བཅུད་པར་གཡང་མཁོ་རྒྱལ། རྡ་རམ་ས་ལ།
ཐོག་མར་འགྲོ་བ་མིའི་རིགས་ནི་དུས་ཡུན་རིང་བོའི་ལོ་རྒྱུས་ཁྲོད་དུ་གདོད་མའི་སྤྱི་ཚོགས་ནས་བཟུང་སྟེ། འཚོ་ཁག་བཅད་བཟུང་གི་འཚོ་བ་རོལ་བའི་བདེ་སྐྱིད་དེ་རིམ་གྱིས་འགྲོ་བ་མིའི་རིགས་ཀྱི་ཆབ་སྲིད་བསམ་བློ་བས་སྲིད་དབང་སྒེར་གཅོད་ཀྱི་ཐབས་ལམ་སྣ་ཚོགས་བཀོལ་ནས་དབང་བསྒྱུར་བྱས་ཏེ། ན་གཞོན་ལོ་ཆུང་རྣམས་རིམ་པར་དམག་མི་ལ་གསར་བསྡུ་བྱས་ནས་མི་རིགས་རིང་ལུགས་ཀྱི་རྣོ་དབལ་ལྟ་བུའི་སློབ་གསོ་རབ་དང་རིམ་པ་བརྒྱབས་ནས་རྒྱལ་ཁབ་ནི་དགོས་མཁོ་ཅན་ཡིན་ཚུལ་དང་། དེ་ལ་བརྩོན་ལེན་བྱེད་དགོས་པའི་སྙིང་སྟོབས་དེ་ཁོ་ཚོའི་དམིགས་འབེན་ལ་ཁ་གཡར་ནས་སྒེར་དབང་བདག་འཛིན་ཅན་གྱིས་རང་ཉིད་ཀྱི་དགོས་མཁོ་དང་སྙན་གྲགས། ཡང་ན་མིའི་འཇིག་རྟེན་འདིར་སོ་སོའི་ལོ་རྒྱུས་ཀྱི་ཤུལ་རྗེས་ཁོ་ན་བཅས་ལ་དམིགས་ནས་གང་འདོད་དུ་དམག་མི་རྣམས་བེད་སྤྱོད་བྱས་ཏེ། སའི་གོ་ལ་ཧྲིལ་བོར་དམག་འཁྲུག་རབ་དང་རིམ་པར་བརྒྱབས་ནས་འགྲོ་བ་མིའི་རིགས་ཡོངས་ལ་དབྱེ་བ་མེད་པར་དབང་བསྒྱུར་གྱི་གཉའ་གནོན་དང་བཤུ་གཞོག་བྱས་པ་ཚད་ལས་བརྒལ་ཅིང་མིའི་བློ་ངོར་ཤོང་མི་ཐུབ་པའི་བྱུང་བ་དེས། འགྲོ་བ་མིའི་རིགས་ཀྱི་ཚེ་སྲོག་གི་རིན་ཐང་སྣང་མེད་དུ་བཞག་ནས་གང་འདོད་དུ་མེ་མདའ་དང་སྒྱོགས་མདེལ་ཁོ་ནས་མིའི་རིགས་ཡོངས་དམར་བསོད་བཏང་སྟེ། བེམ་པོ་བགྲང་ལས་དཔོག་མི་ཐུབ་པ་མང་པོ་དུར་ཁྲོད་དུ་བསྐྱལ་བས་རྗེས་སུ་རིམ་གྱིས་སྲིད་དབང་སྒེར་འཛིན་རིང་ལུགས་པའི་ཆབ་སྲིད་ཀྱི་བསྟན་པ་ནི་ཆར་ཤུལ་གྱི་ཤ་མོ་བརྡོལ་བ་ནང་བཞིན། སའི་གོ་ལ་ཧྲིལ་བོའི་སྒང་འདིར་དར་འགོ་ཚུགས་པས་ད་གཟོད་སའི་གོ་ལ་ཧྲིལ་བོའི་སྒང་འདིར་གཞི་ནས་རྒྱལ་ཁབ་ཅེས་པ་གསར་འཛུགས་བྱས་ཤིང་། དེ་བཞིན་རྒྱལ་རྟགས་དང་། རྒྱལ་གླུ་སོགས་སྣ་མང་ཅན་རིམ་བཞིན་ཤུགས་ཆེར་དར་བ་དང་རྒྱལ་མཚམས་བཅད་བཟུང་བྱས་ཏེ། མིའི་རིགས་ཀྱིས་འབྲེལ་ལམ་ཆགས་སྡང་ཅན་དུ་ཁ་ཕྱོགས་སུ་བཅུག་པ་ནི་འགྲོ་བ་མིའི་རིགས་ཀྱི་སྤྱི་དོན་ལ་ཆ་བཞག་ནས་བཤད་ན། ངས་ནམ་རྒྱུན་ཞིབ་ཏུ་མནོ་བསམ་རེ་བཏང་ཚེ། མིའི་རིགས་ཀྱིས་སའི་གོ་ལ་ཧྲིལ་བོ་ཞི་བདེ་ཅན་དུ་ཁ་ཕྱོགས་པའི་ལས་དོན་བསྒྲུབ་རྒྱུའི་ཐད་ལ་ནག་ཉེས་ཚབས་ཆེན་བསགས་ཡོད་པ་མ་ཟད། ད་དུང་སའི་གོ་ལ་ཧྲིལ་བོའི་སྒང་གི་དབང་འཛིན་རིང་ལུགས་པ་མང་པོའི་རྗེས་ཤུལ་དུ་མིའི་འཇིག་རྟེན་ལ་བཞག་པའི་བཅོས་བསྒྱུར་བྱ་དགོས་པའི་ལོ་རྒྱུས་ཀྱི་ནག་ཉེས་དང་། འགྲོ་བ་མིའི་རིགས་ད་དུང་དབང་སྒྱུར་གྲལ་རིམ་གྱི་གཡོ་འོག་ཏུ་ཚུད་ཡོད་པས་དུས་རབས་ཉེར་གཅིག་གི་ཁྲོད་ནའང་ནག་ཉེས་ཁོ་ན་དུར་སྦས་བྱས་ཡོད་པ་མ་ཡིན་ནམ།
སྤྱིར་བཏང་དུ་མིའི་རིགས་ལ་མཚོན་ནས་བཤད་ན། དུས་རབས་ཉེར་གཅིག་ནི་གོ་ལ་ཧྲིལ་བོ་གཅིག་གྱུར་གྱི་དམིགས་ཡུལ་བརྟན་སྲུང་འདིར་རྨང་གཞིའི་མ་གདན་འདིང་དགོས་པའི་དུས་རབས་གལ་ཆེན་ཞིག་ཏུ་ཆགས་ཡོད་པར་བཤད་ཀྱང་། དོན་ངོ་མར་ཁ་སྟོང་ནང་གི་ཚིག་སྟོང་ཞིག་ཏུ་གྱུར་པ་མ་ཡིན་ནམ། ད་ལྟའི་གོ་ལ་ཧྲིལ་བོའི་སྒང་གི་རྒྱལ་ཁབ་སོ་སོའི་དབང་འཛིན་ཁག་དང་ཆེད་མཁས་ཀྱི་ལས་རིགས་འདྲ་མིན་དག་གིས་དེ་ལས་ལྡོག་སྟེ། ཞི་བདེ་ཞེས་པའི་ཐ་སྙད་སྐམ་པོ་དེ་རྒྱལ་སྤྱིའི་གླེང་སྟེགས་སུ་ཁྱེར་འོང་སྟེ། གསེར་ལས་དཀོན་པའི་དུས་ཚོད་འདི་སྟོང་བཤད་ཁོ་ནས་བསྐྱལ་བཞིན་ད་བར་དུ་འཕྲོ་ལྷག་ཏུ་བཏང་བ་མ་ཟད། ནམ་རྒྱུན་ཐ་སྙད་དེ་གཅིག་པུ་ལག་ཆ་ལྟ་བུ་ཞིག་ཏུ་བེད་སྤྱོད་བྱས་ཏེ། ཐ་ན་རྒྱལ་འབངས་དམར་བསོད་བྱེད་མཁན་གྱི་རྒྱལ་ཁབ་ཁ་ཤས་ཤིག་གི་དབང་འཛིན་དང་ལས་རིགས་འདྲ་མིན་གྱི་ཆེད་མཁས་པ་དག་གིས་ཀྱང་གྲུབ་འབྲས་སྤུ་ཙམ་ཡང་མེད་པར་སྐྱུག་བལྡད་བྱེད་ཀྱིན་ཡོད་པ་དེར་བདག་འགྲོ་བ་མི་ཞིག་ཡིན་པའི་ཆ་ནས་བློ་ཕམ་ཡོད་པ་མ་ཟད། སའི་གོ་ལའི་སྟེང་གི་ནག་ཉེས་ཚབས་ཆེན་ཞིག་ཏུ་ངོས་འཛིན་བྱེད་ཀྱིན་ཡོད། ངས་བརྗོད་འདོད་ཀྱི་བརྒྱ་བཤད་ཚིག་གི་རྩ་བ་ནི་དོན་དངོས་སུ་ཞི་བདེ་ལ་རྨང་གཞི་འདིང་བའི་ལས་དོན་དེ་རྒྱལ་ཁབ་སོ་སོའི་ལག་བསྟར་དུ་འཁེལ་མ་ཐུབ་པར་ལྷག་ཡོད་པ་ནི་ད་ལྟའི་འགྲོ་བ་མིའི་རིགས་ཀྱི་སེམས་པའི་གཏིང་རིམ་ལ་འཐིམ་པའི་ན་ཟུག་ཆེ་ཤོས་ཤིག་ཏུ་གྱུར་ཡོད་པ་དངོས་ཡོད་གནས་ཚུལ་རེད། ཁོང་རྣམ་པ་ཚོར་མཁྱེན་རྒྱ་ཡོད་ཀྱང་ཚད་བཟུང་ཅན་གྱི་ཁེ་དབང་གིས་དམ་དུ་བཅིངས་ནས་མིག་སྔའི་རྒྱུ་ནོར་ཁོ་ན་ཡར་རྒྱས་གོང་འཕེལ་གཏོང་བ་དང་། རྒྱལ་ཁབ་བརྟན་སྲུང་གི་ཆེད་དུ་འགྲོ་བ་མིའི་རིགས་ཀྱི་ཐོབ་ཐང་དང་། མང་གཙོའི་རྒྱལ་ཁབ་སོ་སོའི་བར་འཆམ་མཐུན་བྱེད་དགོས་ཅེས་གོ་ལ་ཧྲིལ་བོར་ཡང་སྐོར་བསྐྱར་སྐོར་དུ་ཁྱབ་བསྒྲགས་བསྟུད་མར་བྱས་ཡོད་ཀྱང་། ཐོབ་ཐང་དང་མང་གཙོ་ཞེས་པའི་ཐ་སྙད་འདི་གཉིས་ནི་ད་ཆ་ཤི་གསོན་མི་ཤེས་པའི་བར་མཚམས་ལ་བསྐྱལ་ཡོད་པར་སྣང་ལ། དོན་ངོ་མར་ཁོང་རྣམ་པས་རྒྱུ་ནོར་ལོངས་སྤྱོད་ཀྱི་དབང་བསྒྱུར་འོག་གི་བསམ་བློ་གཡོ་སྒྱུ་ཅན་གྱི་སྲིད་དབང་སྒེར་གཅོད་རིང་ལུགས་པའི་སྦས་སྐུང་ཟབ་མོའི་མཇུག་མཐུད་པ་རེད། འགྲོ་བ་མིའི་རིགས་ཀྱི་འཆམ་མཐུན་ལ་ཚད་བཟུང་བྱས་ཏེ་མངོན་ལྐོག་གཉིས་ནས་འབངས་མི་ཡོངས་ལ་མགོ་སྐོར་གཏོང་བའི་ཉེས་པ་བསགས་པ་མ་ཡིན་ནམ། ད་ལྟའི་མིའི་རིགས་འཚོ་སྡོད་ཀྱི་ས་སྒང་ཧྲིལ་བོའི་ཕྱི་སྣོད་ཀྱི་རང་བྱུང་ཁོར་ཡུག་དང་ནང་བཅུད་ཀྱི་སེམས་ཅན་མ་ལུས་པར་སྲིད་དབང་སྒེར་འཛིན་པའི་ལྟག་རྒྱབ་ན་སྐུང་བའི་རྒྱུ་ནོར་ལོངས་སྤྱོད་ལ་ཚིམ་པ་མེད་པའི་ཧམ་སེམས་རིང་ལུགས་ཅན་གྱི་ཕྱུག་བདག་གྲལ་རིམ་ཚོའི་དབང་བསྒྱུར་རྒྱ་ཡན་དུ་སོང་བས། སའི་གོ་ལ་ཧྲིལ་བོར་གད་སྙིགས་ཀྱི་ཕུང་བོ་ཞིག་ཏུ་འགྱུར་བཞིན་པའི་ཉེན་ཁའི་འཇིགས་སྣང་འོང་བ་ལས། རྒྱལ་འབངས་ཡོངས་ལ་ཉེས་པ་རྩ་བ་ནས་ཡོད་པ་མ་རེད། དེ་བས་ཆབ་སྲིད་དབང་བསྒྱུར་བ་དག་གིས་དོན་དངོས་ཐོག་མི་རབས་རྗེས་མའི་མ་འོངས་པའི་འཚོ་གནས་ཀྱི་ཕྱོགས་ལ་ཚུལ་འཆོས་ཀྱི་སྐད་ཆ་བཤད་པ་མ་གཏོགས། དོན་དངོས་ཐོག་སེམས་ཁུར་བྱེད་ཀྱིན་མེད་ལ། སའི་གོ་ལ་ཧྲིལ་བོའི་རྒྱལ་ཁབ་སོ་སོའི་དབང་འཛིན་མི་སྣ་དག་དང་ཕྱུག་བདག་ཚང་མ་ཁྱི་སྤྱང་ངན་འབྲེལ་བྱས་པའི་ཧམ་སེམས་ཀྱི་སྒེར་བདག་རིང་ལུགས་དེ་ནི། ད་ལྟ་ཉེན་ཁ་ཚབས་ཆེན་ལྟ་བུའི་གནས་སྟངས་ཤིག་ཏུ་ཆགས་ཡོད་པ་མ་ཡིན་ནམ། དེང་སྐབས་རྒྱལ་ཁབ་ཚང་མར་དཔལ་འབྱོར་ཉིན་རེ་བཞིན་དར་རྒུད་གཉིས་མཉམ་དུ་འདྲེས་བཞིན་ཡོད་པའི་སྒང་ཡིན་ལ། དོན་ངོ་མར་སའི་གོ་ལ་ཧྲིལ་བོ་རྒུད་པའི་ཉེན་ཚབས་དེ་རིམ་གྱིས་མིའི་རིགས་ཀྱི་འཇིགས་སྣང་དུ་འགྱུར་བཞིན་ཡོད་པ་མ་ཡིན་ནམ། སྟོབས་ཆེན་རྒྱལ་ཁབ་ལ་ལས་དངོས་ཡོད་སྤྱི་ཚོགས་དང་ཁ་གཏད་ནས་ཚན་རིག་དར་རྒྱས་གོང་འཕེལ་གཏོང་འདོད་ཀྱིས་དམིགས་འབེན་ཁོ་ན་བཟུང་ཡོད་པས། ད་ལྟ་རྒྱལ་ཁབ་མང་ཤོས་ཤིག་ལ་མངའ་ཐང་ཡར་རྒྱས་ཆེ་སྟབས། རང་རང་གི་རྒྱལ་ཁབ་བསྟན་སྲུང་གི་དམག་ཤུགས་དེ་ཧ་ལས་པའི་གྲུབ་འབྲས་ཤིག་ལ་ངོས་འཛིན་བྱེད་ཀྱིན་ཡོད་ཀྱང་དོན་དམ་པར་འཁོན་སེམས་ཀྱི་ཆགས་སྡང་རུལ་སུངས་ཅན་དུ་གྱུར་བ་མ་ཡིན་ནམ། དོན་དངོས་ཐོག་བཤད་ན། མཉམ་འབྲེལ་རྒྱལ་ཚོགས་ཟེར་བ་ནི་རྒྱལ་ཁབ་སོ་སོའི་བར་ལ་གཅིག་གྱུར་བདག་དབང་ལ་ནུས་པ་འདོན་ཐུབ་ཀྱི་མེད་ལ། དེ་ནི་ཆབ་སྲིད་དབང་བསྒྱུར་བ་དག་གི་འགྲོ་བ་མིའི་རིགས་ཀྱི་མཐོང་སྣང་ན་ཡོད་མདོག་གི་ཁ་གཡར་ས་ཁོ་ན་ཙམ་དུ་གྱུར་བ་མ་ཡིན་ནམ། དེས་རྒྱལ་ཁབ་ཕན་ཚུན་བར་མཛའ་འབྲེལ་གཏིང་ཟབ་ཚད་དང་འགྲོ་བ་མིའི་རིགས་ཀྱི་སྐྱིད་སྡུག་གཅིག་མ་གཏོགས་གཉིས་མེད་ཚུལ་དང་། སའི་གོ་ལ་ཧྲིལ་བོར་མཁོ་བ་ནི་ཞི་བདེ་ལ་ཁ་ཕྱོགས་དགོས་པ་སོགས་བརྗོད་ཀྱིན་ཡོད་ནའང་། དེ་ནི་མངོན་ལྐོག་གཉིས་ལྡན་གྱི་སྐད་ཆ་རེད་མ་གཏོགས་དོན་དངོས་སུ་རྒྱལ་ཁབ་སོ་སོའི་བར་ལ་ཡིད་ཆེས་རྩ་བ་ནས་ཡོད་པ་མ་རེད། འདི་ལ་དཔེ་མཚོན་ཙམ་བཀོད་ན་འདི་ལྟར་དེང་སྐབས་སའི་གོ་ལ་འདིའི་ཕྱོགས་མཐའ་ཀུན་ཏུ་རྡུལ་ཕྲན་མཚོན་ཆ་དང་གོ་མཚོན་འདྲ་མིན་གསང་བའི་སྒོ་ནས་ལས་དོན་བསྒྲུབ་བཞིན་པ་ནི། ཁ་སང་དེ་རིང་རྒྱལ་སྤྱིའི་སྟེང་ན་བྱ་བ་ངན་པ་བཟོ་བཞིན་པ་དངོས་ཡོད་ཡིན་ལ། སའི་གོ་ལ་དང་འགྲོ་བ་མིའི་རིགས་གཉིས་གཅིག་ལ་གཅིག་རྟེན་གྱི་འབྲེལ་བ་ཡོད་པ་ནི་འཁོར་བའི་ཆོས་ཉིད་ཡིན་པས། དེའི་ཆགས་འཇིག་ལ་དུས་རབས་ཉེར་གཅིག་གི་དུས་འདིར་སའི་གོ་ལ་ཧྲིལ་བོར་ཞིབ་འཇུག་བྱེད་མཁན་རྣམ་པས་རྟོག་དཔྱད་བྱས་པའི་ཆགས་འཇིག་གི་གནས་སྟངས་སྤེལ་བ་ལ་ཁ་ཞེ་གཉིས་མེད་སྒོས་དོ་སྣང་བྱ་དགོས་པ་མ་ཟད། འགྲོ་བ་མིའི་རིགས་སུ་ཞིག་ཡིན་རུང་དུས་རྒྱུན་འཚོ་སྡོད་ཀྱི་ཁོར་ཡུག་ལ་དོ་སྣང་བྱ་དགོས་པའི་བྱ་བཞག་གལ་འགངས་ཆེ་བ་མ་བསྒྲུབ་པའི་ཉེས་པའི་ལས་ལན་དེ་ནམ་ཞིག་ལ་ཕྱིར་འགྲོ་བ་ཡོངས་ལ་འཁོར་བར་གདོན་མི་ཟ་བས། འབྲོག་བུ་བློ་དམན་བདག་གིས་བསམ་གཞིགས་ཀྱི་དཔོག་ཚད་ལ་གཞིགས་ན། སྤྱིར་དེང་སྐབས་མིའི་རིགས་ཀྱི་གོ་རྟོགས་ཇེ་ཆུང་དང་མི་རིགས་རིང་ལུགས་ནི་ཇེ་མཁྲེགས་སུ་འགྲོ་བཞིན་ཡོད་པའི་རྣམ་རྟོག་གི་སྣང་ཚུལ་ཞིག་ཉིན་རེ་བཞིན་རབ་དང་རིམ་པར་སྐྱེས་ཀྱིན་འདུག སའི་གོ་ལ་ཧྲིལ་བོ་འདིའི་སྟེང་དུ་རྒྱལ་ཁབ་ཚང་མ་ད་དུང་ཁེ་བཟང་སྲིད་དབང་སྒེར་གཅོད་རིང་ལུགས་པས་མི་རིགས་མཁྲེགས་འཛིན་ཅན་དུ་ཤུགས་ཆེར་ཁ་ཕྱོགས་པར་བཅུག་ཡོད་པས། འགྲོ་བ་མིའི་རིགས་མང་ཤོས་ནི་ད་དུང་བྱིས་པ་བསམ་མེད་ལྟ་བུའི་ཆབ་སྲིད་པའི་དབང་བསྒྱུར་མགོ་སྐོར་འོག་ཏུ་ཚུད་ཡོད། རྒྱུ་མཚན་ནི་རྒྱལ་ཁབ་མང་ཆེ་བར་ཕྱིའི་སྤྱི་ཚོགས་ཀྱི་རྣམ་པ་ཉི་མ་རེ་རེ་བཞིན་འཕེལ་རྒྱས་ཀྱི་རྣམ་པ་ཅན་དུ་འགྱུར་བཞིན་པ་དེས། འགྲོ་བ་མིའི་རིགས་མང་ཤོས་ཤིག་འདོད་འདུན་གྱིས་ཡིད་ཚིམ་ནས་མིག་སྔའི་འཚོ་བར་སྐྱིད་ཉལ་བྱས་ནས་བསྡད་ཡོད་རུང་། རྒྱལ་ཁབ་མེད་པའི་ང་ནི་སྤྲང་བོ་མ་ཎི་བརྡོལ་མཁན་ཞིག་ཡིན་ཡང་། ངའི་སེམས་ཁམས་སྐྱིད་མིན་དང་བོད་ཀྱི་ཐུན་མོང་མ་ཡིན་པའི་སྲོལ་རྒྱུན་གྱི་ཁོར་ཡུག་སྲུང་སྐྱོབ་བྱེད་ཕྱོགས་དང་རྒྱལ་ཁབ་ཡོད་པའི་འབྱོར་ལྡན་གྱི་འབངས་མི་གཉིས་ཀ་བསྡུར་བ་ཡིན་ཚེ། གནམ་ས་ལྟ་བུའི་ཁྱད་པར་ཞིག་ཡོད་པ་ནི་སྨོས་མི་དགོས་པ་ཞིག་རེད། དེ་ནི་སྲིད་དབང་སྒེར་གཅོད་པས་བཟོས་པའི་དབང་བསྒྱུར་གྱི་ནག་ཉེས་ཡིན་ནམ། དོན་ངོ་མར་སའི་གོ་ལ་ཧྲིལ་བོའི་སྟེང་གི་འགྲོ་བ་མིའི་རིགས་ཡོད་ཚད་ལ་སྲིད་དབང་སྒེར་བདག་རིང་ལུགས་ཀྱི་ཚད་བཟུང་དང་དབང་བསྒྱུར་ཤུགས་ཆེ་བ་ཐེབས་ཡོད་པས། ད་དུང་རྒྱལ་ཁབ་སོ་སོའི་ཁེ་དབང་སྲུང་ཆེད་དུ་མངོན་ལྐོག་གཉིས་ན་སྦས་པའི་འཚོ་གནས་ཀྱི་དགོས་མཁོ་དང་རྒྱལ་སྲུང་གི་རྒྱུགས་ཁྱི་ངོ་མ་དེ། ཁ་སང་དེ་རིང་ལ་ཉིན་རེ་ནས་ཉིན་རེ་བཞིན་ཇེ་མང་དུ་འགྲོ་བའི་སྒང་ཡིན་ལ། འདི་ལྟར་ཕྱི་སྣོད་ལ་སྲུང་སྐྱོབ་མ་བྱས་པར་སོང་བ་ན། ཉིན་ཞིག་ལ་སའི་གོ་ལ་ཧྲིལ་བོར་མ་འོངས་པར་འཇིག་ཉེན་གྱི་ཉེན་ཁ་དེ་འགོག་མི་ཐུབ་པའི་དུས་ཚོད་ཅིག་འབྱུང་སྲིད་པས་དེ་དུས་ཀྱང་སྟོབས་ཆེན་རྒྱལ་ཁབ་ཟེར་བ་ཡིན་ནའང་འདྲ། དམག་གི་སྟོབས་ཤུགས་ཟེར་བ་ཡིན་ནའང་འདྲ། ཕྱུག་པོའི་རྒྱུ་སྟོབས་ཀྱི་དབང་བསྒྱུར་ཡིན་ནའང་འདྲ། རྒྱལ་ཁབ་སོ་སོའི་དབང་འཛིན་དང་མཁས་དབང་སོགས་འགྲོ་བ་མིའི་རིགས་ཚང་མ་གྲལ་རིམ་ལ་དབྱེ་བ་མེད་པར་གད་སྙིགས་ཀྱི་ཕུང་བོ་ཞིག་ཏུ་འགྱུར་རྒྱུ་གདོན་མི་ཟའོ།
དྲ་གྲོགས་སྨྲ་སྟི་གཟེར་ལགས།
ངས་གཟབས་ནན་བྱས་སྐད་ཆ་བཤད་ལེ་ཡོད།
གླེང་མི་དགོས་པ་གང་ཡིན་གླེང་མེད།
ངས་དྲང་པོ་བྱས་བཤད་པ་རེད།
དྲང་པོའི་སྐད་ཆ་ཉུང་ན་ཡག་པོ་ཡོད་མ་རེད།
ཁྱོད་སྟི་གཟིར་གྱིས་དྲང་པོ་དགོས་ལེས་འདུག
སྟི་གཟེར་ལོགས།
ཨ་རོགས་ཐོག་རྒོད་ལགས་ཁྱེད་ཀྱི་ཞལ་ནས་གང་མཐོན་སྐད་ཆ་ཡིན་རྣམ་མ་ཤར་་
ཁྱེད་རང་སྐད་ཆ་བཤད་དུས་གཟབ་གཟབ་བྱེད་ན་ཡག་པོ་འདུག་ཁྱེད་་ཀྱི་སྐད་ཆ་མང་པོ་མཐོང་སོང་གླེང་མི་དགོས་པ་མང་པོ་གླེང་འདུག་དེ་རྟེན་ཁྱེད་ཀྱི་ཁ་ནས་
བཤད་ཡ་ཉུང་ན་དགའ་ས་རེད་ཅི་སྟེ་གླེང་འདོད་ན་་དྲང་པོ་ཞིག་བཤད་དགོས་རྒྱུ་གལ་ཆེ་རེད་འདུག་དེ་རྟེན་དགོངས་འཇགས་འཚལ།
གཡང་མཁོ་རྒྱལ་གྱི་རྩོམ་ཡི་དེ་ལ་གོ་ཡ་གང་ཡང་མི་འདུག། མི་ཁོ་སྐྲ་རིང་རྩ་མ་ཚང་པ་ཞིག་ཡོད་རེད་ལ་དེ་ནང་བཞིན་རྩོམ་ཡིག་རྩ་མ་ཚང་བ་ལས་མེད་འདུག། རྩ་མ་ཚང་པ་ཁོ་ངས་ཁ་སང་ཐེངས་ཁ་ཤས་ལ་རྡ་སྟེང་ནས་མཐོང་བྱུང།
སྡུག་བསྔལ་ནི་བདེན་པ་འཚོལ་བྱེད་ཀྱི་ལམ་ཡིག་ལྟ་བུ་ཡིན་ལ།
ཡིན་ནའང་། ང་ཚོས་སྡུག་བསྔལ་གྱི་བརྒྱུད་རིམ་མ་བརྒུད་ན་བདེན་པ་ནི་ནམ་ཡང་འཚོལ་ཐབས་མེད།
དེར་བརྟེན། མི་བུ་རང་ཉིད་ནས་བདེན་འཚོལ་ལ་འབད་བརྩོན་བྱེད་རྒྱུ་ནི་མི་བུ་རང་ཉིད་ཀྱི་འགན་འཁྲི་ཡིན།
ཟིན་བྲིས་ནང་གི་མིང་གང་བྱུང་མང་བྱུང་དེ་ཚོར་ང་མགོ་ན་གི་འདུག
I don’t know.
གོ་རྒྱུ་མེད་པ་ཚིག་ཚོགས་ཅན་གྱི་ཡི་གེ་འབྲི་ན་སློབ་སྦྱོང་དམིགས་གསལ་བྱེད་ཡ་མི་འདུག་
བདེན་པ་བོར་བའི་སྡུག་བསྔལ་འདི་ནི་བདེན་པ་བཞིའི་ནང་གི་སྡུག་བསྔལ་བདེན་པ་རེད། ཧ་ཧ་ཧ་་་
གོ་རྒྱུ་འདུག་མི་གོ་མཁན་ཚོས་མ་གོ་བར་དུ་སློབ་སྦྱོང་དགོས་ངེས་རེད།
ཁ་བྱང་དེ་གཅིག་པུས་དོན་དག་གསལ་ཐག་ཆོད་ཅིག་བཤད་འདུག མགོ་མི་ཚོད་མཁན་ཚོས་རྩོམ་ཡིག་ཚང་མ་ཀློག་དགོས་དོན་མི་འདུག
རྩོམ་པ་པོ་ལགས་ཁྱེད་ཀྱི་ཅི་གསུང་ཡིན་ ཅི་གང་ཤག་གོ་མ་སོང་ ང་བློན་གྲགས་ཡིན་ན་ཡང་ན་ཁྱེད་མཁས་གྲགས་ཡིན་གང་ཞིག
རྩོམ་པ་པོ་ལགས། ཚར་གཅིག་བཀླགས་ཟིན།