རྒྱ་ནག་གིས་ཀྲུང་གོའི་བོད་ཀྱི་ཏཱ་ལའི་བླ་མར་འདོད་ཀྱིན་ཡོད།

མི་ཚང་མས་ངའི་སྐོར་གླེང་སློང་བྱེད་སྐབས། བོད་ཀྱི་ཏཱ་ལའི་བླ་མ་ཟེར་གི་རེད་མ་གཏོགས། སུ་གཅིག་གིས་ཀྱང་རྒྱ་ནག་གི་ཏཱ་ལའི་བླ་མ་ཟེར་གི་མ་རེད། འོན་ཀྱང་། རྒྱ་ནག་གིས་ཀྲུང་གོའི་བོད་ཀྱི་ཏཱ་ལའི་བླ་མ། ཞེས་འདོད་ཀྱིན་ཡོད་པ་རེད། དེ་བཞིན་དུ་ནང་ཆོས་ལའང་། ཀྲུང་གོའི་བོད་བརྒྱུད་ནང་བསྟན་ཆོས་ལུགས་ཟེར་གྱིན་ཡོད། དོན་དངོས་ལོ་རྒྱུས་ཐོག་ཏཱ་ལའི་བླ་མ་བོད་པའི་ཏཱ་ལའི་བླ་མ་རེད། ཅེས་༧གོང་ས་མཆོག་གིས་གསུངས།

ལྡི་ལི་མཐོ་སློབ་དང་ཝ་ར་ནཱ་སི་མཐོ་སློབ་གཉིས་ཀྱི་གོ་སྒྲིག་འོག ཟླ་འདིའི་ཕྱི་ཚེས་ ༡༩ ནས་ ༢༡ བར་གྱི་ཉིན་གསུམ་རིང་ལྡི་ལི་མཐོ་སློབ་ནང་༼ བོད་ཀྱི་ལོ་རྒྱུས་དང་རིག་གཞུང་ཐོག་རྒྱལ་སྤྱིའི་མཁས་པའི་བགྲོ་གླིང་ཚོགས་འདུ ༽ ཞུ་བ་ཞིག་སྐོང་ཚོགས་གནང་ཡོད་ལ། ཐེངས་འདིའི་བོད་རིག་པའི་རྒྱལ་སྤྱིའི་བགྲོ་གླེང་ཚོགས་འདུར་རྒྱལ་ཁབ་དང་ཡུལ་གྲུ་ཁག་ ༡༧ ཙམ་གྱི་མཁས་དབང་དང་མཐོ་སློབ་ཀྱི་དགེ་རྒན་ཆེན་མོ་ ༥༠ ཚོགས་ཞུགས་གནང་སྟེ། དཔྱད་རྩོམ་ཁག་ ༤༢ ཙམ་སྒྲོག་སྦྱོང་བྱས་ཏེ། ཉིན་གསུམ་རིང་ཡུལ་ལུང་འདྲ་མིན་གྱི་བོད་རིག་པའི་ཆེད་མཁས་པ་དག་གིས་བགྲོ་གླེང་གོ་བསྡུར་དང་བསམ་ཚུལ་བརྗེ་རེས་ལྷུག་པོར་བྱས་ཡོད། ཕྱི་ཚེས་ཉེར་གཅིག་ཉིན་གྱི་ཕྱི་དྲོའི་ཆུ་ཚོད་ ༣ དང་ཕྱེད་ཀའི་སྟེང་སློབ་གྲྭའི་ཚོགས་ཁང་ཆེན་མོར་བགྲོ་གླེང་མཇུག་སྡོམ་མཛད་སྒོ་ཚོགས་ཤིང་། དེར་སྤྱི་ནོར་༧གོང་ས་མཆོག་ཆིབས་སྒྱུར་གྱིས་བགྲོ་གླེང་ཚོགས་ཞུགས་པ་རྣམ་པ་དང་། ཟུར་ཉན་དུ་བཅར་མཁན་བོད་རིགས་སློབ་མ་བཅས་ལ་གསུང་བཤད་གནང་ཡོད།

སྐབས་དེར་༧གོང་ས་མཆོག་གིས་བོད་པའི་ལོ་རྒྱུས་བགྲོ་གླེང་གི་སྐབས་བབ་གལ་ཆེའི་རང་བཞིན་གསུངས་དོན། ཐེངས་འདིར་བོད་ཀྱི་ལོ་རྒྱུས་དང་རིག་གཞུང་སྐོར་ལ་རྒྱལ་སྤྱིའི་བགྲོ་གླེང་ཚོགས་འདུ་བསྡུས་པ་འདི་ཧ་ཅང་དགོས་པ་སྐབས་སུ་བབ་པ་ཞིག་རེད། འོན་ཀྱང་། བོད་རིག་པའི་བགྲོ་གླེང་ཚོགས་འདུ་གང་ཞིག་ཡིན་རུང་། ཕྱོགས་ལྷུང་གཡོ་གཟུར་མེད་པའི་ཐོག་ནས་གནད་དོན་ལ་ཞིབ་འཇུག་མཐིལ་ཕྱིན་བྱས་ཏེ། དངོས་ཡོད་གནས་ཚུལ་དང་བདེན་དོན་འཚོལ་རྒྱུ་གལ་ཆེན་པོ་རེད། ལྷག་པར་དུ་ལོ་རྒྱུས་སྨྲ་བ་ཞིག་ལ་མཚོན་ན། དེ་བས་ཀྱང་བདེན་པ་བརྡར་ཤ་གཅོད་རྒྱུ་གནད་ཀྱི་དོན་སྙིང་རེད། བགྲོ་གླེང་ཐོག་ཡུལ་ལུང་འདྲ་མིན་གྱི་མཁས་དབང་མང་པོས་བོད་པའི་བྱུང་རབས་ལོ་རྒྱུས་དང་། སྤྱི་ཚོགས། རིག་གཞུང་སྐོར་གྱི་རྒྱུ་ཆ་གསར་པ་མང་པོ་འཚོལ་སྒྲུབ་དང་སྔོག་འདོན་བྱས་ཡོད་པ་རེད། གོ་ཐོས་སུ་མཁས་དབང་ཞིག་གིས་ཁྲཱར་ཀི་སི་ཐན་ནས་ཀྱང་བོད་པའི་ལོ་རྒྱུས་ཐད་རྒྱུ་ཆ་གསར་པ་རག་ཡོད་རབས་གོ་སོང་། ས་ཁམས་རིག་པ་དང་འཕེལ་འགྱུར་སྨྲ་བའི་ཐོག་ནས་བཤད་ན། གདོད་མའི་སྤྱི་ཚོགས་སྐབས་བོད་པ་དང་ཁྲཱར་ཀི་སི་ཐན་གཉིས་ལའང་འབྲེལ་བ་ཏན་ཏན་ཡོད་རྒྱུ་རེད་སྙམ། ཞེས་དང་།

བོད་པའི་གདོད་མའི་ལོ་རྒྱུས་དེ་ཞེ་དྲག་གསལ་བོ་ཡོད་པ་མ་རེད། དེར་བརྟེན་ཡུལ་ལུང་འདྲ་མིན་ནས་རྒྱུ་ཆ་འཚོལ་དགོས། ཉེ་རབས་དང་དེང་རབས་བོད་པའི་ལོ་རྒྱུས་ལའང་། སྲིད་དོན་དང་ཁོར་ཡུག་གི་དབང་གིས་གནས་ཚུལ་འདྲ་མིན་བྱུང་ཡོད། འོན་ཀྱང་། དོན་དངོས་གནས་སྟངས་གང་ཡིན་ངེས་པར་དུ་གསལ་བོ་བཟོ་རྒྱུ་གལ་ཆེན་པོ་རེད། ངས་རྟག་པར་འདི་ལྟར་བཤད་ཀྱིན་ཡོད། དཔེར་ན། མི་ཚང་མས་ངའི་སྐོར་གླེང་སློང་བྱེད་སྐབས། བོད་ཀྱི་ཏཱ་ལའི་བླ་མ་ཟེར་གི་རེད་མ་གཏོགས། སུ་གཅིག་གིས་ཀྱང་རྒྱ་ནག་གི་ཏཱ་ལའི་བླ་མ་ཟེར་གི་མ་རེད། འོན་ཀྱང་། རྒྱ་ནག་གིས་ཀྲུང་གོའི་བོད་ཀྱི་ཏཱ་ལའི་བླ་མ། ཞེས་འདོད་ཀྱིན་ཡོད་པ་རེད། དེ་བཞིན་དུ་ནང་ཆོས་ལའང་། ཀྲུང་གོའི་བོད་བརྒྱུད་ནང་བསྟན་ཆོས་ལུགས་ཟེར་གྱིན་ཡོད། དོན་དངོས་ལོ་རྒྱུས་ཐོག་ཏཱ་ལའི་བླ་མ་བོད་པའི་ཏཱ་ལའི་བླ་མ་རེད། བོད་པ་ནི་སྐད་ཡིག་རིག་གཞུང་ལོགས་སུ་ཡོད་པ་ཞིག་རེད། གཟུར་གནས་ཀྱི་ལོ་རྒྱུས་སྨྲ་བ་སུ་ཞིག་གིས་ཀྱང་ཀྲུང་གོའི་ཏཱ་ལའི་བླ་མར་མཐོང་གི་མ་རེད། ཅེས་རྩེད་མཚར་དང་སྦྲགས་ཏེ་གསུངས་བྱུང་།

ཡང་༧གོང་ས་མཆོག་གིས་ཟུར་ཉན་དུ་བཅར་མཁན་བོད་རིགས་སློབ་མ་ཚོར་སྔ་རབས་བོད་པའི་ནང་ཆོས་དང་། དེང་གི་འཛམ་གླིང་ཚན་རིག་གཉིས་ཟུང་འབྲེལ་ཐོག་སྦྱང་བརྩོན་གནང་དགོས་པའི་འབོད་སྐུལ་ཞུས་དོན། ང་ཚོས་འདས་པའི་ལོ་ངོ་ལྔ་བཅུ་ལྷག་གི་རིང་ལ་ཤེས་ཡོན་ཐོག་བློ་རིག་བསྒྲིམས་ཏེ། གྲུབ་འབྲས་གང་ལ་གང་འཚམ་བླངས་ཡོད། འོན་ཀྱང་། ད་དུང་ཡང་ཆོག་ཤེས་བྱས་ཏེ་སྡོད་པའི་དུས་ཚོད་རྩ་བ་ནས་མ་རེད། ངས་ནམ་རྒྱུན་བཤད་ཀྱིན་ཡོད་པ་ལྟར། ལས་རིགས་འདྲ་མིན་ཐོག་རིགས་གཅིག་རྐང་འཛིན་བྱས་ཏེ་སློབ་སྦྱོང་མཐར་ཕྱིན་པ་གནང་དགོས། བོད་ནང་གི་བོད་རིགས་རྒྱ་ཆེའི་མི་མང་ལ་ཧ་ལས་པའི་སེམས་ཤུགས་དང་སྙིང་སྟོབས་ཡོད་པ་ཚང་མས་མཁྱེན་གསལ་རེད། འོན་ཀྱང་ཁོང་ཚོར་རང་དབང་ཡོད་པ་མ་རེད། ང་ཚོར་རང་དབང་ཡོད་བཞིན་དུ་སྒྱིད་ལུག་དང་རྣམ་གཡེང་། དོན་དག་ཆུང་ཚགས་ལ་མགོ་འཁོར་བ་སོགས་བྱས་ན་ཐབས་སྐྱོ་བོ་རེད། རྩ་ཆེའི་གོ་སྐབས་འདིའི་ཉི་མ་གཅིག་ཀྱང་འཕྲོ་བརླག་ཏུ་མི་གཏོང་བར་ཤེས་ཡོན་སྦྱོང་བརྩོན་གནང་དགོས། ཁྱེད་ཅག་གིས་ད་བར་ཧུར་ཐག་གནང་ཡོད་ལ། ད་དུང་ཡང་ཤུགས་རྒྱག་རོགས་ཞེས་འབོད་སྐུལ་ཞུ་རྒྱུ་ཡིན། ཞེས་དང་།

རྒྱལ་སྤྱིའི་མཁས་དབང་རྣམ་པས་བོད་རང་ལ་རྩ་ཆེ་བའི་རིག་གཞུང་དང་། གཏིང་ཟབ་མོའི་སངས་རྒྱས་ཀྱི་བསྟན་པ་ཞིག་ཡོད་པ་ཤེས་ཀྱིན་ཡོད། ཉེ་ཆར་ང་ཉི་ཧོང་ལ་ཕྱིན་སྐབས་ཀྱང་མཁས་དབང་མང་པོར་ཐུག་སོང་། ཡུལ་དེར་ཐེག་ཆེན་གྱི་ཆོས་སྤྱི་དང་གསང་སྔགས་ཀྱི་ཆོས་དར་སྲོལ་ཆེན་པོ་ཡོད། འོན་ཀྱང་། བོད་དུ་ཡོད་པ་ལྟ་བུའི་ནང་ཆོས་ཞིབ་ཚགས་པོ་ཞིག་དང་སྤུས་དག་པོ་ཞིག་ང་ཚོར་ཡོད་པ་མ་རེད་ཅེས་གསུང་གིན་འདུག བོད་ཀྱི་མེས་པོ་དམ་པ་ཚོས་དཀའ་ལས་བརྒྱབས་ཏེ་བོད་ནང་ལ་གསར་དུ་བཙུགས་པའི་སངས་རྒྱས་པའི་ལྟ་གྲུབ་དེ་ཧ་ཅང་གི་རྒྱ་ཆེན་པོ་དང་ཆ་ཚང་བ་ཞིག་རེད། སེམས་ཀྱི་རྣམ་བཞག་ཐད་ནས་ཚན་རིག་པ་དག་གིས་ཀྱང་རེ་བ་རྒྱག་ས་བོད་པའི་སངས་རྒྱས་ཆོས་ཆགས་ཡོད། དེ་དག་ཁྱེད་རང་ཚོས་ངོ་ཤེས་པ་བྱས་ཏེ་དེང་རབས་ཀྱི་ཤེས་ཡོན་སློབ་སྦྱོང་དང་ཆབས་གཅིག སྔ་རབས་པས་གསོག་སྒྲུབ་བྱས་པའི་བོད་རང་གི་རིན་པོ་ཆེ་དེའང་ངོ་ཤེས་པ་བྱ་དགོས། དེ་གཉིས་ཟུང་འབྲེལ་བྱས་ན་ད་གཟོད་རང་སྐྱིད་པ་རོགས་བདེ་བ། ཚེ་འདི་དོན་དང་ལྡན་པ། ཚེ་ཕྱི་མར་ལམ་བྲོ་ཡོད་པ་ཞིག་ཆགས་ཡོད། ཅེས་གསུངས་བྱུང་།

ཚོགས་འདུ་མཇུག་སྒྲིལ་མ་ཐག་འདི་གའི་གསར་འགོད་པས་ཝ་ར་ནཱ་སི་མཐོ་སློབ་ཀྱི་ལོ་རྒྱུས་དགེ་རྒན་བྱམས་པ་བསམ་གཏན་ལགས་སུ་བཅར་འདྲི་ཞུས་པར་ཁོང་གིས་ངོ་སྤྲོད་གནང་དོན། ད་རེབ་ང་ཚོ་ལྡི་ལི་མཐོ་སློབ་དང་ཝ་ར་ནཱ་སི་མཐོ་སློབ་གཉིས་ཟུང་འབྲེལ་ཐོག ༼ བོད་ཀྱི་ལོ་རྒྱས་དང་རིག་གཞུང་ཐོག་རྒྱལ་སྤྱིའི་མཁས་པའི་བགྲོ་གླེང་ཚོགས་འདུ་ ༽ ཉིན་གསུམ་རིང་ཚོགས་པ་རེད། ཚོགས་འདུ་འདིར་ཡུལ་གྲུ་ཁག་ ༡༧ ནས་མཁས་དབང་ ༥༠ ཙམ་ཕེབས་འདུག་ལ། ཁོང་ཅག་བོད་པའི་ལོ་རྒྱུས་དང་རིག་གཞུང་ཐོག་རྩོམ་ཡུག་དང་དཔེ་དེབ་མང་པོ་བྲིས་ཡོད་པ་དག་རེད། ཐེངས་འདིར་ཆེད་དུ་གྲ་སྒྲིག་བྱས་པའི་དཔྱད་རྩོམ་ ༤༢ ཙམ་སྒྲོག་སྦྱོང་གནང་སོང་། ཚོགས་ཞུགས་པ་དག་གིས་སོ་སོར་བློ་སྐྱེད་གསར་པ་རག་རྒྱུར་རེ་བ་བརྒྱབས་ཡོད་པ་བཞིན། བགྲོ་གླེང་ཐོག་གནས་ཚུལ་གསར་བ་མང་པོ་སྤུངས་ཐུབ་པ་བྱུང་སོང་། ཚོགས་ཆུང་གཉིས་བགོས་ཏེ་དཔྱད་རྩོམ་ཁག་ལ་བགྲོ་གླེང་གོ་བསྡུར་ཞིབ་ལྷུག་གནང་བ་ཡིན། ཐེངས་འདིར་དཔྱད་རྩོམ་ཁག་གི་ཐོག་ལ་བགྲོ་གླེང་བྱུང་ཡོད་སྟབས། དོ་བདག་གིས་བསྐྱར་ཞིབ་དང་དོགས་སེལ་བྱས་ཏེ། རྗེས་མ་ང་ཚོར་འབྱོར་སྐབས་དེབ་གཟུགས་སུ་འགྲེམས་སྤེལ་བྱ་རྒྱུ་ཡིན། ཞེས་གསུངས་བྱུང་།

ཡང་ཁོང་གིས་བགྲོ་གླེང་ཚོགས་འདིའི་དམིགས་ཡུལ་སྐོར་གསུངས་དོན། མི་གཅིག་གམ་ཕྱོགས་གཅིག་གི་ཤེས་བྱའི་གནས་ལ་མཐར་ཕྱིན་པ་ཞིག་སྦྱང་འདོད་དང་ཤེས་འདོད་ཡོད་ནའང་། དེ་དང་འབྲེལ་བའི་ཡིག་ཆ་རག་ཐུབ་པ་ཤིན་ཏུ་ནས་དཀའ་ལས་ཁག་པོ་རེད། འདི་ལྟར་འཛམ་གླིང་ཡུལ་གྲུ་ཁག་འདྲ་མིན་ནས་མཁས་དབང་མང་པོ་འཛོམས་ཡོང་སྐབས། མི་གཅིག་གིས་མ་མཐོང་བ་དང་མ་ཐོས་པ་མི་གཞན་ཞིག་གིས་མཐོང་ཐོས་ཡོང་སྲིད་སྟབས། དེ་དག་ཕན་ཚུན་ལ་ཉན་བཤད་དང་བརྗེ་ལེན། བགྲོ་གླེང་སོགས་བྱས་པ་བརྒྱུད་དེ་སྔར་མ་མཐོང་བ་དང་མ་ཐོས་པའི་ཡིག་ཆ་མང་པོ་ཞིག་རག་འགྲོ་བ་དང་། དེ་བཞིན་ཕན་ཚུན་ལ་བློ་སྐྱིད་གསར་པ་བསྟེར་བ། སྔར་གྱི་དོགས་གནས་དང་རྣམ་རྟོག་གིས་འོལ་ཚོད་བྱས་བཞག་པ་དག་ལའང་སྒྲོ་འདོག་ཆོད་པ་རེད། ཝ་ར་ནཱ་སི་ལྟ་བུར་མཚོན་ན། ད་ལྟའི་བར་བོད་ཀྱི་ལོ་རྒྱུས་ཐོག་ཚོགས་འདུ་ཟུར་དུ་ཚོགས་པ་དེ་འདྲ་ཡོད་པ་མ་རེད། ལྷག་པར་དུ་ཐེངས་འདིར་རྒྱ་གར་གྱི་མཐོ་རིམ་སློབ་གྲྭ་ཆེ་ཤོས་ཤིག་དང་ཟུང་འབྲེལ་ཐོག བོད་ཀྱི་ལོ་རྒྱུས་དང་རིག་གཞུང་ཐོག་ལ་རྒྱལ་སྤྱིའི་མཁས་པའི་བགྲོ་གླེང་ཚོགས་འདུ་བསྐངས་པ་དང་པོ་ཆགས་ཡོད། ཅེས་ངོ་སྤྲོད་གནང་བྱུང་།

༼ གསར་འགོད་པ་དོན་འགྲུབ་བཀྲ་ཤིས་ཀྱིས་རྒྱ་གར་རྒྱལ་ས་ལྡི་ལི་ནས་སྤེལ ༽