་འདུག ལྷ་སར་གནས་པའི་བོད་མི་གཙོས་མདོ་དབུས་ཁམས་གསུམ་གྱི་བོད་མི་ཚོས་ཐེངས་འདིའི་དུས་དྲན་ཐད་ཞལ་འདེབས་ཕོན་ཆེན་པོ་གནང་ནས་བོད་ལ་སྐྱིད་པའི་ཉི་མ་འཆར་བ་དང་། བོད་ཀྱི་༧སྐྱབས་མགོན་གཅིག་པུ་༧གོང་ས་ཆེན་པོ་མཆོག་བོད་ལ་མྱུར་བར་ཕེབས་པའི་གསོལ་འདེབས་དང་སྨོན་ལམ་ཡང་བཏབས་ཡོད་འདུག
ཉིན་གྲངས་གསུམ་རིང་ས་གནས་ཁག་དང་གནད་ཡོད་ས་ཁུལ་ཁག་ཏུ་རྒྱ་མིའི་ཉེན་རྟོག་པས་སྐོར་སྲུང་དང་དམ་དྲག་ཀྱང་གང་འཚམ་བྱས་ཡོད་འདུག
སྤྱིར་བཏང་འབྲོག་རི་བོ་དགའ་ལྡན་རྣམ་པར་རྒྱལ་བའི་གླིང་ཞེས་པ་འདི་ཐོག་མར་རྗེ་བླ་མ་ཙོང་ཁ་པ་ཆེན་མོས་རབ་བྱུང་བཅུ་བདུན་པའི་ས་གླང་ལོ། ཕྱི་ལོ་ ༡༤༠༩ ལོར་གསར་དུ་ཕྱག་འདེབས་གནང་ཞིང་། ཐོག་མར་དགོན་པ་འདིར་དགེ་འདུན་པའི་ཞལ་གྲངས་ ༥༠༠ ཡས་མས་ཡོད་པར་གྲགས། རྒྱལ་དབང་ལྔ་བ་ཆེན་མོའི་སྐབས་སུ་དགེ་འདུན་པ་ ༡༡༠༠ ལྷག་བྱུང་འདུག དེའི་རྗེས་ཕྱི་ལོ་ ༡༩༥༩ ལོའི་སྔོན་ལ་དགེ་འདུན་པ་ ༤༤༠༠ ལྷག་ཡོད་ཀྱང་། སྐབས་དེར་བོད་ས་ཡོངས་སུ་རྒྱ་ནག་གི་གཏོར་བཅོམ་འོག་དགེ་འདུན་པ་དང་གྲྭ་ཤག་ལྷ་ཁང་། འདུ་ཁང་སོགས་རྩ་མེད་དུ་བཏང་ཡོད་འདུག
ཡང་བོད་ཀྱི་མི་རབས་རྒན་པ་དག་གི་ངག་རྒྱུན་ལ་དགའ་ལྡན་སུམ་སྟོང་སུམ་བརྒྱ། འབྲས་སྤུངས་བདུན་སྟོང་བདུན་བརྒྱ། སེ་ར་ལྔ་སྟོང་ལྔ་བརྒྱ་ཞེས་ནས་བཤད་སྲོལ་ཞིག་ཀྱང་ཡོད། ཡིན་ནའང་། ༡༩༥༩ ལོར་རྒྱ་ནག་གིས་བོད་ཀྱི་དགོན་སྡེ་ཁག་དང་ལྷ་ཁང་སོགས་གཏོར་བཅོམ་བཏང་བའི་རྗེས་ཏེ་ཕྱི་ལོ་ ༡༩༨༠ ལོ་ནས་མི་མང་གིས་ཁྲག་དང་རྣག་བསགས་ནས་དགོན་པ་གཞན་དག་དང་འདྲ་བར་དགའ་ལྡན་དགོན་པ་འདི་མི་མང་གི་འདོད་འདུན་བཞིན་སླར་གསོ་གནང་ནས་ད་ལྟ་དགེ་འདུན་པ་ ༥༠༠ ལྷག་ཅིག་དགོན་སྡེ་འདིར་བཞུགས་ཡོད་འདུག
གཅན་བཟོད་རྒྱམ་ལགས་ཀྱིས་གསང་གཏོར་ལགས་ཀྱིས་གསུངས་པར་དགོངས་ཚུལ་བཏོན་གནང་བར་རྒྱབ་སྐྱོར་ཡོད། འོན་ཀྱང་རྗེ་ཙོང་པའི་སྐབས་སུ་གཞུང་ཁག་ཏུ་རྗེ་ཙོང་ཁ་པ་ཆེན་པོ་ཞེས་པའི་ཐ་སྙད་སྤྱོད་པ་ལས་ཆེན་མོ་ཞེས་མོ་སྒྲ་སྦྱར་བ་ཅུང་མི་བདེ།
མྱུར་བ་མྱུར་བར་ཁ་བའི་ལྗོངས་སུ་སྲུང་བརྩི་ཞུ་རྒྱུའུ་རེ་འདུན་དང་སྨོན་ལམ་ཞུ།
དགའ་ལྡན་དགོན་པར་མཛད་སྒོ་དེ་ཡང་སྙིང་ཅི་ཞིག་གི་ཆེད་དུ་ཡིན་ན།
དྲ་གྲོགས་གསང་གཏོར་ལགས། སྤྱིར་ཆེན་མོ་དང་ཆེན་པོའི་ཁྱད་པར་ནི། ཆེན་པོ། བོང་ཚོད་ཅེ་ཆུང་སྟེ། རི་པོ་ཁང་པ་སོགས་ལ་ཆེན་པོ། ནང་དོན་གཏིང་ཟབ་ཅིང་རྒྱ་ཆེ་བར་ཆེན་མོ་སྟེ། ལམ་རིམ་ཆེན་མོ། སྤྱོད་འཇུག་ཆེན་མོ་ལྟ་བུ།
ཡང་བུ་ལ་ཆེན་པོ་དང་བུ་མོ་ལ་ཆེན་མོ་ཟེར་པས་ངེས་པ་རང་མི་དགོས་ཏེ། སློབ་དཔོན་ཆེན་མོ། དགེ་རྒན་ཆེན་མོ། ཐ་ན་མ་བྱན་ཆེན་མོ། ཕྱག་མཛོད་ཆེན་མོ། དམག་སྤྱི་ཆེན་མོ། ཆེན་མོ་ལགས་ལྟ་བུ་ང་བར་ང་ཚོས་ཐ་སྙད་སྦྱར་བསྡད་པ་མང་ཆེ་བ་ཕོ་རེད་འདུག
སྤྱིར་ཉིད་ཀྱིས་གསུངས་པ་འཐད་མིན་ངས་མི་ཤེས། འོན་ཀྱང་བདག་གི་ནི་འཇམ་མགོན་བླ་མ་ཙོང་ཁ་པ་ཆེན་མོ་ཟེར་བ་ལན་མང་ཐོས་མྱོང་། ཐ་སྙད་འདི་འཇུག་མི་འཇུག་བོད་ཀྱི་མཁས་གྲུབ་དག་གི་རྣམ་ཐར་ན་ཧ་ཅང་མང་། དགོངས་པ་མ་ཚོམས་ལགས།
རྩོམ་སྒྲིག་པ་ལགས། རྗེ་ཙོང་ཁ་པ་བུ་རེད་བུ་མོ་རེད་དམ། གང་ཡིན་ཟེར་ན་རྗེ་ཙོང་ཁ་པ་ཆེན་པོ་ཟེར་བ་མ་གཏོགས་ཆེན་མོ་ཟེར་བ་ད་བར་གོ་ཐོས་མ་བྱུང༌། གཅིག་བྱས་ན་ང་རང་མཐོང་རྒྱ་ཆུང་བས་རྐྱེན་ཡིན་གྱི་རེད།
http://tb.chinatibetnews.com
དྲ་གྲོགས་དང་། རྒྱ་ཆེའི་ཀློག་པ་པོ་ཚོ།
རྒྱ་མིས་གསར་འགྱུར་བརྒྱུད་ལམ་འདིའི་ཐོག་༸གོང་ས་མཆོག་ལ་མཚན་སྨད་བྱེད་པ་སོགས་ཀྱི་གནས་ཚུལ་མང་པོ་ཞིག་རྫུན་སྒྲོག་བྱེད་ཀྱི་འདུག མཚམས་མཚམས་སུ་དྲ་འབྲེལ་དེའི་ཐོག་ལ་ཐུགས་སྣང་དགོས་གལ་ཆེ།།
རི་བོ་དགེ་ལྡན་པའི་དུས་ཆེན་འདིས་སྟེང་ལ་བདག་གི་ལྷག་བསམ་རྣམ་དག་གིས་
འཚམས་འདྲི་བཀྲ་ཤིས་བདེ་ལེགས་གྲངས་མེད་ཞུ།