དེ་འདྲའི་སེམས་འཁུར་ཡོད་པ་མ་རེད། བླ་མ་དགེ་བཤེས་ཚོ་དང༌། གྲྭ་རྒན་བླ་རྒན་ཚོས་བརྟན་པོ་བྱོས། ཧུར་བརྩོན་བྱོས། ད་ལོ་ནས་བོད་མི་རིགས་དང་སངས་རྒྱས་བསྟན་པ་འཛམ་གླིང་ལ་དར་རྒྱས་འགྲོ་བའི་དུས་སུ་སླེབས་པ་རེད། འོན་ཀྱང༌། བྱ་དངོས་གང་ཞིག་ཡིན་རུང༌། དར་རྒྱས་ཀྱི་དུས་སུ་དགག་བར་ཆད་ཕྲན་བུ་འབྱུང་སྲིད་པ་རེད། ཅེས་ཀུན་མཁྱེན་འཇམས་དབྱངས་བཞད་པས་གསུངས་སོང་ཟེར།

དྷ་ས་དབུས་སྣེ་ལེན་ཁང་ལ་བོད་ནས་གསར་དུ་འབྱོར་བའི་ཕ་ཡུལ་ཨ་མདོ་བླ་བྲང་ནས་ཡིན་པའི་གྲྭ་བློ་བཟང་རྒྱ་ཚོས་འདི་གའི་གསར་འགོད་པར། ད་ལོ་བླ་བྲང་དུ་བྱུང་བའི་གྱེན་ལངས་ཆེན་མོའི་མཐོང་ཐོས་དངོས་བརྗོད་དོན།  ལུགས་རྙིང་གི་ཟླ་ ༢ པའི་ཚེས་ ༦ ནས་ཉིན་གསུམ་རིང་བླ་བྲང་དགོན་པའི་ཚོགས་མཆོད་ཆེན་མོ་ཡིན། སྐབས་དེར་ལོ་ལྟར་ཕྱོགས་མཐའ་ཁག་གི་མི་དམངས་སྟོང་ཕྲག་མང་པོ་མཆོད་མཇལ་དུ་ཡོང་སྲོལ་ཡོད། ཚེས་ ༦ ཉིན་དགོན་པའི་དཀར་འཆམ་དང༌། ཚེས་ ༧ ཉིན་བསང་ཆུའི་ནང་དུ་ཀླུ་རྫོངས་འཕེན་པ། ཚེས་ ༨ ཉིན་གླིང་སྐོར་དུ་སེམས་འཁྲེང་སྒྲིག་པ་བཅས་ཡིན་མོད། ད་ལོ་ཚེས་ ༧ ཉིན་གྱི་ཀླུ་རྫོངས་སྐབས། ཚོགས་ཆེན་འདུ་ཁང་གི་ཟུར་དུ་ཡི་གེ་ཞིག་སྦྱར་འདུག དེར་མི་དམངས་ཚང་མ་བླ་བྲང་བསང་ཆུའི་འགྲམ་དུ་ཕེབས་རོགས། ཞེས་བྲིས་འདུག འོན་ཀྱང༌། ཉེན་རྟོག་པས་འདུ་འཛོམ་བྱེད་དུ་བཅུག་མི་འདུག ཕྱི་དྲོའི་ཆུ་ཚོད་ ༤ བ་ཙམ་ལ་གློ་བར་དུ་གྲྭ་བ་བཅུ་གྲངས་ཤིག་གིས་གླིང་སྟོད་ནས་བོད་ཀྱི་རྒྱལ་དར་ཕྱར་ཏེ། རྒྱལ་བ་བསྟན་འཛིན་རྒྱ་མཚོ་བོད་དུ་ཕེབས་རོགས། བོད་མིར་རང་དབང་དགོས། ཞེས་སྐད་བརྒྱབས་སོང་ལ། མང་ཚོགས་ཁྲོད་བོད་ཀྱི་རྒྱལ་དར་མང་པོ་གཏོར་སོང༌། དེ་མ་ཐག་མི་དམངས་ ༣༠༠༠ ཙམ་འདུ་འཛོམས་བྱུང་སྟེ་རྔམ་སྟོན་ཁྲོམ་སྐོར་གྱི་མགོ་བསླངས་སོང༌།

ཚེས་ ༨ ཉིན་དགོན་པའི་སེམས་འཁྲེང་གྲོལ་མ་ཐག བསྐྱར་དུ་མི་དམངས་ ༤༠༠༠ ལྷག་འདུ་འཛོམས་བྱུང་སྟེ། སྐད་འབོད་རྒྱག་བཞིན་རྫོང་སྲིད་གཞུང་གི་སྒོ་ཁར་སྐྱོད་སྐབས། གདོང་པ་བོད་པ་ལས་དཀར་ཞིང༌། ཤ་ཅུང་རྒྱག་པའི་གྲྭ་བ་ཆ་མེད་འགའ་ཡིས་སྲིད་གཞུང་ནང་རྡོ་གཞུས་སོང༌། དེ་མ་ཐག་མང་ཚོགས་ཀྱིས་ཀྱང་གང་བྱུང་དུ་རྡོ་གཞུ་མགོ་བརྩམས་སོང་ལ། རྫོང་སྲིད་གཞུང་གི་སྒོ་བྱང་ཡང་བཅག་སོང༌། ངོ་རྒོལ་བ་ཕྱིར་ལོག་ཁར་རྒྱ་མི་དང་ཁ་ཆེའི་ཚོང་ཁང་དང་ཟ་ཁང་སོགས་ལའང་རྡོ་གཞུས་སོང༌། རྫོང་དྲག་ཆས་དཔུང་དམག་རུ་ཁག་གི་སྒོ་ཁར་སླེབས་སྐབས། དམག་མི་སྟོང་ཕྲག་མང་པོས་མེ་མདའ་དང་མདའ་འགོག་འཁྲབ། ལྕགས་འཁྲབ་འཁོར་ལོ་སོགས་བཞག་སྟེ་དྲག་གནོན་བྱ་རྒྱུར་གྲ་སྒྲིག་བྱས་འདུག སྐབས་དེར་བོད་པ་ཚོའི་སྐད་ཤུགས་སྔར་ལས་ཆེ་རུ་ཕྱིན་སོང་ལ། དྲག་ཆས་དཔུང་དམག་རུ་ཁག་གི་སྒོ་བྱང་ཡང་ས་རུ་འཕངས་ཏེ་ཅག་ཉིལ་བྱས་སོང༌། ཁག་ཅིག་རྫོང་བོད་ཡིག་སློབ་བྲིང་དུ་རྒྱུགས་ཏེ། རྩིག་ལྡེབས་སུ་ཧུའུ་ཅིན་ཐའོ་ཡི་དཔར་ཆེན་པོ་ཞིག་ཡོད་པ་མེར་བསྲེགས་བཏང༌། སློབ་གྲྭའི་ཐང་ཆེན་གྱི་དར་དམར་ཕབ་སྟེ་བོད་ཀྱི་རྒྱལ་དར་བསྒྲེངས། མང་ཚོགས་ཀྱིས་བསང་བཏང་སྟེ ༧རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོ་བརྟན་པར་ཤོག ཅེས་འབོད་སྒྲ་སྒྲོག་གིན་འདུག སྐབས་དེར་དྲག་ཆས་དམག་མི་ཕོན་ཆེན་ཡོང་སྟེ། དུག་བརླངས་གཏོར་ཞིང༌། འགད་རྫས་རིགས་འདྲ་མིན་འཕངས་ཏེ་དམངས་ཚོགས་ཁ་གཏོར་ཐབས་བྱས། ཕྱི་དྲོ་ཆུ་ཚོད་ ༤ བ་ཙམ་ལ་སྟེང་དུ་རྒྱང་བསྒྲགས་ཡོད་པའི་རླངས་འཁོར་ཞིག་གི་ནང་ནས། ཐེངས་འདིའི་ངོ་ལོག་སྣེ་ཁྲིད་པ་སུ་ཡིན་བཤད་མཁན་ཡོད་ན། རྒྱ་སྒོར་ས་ཡ་ལྔ་་༥༠༠༠༠༠༠ སྤྲོད་རྒྱུ་ཡིན། ཁྱེད་ཚོར་དྲག་གནོན་མ་བྱས་པའི་རྒྱུ་མཚན། ད་བར་གོང་རིམ་ནས་ཆོག་མཆན་མ་ཐོབ་པ་རེད་ཟེར། དེ་ནས་བཟུང་དགོན་པའི་མཐའ་དང་གྲོང་ཁྱེར་ཡོངས་དམག་གིས་བསྣན་ཏེ་ཟིང་འཁྲུག་རིམ་གྱིས་འཇགས་སོང༌།

དེའི་རྗེས་ཀྱི་ཉིན་ཞིག དགོན་པའི་ནང་གི་དམག་མིས་གྱོན་ཆས་གཙང་མ་གྱོན་ཞིང༌། ལག་ཏུ་དཔར་ཆས་དང་ཕྲེང་བ་བཟུང་སྟེ། སྤྲོ་འཆམ་པ་དང་མཆོད་མཇལ་བ་ཡིན་ཁུལ་བྱས་འདུག ཉིན་དེར་ཚོགས་འཚོགས་སྐབས། སྐྱབས་འཇུག་ཞུ་ཡིག་གི་ནང་དུ་ཡི་གེ་རེ་བཞག་འདུག དེའི་ནང་དེ་རིང་སྔ་དྲོ་ཆུ་ཚོད་ ༡༢ སྟེང་རྒྱལ་སྤྱིའི་གསར་འགོད་པ་ཁག་ཅིག་འབྱོར་རྒྱུ་རེད། ཅེས་བྲིས་འདུག ཚོགས་གྲོལ་མ་ཐག་གྲྭ་བ་འགའ་འདུ་ཁང་སྒོ་འགྲམ་གྱི་བུད་ཤིང་འོག་ཏུ་ཡུབ་བསྡད་པ་རེད། ཁོང་ཚོར་གསར་འགོད་པ་སླེབས་པའི་བརྡ་བསྐྱལ་མ་ཐག བོད་ཀྱི་རྒྱལ་དར་ཕྱར་ཏེ་སྐད་འབོད་བྱས། རྒྱུ་མཚན་དེ་དག་ལ་བརྟེན་ཏེ། ལན་ཀྲུ་ནུབ་བྱང་དམག་ཁུལ་ཁང་གི་དམག་ཁ་སྣོན་བྱས་ཏེ། དགོན་པ་སྔར་ལས་དམ་དྲག་ཆེ་རུ་བཏང་སོང༌། གྲྭ་ཤག་གཅིག་ཀྱང་མ་ལྷག་པར་སྒོ་དང་སྒེའུ་ཁུང་བཅག་སྟེ་སྔོག་བཤེར་བྱས། ༧གོང་ས་མཆོག་གི་པར་ཡོད་ཚད་འཕྲོག ཕྱི་རྒྱལ་བརྙན་འཕྲིན་ལྟ་བྱེད་ཡོད་ཚད་བཅོམ་བཅག་བྱས་ཏེ། གྲྭ་བ་ ༢༦༠ ཙམ་སྡེབ་གཅིག་ལ་འཛིན་བཟུང་བྱས་སོང༌། ཕྱར་ཉིན་དགེ་བཤེས་དང་གྲྭ་བ་རྒན་པ་ ༣༠༠ ཙམ་རྡོ་གཅལ་ཐང་དུ་འཚོགས་ཏེ། འཛིན་བཟུང་བྱས་པའི་གྲྭ་བ་རྣམས་མ་གློད་ཚེ། དགོན་པའི་དགེ་འདུན་པ་ཡོངས་ཀྱིས་ཞི་བའི་ངོ་རྒོལ་བྱ་རྒྱུར་གྲོས་ཐག་བཅད་སོང༌། འོན་ཀྱང༌། དགོན་པའི་དོ་དམ་ལྷན་ཁང་ཡོང་སྟེ། འུ་ཅག་གི་སྐྱིད་སྡུག་གཅིག་པ་ཡིན། རྫོང་སྲིད་གཞུང་ལ་ང་ཚོས་བཤད། གལ་ཏེ་གྲྭ་བ་རྣམས་མ་གློད་ཚེ། ང་ཚོས་སྣེ་ཁྲིད་དེ་ངོ་རྒོལ་བྱས་ཆོག་ཟེར། བརྡ་ལན་དེ་རྫོང་སྲིད་གཞུང་ལ་བསྐྱལ་མ་ཐག་གྲྭ་བ་རྣམས་གློད་གྲོལ་བཏང་སོང་མོད། ད་དུང་གྲྭ་བ་གསུམ་བཙོན་ཁང་དུ་ལྷག་ཡོད་ལ། དམ་དྲག་དང་འཇིགས་དངངས་སྔར་བཞིན་གནས་ཡོད།

ཟིང་འཁྲུག་སྐབས། བླ་བྲང་དགོན་པའི་ཉེ་འཁོར་གྱི་འབྲོག་དམངས་ཚོས། ད་ནི་སྔོན་མའི་བཅིངས་གྲོལ་སྐབས་ཀྱི་ཆག་སྒོ་ལྟ་བུ་ཞིག་ཡོང་རྒྱུ་རེད། ཟ་མའི་དཀའ་ངལ་འཕྲད་རྒྱུ་རེད་ཟེར་ནས་བྲོ་ཕྱེ་དང་འབྲས་འབོར་ཆེན་ཉོ་བཞིན་འདུག་ལ། དགོན་པའི་གྲྭ་བ་རྒན་པ་ཚོ་ཀུན་མཁྱེན་འཇམ་དབྱངས་བཞད་པའི་དྲུང་དུ་བཅར་ཏེ། ད་ནི་རྒྱ་ནག་གིས་སངས་རྒྱས་བསྟན་པ་བསྣུབ་རྒྱུ་ཡིན་པ་འདྲ་ཟེར་ནས་ཞུས་འདུག སྐབས་དེར་ཀུན་མཁྱེན་རིན་པོ་ཆེ་ཡིས། དེ་འདྲའི་སེམས་འཁུར་ཡོད་པ་མ་རེད། བླ་མ་དགེ་བཤེས་ཚོ་དང༌། གྲྭ་རྒན་བླ་རྒན་ཚོ་བརྟན་པོ་བྱོས། ཧུར་བརྩོན་བྱོས། ད་ལོ་ནས་བོད་མི་རིགས་དང་སངས་རྒྱས་བསྟན་པ་འཛམ་གླིང་ལ་དར་རྒྱས་འགྲོ་བའི་དུས་སུ་སླེབས་པ་རེད། འོན་ཀྱང༌། བྱ་དངོས་གང་ཞིག་ཡིན་རུང༌། དར་རྒྱས་ཀྱི་དུས་སུ་དགག་བར་ཆད་ཕྲན་བུ་འབྱུང་སྲིད་པ་རེད། ཅེས་གསུངས་འདུག སྐབས་དེར་མང་པོ་ཞིག་གིས་རེ་བ་ཆེན་པོ་བརྒྱབས་འདུག་ཀྱང༌། ཉེ་ཆར་རྒྱ་རི་བློ་གྲོས་རྒྱལ་མཚན་སོགས་པེ་ཅིན་དུ་སྐྱོད་དེ། གྲུབ་འབྲས་བྱུང་མེད་པ་ཐོས་རྗེས། ད་ནི་རེ་བ་མི་འདུག ཨོ་ལིམ་པིག་རྗེས་སུ་རྒྱ་ནག་གིས་བོད་ནང་སྡུག་པོ་སྔར་ལས་ཆེ་བ་གཏོང་གི་རེད་ཟེར་བཞིན་འདུག་ཅེས་བརྗོད་སོང༌།