རྒྱབ་ཤ་དཀར་པོའི་དེབ་ལ་ལན་འདེབས་བྱས་ཡོད།

ཕྱི་ཚེས་ ༢ ཉིན་རྒྱ་ནག་པེ་ཅིན་གསར་འགྱུར་གཞུང་ལས་ཁང་གིས། བོད་ལྗོངས་སུ་དམངས་གཙོའི་བཅོས་སྒྱུར་བྱས་ནས་ལོ་ལྔ་བཅུ་འཁོར་བའི་རྒྱབ་ཤ་དཀར་པོའི་དེབ་ཟེར་བ་ཞིག་བཏོན་པའི་ཐད། དེ་རིང་སྔ་དྲོ་རྒྱ་གར་བྱང་ཕྱོགས་ངྷ་རམ་ས་ལར་རྟེན་གཞི་བྱས་པའི་བོད་ཀྱི་དགུ་བཅུ་གསུམ་ལས་འགུལ་ཚོགས་པས་དོན་ཚན་བཞི་ཡིས་ལན་འདེབས་བྱས་ཡོད།

 

ཐེངས་འདིར་རྒྱ་གཞུང་གིས་བཏོན་པའི་རྒྱབ་ཤ་དཀར་པོ་ཞེས་པའི་དེབ་དེ་ནི། དངོས་ཡོད་ལ་འཁྱོག་བརྗོད་བྱས་ཏེ། བོད་ཀྱི་སྤྱི་ཚོགས་རྙིང་བའི་སྐབས་ཀྱི་བོད་མིའི་འཚོ་བའི་གནས་སྟངས་དང༌། རྒྱ་ནག་གཞུང་གིས་བོད་ཡུལ་བཙན་བཟུང་རྗེས་སུ་དམངས་གཙོའི་བཅོས་སྒྱུར་དང༌། སྤྱི་ཚོགས་འཕེལ་རྒྱས་ཟེར་བ་སོགས་འཛམ་གླིང་ལ་དྲིལ་བསྒྲགས་བྱ་ཆེད་ཡིན་པ་དང༌། རྒྱ་གཞུང་གིས་བོད་སྐོར་ལ་རྒྱབ་ཤ་དཀར་པོའི་དེབ་འདོན་ཐེངས་བརྒྱད་པ་དེ་ཆགས་ཡོད་འདུག དང་པོ། བོད་རང་བཙན་གྱི་དུས་སྐབས་ནི་ཆེས་མུན་ནག་ཡིན་པ། གཉིས་པ། རྔམ་བརྗིད་ལྡན་པའི་དམངས་གཙོའི་བཅོས་སྒྱུར་བྱས་ཚུལ། གསུམ་པ། དུས་རབས་ཕྱེད་ཀའི་རིང་བོད་ལ་ལོ་རྒྱུས་རང་བཞིན་གྱི་འཕོ་འགྱུར་བྱུང་ཚུལ་བཅས་གནད་དོན་གསུམ་བཤད་ཀྱིན་ཡོད་པ་དང༌། ད་ཕན་འདོན་སྤེལ་བྱས་པའི་དེབ་བརྒྱད་པོའི་ནང་དོན་ཡོངས་རྫོགས་མཐར་གཏུགས་ན་གཅིག་སྟེ། རླབས་ཆེན་གུང་ཁྲན་ཏང་གི་དབུ་ཁྲིད་འོག་བོད་མི་དམངས་བདེ་སྐྱིད་ཀྱི་འཚོ་བར་རོལ་བཞིན་ཡོད་ཅེས་པ་འདི་རེད། ཅེས་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ལན་འདེབས་ནང་ཆོས་ལུགས་དང་སྐད་ཡིག མི་རིགས། ཁོར་ཡུག་བཅས་གནད་དོན་བཞིས་གསེད་བཀྲོལ་དང་ལན་འདེབས་བྱས་དོན། 

 

དང་པོ། ཆོས་ལུགས་ཀྱི་གནད་དོན་སྐོར་བཀོད་དོན། རྒྱ་གཞུང་གིས་བོད་ཀྱི་ལོ་རྒྱུས་ཐོག་གི་དགོན་སྡེ་ ༦༠༠༠ ལྷག་ཙམ་གཏོར་བཤིག་བཏང་བ་དེས།  བོད་ཀྱི་ལོ་རྒྱུས་དུས་སྐབས་རིམ་པའི་རིག་གནས་དང༌། ལོ་རྒྱུས། བཟོ་སྐྲུན། ཨར་ལས། སྒྱུ་རྩལ་སོགས་ལ་ཞིབ་འཇུག་བྱ་ཡུལ་མེད་པར་གྱུར་ཞིང༌། བོད་ཀྱི་ལོ་རྒྱུས་ཐོག་བྱུང་མྱོང་མེད་པའི་གྱོང་གུད་ཆེ་ཤོས་དེ་ཆགས་ཡོད། ད་ཆ་ང་ཚོའི་མིག་ལམ་དུ་མཐོང་ཐུབ་པ་ནི་ལོ་རྒྱུས་རིན་ཐང་དང༌། ཞིབ་འཇུག་གི་རིན་ཐང་མེད་པའི་དགོན་སྡེ་ཁག་ཡིན་ལ། དགོན་པ་དེ་དག་ཀྱང་ཚོང་ལས་འཕེལ་རྒྱས་གཏོང་ཡུལ་ཡོང་འབབ་གསོག་ས་དང༌། ཡུལ་སྐོར་འགྲེམ་སྟོན་ཁང་དུ་བསྒྱུར་ཅིང༌། གྲྭ་བཙུན་རྣམས་ལ་ནང་པའི་གསུང་རབ་ལྟ་ཀློག་གི་དབང་ཆ་འཕྲོག་སྟེ། ཉིན་མཚན་མེད་པར་མར་ལེའི་རིང་ལུགས་ཀྱི་དཔེ་དེབ་སྐྱོར་དུ་བཅུག་པ་དེ་ཡང་བོད་ཀྱི་ལོ་རྒྱུས་ཐོག་གི་གྱོང་གུད་ཆེ་ཤོས་ཤིག་རེད།

 

གཉིས་པ། སྐད་ཡིག་གི་གནད་དོན་སྐོར་བཀོད་དོན། བོད་རང་བཙན་སྐབས་བོད་ཀྱི་ལོ་ཙཱ་བ་ཚོས་སྔོན་ཐོན་མི་རིགས་གཞན་གྱི་རིག་གནས་སྟེ། སྒྲ་རིག་པ་དང་བཟོ་རིག་པ། གསོ་བ་རིག་པ། སྐར་རྩིས། སྙན་ངག ཟློས་གར། རྩོམ་རིག་སོགས་མི་རིགས་གཞན་དག་གི་རིག་གནས་ཡོད་ཚད་བོད་མི་རང་ཉིད་ཀྱི་སྐད་ཡིག་ཐོག་བསྒྱུར་ཡོད་པ་མ་ཟད། ཡིག་སྒྱུར་གྱི་གྲངས་འབོར་དང༌། སྤུས་ཚད། ཁྱབ་ཁོངས་བཅས་ཀྱང༌། འཛམ་གླིང་ཡིག་སྒྱུར་ལོ་རྒྱུས་ནང་དུ་མཐོང་དཀོན་པའི་རླབས་ཆེན་གྱི་གྲུབ་འབྲས་བླངས་ཡོད་ཀྱང༌། ད་ཆ་བོད་ནང་རྒྱ་གཞུང་གི་སྲིད་ཇུས་ལ་དགོས་ངེས་ཀྱི་དངོས་རིགས་འགའ་མ་གཏོགས། བོད་ཀྱི་གཞི་རྒྱ་ཆེ་བའི་འབྲིང་རིམ་དང་མཐོ་རིམ་སློབ་གྲྭ་ཁག་གི་སློབ་ཚན་རྣམས་བོད་ཀྱི་སྐད་ཡིག་ཐོག་ནས་སློབ་ཁྲིད་བྱེད་དུ་མ་བཅུག་པར། རྒྱའི་སྐད་ཡིག་གི་ཐོག་ནས་སློབ་ཁྲིད་བྱེད་ཀྱིན་ཡོད་པ་དང༌། རིམ་པ་ཁག་གི་ལས་ཁུངས་དང་ཚན་པ་ཁག་ཏུ་རྒྱུན་ལྡན་གྱི་ཚོགས་འདུ་འཚོགས་པ་དང་ཡིག་ཆ་བཟོ་བ་བཅས་རྒྱ་ཡིག་བཀོལ་སྤྱོད་བྱས་ཏེ། རྒྱ་སྐད་ཀྱིས་བོད་སྐད་ཀྱི་ཚབ་དང་རྒྱ་ཡིག་གིས་བོད་ཡིག་གི་ཚབ་བྱེད་དུ་བཅུག་པ་སོགས་བོད་ཡུལ་ནས་མི་རིགས་གཞན་གྱི་སྐད་ཡིག་བཙན་བཀོལ་བྱེད་པའི་ཚད་གཞི་འདི་ལོ་རྒྱུས་ཀྱི་དུས་སྐབས་གང་དུའང་བྱུང་མྱོང་མེད་པའི་ཆག་སྒོ་ཆེན་པོ་ཞིག་ཡིན།

 

གསུམ་པ། ཡང་མི་རིགས་ཀྱི་གནད་དོན་སྐོར་བཀོད་དོན། བོད་དེ་ས་རྒྱ་ཆེ་ཞིང་ཐོན་ཁུངས་ཕུན་སུམ་ཚོགས་པའི་མི་རིགས་ཤིག་ཡིན་ཡང༌། མི་འབོར་ཧ་ཅང་ཉུང་བའི་དབང་གིས་མི་འབོར་འཕེལ་རྒྱས་གཏོང་རྒྱུ་དེ་ནི། དགོས་མཁོ་ཆེ་བའི་ཁ་ཚ་དགོས་གཏུགས་ཀྱི་གནད་དོན་ཞིག་ཡིན་ཡང༌། མི་འབོར་མང་བའི་རྒྱ་རིགས་ས་ཁུལ་གྱི་འཆར་ལྡན་བུ་བཙའི་སྲིད་ཇུས་བོད་དུ་ལག་བསྟར་བྱས་ཤིང༌། བོད་པའི་མི་འབོར་འཕར་ཚད་ལ་ཚོད་འཛིན་དམ་དྲག་བྱས་ཏེ། མི་རིགས་འཕེལ་རྒྱས་གཏོང་རྒྱུར་ཚབས་ཆེའི་འགོག་རྐྱེན་བཟོས་པ་དང་ཆབས་ཅིག གནས་སྤོའི་རྒྱ་རིགས་ཀྱི་མི་འབོར་ལ་སྔར་ལས་ལྷག་པའི་ཤུགས་སྣོན་བརྒྱབས་ཡོད་པ་དེ་ནི། བོད་ཀྱི་ལོ་རྒྱུས་སྟེང་མི་རིགས་གཞན་དག་གནས་སྤོ་དང་གཏན་སྡོད་བྱེད་པའི་གྲངས་ཚད་མང་ཤོས་ཀྱི་དུས་སྐབས་ཤིག་ཡིན་ལ།  བོད་མིའི་རང་དབང་གི་སྐྱེ་འཕེལ་དབང་ཆར་བཀག་འགོག་བྱེད་པའི་ཚད་གཞི་མཐོ་ཤོས་ཀྱི་དུས་སྐབས་ཤིག་ཀྱང་ཡིན།

 

བཞི་བ། ཁོར་ཡུག་གི་གནད་དོན་སྐོར་བཀོད་དོན། མདོ་དབུས་མཐོ་སྒང་དུ་བོད་མི་རིགས་ཆགས་ནས་ལོ་ངོ་ཁྲི་སྟོང་མང་པོའི་ལོ་རྒྱུས་ལ་ཕྱོགས་སྡོམ་བྱས་ཚེ། དེང་གི་དུས་སྐབས་འདི་ནི་བོད་ཀྱི་རྩྭ་ཐང་དང་ནགས་ཚལ། གཙང་པོ། མཚེའུ། རྒྱུག་ཆུ་སོགས་རང་བྱུང་ཁོར་ཡུག་དང༌། དེབཞིན། བདག་མེད་སྲོག་ཆགས་དང་ཆུར་གནས་ཀྱི་ཉ་རིགས། ནམ་མཁའི་འདབ་ཆགས་སོགས་ལ་ལོ་རྒྱུས་ཀྱི་དུས་སྐབས་གང་འདྲ་ཞིག་ཏུའང་བྱུང་མྱོང་མེད་པའི་གནོད་འཚེ་ཆེ་ཤོས་དང་ཉམས་ཉེས་ཆེ་ཤོས། འབག་བཙོག་མང་ཤོས། གཏོར་སྐྱོན་ཆེ་ཤོས་ཕོག་པ་སོགས་ནི། དེང་སྐབས་ཀྱི་སྐྱེ་ཁམས་ཁོར་ཡུག་ལ་ཞིབ་འཇུག་བྱེད་མཁན་ཚང་མས་བཞེད་པ་གཅིག་མཐུན་ཡིན། ཞེས་དོན་ཚན་བཞི་ཡིས་རྒྱ་ནག་གི་འཁྱོག་བཤད་དང་ཕྱོགས་གཅིག་ཁོ་ནའི་ལྟ་བ་བརྒྱུད་བསྒྲགས་བྱེད་པའི་རྒྱབ་ཤ་དཀར་པོའི་དེབ་ལ་ལན་འདེབས་ཁ་གསལ་བྱས་ཡོད།

 

དེ་བཞིན་བཙན་བྱོལ་བོད་གཞུང་གི་ཡང་དག་པའི་དམངས་གཙོའི་རང་ལུགས་དང༌། རྒྱ་ནག་དམར་གཞུང་གི་སྤྱི་ཚོགས་རིང་ལུགས་སུ་འབོད་པའི་ལམ་ལུགས་གཉིས་ལ་གཤིབ་བསྡུར་གྱི་ཚུལ་དུ་བཀོད་དོན། བོད་རང་བཙན་སྐབས་ཀྱི་སྤྱི་ཚོགས་དེ་སྐྱོན་མེད་དྭངས་གཙང་གི་སྤྱི་ཚོགས་ཤིག་མ་ཡིན་ཡང༌། ད་ཆ་བཙན་བྱོལ་བོད་གཞུང་འདི་ནི་ཡང་དག་པའི་དམངས་གཙོའི་ལམ་ལུགས་སུ་སྐྱོད་མགོ་ཚུགས་པ་དང༌། གཞུང་གི་ཆེས་མཐོའི་མགོ་ཁྲིད་རྣམས་མི་དམངས་ཀྱིས་ཐད་ཀར་འོས་འདེམས་བྱེད་ཀྱིན་ཡོད་པ། བཙན་བྱོལ་སྤྱི་ཚོགས་ཁྲོད་དུ་གཞུང་འབྲེལ་མིན་པའི་ཆབ་སྲིད་ཚོགས་པ་དང༌། རིག་གཞུང་གི་སྡེ་ཁག  དེ་མིན་ཚགས་པར་དང་དུས་དེབ་སོགས་རང་དབང་ཅན་གྱི་གླེང་སྟེགས་སྣ་མང་ཡོད་འདི་ནི། བོད་ཀྱི་ལོ་རྒྱུས་དུས་སྐབས་གང་དུ་ཡང་བྱུང་མྱོང་མེད་པའི་འགྱུར་བ་དང༌། བོད་ནང་གི་བོད་མི་ཚོར་མེད་པའི་ཐོབ་ཐང་ཡིན་མོད། རྒྱ་ནག་གཞུང་གི་སྤྱི་ཚོགས་རིང་ལུགས་ཀྱི་འགྲོ་ལམ་རྒྱུན་འཁྱོངས་དང་མི་རིགས་ས་ཁོངས་རང་སྐྱོང་ལམ་ལུགས་རྒྱུན་འཁྱོངས། གུང་ཁྲན་ཏང་གི་མགོ་ཁྲིད་རྒྱུན་འཁྱོངས་བྱེད་དགོས་ཞེས་མི་དམངས་ལ་བདམས་བྱ་འདེམས་བྱེད་ཀྱི་དབང་ཆ་དང་རང་དབང་སྤུ་ཙམ་མེད་སྟབས། དེ་ནི་ངེས་པ་དོན་གྱི་སྲིད་དབང་སྒེར་གཅོད་པ་ཞིག་ཡིན་ལ། ཇི་ལྟར་ཐབས་མཁས་བྱས་ཀྱང་བཙན་རྒྱལ་རིང་ལུགས་ཀྱི་ངོ་གདོང་ནམ་ཡང་སྦས་སྐུང་བྱེད་མི་ཐུབ་ཅིང༌། ཁོང་ཚོས་བཏོན་པའི་རྒྱབ་ཤ་དཀར་བོ་ཞེས་པའི་འཆར་ཅན་གྱི་དཔེ་དེབ་དེ་ཡང་ཞིབ་མཇུག་གི་རིན་ཐང་གང་ཡང་མེད་པའི་ཤོག་སྙིགས་ཤིག་ཡིན་སྟབས། དམངས་གཙོ་དང་རང་དབང་གི་ལམ་བུར་བློ་ཁ་ཕྱོགས་པའི་ང་ཚོས་ཅིའི་ཕྱིར་གདེང་འཇོག་བྱེད་དགོས་སམ། ཞེས་བྲིས་ཡོད་པ་རེད།   

 

བསྐྱར་བཅོས།: ༢༠༡༤/༠༣/༢༦

Leave a Reply

4 thoughts on “རྒྱབ་ཤ་དཀར་པོའི་དེབ་ལ་ལན་འདེབས་བྱས་ཡོད།

  1. རྡོ་རྗེ་རྒྱལ་མཚན།

    ཚང་མས་དོ་ཁུར་ཆེན་པོས་ཡག་པོ་ཞེ་དྲག་བྲིས་གནང་བ་ལ་སྙིུུང་ནས་ཐུགས་རྗེ་ཆེ་ཞུ་བ་ལགས།

  2. མཛངས་མ་ལགས།

    ངས་སྐུ་ཉིད་བོད་པའི་བུད་མེད་ཀྱི་མིག་དཔེ་ཞིག་ཏུ་ངོས་འཛིན་བྱེད་ཀྱི་ཡོད། དེ་གཞན་མ་ཡིན་པར་ཁྱོད་རང་གི་སྙིང་སྟོབས་སམ་ཕོད་སེམས་དེ་ཡིན་ལ། ག་དུས་ཀྱང་ཡི་རངས་ཡོད། འདི་གཅིག་ཡིན།

    གཞན་དེ་སྙན་ངག་པ་ནས་མཛངས་མའི་བར་དང་མཛངས་མ་ནས་གསར་འགོད་པའི་བར་དེའང་ལས་སླ་བོ་ཞིག་མ་རེད། ཡིན་ནའི། དུས་བབ་ཚང་ལ་ས་བཅད་མང་པོ་འདུག དེ་ཆ་ཚང་ལ་སྙན་ངག་སྤེལ་མ་ཆོག་པ་སྲིད་རྒྱུ་མ་རེད་དེ། མི་ཁ་ཤས་ནས་བགྲོ་གླེང་ནང་སྙན་ངག་སྤེལ་ཡོང་གི་འདུག གལ་སྲིད་བོད་སིལ་བུར་འཐོར་བའི་སྐབས་ཡིན་ན། གླུ་ཐ་ལ་ལ་མོ་ཐ་ལ་ལེན་ཟེར་ཆོག་གི་ཡོད་མོད། དེང་སྐབས་དེ་དུས་རབས་ཤིག་གི་མཚོན་རྟགས་ལས་ལག་ལེན་ནང་ཡོང་ཐབས་མི་འདུག དེ་མ་གཏོགས་པཱ་ལེ་བས་སྙན་ངག་མི་གོ་ཡང་སྤེལ་ཆོག་པར་མ་ཟད། འཛམ་གླིང་རྩོམ་སྟེགས་སུ་འབུད་ཆོག་གི་ཡོད་པ་ཧ་གོ་གི་ཡོད། འདི་གཞན་དེ་ཡིན།

    ཁྱེད་རང་གིས་སྒེར་གྱི་བསམ་ཚུལ་གླེང་གི་འདུག པཱ་ལེ་བས་ག་དུས་ཀྱང་སྒེར་སྐད་ལས་རྒྱག་མྱོང་མེད། དེ་བས། དྲི་བ་གཅིག་ཡོད། དགོངས་འགལ་མེད་པ་ཞུ།
    ཁྱོད་རང་གིས་གསར་འགྱུར་ཞིག་འགོད་སྐབས་ཚད་ལྡན་ཡིན་མིན་ག་འདྲ་བྱས་ནས་ཐག་གཅོད་བྱེད་ཀྱིན་ཡོད་དམ། ཡང་ཅིག་བཤད་ན། ཡོང་ཁུངས་ག་ཚོད་དང་མཐུན་བསྡེབས་བྱེད་ཀྱི་ཡོད་ཡོད་དམ།

    དུས་བབ་བོད་དྲའི་ཀློག་མཁན་རྙིང་བ་པཱ་ལེ་བ་ནས་རང་མལ་བག་ལེབ་ཞིམ་པོའི་དགའ་ཚལ་ནས་ཕུལ་བ་དགེའོ།

  3. ཚེ་རིང་སྐྱིད།

    ང་ཚོའི་དྲ་རྒྱའི་སྐུ་མགྲོན་རྙིང་པ་གནས་ཚང་ལགས།
    སྐབས་འདིར་ང་གསར་ཁང་གི་ཚབ་མིན་པར་རང་གི་ཚབ་བྱེད་ནས་སྐད་ཆ་འགའ་བཤད་འདོད་བྱུང་།
    དུས་བབ་དྲ་རྒྱ་ངོས་སུ་གནས་ཚུལ་ཁ་གསལ་མིན་པ་དང་ཁུངས་ལྡན་ཡིན་མིན་མི་ཤེས་པ་དེ་ཚོ་འགོད་རྐྱང་བྱེད་གི་མི་འདུག དུས་བབ་ཚང་ལ་ཁྱད་ཆོས་གཅིག་ཡོད་པ་ནི་གནས་ཚུལ་གང་ཞིག་ཡིན་རུང་ཚང་མར་ཞིབ་འཇུག་རང་པཞིན་ལྡན་པ་དང་། དེ་བཞིན་འབྲེལ་ཡོད་ཁག་ལ་གནས་ཚུལ་བཅར་འདྲི་བྱེད་བཞིན་པ་འདི་རེད་འདུག ད་དུང་རིག་རིག་གོ་གོ་ཚང་མ་དང་གལ་ཆེ་ཆུང་ཚང་མ་ཡང་འགོད་རྐྱང་བྱེད་གི་མི་འདུག ཚགས་པར་ལ་གསར་འགྱུར་གདམས་བསེས་དང་གནད་འགག་གི་སྒྲིག་སྟངས་སོགས་ཡོད་དང་ཡོད། དྲ་རྒྱའི་སྒང་ལ་ཡང་གང་ཐུབ་བྱེད་གི་འདུག
    གཞན་སྐུ་ཉིད་ནས་བསམ་ཚུལ་ནང་ལ་སྙན་ངག་མ་འབྲི་གསུངས་འདུག དེ་བདེན་པ་རེད། བསམ་ཚུལ་དང་དཔྱད་བརྗོད། བསྒྲགས་གཏམ། དགོག་ལན་སོགས་ཀྱི་དབྱེ་བ་ཧ་གོ་བ་གནང་དགོས་གྱིན་འདུག དྲ་རྒྱར་གཟིགསམཁན་ཚོས་རང་གིས་གསར་འགྱུར་ཀློག་གི་ཡོད་པ་དང་། ཡང་ན་དཔྱད་རྩོམ་སོགས་ག་རེ་ཀློག་གི་ཡོད་མེད་ཀྱང་ཤེས་དགོས་པ་འདུག
    ཡང་སྐུ་ཉིད་ཀྱིས་སྙན་ངག་འབྲི་རྒྱུ་ཡིན་ན་འཛམ་གླིང་རྩོམ་སྟེགས་སུ་སྤེལ། གསུངས་འདུག དེ་ནི་བདེན་པ་ཡིན་མིན་གང་ཤེས། དུས་བབ་དྲ་རྒྱས་བཟོས་པའི་མི་སྒེར་གྱི་ཟིན་བྲིས་སུ་རྕོམ་ལུས་གང་ཡང་བཀོད་ཆོག་པར་སྣང་། གསར་འགྱུར་ལ་བསམ་ཚུལ་སྤེལ་སྐབས་སྙན་ངག་འབྲི་བ་ལས་ཟིན་བྲིས་སུ་བྲིས་ན་འོས་པར་མཐོང་།
    གཞན་སྐུ་ཉིད་ཀྱིས་ནམ་རྒྱུན་ང་ཚོར་ཁ་ལྟ་མིག་ལྟ་རེ་བྱེད་བཞིན་པར་བཀའ་དྲིན་ཆེ་ཞུ་རྒྱུ་ཡིན་ལ། ཤ་ཚ་བའི་གཏམ་རེ་སྨྲ་བཞིན་པར་ཡང་བཀའ་དྲིན་ཆེ།

  4. རྒྱབ་ཤ་དཀར་པོ་བསྐྱར་བཟློས་རེད་ལ། ལན་འདེབས་འདི་རིགས་ཀྱང་བསྐྱར་བཟློས་རེད། གལ་སྲིད་འདི་ལས་ལྷག་པ་ཞིག་ལ་བསམ་བློ་གཏོང་བ་དང་ལག་ལེན་ནང་ཡོང་མ་ཐུབ་ཚེ། མནར་གཅོད་མྱོང་མཁན་བོད་ནང་གི་མང་ཚོགས་རེད། དེང་སྐབས་ལས་ཁུངས་ཁག་ཏུ་དུས་ཚོད་ཉེར་བཞིར་རེས་མོས་ཀྱིས་ལས་མཚམས་འཇོག་མི་ཆོག་པ་དང་གུང་གསེང་གཅིག་ཀྱང་གཏོང་གི་མེད་པ་ཧ་མ་གོ་དོན་ཅི། པཱ་ལེ་བ་ཞིག་གིས་གསར་འགོད་པ་ཚོར་ལམ་སྟོན་བྱེད་དགོས་ཆགས་པ་འདི་ངོ་ནས་དྲང་ནས་ཐབས་སྐྱོ་བོ་རེད། ཚང་མ་ལོས་བསམ་ཚུལ་ཤོད། བསམ་ཚུལ་ནང་སྙན་ངག་མ་འབྲི། སྙན་ངག་འབྲི་རྒྱུ་ཡིན་ན་འཛམ་གླིང་རྩོམ་སྟེགས་སུ་སྤེལ། དེས་ག་དུས་ཀྱང་སྒོ་འབྱེད་ཡོད་པ་རེད་ལ། བོད་པ་ཞེས་པ་ཞིག་ཐོན་པ་ཡིན་ན་རང་གཞན་གཉིས་ཕན་རེད། དེ་ལས་ལྡོག་ན། སྙན་ངག་གི་རིན་ཐང་གཅོག་ཀྱིན་པ་ལས་མཁས་ཉམས་ཁྱོན་ནས་མཐོང་མ་སོང་།