རྒྱ་ནག་སྒེའུ་ཁུང་།

༼དམར་ཤོག་དཔོན་པོར་ཉེས་ཁྲིམས་ཕོགས་པ།༽
སི་པན་གྱི་ཁྲིམས་ཁང་གིས་ཚོགས་སྡེ་རྩ་གཏོར་གྱི་ཉེས་བ་དང་གདུག་རྩུབ་ཀྱི་ཉེས་པ་བསགས་པ་བཅས་ཀྱི་ཐོག་ནས། རྒྱ་ནག་གི་སྲིད་འཛིན་ཟུར་བ་ཅང་ཙེ་མིན་དང་། དམར་ཤོག་དཔོན་རིགས་ལོ་ཀན། པའོ་ཞིས་ལེ། ཅ་ཆིན་ལིན། ཝུ་ཀོན་ཀྲིན་བཅས་མི་ ༥ ཡིས་ཆོས་འཁོར་རྩ་རླུང་ཚོགས་པ་རྩ་གཏོར་དང་ཆོས་འཁོར་སྒོམ་སྒྲུབ་པ་རྣམས་ལ་གདུག་རྩུབ་དྲག་གནོན་བྱས་ཡོད་པར་བརྟེན། ཕྱི་ཟླ་ ༡༡ པའི་ཚེས་ ༢༥ ཉིན་ཁྲིམས་ཁང་གིས་གོང་གི་རྒྱ་ནག་དཔོན་རིགས་ ༥ ཉེས་གཏུགས་བྱས་པའི་ཉེས་དོན་བདེན་པ་དཔང་འཕེར་བྱུང་བའི་གསལ་བསྒྲགས་སྤེལ་ཏེ། མ་མཐར་ཡང་ལོ་ ༢༠ ཡི་ཉེས་ཁྲིམས་བཙོན་འཇུག་དང་གནོད་སྐྱོན་ཕོགས་མཁན་དག་ལ་ཀུན་གསབ་སྤྲོད་དགོས་པའི་བཅད་ཁྲ་བཏང་ཡོད་པ་དང་།  གོང་གི་ཉེས་ཅན་པ་དག་གིས་བདུན་ཕྲག་ ༤ ནས་ ༦ གི་ནང་ཚུད་དུ་ལྡོག་གཏུགས་བྱས་ཆོག་ལ། གལ་སྲིད་ལྡོག་གཏུགས་ཅི་ཡང་མ་ཞུས་ཚེ། ཁྲིམས་ཁང་གིས་རྒྱལ་སྤྱིའི་སྟེང་འཛིན་བཟུང་བཀའ་རྒྱ་གཏོང་རྒྱུའི་ཁྱབ་བསྒྲགས་བྱས་ཡོད་པ་རེད།

༢༠༠༢ ལོ་ནས་ད་ལྟའི་བར་ཆོས་འཁོར་རྩ་རླུང་ཚོགས་པས་རྒྱལ་སྤྱིའི་སྟེང་རྣམ་པ་འདྲ་མིན་ཐོག་ཞུ་གཏུགས་ ༥༠ ལྷག་བྱས་ཡོད་པ་དང་། ཉེ་སྔོན་རྒྱལ་ཁབ་ ༣༠ ལྷག་གི་ཁྲིམས་རྩོད་པ་ ༧༠ བརྒལ་བ་ ༼ཅང་ཙེ་མིན་གཏུགས་བཤེར་རྒྱལ་སྤྱིའི་ཁྲིམས་རྩོད་པའི་ཚོགས་སྡེ༽ཞེས་པའི་ནང་ཞུགས་ཏེ་ཆོས་འཁོར་རྩ་རླུང་ཚོགས་པའི་གཏུགས་བཤེར་ལ་རྒྱབ་སྐྱོར་བྱས་ཡོད་པ་རེད། ལྷག་པར་དུ་ཅང་ཙེ་མིན་གཏུགས་བཤེར་ཁྲིམས་དོན་དེ་རྒྱལ་ཁབ་ ༡༥ ནང་དུ་ཁྲིམས་རྩོད་ཞུ་གཏུགས་དང་དམངས་ཁྲོད་གཏུགས་བཤེར་གཉིས་ཀྱི་སྒོ་ནས་བྱ་འགུལ་སྤེལ་ཏེ་རྒྱལ་སྤྱིའི་སྟེང་དོ་སྣང་ཤུགས་ཆེན་བྱུང་ཡོད་པ་རེད། ཧོང་ཀོང་མཐུན་ཚོགས་ཀྱི་ཚོགས་གཙོ་ཟི་ཐའོ་ཧྭ་ཡིས་དེའི་ཐད་བརྗོད་དོན། ༼ཅང་ཙེ་མིན་གཙོས་དམར་ཤོག་སྲིད་གཞུང་གི་དཔོན་རིགས་ཚོས་ཁྲིམས་རར་ལྡོག་གཏུགས་ཀྱིས་དག་འབུལ་བྱེད་མི་ཐུབ་པ་ང་ལ་གདེང་ཚོད་ཡོད། དེའི་རྒྱུ་མཚན་ནི། ཁོ་ཚོས་རྒྱལ་སྤྱི་ལ་གདོང་གཏད་དེ་དཔྱད་གླེང་བྱེད་ནུས་ཀྱིན་མེད་པ་རེད། དེ་ཡིས་ཁོ་ཚོར་བདེན་པ་ཐེར་འདོན་གྱི་བློ་ཁོག་དང་གནས་ལུགས་ཀྱིས་སྟོང་བ་མཚོན་ཡོད། ༽ཅེས་བརྗོད་ཡོད་འདུག 

༼དམངས་གཙོ་དོན་གཉེར་བ་ཧོང་ཅི་ལ་ཁྲིམས་ཐག་བཅད་པ།༽
ཟི་ཁྲོན་ས་ཡོམ་རྗེས་རྐྱེན་འདས་སུ་སོང་བའི་བུ་ཕྲུག་གི་ཕ་མར་རྒྱབ་རོགས་བྱས་ཏེ། སློབ་གྲྭ་དག་གི་འཛུགས་སྐྲུན་རྒྱུ་སྤུས་ཞན་པའི་རྐྱེན་གྱིས་སློབ་ཁྲིད་ཐོག་ཁང་བཤིག་རལ་དུ་སོང་བའི་རྒྱུ་རྐྱེན་དཔྱད་ཞིབ་པ་དང་། འགྲོ་བ་མིའི་ཐོབ་ཐང་སྲུང་སྐྱོབ་པ་ཧོང་ཆི་ལགས་ལ། ཕྱི་ཚེས་ ༢༣ ཉིན་རྒྱ་ནག་ཁྲིན་ཏུའུ་ཝུ་ཧུ་ས་གནས་ཁྲིམས་ཁང་གིས་ལོ་གསུམ་གྱི་བཙོན་འཇུག་ཁྲིམས་ཐག་བཅད་འདུག  ཁྲིམས་ཁང་གིས་ཁོ་རང་ལ་ཁྲིམས་ཐག་བཅད་པའི་རྒྱུ་རྐྱེན་གཙོ་བོ་ནི། ཁོང་གིས་སྒྲུབ་བཞིན་པའི་འགྲོ་བ་མིའི་ཐོབ་ཐང་སྲུང་སྐྱོབ་དྲ་བའི་སྟེང་རྒྱ་ནག་གི་ཞུ་གཏུགས་སྲིད་ཇུས་སྐོར་ཀྱི་གནད་དོན་གླེང་བའི་རྩོམ་ཡིག་བཏོན་ཡོད་པའི་རྐྱེན་གྱིས་ཡིན་ལུགས་བརྗོད་ཡོད་འདུག དེ་མིན་ཧོང་ཆི་ལ་བཙོན་བཀག་དུས་སྐབས་རིང་མནར་གཅོད་ཚད་མེད་བཏང་སྟེ་དེང་སྐབས་ཁོང་གི་ཀླད་པའི་ནང་རྒྱུན་དུ་ཟུག་གཟེར་གཏོང་བ་དང་མིག་ཤེས་ཀྱང་ཉམས་ཡོད་ལ། ཤ་ལྤགས་ལ་གནོད་སྐྱོན་ཚབས་ཆེན་བཟོས་ཡོད་འདུག
རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པས་ཕྱི་ཚེས་ ༢༣ ཉིན་རྒྱ་ནག་གིས་ཆ་རྐྱེན་ཅི་ཡང་མེད་པའི་ཐོག་ནས་ཧོང་ཆི་ལགས་མྱུར་དུ་གློད་གྲོལ་གཏོང་དགོས་པའི་འབོད་སྐུལ་གནང་ཡོད་པ་དང་། ཨ་རིའི་གྲོས་ཚོགས་ཀྱིས་ཟླ་འདིའི་ཕྱི་ཚེས་ ༢༧ ཉིན་མང་མོས་འོས་འདེམས་བརྒྱུད་དེ་འོས་གྲངས་ ༤༢༦ ཐོབ་པར་བརྟེན་ནས་ཧོང་ཆི་དང་ཐན་ཙོ་རན་གཉིས་གློད་གྲོལ་ཡོང་བར་རྒྱ་ནག་གཞུང་ལ་གནོན་ཤུགས་གཏོང་རྒྱུའི་གྲོས་ཆོད་བཞག་ཡོད་པ་རེད། ཐན་ཙོ་རན་ལ་ཁྲིན་ཏུའུ་འབྲིང་རིམ་མི་དམངས་ཁྲིམས་ཁང་གིས་ཕྱི་ཟླ་ ༨ པའི་ཚེས་ ༡༢ ཉིན་ཁྲིམས་བཤེར་བྱས་ཟིན་ཡོད་ནའང་། ད་ལྟའི་ཆར་ད་དུང་ཁྲིམས་ཐག་བཅད་མེད་པ་རེད། གཞན་ཡང་། རྒྱ་ནག་ཧྲང་ཧེ་ཡི་འགྲོ་བ་མིའི་ཐོབ་ཐང་སྲུང་སྐྱོབ་པ་མ་ཀྲིན་ཧོ་ཁྲིམས་མཐུན་འགྲོ་ལུགས་ལྟར་ཉི་ཧོང་ལ་་ཡོང་རྗེས། རྒྱ་ནག་གཞུང་གིས་ཕྱིར་རྒྱ་ནག་ལ་ལོག་ཏུ་བཅུག་མེད་པ་རེད། ཁོད་གིས་ཕྱིར་ལོག་ཐབས་སུ་ཐེངས་བརྒྱད་ལ་འབད་བརྩོན་བྱས་མོད་དོན་འབྲས་མ་བྱུང་བར་བརྟེན་རང་ཉིད་ཀྱི་ཐོངས་མཆན་གཙབ་རལ་དུ་བཏང་རྗེས། ཕྱི་ཟླ་ ༡༡ པའི་ཟླ་སྨད་ནས་བཟུང་ཉི་ཧོང་ཏུང་ཅིན་ཁྲིན་ཐེན་གནམ་ཐང་དུ་ངོ་རྒོལ་བསྒྲགས་གཏམ་འཕྱར་དེ་ངོ་རྒོལ་བྱེད་རྒྱུའི་མགོ་བརྩམས་ཏེ་ད་ལྟའི་བར་བདུན་ཕྲག་གསུམ་ལྷག་འདས་ཡོད་འདུག

༼འཇར་མན་གྱིས་རྒྱ་ནག་གི་གསང་མྱུལ་བར་ཞིབ་བཤེར།༽
འཇར་མན་ཉེན་རྟོག་པས་གཟའ་མིག་དམར་ཉིན་མུ་ནི་ཁུ་གྲོང་ཁྱེར་དུ་གནས་སྡོད་རྒྱ་རིགས་བཞི་ལ་ས་གནས་དེ་གར་སྐྱབས་བཅོལ་དུ་སྡོད་མཁན་ཤིན་ཅང་མི་རིགས་ཀྱི་གནས་སྟངས་སྐོར་རྒྱ་ནག་ལ་གསང་བའི་ཐོག་ནས་སྤྲོད་མཁན་གྱི་གསང་མྱུལ་བའི་དོགས་གཞིའི་འོག་ཁོ་ཚོའི་སྡོད་ཁང་དུ་ཞིབ་བཤེར་བྱས་ཡོད་འདུག དེ་བཞིན་ལོ་གཉིས་ཀྱི་སྔོན་དུ་ས་གནས་དེ་གའི་རྒྱ་ནག་གི་དོན་གཅོད་པ་ཅིས་ཝའོ་མིན་གྱིས་ཀྱང་གསང་མྱུལ་བའི་རྩ་འཛུགས་གཉེར་བར་བརྟེན་འཇར་མིན་ནས་ཕྱིར་འབུད་བཏང་ཡོད་པ་རེད། ཡིན་ནའང་། ཁོའི་ལག་གཡོག་པ་དག་གིས་མུ་མཐུད་ནས་ས་གནས་དེ་གའི་རྒྱ་ནག་དོན་གཅོད་ཁང་དང་ལྐོག་འབྲེལ་གྱིས་གསང་མྱུལ་གྱི་ལས་ཀ་གཉེར་བཞིན་པར་བརྟེན། འཇར་མིན་གྱིས་ཁོ་ཚོའི་ལག་འོག་གི་གསང་མྱུལ་བ་ཐེར་འདོན་གྱིས་རྒྱ་ནག་གཞུང་ལ་ཉེན་བརྡ་བཏང་ཡོད་འདུག མུ་ནི་ཁུ་རུ་ཤིན་ཅང་མི་རིགས་ཀྱི་བཙན་བྱོལ་བ་ ༥༠༠ ལྷག་ཡོད་པ་དང་། འཛམ་གླིང་སྟེང་ཤིན་ཅང་མི་རིགས་ཀྱི་ཐོབ་ཐང་འཐབ་རྩོད་དོན་གཉེར་བ་ཆེས་མང་ཤོས་དང་། འཛམ་གླིང་ཤིན་ཅང་མི་རིགས་མཐུན་ཚོགས་ཀྱི་རྩ་འཛུགས་ལྟེ་བ་གནས་སའང་ཡིན་འདུག  ད་ལོའི་ཤིན་ཅང་དོན་རྐྱེན་སྐབས་རྒྱ་ནག་གཞུང་གིས་མི་ ༡༩༧ རྐྱེན་འདས་བྱུང་ཡོད་པར་བརྗོད་ཡོད་ལ། ཤིན་ཅང་བཙན་བྱོལ་མཐུན་ཚོགས་ཀྱིས་ཉུང་མཐར་ཡང་མི་ ༤༠༠ ལྷག་རྐྱེན་ལམ་དུ་བཏང་ཚུལ་བརྗོད་ཡོད།

༼སོལ་ཁུང་གས་གཏོར་གྱིས་མི་ ༡༠༧ གྱི་ཚེ་སྲོག་འཕྲོག་པ།༽
ཕྱི་ཚེས་ ༢༡ ཉིན་རྒྱ་ནག་ཧེ་ལུང་ཅང་ཞིན་ཞིན་རྡོ་སོལ་གཏེར་ཁུང་དུ་གས་གཏོར་དོན་རྐྱེན་བྱུང་སྟེ་བཟོ་བ་ ༡༠༧ རྐྱེན་ལམ་དུ་བཅུག་ཡོད་པ་རེད། ཐེངས་འདིའི་དོན་རྐྱེན་དེ་ནི་རྒྱ་ནག་རྒྱལ་ཡོངས་སུ་ལོ་བཞིའི་རིང་ཆེས་ཚབས་ཆེ་བའི་སོ་ཁུང་གས་གཏོར་གྱི་དོན་རྐྱེན་ཆགས་ཡོད་པ་དང་། རྒྱ་གཞུང་གིས་དོན་རྐྱེན་དེ་ཞི་འཇགས་ཐག་གཅོད་ཡོང་ཆེད་དུ་རྐྱེན་འདས་སུ་སོང་བའི་བཟོ་བ་རྣམས་ལ་དུར་མཆོད་གུན་གསབ་ཆེད་རྒྱ་སྒོར་ ༡༠ དང་། ནང་མིར་ཟླ་རེར་རྒྱ་སྒོར་ ༥༠༠ ནས་ ༧༠༠ བར་གྱི་གུན་གསབ་ཟླ་ཕོག་སྤྲོད་རྒྱུ་ཁས་ལེན་བྱས་ཡོད་ནའང་། ཕྱི་ཚེས་ ༢༣ ཉིན་བར་ཆིངས་ཡིག་དེར་ངེས་ལེན་ས་རྟགས་འགོད་མཁན་གྱི་ཁྱིམ་མི་ ༤༨ མ་གཏོགས་བྱུང་མི་འདུག ༢༠༠༣ ལོ་ནས་ད་ལྟའི་བར་རྒྱ་ནག་རྒྱལ་ཡོངས་སུ་རྡོ་སོལ་གཏེར་ཁུངས་གས་གཏོར་གྱི་དོན་རྐྱེན་ཁྲོད་རྐྱེན་འདས་སུ་སོང་བའི་བཟོ་བ་ ༡༦༢༡ ལྷག་ལ་བུད་ཡོད་པ་རེད།

༼སྨྱོ་ནད་ཀྱིས་ཁེངས་པའི་རྒྱ་ནག་གི་སྤྱི་ཚོགས།༽
ཉེ་ལམ་རྒྱ་ནག་ཝུའུ་ཧན་གྲོང་ཁྱེར་དུ་འཚོགས་པའི་རྒྱ་ནག་པའི་སེམས་ཁམས་བདེ་ཐང་གོང་འཕེལ་སྐོར་གྱི་དཔྱད་གླེང་ཚོགས་འདུའི་ཐོག་གནས་ཚུལ་སྤེལ་དོན། རྒྱ་ནག་ཏུ་སེམས་ཁམས་བདེ་ཐང་མིན་པའི་མི་དུང་ཕྱུར་ ༡.༧ ཡོད་པ་དང་། དེའི་ཁྲོད་སེམས་ཁམས་སྨྱོ་ནད་ཀྱི་སྨན་བཅོས་བྱ་དགོས་པའི་མི་ ༡༦༠༠༠ ལྷག་ཡོད་སྐོར་བརྗོད་འདུག
དེའི་ཁྲོད་ཀྱི་གསུམ་ཆའི་གཅིག་གི་ནད་གཞི་ཧ་ཅང་ཛ་དྲག་གི་གནས་སྟངས་སུ་སླེབས་ཏེ་བྱ་བ་ཤོར་བ་དང་རང་འཚོའི་ནུས་པ་མེད་པར་གྱུར་ཡོད་འདུག  རྒྱལ་སྤྱིའི་རྒྱ་ནག་པའི་སེམས་ཁམས་བདེ་ཐང་མཐུན་ཚོགས་ཀྱི་ཚོགས་གཙོ་འམ། ཨ་རིའི་ཞིན་ཧྥུ་སེམས་ཁམས་རིག་པའི་སློབ་གྲྭ་ཆེན་མོའི་སློབ་གཙོ་སུང་ཀྲུ་ཡན་གྱིས། དེང་སྐབས་རྒྱ་ནག་དཔལ་འབྱོར་འགྲན་རྩོད་ཀྱི་སྐས་རིམ་ཤིག་ཏུ་སླེབས་པ་དང་བསྟུན་ནས་འཚོ་བ་དང་། སློབ་སྦྱོང་། བྱ་བ་སོགས་གང་ཅིའི་ཐད་གནོན་ཤུགས་ཆེ་རུ་ཕྱིན་པར་བརྟེན།  རྒྱ་ནག་གི་གཞོན་སྐྱེས་ཚོའི་སེམས་ཁམས་བདེ་ཐང་མིན་པའི་གནས་སྟངས་སྔར་ལས་ཁྱབ་ཆེ་རུ་འགྲོ་བཞིན་ཡོད་པ་དང་། གཞོན་སྐྱེས་མང་ཆེ་བས་ཨ་རག་འཐུང་བ་དང་དུད་ནག་འཐེན་པ། ཐ་ན་རང་སྲོག་གཅོད་པའི་གནས་སྟངས་ཀྱང་མང་དུ་འགྲོ་བཞིན་པའི་སྐོར་འགྲེལ་བརྗོད་གནང་ཡོད་པ་རེད། དེ་བཞིན། རྒྱ་ནག་གཞུང་གི་སྡོམ་རྩིས་ལྟར་ན་ལོ་རྗེས་མར་རྒྱ་ནག་ཏུ་ལས་འཚོལ་འགྲན་རྩོད་ཁྲོད་ཞུགས་མཁན་གྱི་སློབ་ཆེན་མཐར་ཕྱིན་སློབ་མ་ཁྲི་ ༦༣༠ ལྷག་ལ་འབུད་རྒྱུ་ཡིན་པ་དང་།  ༢༠༡༠ ལོའི་སློབ་ཆེན་མཐར་ཕྱིན་སློབ་མའི་གྲངས་འབོར་གྱིས་རྒྱལ་ནང་ཟིན་ཐོ་བརྒལ་བའི་ལས་དོན་དེར་རྒྱ་ནག་སློབ་སྒྲུབ་ཁང་གིས་བློ་འཚབ་དང་། མ་འོངས་པར་རྒྱ་ནག་གི་ལས་ཞུགས་ཁྲོམ་རས་དཀའ་གནད་ཅན་གྱི་འཐབ་བརྩོད་ཅིག་ལ་གདོང་གཏོད་པར་གྲ་སྒྲིག་དགོས་པའི་ཉེན་བརྡ་ཡང་བཏང་ཡོད་པར་མ་ཟད། རྒྱ་ནག་གཞུང་གིས་སྔ་ས་ནས་སློབ་ཆེན་མཐར་ཕྱིན་སློབ་མ་རྣམས་ལ་མཐའ་འཁོབ་ས་ཁུལ་དུ་ལས་ཀ་སྒྲུབ་ཏུ་འགྲོ་རྒྱུར་སྐུལ་འདེད་ཀྱི་བྱ་འགུལ་སྤེལ་བཞིན་པ་རེད། 

༼སྙིགས་སྲེག་གློག་འདོན་གྱི་ལས་གཞིར་ངོ་རྒོལ།༽
ཕྱི་ཚེས་ ༢༢ ཉིན་རྒྱ་ནག་ཀུང་ཀྲུག་ཏུ་གད་སྙིགས་མེར་སྲེག་གློག་འདོན་ལག་རྩལ་ལས་གཞི་གཏན་འབེབས་ཀྱི་མཛད་སྒོ་བསྡུས་ཏེ་ལས་གཞི་དེར་མིང་རྟགས་བཀོད་ཡོད་པ་དང་། ཕྱི་ཚེས་ ༢༣ ཉིན་མི་མང་སྟོང་ཕྲག་ ༢ བརྒལ་བ་ས་གནས་གྲོང་ཁྱེར་སྲིད་གཞུང་དང་གྲོང་ཁྱེར་འཛུགས་བསྐྲུན་དོ་དམ་ལྷན་ཁང་གི་སྒོ་འགྲམ་དུ་འདུ་འཛོམས་ཀྱིས་གད་སྙིགས་མེར་སྲེག་གློག་འདོན་བྱས་ཏེ་གྲོང་ཁྱེར་མཁའ་རླུང་བཙོག་པོར་བསྒྱུར་རྒྱུར་ངོ་རྒོལ་བྱས་ཡོད་པ་དང་། ཅང་སུའུ་དང་ཝུའུ་ཧན་གྲོང་ཁྱེར་བཅས་སུའང་མི་མང་གིས་སྲང་ལམ་ཁག་ཏུ་ཞི་བའི་ངོ་རྒོལ་གྱི་ལས་འགུལ་སྤེལ་ཡོད་འདུག

༼༤༡༥ རྐྱེན་འདས་མི་དམངས་ལ་རྗེས་དྲན་མྱ་ངན་ཞུས་པ།༽
ཟླ་འདིའི་ཚེས་ ༡༧ ཉིན་རྒྱ་ནག་ཡུན་ནན་ཞིང་ཆེན་གྱི་ནེ་ཁུང་མེ་འཁོར་ལྕགས་ལམ་གྱི་ཉེ་འགྲམ་དུ་ ༤༡༥ རྐྱེན་འདས་མི་དམངས་རྣམས་ལ་རྗེས་དྲན་མྱ་ངན་ཞུ་བའི་ལས་འགུལ་ཞིག་སྤེལ་ཡོད་པ་དང་། བྱ་འགུལ་དེར་ས་གནས་མང་ཚོགས་དང་རྩོམ་པ་པོ་ ༤༠ ལྷག་མཉམ་ཞུགས་བྱས་ཡོད་པ་རེད། ༤༡༥ ཡི་མཚོན་དོན་ནི་རྒྱ་ནག་གཡོན་ལྷུང་དམར་ཤོག་དབང་སྒྱུར་བའི་རིག་གནས་གསར་བརྗེ་ཞེས་པའི་ལས་འགུལ་སྤེལ་ཏེ་རྒྱལ་ཡོངས་སུ་ངལ་རྩོལ་བསྒྱུར་བཀོལ་བཙོན་ར་གསར་འཛུགས་བྱེད་སྐབས་ཟི་ཁྲོན་ནས་ཡུན་ནན་བར་གྱི་ནེ་ཁུང་ལྕགས་ལམ་གསར་བསྐྲུན་གྱི་ལས་མགོ་བཙུགས་པའི་ཉིན་མོ་སྟེ། ཕྱི་ལོ་ ༡༩༥༨ ཟླ་ ༤ པའི་ཚེས་ ༡༥ ཉིན་ཡིན་ལ། ཟི་ཁྲོན་ནེ་ཅང་ནས་ཡུན་ནན་ཁུང་མིན་བར་གྱི་ལྷོ་ནུབ་ལྕགས་ལམ་ལོ་ལྔའི་ནང་བྲེལ་མྱུར་གསར་འཛུགས་བྱས་པའི་བརྒྱུད་རིམ་ཁྲོད་ངལ་བསྒྱུར་བཙོན་པ་ ༨༠༠༠ ལྷག་གི་ཚེ་སྲོག་འཕྲོག་ཡོད་པ་རེད།

༼རྒྱ་ནག་གི་རྡོ་ཐལ་པང་ལེབ་ཀྱིས་དུག་རླངས་གཏོང་བ།༽
ཕྱི་ཚེས་ ༢༣ ཉིན་ཨ་རིའི་འཛད་སྤྱོད་ཐོན་དངོས་བདེ་འཇགས་མཐུན་ཚོགས་ཀྱིས་རྒྱ་ནག་ནས་ནང་འདྲེན་བྱས་པའི་རྡོ་ཐལ་པང་ལེབ་ཀྱིས་དུག་རླངས་ཕྱིར་གཏོང་བྱས་ཏེ་ཁང་ཁྱིམ་གྱི་མཁའ་དབུགས་བཙོག་པར་བསྒྱུར་བཞིན་པ་ར་སྤྲོད་བྱུང་ཡོད་སྐོར་བརྗོད་འདུག ཨ་རིའི་འཛད་སྤྱོད་ཐོན་དངོས་བདེ་འཇགས་མཐུན་ཚོགས་ཀྱིས་རྒྱ་ནག་གི་རྡོ་ཐལ་པང་ལེབས་སྤྱད་ཡོད་པའི་ཁང་ཁྱིམ་དུ་སྡོད་པའི་ཁྱིམ་ཚང་ ༤༡ དང་། རྒྱ་ནག་གི་རྡོ་ཐལ་པང་ལེབ་བཀོལ་སྤྱོད་བྱས་མེད་པའི་ཁྲོམ་གཤར་ ༡༠ ལྷག་གི་ཁྱིམ་ཚང་གི་ནང་མིའི་བདེ་ཐང་ལ་ཞིབ་འཇུག་བརྟག་དཔྱད་བརྒྱུད། རྒྱ་ནག་གི་རྡོ་ཐལ་པང་ལེབ་སྤྱད་ཡོད་པའི་སྡོད་ཁང་ནང་དུ་དབྱང་གཉིས་ཐཱན་འགྱུར་གྱི་བཙོག་རླུང་ཁྱབ་ཡོད་པར་བརྡར་ཤ་བཅད་ཡོད་པ་དང་། ཚོགས་པའི་ངོས་ནས་ཨ་རིའི་རྒྱལ་ཚོགས་དང་སྲིད་གཞུང་གཉིས་མཉམ་འབྲེལ་ཐོག་བཙོག་རླུང་གི་རྐྱེན་གྱིས་བདེ་ཐང་ལ་གནོད་སྐྱོད་ཕོག་པའི་ཁྱིམ་ཚང་ལ་གུན་གསབ་ཇི་ལྟར་སྤྲོད་རྒྱུའི་ཐག་གཅོད་ཡོང་རྒྱུར་རེ་སྐུལ་ཞུས་ཡོད་པ་རེད།

བསྐྱར་བཅོས།: ༢༠༡༤/༠༣/༢༦

Leave a Reply

One thought on “རྒྱ་ནག་སྒེའུ་ཁུང་།

  1. བསྟན་པ་ཡར་འཕེལ།

    ཟི་ཁྲོན་ནས་ཡུན་ནན་བར་གྱི་ནེ་ཁུང་ལྕགས་ལམ་གསར་བསྐྲུན་གྱི་ལས་མགོ་བཙུགས་པའི་ཉིན་མོ་སྟེ། ཕྱི་ལོ་ ༡༩༥༨ ཟླ་ ༤ པའི་ཚེས་ ༡༥ ཉིན་ཡིན་ལ། ཟི་ཁྲོན་ནེ་ཅང་ནས་ཡུན་ནན་ཁུང་མིན་བར་གྱི་ལྷོ་ནུབ་ལྕགས་ལམ་ལོ་ལྔའི་ནང་བྲེལ་མྱུར་གསར་འཛུགས་བྱས་པའི་བརྒྱུད་རིམ་ཁྲོད་ངལ་བསྒྱུར་བཙོན་པ་ ༨༠༠༠ ལྷག་གི་ཚེ་སྲོག་འཕྲོག་ཡོད་པ་རེད།