བོད་གངས་ཅན་གྱི་ལྗོངས་སུ་བསྟན་པ་ཉམས་པའི་རྒྱུ་རྐྱེན་གཅིག་དེ་སངས་རྒྱས་བཅོམ་ལྡན་འདས་ཀྱི་དགེ་ཕྲུག་ནང་ཚགས་ཤིག་ཡིན་གིན་ཡིན་གིན་ང་ཚོ་དང་ཁྱེད་ཚོ་ཟེར་བའི་གྲུབ་མཐའི་ཕྱོགས་རིས་བྱས་པ་དེ་བསྟན་པ་སྣུབ་པའི་ཆ་རྐྱེན་ཆགས་འདུག དེ་ཧ་ཅང་གི་ཐབས་སྐྱོ་བོ་རེད། ཅེས་༧གོང་ས་མཆོག་གིས་གསུངས་བྱུང་།
༧གོང་ས་མཆོག་གི་མོན་རྟ་དབང་ཁུལ་གྱི་མཛད་འཕྲིན་གྱི་ཉིན་བཞི་བ། དེ་རིང་རེས་གཟའ་ལྷག་པའི་ཉིན། ༧གོང་ས་མཆོག་གིས་མོན་རྟ་དབང་མི་དམངས་ལ་ཚེ་དབང་གནང་གྲུབ་རྗེས་མོན་རྟ་དབང་གཙོས་པའི་ཧི་མ་ཅལ་མངའ་ཁུལ་གྱི་ནང་པ་ཐུན་མོང་ནས་༧གོང་ས་མཆོག་སྐུ་ཚེ་བསྐལ་བརྒྱར་བཞུགས་པའི་བརྟན་བཞུགས་ཕུལ་ཡོད། ཉིན་གོང་ཆུ་ཚོད་ ༡༢ ཐོག་༧རྒྱལ་དབང་དྲུག་པ་རིག་འཛིན་ཚངས་དབྱངས་རྒྱ་མཚོའི་སྐུའི་འཁྲུངས་ཡུལ་ཨོ་རྒྱན་གླིང་དུ་ཆིབས་སྒྱུར་བསྐྱངས་ཡོད་ལ། དེ་དང་མཉམ་དུ་ཨོ་རྒྱན་གླིང་དགོན་པའི་ཉེ་འཁྲིས་སུ་རིག་འཛིན་ཚངས་དབྱངས་རྒྱ་མཚོས་སྐུ་རྩེད་གནང་ཡུལ་གྱི་རྡོ་ཕ་བོང་ཆེན་པོ་ཞིག་ཡོད་ས་དེར་མོན་རྟ་དབང་དྭ་ ཕྲུག་གཅེས་སྐྱོང་ཚོགས་པས་༼ འཇིགས་སྐྱོབས་མཐོང་གྲོལ་མཆོད་རྟེན་ཆེན་མོ ༽ ཞུ་བ་ཞིག་བཞེངས་འཆར་ཡོད་པའི་ས་དེར་ཞབས་ཀྱིས་བཅགས་ཤིང་བྱིན་གྱིས་བརླབས་ཡོད། ཉིན་རྒྱབ་བསྐྱར་དུ་གསུང་ཆོས་ར་བར་ཞབས་སོར་བཀོད་དེ། མི་དམངས་ལ་བཀའ་སློབ་གནང་ཡོད་ལ། དེ་དང་མཉམ་དུ་མོན་རྟ་དབང་ས་ཁུལ་གྱི་ས་གནས་སོ་སོའི་ཁྱད་ཆོས་མཚོན་པའི་གླུ་གར་ཞབས་བྲོ་འཁྲབ་སྟོན་ལ་གཟིགས་མོ་གནང་ཡོད།
སྔ་དྲོའི་བརྟན་བཞུགས་ཀྱི་གོང་དུ་༧གོང་ས་མཆོག་གིས་ཆོས་ལ་སློབ་གཉེར་གནང་སྐབས་བློ་གཟུ་བོར་གནས་པ་ཞིག་དགོས་སྐོར་དང་། ཆོས་བརྒྱུད་ཁག་གི་བར་ཐུགས་མཐུན་ཁྲིམས་གཙང་དགོས་པའི་བཀའ་སློབ་གནང་དོན། བློ་གཟུ་བོར་གནས་པ་ཞིག་དགོས་པ་ཧ་ཅང་གལ་ཆེན་པོ་རེད། འདི་ང་རང་གི་ཆོས་ཡིན་ཞེས་ཞེན་ཁོག་བྱས་ན། བདེན་པའི་གནས་ཚུལ་ཤེས་གིན་མ་རེད། བློ་གཟུ་བོར་མ་གནས་པ་རེད། སངས་རྒྱས་ཀྱི་ཆོས་ཟེར་བ་དེ་རིག་པའི་དཔྱད་པ་བཏང་སྟེ་བསམ་བློ་གཏོང་དགོས་པ་ཞིག་ཡིན་སྟབས། རིག་པའི་དཔྱད་པ་གཏོང་བར་སྔོན་ལ་བློ་གཟུ་བོར་གནས་དགོས། གང་ཡང་འབྱུང་གི་རེད་སྙམ་པ་ཞིག སྐྱེ་བ་སྔ་ཕྱི་མེད་པ་ཡང་འབྱུང་སྲིད་གི་རེད་སྙམ་པའི་བློ་གཟུ་བོར་གནས་པའི་ཐོག་ནས་བརྟག་དཔྱད་གཏོང་དགོས་པ་གལ་ཆེན་པོ་རེད། བརྟག་དཔྱད་གཏོང་བར་ཐེ་ཚོམ་དགོས་པ་རེད། གང་འདྲ་ཡིན་ནམ་སྙམ་པའི་ཐེ་ཚོམ་བྱུང་ན་བརྟག་དཔྱད་གཏོང་བ་ཞིག་ཡོང་གི་རེད། གཟུར་བློའི་ཐེ་ཚོམ་གྱི་སྒོ་ནས་ཞིབ་མོར་བརྟག་ཅིང་དཔྱད་དེ་རྒྱུ་མཚན་མཐོང་བ། རྒྱུ་མཚན་མཐོང་སྟེ་ཤེས་རབ་གྱི་གྲོགས་དང་བཅས་དད་པ་སྐྱེས་པ། ང་ཚོས་དཀོན་མཆོག་གསུམ་ལ་སྐྱབས་སུ་མཆིའོ་སྙམ་པ་དེ་རྒྱུ་མཚན་དང་ལྡན་པ་ཞིག་དགོས་པ་རེད་མ་གཏོགས། ངའི་ཕ་མེས་ནས་དཀོན་མཆོག་ལ་དད་པ་བྱེད་ཀྱིན་ཡོད་ཟེར་ན། སངས་རྒྱས་ཀྱི་ཆོས་རླབས་ཆེན་པོ་དེ་བྱབ་ཆུང་ཆགས་ཚར་བ་རེད། བོད་གངས་ཅན་གྱི་ལྗོངས་སུ་བསྟན་པ་ཉམས་པའི་རྒྱུ་རྐྱེན་གཅིག་དེ་སངས་རྒྱས་བཅོམ་ལྡན་ འདས་ཀྱི་དགེ་ཕྲུག་ནང་ཚགས་ཤིག་ཡིན་གིན་ཡིན་གིན་ང་ཚོ་དང་ཁྱེད་ཚོ་ཟེར་བའི་གྲུབ་མཐའི་ཕྱོགས་རིས་བྱས་པ་དེ་བསྟན་པ་སྣུབ་པའི་ཆ་རྐྱེན་ཆགས་འདུག དེ་ཧ་ཅང་གི་ཐབས་སྐྱོ་བོ་རེད། ཅེས་གསུངས་བྱུང་།
མོན་ཁུལ་དུ་ཆ་བཞག་ན་རྟ་དབང་དགོན་པ་དགེ་ལུགས་ཆགས་ཡོད། དེ་བཞིན་རྙིང་མ་དང་བཀའ་བརྒྱུད་དགོན་པ་སོགས་ཡོད་པ་རེད། ཁྱིམ་མཚེས་འབྲུག་ཡུལ་ནང་བཀའ་རྙིང་གཉིས་གཙོ་བོ་རེད། དགེ་ལུགས་པའི་དགོན་པའང་ཡོད་པ་རེད། ནུབ་ལ་དྭགས་བར་བོད་གངས་ཅན་ལྗོངས་ཀྱི་ས་དགེ་བཀའ་རྙིང་ཐམས་ཅད་ཀྱི་སྲོལ་རྒྱུན་ཡོད་བསྡད་པ་ཞིག་ཆགས་ཡོད། དེར་བརྟེན། ང་ཚོ་ཐུགས་མཐུན་ཁྲིམས་གཙང་དགོས་པ་དེ་ཞེ་དྲག་གལ་ཆེན་པོ་རེད། སངས་རྒྱས་ཀྱི་ཆོས་ཤེས་ཏེ་དད་པ་ཐོབ་པ་ཞིག་བྱུང་ན། གནད་འགག་བསྐང་ཐུབ་པ་རེད། སངས་རྒྱས་ཆོས་ཀྱི་གནད་འགག་ཡག་པོ་མ་ཤེས་པར་ཞྭ་མོ་སེར་པོ་གྱོན་མཁན་དང་། ཞྭ་མོ་དམར་པོ་གྱོན་མཁན་གྱི་ཐོག་ནས་གྲུབ་མཐའི་དབྱེ་བ་འབྱེད་དགོས་བྱུང་ན་ཨུ་ཐུགས་པའི་ལས་ཀ་རེད་ལ། ང་ཚོ་དང་ཁྱེད་ཚོ་ཟེར་བ་དེའང་ཡོང་གི་རེད། ཁྱེད་ཚོའི་ས་ཁུལ་འདིར་མཚོན་ན་ཐུགས་མཐུན་ཁྲིམས་གཙང་ཡག་པོ་ཡོད་ས་རེད། ད་དུང་ཡིན་ནའང་ཐུགས་མཐུན་ཁྲིམས་གཙང་ཡག་པོ་གནང་རོགས་ཞུ་རྒྱུ་ཡིན།
ཡང་༧གོང་ས་མཆོག་གིས་རྒྱལ་བོ་ཤུགས་ལྡན་སྐོར་ལ་བཀའ་སློབ་གནང་དོན། རྒྱལ་བོ་ཤུགས་ལྡན་ཟེར་བའི་སྐོར་ལ་སྐད་ཆ་ཞིག་བཤད་ན་བསམ་སོང་། སྤྱིར་སངས་རྒྱས་པའི་ཆོས་པ་ཞིག་གིས་འཇིག་རྟེན་པའི་གྲགས་པ་ལ་སྐྱབས་བཅོལ་ན། སྐྱབས་འགྲོའི་བསླབ་བྱ་དང་འགལ་གྱིན་ཡོད། དེ་བཞིན། བརྟན་མ་བཅུ་གཉིས་ཟེར་བ་སོགས་ལ་ཞེ་ཐག་པ་ནས་སྐྱབས་གནས་སུ་བལྟས་ན། སྐྱབས་འགྲོའི་བསླབ་བྱ་དང་འགལ་གྱིན་ཡོད། འཇིག་རྟེན་དྲེགས་པ་དེའི་རིགས་ལ་ང་ཚོས་གྲོགས་པོའི་འདུ་ཤེས་བཟུང་སྟེ། འཕྲིན་ལས་བཅོལ་བ་དང་གསོལ་མཆོད་བྱས་ན་འགྲིག་གི་རེད། འོན་ཀྱང་། རྒྱལ་བོ་ཤུགས་ལྡན་ལ་ཆ་བཞག་ན། སྨོན་ལམ་ལོག་པའི་དམ་སྲི་ཞིག་རེད། ༧གོང་ས་ལྔ་བ་ཆེན་པོའི་གསུང་རྩོམ་ལས་པོད་ཏ་བའི་བསྟན་སྲུང་ཁག་གི་འཕྲིན་བཅོལ་ནང་གསལ་བོར་གསུངས་ཡོད། དེའི་ནང་ངོས་འཛིན་གང་འདྲ་ཞིག་གནང་ཡོད་ཟེར་ན། དོལ་རྒྱལ་གྱི་རྒྱུ་དང་ངོ་བོ་འབྲས་བུའམ། བྱེད་ལས་གསུམ་གྱི་སྒོ་ནས་ངོས་འཛིན་གནང་ཡོད། རྒྱུ་སྨོན་ལམ་ལོག་པ་ཟེར་བ་དེ་རེད། ངོ་བོ་དམ་སྲི་འབྱུང་བོ་ཟེར་བ་དེ་རེད། བསྟན་དང་འགྲོ་བ་ཀུན་ལ་འཚེ་བྱས་ན། ཟེར་བ་དེས་བྱེད་ལས་སྟོན་གྱིན་ཡོད། ཞེས་དང་།
སྐབས་དེར་དགའ་ལྡན་ཕོ་བྲང་དང་༧གོང་ས་ལྔ་བ་ཆེན་པོ་ལ་མ་འགྲིག་པ་ཞིག་གི་ཐོག་ནས་བྱུང་བ་ཡིན་སྟབས། དགའ་ལྡན་ཕོ་བྲང་ལ་གནོད་པ་བྱེད་མཁན་ཞིག་ཆགས་ཡོད། དང་པོ་ས་སྐྱ་དང་འབྲེལ་བ་བྱུང་བ་རེད། དེ་ནས་རིམ་པས་དགེ་ལྡན་པའི་ནང་སླེབས་པ་རེད། བོད་གངས་ཅན་ལྗོངས་ཀྱི་དགེ་ལུགས་པའི་གདན་ས་ཆེ་ཤོས་འབྲས་སྤུངས་རེད། འབྲས་སྤུངས་དགོན་པར་སྔ་མོ་ནས་ཤུགས་ལྡན་བསྟེན་ན་ཡག་པོ་ཡོད་པ་མ་རེད་ཟེར་ནས་བཤད་རྒྱུན་ཞིག་འདུག འོན་ཀྱང་། གནས་ཚུལ་ཆ་ཚང་བ་དང་གསལ་བོ་ཞིག་དགོངས་པས་མ་ཆོད་པར་འཕྲལ་སེལ་ལྟ་བུར་བསྟེན་མཁན་བྱུང་སྟེ། བར་སྐབས་ཤིག་ནས་འཇམ་མགོན་རྒྱལ་བའི་བསྟན་སྲུང་ཞེས་མིང་ཆེན་པོ་ཆགས་ཤིང་། མང་པོ་ཞིག་དེ་ལ་མགོ་འཁོར་བསྡད་པ་རེད། ཅེས་གསུངས་བྱུང་།
ཁོང་གིས་མུ་མཐུད་དུ་གསུངས་དོན། རྒྱ་གར་ནང་གི་བོད་པའི་གཞིས་ཆགས་ནང་དུ་མི་ཚང་རེ་ཟུང་གིས་རྒྱལ་བོ་ཤུགས་ལྡན་གྱི་བུམ་པ་བསྒྲུབས་ཏེ། བུམ་པ་དེ་ཉར་བ་ཡིན་ན་ཚོང་ཡག་པོ་ཡོང་གི་རེད་ཟེར་ནས་ཁྱིམ་དུ་པད་མ་བཀའ་ཐང་ཡོད་པ་གཞན་ལ་སྤྲད་དེ། ངས་ཤུགས་ལྡན་བསྟེན་གྱིན་ཡོད། རྙིང་མའི་དཔེ་ཆ་དེ་ཚོ་ནང་དུ་བཞག་ན་འགྲིག་གིན་མི་འདུག་ཟེར་མཁན་ཡོད་ཚོད་འདུག འཕགས་པ་བླ་མའི་ཞལ་ལུང་ནང་། དགའ་ལྡན་ཕོ་བྲང་གི་གཞུང་ཞབས་དང་། རི་བོ་དགེ་ལྡན་པའི་བླ་སྤྲུལ་ཚོས་རྙིང་མར་འབྲེལ་བ་བྱས་པའི་རྒྱུ་མཚན་གྱིས་རྒྱལ་བོ་ཤུགས་ལྡན་གྱིས་ཚར་བཅད་པ་རེད་ཟེར་ནས་གསལ་བོ་བཀོད་ཡོད། དགེ་ལུགས་པས་རྙིང་མའི་དཔེ་ཆ་ཞིག་ཉར་ནའང་གནོད་ཀྱིན་ཡོད་ན། ཐད་ཀར་བལྟས་ན་དགེ་ལུགས་པའི་བསྟན་པ་སྲུང་གིན་ཡོད་པའི་བཟོ་འདྲ་བོ་ཞིག་འདུག་ཀྱང་། ཕན་པའི་ཟོལ་གྱིས་གནོད་ཀྱིན་ཡོད་པ་རེད། བར་སྐབས་ཁམས་ཆབ་མདོ་ས་ཁུལ་དུ་དོལ་རྒྱལ་བསྟེན་མཁན་ཤུགས་ཆེན་པོ་ཆགས་ཡོང་སྐབས། གྲུབ་མཐའི་ཕྱོགས་རིས་ཀྱང་ཤུགས་ཆེ་རུ་འགྲོ་བཞིན་འདུག ཤུགས་ལྡན་བསྟེན་མཁན་ཁ་ཤས་ཀྱིས་སློབ་དཔོན་རིན་པོ་ཆེའི་སྐུ་བརྙན་ཆུ་ལ་གཡུགས་པ་དེ་འདྲ་བྱུང་འདུག བསྟན་པའི་དམ་སྲི་ཆེན་པོ་ཞེ་དྲག་བྱུང་ཡོད། ཕྱོགས་གཅིག་ནས་དགའ་ལྡན་པོ་བྲང་དང་༧རྒྱལ་བ་སྐུ་ཕྲེང་རིམ་བྱོན་དང་མ་འགྲིག་པ་ཆགས་ཤིང་། གཉིས་ནས་བསྟན་པ་སྤྱིའི་ཐུགས་མཐུན་ཁྲིམས་གཙང་ཡོང་བར་འགལ་རྐྱེན་བཟོས་ཏེ། ཕྱོགས་རིས་ཆེན་པོ་བྱུང་ཞིང་བསྟན་པ་ནང་ཁུལ་ལ་ཕུང་དཀྲུག་བྱེད་པ་བྱུང་ཡོད།
སྔ་མོ་ངོས་ཀྱང་དོལ་རྒྱལ་བསྟེན་གྱིན་ཡོད། ༡༩༥༡ ལོར་ང་གྲོ་མོར་སླེབས་པ་རེད། སྐབས་དེ་ནས་ངོས་དོལ་རྒྱལ་དང་འབྲེལ་བ་བྱུང་བ་རེད། དེ་ནས་བཟུང་བདུན་ཅུ་དོན་གྲངས་བར་ངོས་དོལ་རྒྱལ་བསྟེན་པ་རེད། རིམ་གྱིས་སྔོན་མའི་ལོ་རྒྱུས་དང་འབྲས་སྤུངས་ཀྱི་མཁས་པ་ཚོ་དང་། ལྷག་པར་དུ་རྒན་པད་མ་རྒྱལ་མཚན་ལ་མཚོན་ན། བོད་བསྟན་སྲིད་ཀྱི་དོན་དུ་ཧ་ལས་པའི་མཛད་རྗེས་ཆེན་པོ་ཡིན། ངོས་ནམ་རྒྱུན་རྩེད་མོའི་ཞོར་ནས་འདི་ལྟར་བཤད་ཀྱིན་ཡོད། དགེ་ལུགས་པའི་སྲུང་མ་དམ་ཅན་ཆོས་རྒྱལ་རེད། ཉིན་ཞིག་དམ་ཅན་ཆོས་རྒྱལ་གཤེགས་སོང་ཞེས་བསྔོ་རྟེན་འབྱོར་སོང་ན། དེ་དུས་སྲུང་མ་གསར་པ་ཞིག་འཚོལ་དགོས་པ་རེད། དམ་ཅན་ཆོས་རྒྱལ་མ་གཤེགས་ན། དམ་ཅན་ཆོས་རྒྱལ་གྱི་ཐུགས་ཡུལ་དེ་གོ་ཆོད་ཐག་ཆོད་ཅིག་ཡོད་པ་རེད་མ་གཏོགས། དམ་ཅན་ཆོས་རྒྱལ་གྱི་ཐུགས་ཡུལ་དེ་ཞེ་དྲག་ཕན་མ་ཐོགས་པ་དང་། ཡང་ན་དམ་ཅན་ཆོས་རྒྱལ་གྱིས་མ་ཁྱོག་པ་དེ་འདྲ་རྩ་བ་ཉིད་ནས་ཡོང་གི་མ་རེད། དེར་བརྟེན། རྗེ་རིན་པོ་ཆེ་ཡི་བླ་བྲེ་ཐུབ་པའི་སྲུང་མ་ཞིག་ལ་བསྙེན་འབྲེལ་གནང་གི་རེད་མ་གཏོགས་གོ་མ་ཆོད་པ་ཞིག་ལ་བསྙེན་འབྲེལ་གནང་གི་མ་རེད། ངོས་བར་སྐབས་དམ་དྲག་བྱེད་དོན་དེ་ཡིན།
མང་ཚོགས་བརྒྱ་ཆ་ ༩༩ ཡིས་ངོས་བཤད་པ་དེར་ཡིད་ཆེས་བྱས་ཏེ་བླང་དོར་ཚུལ་བཞིན་གནང་གིན་འདུག བོད་ནང་དུ་ཡང་དེ་བཞིན་རེད་འདུག འོན་ཀྱང་། རིགས་གཅིག་གིས་༧རྒྱལ་བ་རིན་པོ་ཆེས་བཀའ་གནང་བ་ཡིན་སྟབས། ང་ཚོས་བླང་དོར་བྱེད་ཀྱིན་ཡོད་ཟེར། སྐད་ཆ་དེ་མ་རེད། ངོས་བཤད་པ་དེ་རྒྱུ་མཚན་ག་རེ་རེད། དགོས་པ་ག་རེ་རེད་དེ་ཤེས་པ་བྱས་ཏེ། སྤངས་བླང་བྱ་དགོས་པ་རེད་མ་གཏོགས་༧རྒྱལ་བ་རིན་པོ་ཆེས་བཤད་པ་ཙམ་ལ་གཞི་བཞག་ན། ལུང་ཙམ་ལ་བསྟེན་པ་རེད། ངོས་སྔ་མོ་བསྟེན་གྱིན་ཡོད་པ་རེད། འོ་ན། རྒྱལ་བ་རིན་པོ་ཆེས་སྔ་མོ་བསྟེན་གྱིན་ཡོད་པ་རེད། དེར་བརྟེན། ང་ཚོས་ཀྱང་བསྟེན་རྒྱུ་ཡིན་ཟེར་ན་འགྲིག་གི་རེད། ཅེས་གསུངས་བྱུང་།
༼ གསར་འགོད་པ་དོན་འགྲུབ་བཀྲ་ཤིས་ཀྱིས་མོན་རྟ་དབང་ནས་སྤེལ། ༽
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
དྲ་གྲོགས་དོན་བཀྲ་ལགས།
སྟབས་ལེགས་ནས་ཁྱེད་རང་གིས་བོད་རྒྱ་ཚིག་མཛོད་ཆེན་མོ་ས་ཐག་རིང་པོ་དེ་འདྲར་འཁྱེར་མི་འདུག དེའི་ནང་ན་ཡིག་ནོར་དང་འགྲེལ་ནོར་མང༌། དེ་ལས་ཁྱེད་རང་གིས་དག་ཡིག་གསར་བསྒྲིགས་ཤིག་འཁྱེར་ཡོད་པ་ཡིན་ན། དེས་ནི་ཕན་ཐོགས་ཏན་ཏན་འབྱུང༌།
ཨེ་གྲོགས་པོ། ཁྱེད་རང་གི་ཀླད་པའི་ནང་གི་དག་གསར་དེ་རྒྱ་གར་རྡ་རམ་ས་ལ་ནས་ཕོ་གསར་ཁ་ཤས་ཀྱིས་༼དག་ཡིག་གསར་བསྒྲིགས༽མ་དག་པ་ཞིག་ཏུ་བསྒྱུར་ནས་དཔར་སྐྲུན་བྱས་པའི་༼དག་གསར་༽དེ་ནི་ཡིན་མདོག་མེད། དེ་ཡིན་ན་ནི་དཔེ་བསགས་པ་རེད། ༼དག་གསར་༽དེ་བེད་སྤྱོད་དེ་ཙམ་མེད།
མ་གཞི་བྱས་ན། དུས་བབ་དྲ་ངོས་ན་དག་ཡིག་ཆེ་ཆུང་བཅུ་གཅིག་ཡོད་པ་དེ་ཚོ་ཡང་བེད་སྤྱོད་གནང་ཆོག་ཆོག་རེད། ཨ་ལ་ཀུ་རེ་ཡིན། བྲེལ་ཟིང་གི་བར་ནས་ཡིག་ནོར་རེ་ཟུང་ཤོར་འགྲོ་བ་ལ་ངས་ཡིད་ཆེས་བྱེད་ཐུབ་པ་འདུག གང་ལྟར་ནའང༌། ངས་ནི་ང་ཚོའི་དུས་བབ་འདི་ཡིག་ནོར་མེད་པ་ཞིག་གི་རྨི་ལམ་ལ་འཐམས་ནས་ཡོད། དེའི་སྟབས་ཀྱིས། འདི་ལྟར་དུས་ཚོད་རེ་བྱུང་བ་དང་ཞུས་དག་རེའི་རོགས་འདེགས་ལ་འབད་བཞིན་ཡོད་ལགས་ཞུའོ།།
ལྷོ་ཕྲུག་ལགས།
དམ་ཅན་ཆོས་རྒྱལ་གྱི་ཐུགས་ཡུལ་ཞེས་པར་ དམ་ཅན་ཆོས་རྒྱལ་གྱི་ཐུ་ནུས་ ཞེས་དང༌། རྗེ་རིན་པོ་ཆེ་ཡི་བླ་བྲེ་ཐུབ་པའི་སྲུང་མ་ཞེས་པར་ རྗེ་རིན་པོ་ཆེ་ཡི་བློ་འགེལ་ཐུབ་པའི་སྲུང་མ་ ཞེས་བཅོས་ན་འགྲིག་གི་ཡོད་ས་རེད་ལགས། གཞན་ཡིག་ནོར་མང་དག་ཞིག་འདུག་ཀྱང་ཕྱེད་ཀ་གོ་བས་ཀློག་དགོས་ཀྱི་ཡོད་པ་འདྲ།
དུས་ཚོད་མ་འདང་བ་དང་མེད་པ་ལ་ཁ་གཡར་ནས་གསར་འགྱུར་བཀོད་རྐྱང་བྱས་ན་ག་ནས་འགྲིག ཡིག་ཐོག་ནས་གསར་འགྱུར་སྤེལ་བ་ནི་ཁ་ནས་གཏམ་བཤད་བྱས་པ་ལྟ་བུའི་སྟབས་བདེ་བོ་ཞིག་གཏན་ནས་མིན། འདི་ལ་དོ་སྣང་མ་གནང་ཐབས་མེད་ཅིག་ཆགས་འདུག་གཱ།
འདི་དག་ནས་ཞེས་པར་བཅོས་ཡོད།
སྔོན་གྱི་དམ་པ་རྣམས་ཕེབས་ཤུལ་དུ་འུ་ཚོ་ཕྱི་རབས་པ་རྣམས་ཀྱིས་བགྲོད་ཐུབ་པ་ཞིག་དགོས་རྒྱུ་འདི་ངའི་རེ་བ་ཡང་ཡིན་ལ་དེ་ལྟར་བྱུང་ན་ལག་ཐལ་མོ་སྦྱར་རྒྱུ་ལས་གཞན་མེད། ཡིན་ན་ཡང་གནས་ལུགས་དང་ལག་ལེན་དབར་གྱི་སྟོང་ཆ་ཁ་སྐོང་བྱ་རྒྱུ་འདི་ལས་སླ་པོ་མིན་པ་འུ་ཚོ་ཐམས་ཅད་ཀྱི་སེམས་ན་གསལ་ཐིང་ཐིང་དུ་ཡོད། དེར་བརྟེན་རྟག་ཏུ་གནས་ལུགས་རྐྱང་རྐྱང་བཤད་པས་ཕན་རྒྱུ་ཞིག་མེད་པར་ལག་ལེན་ལ་ཇི་འཁྱོལ་ལ་ཡང་བསམ་དགོས་པའི་སྐབས་ངེས་ཅན་རེ་ཡོད།
གོང་དུ་དག་ནོར་མེད་པའི་རྩོམ་ཡིག་དང་ཚགས་པར་ཞིག་ལ་རེ་བ་བརྒྱབ་ཆོག་པ་དང་དེ་འདྲ་ཞིག་ཡོང་ཐུབ་པའི་དགོངས་ཚུལ་གསུངས་སོང་། དེ་འདྲའི་རྩོམ་ཡིག་དང་ཚགས་པར་གྱི་རིགས་དག་གཞན་ཞིག་ནས་ཡོང་རྒྱུ་དང་བསྒྲུབ་རྒྱུ་ཞིག་མེད་པར་འབྲེལ་ཡོད་དུས་བབ་དང་བང་ཆེན་ལ་སོགས་པའི་ཚགས་པར་འདི་དག་མགོ་འཛུགས་དགོས་པ་ཡིན་སྟབས་ཁྱེད་ཅག་ནས་རེ་བ་དང་སྙིང་སྟོབས་བསྐྱེད་པ་ནང་བཞིན་དུས་བབ་འདི་དག་ནོར་དང་སྡེབ་ནོར་མེད་པའི་ཚགས་པར་ཞིག་ཏུ་མངོན་འགྱུར་བྱེད་རོགས་ཞུ་རྒྱུ་ཡིན།
བསྟན་འཛིན་ཚེ་དཔག་ལགས།
དེ་རིང་དངོས་གནས་ང་ལ་གུ་ཡངས་གནང་རོགས། ཨ་ལ་ཀུ་རེ་ཡིན། བསྟན་འཛིན་ཚེ་དཔག་གིས་དོན་འགྲུབ་བཀྲ་ཤིས་གུ་ཡངས་གཏོང་ཡང་། ཀློག་མཁན་གཞན་དག་གིས་གུ་ཡངས་གཏོང་མི་སྲིད་ལ། ལྷག་པར་དུ་བོད་ཡིག་གི་བརྡ་དག་གནས་ལུགས་ཀྱིས་དེ་བས་ཀྱང་ཀ་ལ། འོན་ཀྱང་། ཕ་གསོད་བུ་ལའང་གནས་ལུགས་བཤད་རྒྱུ་ཡོད་པའི་དཔེ་ལྟར། ཐེངས་འདིར་ང་ལའང་གནས་ལུགས་ཉི་ཚེ་བ་ཞིག་ཞུ་ཆོག་པར་བགྱིས། མ་གཞི་ནས་དོན་འགྲུབ་བཀྲ་ཤིས་ཀྱི་ཀླད་པའི་ནང་གི་དག་གསར་གྱི་བསྒྲིགས་མི་ལེགས་པའི་ཁར། ཐེངས་འདིར་ང་རང་འགྲུལ་བཞུད་ཀྱི་ས་ཐག་རེང་དྲགས་ཏེ། བོད་རྒྱ་ཚིག་མཛོད་ཆེན་མོ་ཡང་འཁུར་ཐུབ་མ་སོང་། གསར་འགྱུར་ཤོག་ངོས་དྲུག་རེ་ཆུ་ཚོད་གཉིས་ཀྱི་ནང་དུ་བཟོ་ཚར་དགོས་སྟབས། ཡི་གེ་གཏགས་ཐབས་ཙམ་ལས་བསྐྱར་དུ་བལྟ་ལོང་གི་དུས་ཚོད་ཙམ་ཡང་མི་འདུག
བྱ་ཚིག་གི་དུས་གསུམ་ལ་མཚོན་ན། ངེས་པར་དུའང་སྔོན་རྗེས་ཀྱི་ཡི་གེ་མ་ནོར་བ་གལ་ཆེ་བ་སོགས་ལ་བསམས་ན། འདི་དག་ནི་འཁྲུལ་བ་ཉི་ཚེ་བ་ཞིག་ཏུ་འདོད་རུང་བ་མིན་པར་འདོད།
སྔོན་གྱི་དམ་པ་རྣམས་ཀྱིས། དག་ནོར་གཏན་ནས་མེད་པའི་ཕྱག་རྩོམ་གནང་བཞག་པ་མང་པོ་མཇལ་དུ་ཡོད་པ་རེད། དེ་བཞིན་དུ། ད་ལྟའི་ང་ཚོས་ཀྱང་། དག་ནོར་མེད་པའི་རྩོམ་དང་ཚགས་པར་ལ་རེ་བ་བྱས་ཆོག་གི་རེད་ལ། ཤུགས་བརྒྱབ་པ་ཡིན་ན། དེ་ནི་ཡོང་མི་སྲིད་པ་གང་ཡང་མ་རེད།
མཁས་པ་མཁས་པའི་རྩ་ན་སྡུག་གཏམ་བཤད།
ལྐུག་པ་ལྐུག་པའི་རྩ་ན་མཁས་མདོག་བཤད།
མི་རེ་སེམས་ལ་འདི་ཡིན་འཁྲུལ་སྣང་རེ།
འཁྲུལ་བའི་གཞི་མ་མིག་ཚིག་ཐ་སྙད་རེད།
དགུན་ས་གྲང་གནམ་གྲང་གི་དུས་ན་གྲྭ་རྐྱང་ཁེར་ཉལ་བརྒྱག་རྒྱུ་འདི་དངོས་གནས་དཀའ་སེ་འདུག་ཏཱ། ཧཧཧཧ
ས་གྲང་གདན་དང་རྡོ་གྲང་སྔས་བྱས་ནས། །
ཐོ་རངས་ཚུར་བསུ་ནམ་ཕྱེད་ཕར་བསྐྱེལ་བའི། །
སྔོན་བྱོན་དམ་པའི་རྣམ་ཐར་ད་མི་འཁྱོངས། །
དེ་བས་ཁྱོད་ལྟར་བདེ་མོའི་མལ་དུ་འགྲོ། །
དཔེར་ན་གོང་གི་འཇིག་རྟེན་གྲགས་པ་དང་འཇིག་རྟེན་དྲེགས་པ་གཉིས་ཀྱི་འཁྲུལ་སྐྱོན་དེ་ཡང་གཞན་ཅི་ཡང་མིན་པར་སྒྲ་མཚུངས་ཀྱི་འཁྲུལ་གཞི་ཞིག་གིས་བཟོས་པའི་དག་ནོར་ཡིན་པ་ལྟ་བུ་རེད།
འདི་ལྟར་འཆད་དུས་སྔོན་ལོ་བོད་ཁྱིམ་དུས་དྲན་མཛད་སྒོའི་ཐོག་༸གོང་ས་མཆོག་ནས་དེང་དུས་Aidsརུ་འབོད་པའི་ནད་གཞི་འདིར་རེག་དུག་གི་ནད་གཞི་ཞེས་པའི་ཐ་སྙད་སྤྱོད་གནང་བར་བརྟེན་དེའི་ཕྱི་ཉིན་གྱི་དུས་བབ་གསར་འགྱུར་སྟེང་རེག་དུག་ཅེས་པའི་དོད་དུ་རིགས་སྡུག་གི་ནད་གཞི་ཞེས་དགོད་ཁ་སློང་བའི་ཐ་སྙད་ཅིག་བྲིས་པ་དེ་ཡང་དྲན་ཡོང་གི་འདུག
༼ངེས༽་རང་ཞེས་བྲིས་ནོར་བྱུང་ནས་བཏང་འདུག་པ་༼ངེད༽་རང་ལ་བཟོ་བཅོས་གནང་རོགས།
ལྷོ་ཕྲུག་ལགས།
དྲ་ངོས་ནས་མཇལ་མོལ་བྱུང་བར་ཡིད་སྤྲོ་ནས་ཡོད།
ད་ནི་ང་རང་གཉིད་ཀྱིས་མི་ལྕོགས་འདུག།
ཡ་ཐོད་མིག་ཀྱང་དེ་ཙམ་མི་གསལ་འདུག།
གྲོགས་པོ་ད་ནི་འདི་ནས་མཚམས་བཞག་སྟེ།།
བདེ་བའི་མལ་ལ་ཞུགས་འདོད་ག་ལེར་བཞུགས།།
རེད་རེད། ང་ན། ཚ་མེད། གཡག་རྔ་དཀར་གྲངས་ཀྱི་ལྔ་ཀར་གོ་ནས་དེ་དག་ཤི་བའི་དོན་དུ་གོ་སྟེ་དོན་མེད་ཀྱི་སེམས་ཁྲལ་བྱས་པའི་ལོ་རྒྱུས་ཤིག་ཀྱང་གསུང་རྒྱུ་ཡོད་པ་རེད། དེར་བརྟེན་འཁྲུལ་པ་ཆུང་ཙག་གིས་སྐྱོན་ཆ་ཆེ་རིམ་ནས་བྱེད་པ་ཡང་བདེན་ངེས་གཏན་རེད། འོན་ཀྱང་འཁྲུལ་པ་ཆུང་ཙག་གིས་སྐྱོན་ཆ་ཆེ་རིམ་ནས་བྱེད་པའི་ཉེས་པ་འདི་ཀློག་མཁན་གྱི་གོ་སྟོབས་དང་ཤེས་ཡོན་ལ་ཡང་རག་ལས་ཀྱི་འབྲེལ་བ་ངེས་ཅན་ཞིག་ཡོད་པ་རེད།
སྤྱིར་དག་ནོར་གཏན་མེད་ཀྱི་ཚགས་པར་ཞིག་དང་རྩོམ་ཡིག་ཅིག་དགོས་རྒྱུ་འདི་ཁྱེད་ཅིག་པུ་མིན་པར་འུ་ཚོ་མཐུན་མོང་གི་རེ་འདུན་ཞིག་ཡིན་པ་རེད། འོན་ཀྱང་རྩོམ་ཡིག་ཀུན་ནས་སློང་བྱེད་ཀྱི་སེམས་ཀྱི་རྨོངས་པ་མ་སེལ་བར་དུ་དེ་ལས་ཐོན་པའི་རྩོམ་ཡིག་གི་བརྗོད་བྱ་དང་རྗོད་བྱེད་གང་ལ་ཡང་འཁྲུལ་མེད་སྤུས་གཙང་ཞིག་དང་གཡའ་དག་སྐྱོན་བྲལ་ཞིག་དུས་ནམ་དུ་ཡང་མི་འབྱུང་།
གང་ལྟར་རང་བཞིན་དག་བཅོས་བྱེད་པའི་གློག་ཀླད་ཀྱི་ཚིག་མཛོད་ཅིག་མ་བྱུང་བར་དུ་ང་ཚོའི་དཀའ་ངལ་འདི་སེལ་མི་ཐུབ་ལ་སྤྱིར་ནས་ནོར་བ་རྫོགས་མེད་དུ་འབྱུང་བ་འདི་བོད་ཡིག་ཁོ་རང་གི་གཤིས་ཀའི་སྟེང་གི་སྐྱོན་ཆ་ཞིག་ཏུའང་བརྩི་ཆོག་པ་རེད།
དཔེར་ན་དབྱིན་ཡིག་ལྟ་བུར་བོད་པའི་ཐ་སྙད་འདི་ཚོ་ནང་བཞིན་གྱི་སྒྲ་གདངས་དབྱེ་འབྱེད་གཏོང་མི་ཐུབ་པའི་སྒྲ་མཚུངས་ཀྱི་ཐ་སྙད་འདི་འདྲ་མང་པོ་ཞིག་མེད་པ་རེད།
སྟག་དང་རྟག བཏགས། གཏགས། ཏག ལྟག སྔོན་གྱི་ཚེ་ཐ་སྙད་འདི་དག་ལ་སྒྲའི་ཁྱད་གསལ་པོ་ཞིག་ཡོད་ཚོད་ཀྱང་ད་ལྟ་ནི་བརྗོད་པ་གོང་འོག་གི་འགྲོས་དང་ཡིག་རིས་སུ་མ་བཀོད་ན་ཐ་སྙད་འདི་དག་ནི་མཚེ་ཕྲུག་ནང་བཞིན་དབྱེ་འབྱེད་གཏོང་མི་ནུས་པར་གྱུར་ཟིན།
རེད། འདི་འདྲའི་བསམ་ཚུལ་ཡང་ཡོད་ཆོག་གི་རེད། ཡིན་ནའང་། ད་ལྟ་གོང་དུ་ངེས་རང་གཉིས་ཀས་སྔ་རྗེས་བྱས་ནས་མཆན་བཀོད་པའི་ནང་། ༼རྗེ་རིན་པོ་ཆེ་ཡི་བླ་བྲེ་ཐུབ་པའི་སྲུང་མ་ཞིག་ལ་བསྙེན་འབྲེལ་གནང་གི་རེད་མ་གཏོགས་གོ་མ་ཆོད་པ་ཞིག་ལ་བསྙེན་འབྲེལ་གནང་གི་མ་རེད།
༽ཅེས་བྲིས་འདུག་པ་དེའི་དོན་མ་གོ་བ་གཅིག་མཚུངས་བྱུང་བ་རེད། དེ་ནི་ངས་བསམས་ན། སྒྲ་ལོག་བྲིས་ཐལ་གྱིས་མ་གོ་བ་འདིའི་ཚད་དུ་བསྐྱལ་བར་འདོད་ཀྱི་ཡོད། དེ་ནི་ཡི་གེའི་དག་ཆའི་སྟེང་ནས་ནོར་དབང་གིས་བྱུང་བ་ལས། གཞན་གང་ཡང་རེད་མི་འདོད།
ཡང་གཅིག་ཞུ་རྒྱུར། ཁྱེད་རང་ལྟར་ན་སྔོན་འཇུག་དང་རྗེས་འཇུག ཕྲད་ཀྱི་འགྲོ་ལུགས་སོགས་ནི་ནོར་བ་ཡིན་ནའང་། ནོར་བ་ཚབས་ཆེན་མ་རེད་ཅེས་གསུངས་འདུག ངས་ནི། སྔོན་འཇུག་རྗེས་འཇུག་འབྲི་ནོར་བྱེད་པ་ནི། རྟགས་འཇུག་གི་དགོངས་དོན་དང་འགལ་ཚབས་ཆེ་བ་དང་། ཕྲད་ཀྱི་སྦྱོར་སྟངས་ནོར་བ་ནི། སུམ་ཅུ་པའི་དགོངས་དོན་དང་འགལ་ཚབས་ཆེ་ཞིང་། དེ་གཉིས་ཀའི་གང་དུ་སོང་བས་ཀྱང་གོ་བརྡ་ཏག་ཏག་ཅིག་སྟོན་མི་ཐུབ་པར་འདོད་ཀྱི་ཡོད། དཔེར་ན། རྟག རྟགས། བརྟག། བརྟགས། འདི་ཚོར་རང་རང་གི་བསྟན་དོན་རེ་ཡོད་པ་ལྟ་བུ་རེད། ཡང་། བྱ་ཚིག་གི་དུས་གསུམ་ལ་མཚོན་ན། ངེས་པར་དུའང་སྔོན་རྗེས་ཀྱི་ཡི་གེ་མ་ནོར་བ་གལ་ཆེ་བ་སོགས་ལ་བསམས་ན། འདི་དག་ནི་འཁྲུལ་བ་ཉི་ཚེ་བ་ཞིག་ཏུ་འདོད་རུང་བ་མིན་པར་འདོད།
སྔོན་གྱི་དམ་པ་རྣམས་ཀྱིས། དག་ནོར་གཏན་ནས་མེད་པའི་ཕྱག་རྩོམ་གནང་བཞག་པ་མང་པོ་མཇལ་དུ་ཡོད་པ་རེད། དེ་བཞིན་དུ། ད་ལྟའི་ང་ཚོས་ཀྱང་། དག་ནོར་མེད་པའི་རྩོམ་དང་ཚགས་པར་ལ་རེ་བ་བྱས་ཆོག་གི་རེད་ལ། ཤུགས་བརྒྱབ་པ་ཡིན་ན། དེ་ནི་ཡོང་མི་སྲིད་པ་གང་ཡང་མ་རེད་འདོད།
སྤྱིར་སྟངས་ངོས་རང་ཡང་ཡི་གེའི་དག་སྡེབ་སོགས་ཕྱོགས་གང་ལ་ཡང་བལྟ་བཟོ་ཏིལ་འབྲུ་ཙམ་ཞིག་ཀྱང་མེད་མཁན་ཞིག་ཡིན། འོན་ཀྱང་དུས་བབ་མཆན་འདེབས་པའི་གྲས་སུ་ཐོག་མར་འཛུལ་ཞུགས་སྐབས་དག་ནོར་བཟོ་བཅོས་ཀྱི་ཁ་ཕོ་ཞིག་ཀྱང་སྒྲོག་ཐལ་ཤོར་བ་དྲན་གྱི་འདུག
རིམ་པས་ཆ་རྒྱུས་ལོན་པའི་ཚེ་ལུང་འདྲེན་ལོག་པའི་རིགས་དང་གོང་དུ་བཤད་པ་ལྟར་གོ་ལོག་དོན་ལོག་གི་ནོར་བ་ཚབས་ཆེའི་རིགས་མ་གཏོགས་འཁྲུལ་པ་ཕྲན་ཚེགས་ཀྱི་རིགས་ལ་སྣང་བ་ཞིག་གཏོད་ཀྱིན་བསྡད་ན་ཞིང་ཁའི་སྔོ་ལྡུམ་ནང་བཞིན་གཏུབས་ནས་ཚར་རྒྱུ་མེད་མཁན་ལྟ་བུ་ཞིག་གི་མཐོང་སྣང་བྱུང་སྟབས་དེ་ཙམ་དོ་གལ་མ་བྱས།
རེད་རེད། ཕན་པའི་སེམས་ཀྱིས་རང་འདོད་མེད་པའི་གཏམ། །བརྩེ་བའི་མི་ལ་མཚང་ནས་བརྗོད་པ་ཡང་། །དྲང་པོ་ཡིན་ཡང་སྙིང་སྐྲན་འཇུག་པའི་རྒྱུ། །ཞེས་པའི་གདམས་པ་ཞིག་ཀྱང་ཡོད་པ་རེད།
ཡིན་ན་ཡང་ཡིག་ནོར་འདི་སྐད་ཡིག་གི་དར་རྒུད་དང་འབྲེལ་བ་ངེས་ཅན་ཞིག་ཡོད་པ་བདེན་པ་ཡིན་པ་སྨྲ་མི་དགོས་ཀྱང་ཐལ་ཆེས་པའི་དོན་ལོག་གོ་ལོག་གི་རིགས་དང་གོ་རྒྱུ་གཏན་མེད་ཀྱི་སྐྱོན་ཆ་ཚབས་ཆེན་དེ་འདྲ་མེད་ངེས་ཀྱི་རིགས་ཁ་ཤས་ལ་དེ་ཙམ་ཚོར་སྣང་སྐྱེན་པོ་རང་བྱེད་དགོས་དོན་ཞིག་ཀྱང་མཐོང་གི་མི་འདུག
ངས་ཁྱེད་ཀྱི་གནང་སྟངས་ལ་འགྲིག་མིན་གྱི་རྣམ་འགྱུར་འདོན་གྱི་མེད། མཐའ་གཅིག་ཏུ་རྒྱབ་སྐྱོར་ཡོད། ཡིན་ན་ཡང་དག་ནོར་གཏན་མེད་ཀྱི་རྩོམ་ཡིག་ཅིག་དང་ཚགས་པར་ཞིག་ལ་རེ་བ་སྐྱོན་གྱིན་བཞུགས་པ་ཡིན་ན་ལག་ལེན་ངོ་མའི་ཐོག་ནས་ཧ་ཅང་དཀའ་ཚེགས་ཆེ་ལ་འགྲུབ་ཐབས་བྲལ་བའི་གནས་ཚུལ་ཞིག་ཡིན་དུས་དེ་ལས་འགངས་ཆེ་སའི་རིགས་དང་གོ་བ་ཕྱིན་ཅི་ལོག་སྟེར་མཁན་གྱི་ཚབས་ཆེ་སའི་རིགས་ལ་གཙོར་དམིགས་གནང་བ་མ་གཏོགས་སྔོན་རྗེས་དང་ཕྲད་ཀྱི་འགྲོ་ལུགས་སོགས་དོན་ནོར་ཚབས་ཆེ་མེད་སའི་འཁྲུལ་པ་ཉི་ཚེ་བའི་རིགས་འགའ་ཞིག་ལ་དེ་ཙམ་དོ་གལ་མ་བྱས་རུང་ཨོ་ཙམ་མིན་འགྲོ།
དཔེར་ན། ཟླ་བ་བཅུ་པའི་ཚེས་ཉེར་བཞི་དང་ཉེར་བརྒྱད་ཉིན་གྱི་གསར་འགྱུར་ནང་གི་ཡིག་ནོར་ཁག་ཟུར་འདོན་ཞུས་ཏེ། དུས་བབ་རྩོམ་སྒྲིག་པར་བཟོ་བཅོས་ཀྱི་རེ་བ་ཞུས་པ་ཡིན། བཟོ་བཅོས་ཀྱི་ཚབ་ལ་དུས་ད་ལྟ་ནའང་སྣང་མེད་དུ་བཞག་ནས་འདུག མ་གཞི་བྱས་ན། དེ་བཟོ་བཅོས་བྱས་པས་ང་ལ་ནི་ཕན་རྒྱུ་གང་ཡང་མེད། ཀློག་མཁན་ཚོར་ཀློག་བདེ་བ་ཞིག་གི་ཆེད་དང་། སྐད་ཡིག་གནས་སྟངས་ཡར་རྒྱས་ལ་བསམ་པ་ཁོ་ན་ལགས་ནའང་། ཡིག་ནོར་ཐེར་འདོན་ཞུས་པར་མ་དགའ་བའི་རྣམ་འགྱུར་སྟོན་སྟངས་འདི་ནི། ཡ་མཚན་པོ་ཞིག་ནི་རེད།
ང་ལ་དགའ་བསུ་ཞུས་ནས་གང་ཕན། དུས་བབ་འདི་ཡིག་ནོར་མེད་པ་ཞིག་གི་རེ་བས། འདི་ལྟར་ཞུ་མུས་ལགས་མོད། འོན་ཏེ། འདི་ཚོས་སྣང་མེད་ལྟ་བུས། བཟོ་བཅོས་ཤིག་ཁྱོན་ནས་རྒྱག་གི་མི་འདུག ཡིན་ནའང་། ད་དུང་དུས་ཚོད་གང་འཚམ་རིང་ཨུ་ཚུགས་རྒྱག་རྩིས་ཡིན། དེ་ནས་ཀྱང་རེ་བ་འབྲས་མེད་དུ་གྱུར་པ་ཡིན་ན། དེ་ནས་ཡིག་ནོར་ཐེར་འདོན་བྱེད་པ་དང་། ཞུས་དག་གི་རེ་བ་འདོན་པ་གཉིས་ཀ་མཚམས་བཞག་ན་ལས། དོན་དག་མེད་སར་དགྲ་བསགས་པ་ལྟ་བུ་ཆགས་ན། དེ་ནི་ངའི་དང་པོའི་འདོད་པའི་ཟུར་ནའང་མེད་པ་ཡིན།
ད་ཨ་ཁུ་སྨོན་ལམ་ལགས་ལ་རང་བཞིན་དག་བཅོས་བྱེད་མཁན་གྱི་གློག་ཀླད་ཚིག་མཛོད་ཅིག་གསར་བཟོ་གནང་རྒྱུའི་རེ་བ་ཞིག་མ་བརྒྱབ་ཕྱིན་རྫོགས་རྒྱུ་མེད་པའི་དག་ནོར་འདི་ཚོར་མཚམས་ཆད་རྒྱུ་ཞིག་ཕལ་ཆེར་ཁག་པོ་ཡིན་པ་འདྲ།
བསྟན་འཛིན་ཚེ་དཔག་ལགས་ནས་རྙོག་གྲ་དང་དཀའ་ངལ་མང་དག་ཅིག་ལ་གདོང་ལེན་མཐའ་གཅིག་ཏུ་གནང་ནས་མུ་མཐུད་དག་བཅོས་ཀྱི་བྱ་བ་ལྷུར་ལེན་གནང་བཞིན་པར་སྙིང་ཐག་པ་ནས་དགའ་བསུ་ཞུ་ཡིན་ཡོད་ལགས།
རེད་རེད། འདི་ལྟར་བྲིས་ཡོང་ན། བོད་ཡིག་ནི་རེད་ཐག་ཆོད་རེད་དེ། དོན་དག་ཅི་སྟོན་ཁྱོན་ནས་གོ་མི་ཐུབ་པ་ཞིག་འདུག ད་ནི་དེང་སང་གི་གསར་འགྱུར་འདི་ཚོ་མགོ་ཚོས་ཁག་པོ་འདུག ང་ཙམ་མ་རེད། ལྷོ་ཕྲུག་ལགས་ལའང་ངའི་དཀའ་ངལ་འདི་བྱུང་ནས་འདུག
འཇིག་རྟེན་གྲགས་པ་ཞེས་པ་ནོར་བ་ཡིན། འཇིག་རྟེན་དྲེགས་པ་ཞེས་འབྲི་དགོས། འདིའི་དོན་ནི་ས་མ་ཐོབ་པའི་སྲུང་མའི་རིགས་དང་རྒྱལ་བཙན་ལ་སོགས་པ་འཇིག་རྟེན་རང་ག་བའི་ལྷ་སྲུང་གི་རིགས་ཤིག་ལ་གོ་ཡིན་ཡོད་པ་རེད།
དམ་ཅན་ཆོས་རྒྱལ་གྱི་ཐུགས་ཡུལ་ཞེས་པ་ཐེངས་གཉིས་ཙམ་དོན་སོང་། དོན་ཇི་ཡིན་གོ་མ་སོང་།
རྗེ་རིན་པོ་ཆེ་ཡི་བླ་བྲེ་ཐུབ་པའི་སྲུང་མ་ཞེས་པ་ཞིག་ཀྱང་དོན་སོང་། འདི་ཡང་གོ་མ་སོང་།
རྩོམ་སྒྲིག་པ་ལགས།
གཤམ་གྱི་འདི་ཚོ་ནོར་ནས་འདུག་སྟབས། བཟོ་བཅོས་ཤིག་གནང་རོགས།
གྲུབ་༼མཐའ༽་ཕྱོགས་རིས། གྲུབ་༼མཐའི་༽ཕྱོགས་རིས།
ཤེས་༼ཀིན་མ་རེད། ཤེས་༼ཀྱི༽་མ་རེད།
ཨུ་༼ཐུགས། ཨུ་༼ཐུག༽
སྐྱབས་༼བཅས༽ སྐྱབས་༼བཅོལ༽
༼བསྟན༽་པ་བཅུ་གཉིས། ༼བརྟན༽་མ་བཅུ་གཉིས།
བསྟན་དང་འགྲོ་བ་ཀུན་ལ་འཚེ་༼བྱས༽་ན།། བསྟན་དང་འགྲོ་བ་ཀུན་ལ་འཚེ་༼བྱེད༽་ན།།
འཇམ་༼དགོན༽་རྒྱལ་བ། འཇམ་༼མགོན༽་རྒྱལ་བ།
༼གཞེས་༽ཆགས། ༼གཞིས་༽ཆགས།
༼འཕགས་པ༽་བླ་མའི་ཞལ་ལུང༌། ༼ཕ་རྒོད་༽བླ་མའི་ཞལ་ལུང༌།
དོལ་རྒྱལ་༼བསྟན༽་མཁན། དོལ་རྒྱལ་༼བསྟེན༽་མཁན།
དམ་ཅན་ཆོས་རྒྱལ་གྱིས་མ་༼ཁྱོག༽་པ། དམ་ཅན་ཆོས་རྒྱལ་གྱིས་མ་༼ཆོག༽་པ།
ཡང༌། མཇུག་འདིར་དྲི་བ་ཞིག་ཡོད། ༼རྗེ་རིན་པོ་ཆེ་ཡི་བླ་བྲེ་ཐུབ་པའི་སྲུང་མ་ཞིག་ལ་བསྙེན་འབྲེལ་གནང་གི་རེད་མ་གཏོགས་གོ་མ་ཆོད་པ་ཞིག་ལ་བསྙེན་འབྲེལ་གནང་གི་མ་རེད།
༽ཞེས་བྲིས་འདུག་པ་འདིར་འགྲེལ་བཤད་ཅིག་ཀྱང་གནང་རོགས།
དེ་རིང་༧གོང་ས་མཆོག་གི་བཀའ་སློབ་དེ་དངོས་ཉིད་རླབས་ཆེན་གྱི་བཀའ་སློབ་
ཞིག་རེད་དོན་སྙིང་ལྡན་པའི་བཀའ་བཟང་འདིར་ང་ཚོ་ཚང་མ་གཅིག་མཇུག་གཉིས་མཐུད་བྱེད་ཤོག་བླ་སྤྲུལ་ཚོ།