ཁྱེད་དངོས་གནས་བཀའ་བློན་ཞིག་རེད།

ཁྱེད་ཀྱིས་དུབ་བབ་གསར་འགོད་པའི་དྲི་བ་ལ་ལན་འདི་ལྟར་སྐྱོན་འདུག “ཤེས་རབ་དགའ་ཚལ་སློབ་གླིང་ལ་དགེ་རྒན་གང་འདྲ་བྱས་ནས་རག་གི་མེད་པའི་སྐོར་ངས་ཤེས་ཀྱིན་མེད།”གསུངས་འདུག དེ་བདེན་པ་རེད་ཁྱེད་ཀྱིས་ཤེས་ཀྱིན་མེད་ཙང་གནས་ཚུལ་འདི་དག་ལྷགས་པ་རེད། གནས་ཚུལ་འདི་ནི་ྋགོང་ས་མཆོག་གིས་ཉེ་ཆར་གནང་བའི་ཤེས་ཡོན་སྐོར་གྱི་བཀའ་སློབ་དང༌། ལོ་ངོ་སུམ་ཅུའི་འཐུས་ཤོར་དང་འབྲེལ་བ་སྟེང་ཟབ་ཡོད། ཡང༌། “དགེ་རྒན་མི་རག་པའི་རྒྱུ་མཚན་དེ། ང་ཚོས་དགེ་རྒན་ཡོང་བར་ཆ་རྐྱེན་འདོན་གྱི་ཡོད་པ་དང༌། ཆ་རྐྱེན་དེ་དག་ཚང་མཁན་རག་ཁག་པོ་ཆགས་ཡོད་པ་རེད།”གསུངས་འདུག དེའང་བདེན་པ་རེད། ཁྱེད་ཀྱིས་ཆ་རྐྱེན་ལ་མངོན་པར་མི་གསལ་བའི་ས་མཚམས་ཤིག་ཡོད་པ་རེད། མཐར་ཕྱིན་སློབ་མའི་ནང་ནས་དགེ་རྒན་སླེབས་མི་ཆོག་པ་དེའང་ཁྱེད་ཀྱིས་བཏོན་པའི་ཆ་རྐྱེན་ཞིག་རེད། སྔོན་མ་ཡིན་ན་བོད་ཡིག་འཛིན་རིམ་མཐོ་ཤས་ཀྱི་དགེ་རྒན་མཐའ་ཕྱིན་སློབ་མ་ཕོགས་ཐོབ་ཡོད་མེད་གཉིས་ཀ་ཡོད། ཕོགས་ཐོབ་ཡོད་མཁན་དཔེར་ན། སྙན་ངག་རྒན་ཟླ་བ་ཚེ་རིང་དང༌། སུ་རྟགས་རྒན་ཨ་ཁུ་དར་རྒྱས། ཕོགས་ཐོབ་མེད་མཁན་རིག་གནས་རྒན་ཟླ་བ་ཚེ་རིང་ལྟ་བུ་རེད། འདི་དག་ནི་ངའི་བོད་པའི་མིག་གིས་དངོས་སུ་མཐོང་བས་གནས་ཚུལ་རེད། ཁྱེད་ཀྱི་རི་བང་གི་ར་དང་འདྲ་བའི་ཆ་རྐྱེན་དེ་གསལ་བསྒྲགས་ལོ་བརྒྱར་བྱས་ཀྱང་འབྲས་བུ་མེད་པ་སྡུག་ངས་ཀྱང་ཤེས། སློབ་གྲྭ་འདིར་མེས་པོའི་སྐད་ཡིག་ལ་མཚོན་ན་སློབ་མས་དགེ་རྒན་ལ་སློབ་ཁྲིད་བྱེད་དགོས་པའི་དུས་ཚད་ཡ་མཚན་ཞིག་སླེབས་ཡོད་པ་འདི་དོ་མི་མཉམ་པའི་དཀའ་ངལ་ཆེན་པོ་ཞིག་འཕྲད་བཞིན་ཡོད། འདི་ནི་ཁྱེད་ཀྱིས་ཆ་རྐྱེན་བཏོན་པ་དང༌། གསལ་བསྒྲགས་བྱས་པའི་མཇུག་འབྲས་དངོས་དེ་རེད། ཡང༌། “དགེ་རྒན་གྱི་མཐུན་རྐྱེན་ཐད་རྩ་འཛིན་ལམ་སྟོན་གཞིར་བཟུང་ཐོག་སམ་བྷོ་ཊ་དང་གཅིག་མཚུངས་ཀྱི་མཐུན་རྐྱེན་སྤྲད་ཡོད་པ་རེད།”གསུངས་འདུག ད་ལྟ་དེ་འདྲ་ཡིན་དུ་ཅུག་ཀྱང༌། འདི་ཡང་དོན་ལ་ཏག་ཏག་གནས་མིན་ཤོག་གཉིས་ཀྱི་འདས་པའི་འབྲེལ་ལམ་ལ་ལྟོས་ན་ཤེས་ཐུབ་པ་ཞིག་རེད། ཡང༌། “དཀའ་ངལ་ཁ་ཤས་ཤིག་སློབ་གྲྭ་རང་ནས་ཐོན་ཡོང་གི་ཡོད་པ་རེད།”གསུངས་འདུག ཁ་ཤས་ཀྱི་ནང་དུ་ཁྱེད་རང་གི་ནག་ཉེས་ཚང་མ་མི་ཤོང་བ་ནི་དངོས་ཡོད་གནས་ཚུལ་ཡིན་པས། གོང་གི་ཚིག་དུམ་འདིས་དོན་གྱིས་ཁྱེད་རང་གི་ནོར་འཁྲུལ་ངོས་ལེན་བྱས་ཡོད། ཡང༌། “སློབ་གྲྭ་གཞན་ནང་སློབ་སྦྱོང་ཁོ་ན་ལས་ཆབ་སྲིད་ཀྱི་ལས་ཀ་བྱེད་མཁན་ཡོད་པ་རེད། ཤེས་རབ་དགའ་ཚལ་སློབ་གླིང་ནང་གང་ལ་གང་འཚམ་བྱེད་ཀྱིན་ཡོད་པ་དེས། སེམས་མ་བདེ་བ་དང་མ་སྐྱིད་པ་མང་པོ་ཡོང་གི་ཡོད་པ་རེད།”གསུངས་འདུག ཆབ་སྲིད་ཅེས་པ་དེའི་རྩེ་མོ་གཉིས་འདུག་ཀྱང༌། ངེས་འདིར་རྩེ་མོ་གཅིག་ལས་གླེང་རྒྱུ་མིན། བདེན་པ་རེད། སློབ་གྲྭ་འདི་དང་གསུམ་གཅིག་བཞིའི་དོན་རྐྱེན་གཉིས་འགྲེལ་བ་གཏིང་ཟབ་ཡོད་པ་རེད། རྒྱ་དམར་གཞུང་གིས་སློབ་གྲྭ་འདི་ལ་ཆབ་སྲིད་སློབ་གྲྭ་ཞེས་དམིགས་གསལ་གྱིས་དོགས་ཟོན་བྱས་དང་བྱེད་བཞིན་ཡོད་པ་རེད། ང་ཚོ་མར་ལོག་ཀྱང་སྣེ་ལེན་དམིགས་བསལ་ཞིག་ཡོད་པ་དེ་གསར་འགྱུར་བརྒྱུད་ལམ་ཁག་ནས་ཤེས་ཐུབ་པ་ཞིག་རེད། དེའི་ཐད་ཁྱེད་ཀྱིས་ལེགས་ཉེས་དབྱེ་བ་ཕྱེས་ནས་འབོད་སྐུལ་གནང་འདུག དེ་ལ་གཞན་སྐྱེས་རྒྱལ་ཞེན་ཅན་རྣམས་ཀྱིས་མུ་མཐུད་ནས་དགའ་ཚུལ་ཞུ་རྒྱུ་རེད་དྲན་གྱི་འདུག ཁྱེད་ཀྱིས་འདི་ལྟར་བུའི་འབོད་སྐུལ་བྱས་པ་ཐེངས་གཅིག་གཉིས་གཏན་ནས་མིན། བོད་མི་རིགས་ཀྱི་ཁྲག་རྒྱུན་དྲོན་མོའི་གསོན་ཤུགས་རྒྱས་པའི་མི་བུ་ཞིག་ཡིན་པས་ཆ་ནས་འབོད་སྐུལ་འདིའི་རིགས་ལ་འཆི་བ་གསོག་ལ་ཉེན་ཁ་ཡོད་ཀྱང་ངའི་བོད་ཀྱི་རྣ་བ་འདིས་ངོས་ལེན་མི་བྱེད་ཁོ་ཐག་ཡིན། མཚམས་འདི་ནས་ངའི་མིག་ནང་ནས་མཆུ་མའང་བཞུར་བྱུང༌། རྩོམ་ཐུང་འདི་འབྲི་དགོས་པའི་རྒྱུ་རྐྱེན་གཙོ་བོ་ཁྱེད་ཀྱིས་འབོད་སྐུལ་འདི་ལ་ཐུག་ཡོད་པ་ཤེས་གལ་ཆེ། སྤྱིར་རྩ་འཛུགས་ལམ་སྟོན་གྱི་རྙོག་དྲ་དེའི་འབྱུང་ཁུངས་དང༌། སློབ་མ་ཡོངས་ཀྱིས་བརྩི་བཀུར་བླ་མེད་ཡོད་པའི་དབུ་འཛིན་དང༌། དགེ་ཆེ་གཉིས་སློབ་གྲྭ་འདི་དང་ཁ་བྲལ་དགོས་པའི་རྒྱུ་མཚན་ཐད་གཞུང་དམངས་གཉིས་ཀྱི་གནད་ཡོད་མི་སྣས་ཆོལ་ཁ་དང་ཆོས་ལུགས་ཀྱི་རྣ་མིག་དོར་ནས་བོད་པའི་རྣ་མིག་གིས་ཞིབ་ལྟ་ཞིབ་ཉན་བྱེད་རོགས་ཞེས་སློབ་ཟུར་པ་བདག་གིས་ཞུ་བ་བྱེད་རྒྱུ་ཡིན། འདི་དག་ནི་གནད་དོན་ཆུང་ཆུང་ཞིག་མ་རེད། བོད་མི་རིགས་ཀྱི་ཤེས་ཡོན་སྲིད་ཇུས་དང༌། བོད་མའི་བདེ་སྡུག་དང་འབྲེལ་བ་ཡོད་པ་ཞིག་ཡིན་ཙང༌། དེ་ལུགས་དགོངས་མངའ་ཡོད་པ་མཁྱེན་མཁྱེན།།

གསོག་སྒར་སློབ་ཟུར་ཡིད་ལྷུང་བུ་རྒོད་ཀྱིས་རྡ་ས་ནས་ ༢༠༠༨ ༡༢ ༡༣ ཉིན་བྲིས།

 

 

བསྐྱར་བཅོས།: ༢༠༡༧/༠༢/༡༦

Leave a Reply