ང་བཀའ་ཁྲིའི་འོས་གཞིར་འདུག་རྒྱུ་ཡིན།

གལ་སྲིད་ང་རང་སྔོན་འགྲོའི་འོས་གཞིའི་ནང་སླེབས་པ་ཡིན་ནམང་ཚོགས་ཀྱི་རེ་འདོད་བཞིན་བཀའ་ཁྲིའི་འོས་གཞིར་འདུག་རྒྱུ་ཡིན་ཞེས་བཀའ་ཟུར་བཀྲ་ཤིས་དབང་འདུས་མཆོག་གིས་གསུངས་འདུག  

འདས་པའི་ཟླ་གཉིས་ཀྱི་གོང་དུ་བོད་ཀྱི་གཞུང་འབྲེལ་མིན་པའི་ཚོགས་པ་ཁག་གིས་བཀའ་ཟུར་བཀྲ་ཤིས་དབང་འདུས་མཆོག་ཚུད་པའི་མི་སྣ་འགའ་ཕྱི་ལོ་ ༢༠༡༡ ལོའི་བཀའ་བློན་ཁྲི་པའི་འོས་མིའི་ཁོངས་སུ་ཕྱིར་བསྒྲགས་བྱས་ཡོད་ཀྱང་། སྐབས་དེར་ཁོང་གིས་ངོས་བཞེས་མ་གནང་པར་གནས་སྐབས་རིང་དགོངས་པ་ཞུས་ཡོད་ཀྱང་། ཕྱིས་སུ་ཡུ་རོབ་ཀྱི་བོད་རིགས་ཚོགས་སྡེ་ཁག་གི་སྐུ་ཚབ་དང་མང་ཚོགས་བཅས་ནས་ཡང་ཡང་རེ་སྐུལ་ཞུས་ཡོད་སྟབས། བཀའ་ཟུར་བཀྲ་ཤིས་དབང་འདུས་མཆོག་གིས་མང་ཚོགས་ཀྱི་རེ་འདོད་ལྟར། ཁོ་རང་ཕྱི་ལོ་ ༢༠༡༡ ལོའི་བཀའ་ཁྲིའི་འོས་གཞིར་བཞེངས་རྒྱུ་ཡིན་པའི་ཁས་ལེན་བྱས་ཡོད་པ་རེད།

བཀྲ་ཤིས་དབང་འདུས་ལགས་ཀྱིས་རང་ཉིད་བཀའ་ཁྲིར་བཞེངས་འདོད་ཡོད་མེད་སྐོར་ལ། ཉེ་སྔོན་ཚོགས་པ་ཁག་ཅིག་གིས་ང་རང་བཀའ་ཁྲིའི་འོས་གཞིར་ལངས་རྒྱུ་ཡིན་མིན་སྐོར་དྲིས་སྐབསངས་ལངས་རྒྱུ་མིན་ཞེས་ཞུས་པ་ཡིན། ཡང་ཁ་ཤས་ཀྱིས་ང་ལ་ཁྱེད་རང་འོས་གཞིར་ལངས་འདོད་མེད་ཀྱང་མང་ཚོགས་ཀྱིས་འོས་བླུགས་པ་ཡིན་ན་ཅི་ཞིག་བྱེད་རྩིས་ཡོད་ཟེར་ནས་བཀའ་འདྲི་གནང་གི་འདུག དེ་འདྲ་བྱུང་བ་ཡིན་ན། སྐབས་ཐོག་དེ་ལ་བསམ་བློ་གཏོང་དགོས་རྒྱུ་ཡིན། འོས་སུ་ལ་ལྡུག་མིན་དེ་མང་གཙོའི་སྤྱི་ཚོགས་ཀྱི་གཞི་རྩའི་ཐོབ་ཐང་ཞིག་ཡིན་སྟབས། མི་མང་གི་ངོས་ནས་འོས་སུ་ལ་ལྡུག་མིན་རིམ་བཞིན་གསལ་པོ་ཆགས་ཡོང་གི་རེད། གལ་སྲིད་ང་རང་སྔོན་འགྲོའི་འོས་གཞིའི་ནང་སླེབས་པ་ཡིན་ནམང་ཚོགས་ཀྱི་རེ་འདོད་བཞིན་བཀའ་ཁྲིའི་འོས་གཞིར་འདུག་རྒྱུ་ཡིན། ཞེས་དང་།

ཡང་ཁོང་གིས་སྔོན་མ་ཚོགས་པ་སྒྲིག་འཛུགས་ཁག་གི་རེ་འདོད་དང་ལེན་མ་བྱས་པའི་སྐོར་བརྗོད་དོན། སྔོན་མ་ང་བཀའ་ཁྲིའི་འོས་གཞིའི་ནང་མ་ཞུགས་པའི་རྒྱུ་མཚན་གང་ཡིན་ཟེར་ན། ང་ལ་སེམས་ཤུགས་མེད་པ་དང་ལས་ཀ་བྱ་འདོད་མེད་པ་སོགས་གང་ཡང་མིན། ངས་མི་ལོ་ ༤༠ རིང་གཞུང་ཞབས་ནང་ལས་ཀ་བྱས་པ་རེད། ལྷག་པར་དུ་ལོ་ ༡༧ ཙམབཀའ་ཤག་ཏུ་བསྐྱལ་བ་རེད། དེའི་སྟབས་ཀྱིས་ལས་ཀ་བྱ་རྒྱུ་ཞིག་ཡོད་ན་གོ་སྐབས་ཚང་མ་ཐོབ་ཚར་བ་རེད། ད་ཆར་ལོ་ན་རྒན་པ་ཆགས་ཡོང་དུས་སྡུག་ཏུ་འགྲོ་རྒྱུ་མ་གཏོགས་དེ་ལས་ལྷག་པ་ཞིག་ཡོང་ཁག་པོ་རེད།  ཡིན་ནའང་མི་མང་གི་ཐོབ་ཐང་དང་རང་དབང་། ཐག་གཅོད་བཅས་ལ་ང་ཚོས་བརྩི་བཀུར་དགོས་པ་རེད་ཅེས་གསུངས་འདུག

བཀའ་ཟུར་བཀྲ་ཤིས་དབང་འདུས་ལགས་ནི་ཕྱི་ལོ་ ༡༩༤༧ ལོར་བོད་དུ་འཁྲུངས་ཤིང་། ང་དགུ་ལོར་ཁོང་གི་ཕ་མ་དང་ལྷན་དུ་བཙན་བྱོལ་དུ་འབྱོར་ཏེམ་སུ་རི་སློབ་གྲྭར་ཞུགས། ཕྱི་ལོ་ ༡༩༧༠ ལོར་དབྱིན་ཇིར་ཕྱིན་ཏེ་སྲིད་དོན་རིག་པའི་ཐོག་སློབ་སྦྱོང་བྱས་ཤིང་ ཕྱི་ལོ་ ༡༩༧༣ ལོར་གཞུང་ཞབས་ཁོངས་སུ་འཛུལ་ཞུགས་བྱས་ཏེ་ལོ་མང་རིང་བཀའ་བློན་དང་སྐུ་ཚབ་དོན་གཅོད། ནང་སྲིད་དང་ཕྱི་དྲིལ་ལས་ཁུངས་བཅས་བཅས་སུ་ཕྱག་ལས་གནང་ཡོད་ལ། ད་ལྟ་ནུབ་ཡུ་རོབ་སྐུ་ཚབ་དོན་གཅོད་ཀྱི་ཕྱག་ལས་གནང་མུས་ཡིན་འདུག

གསར་འགོད་པ། དཔལ་ལྡན།

 

བསྐྱར་བཅོས།: ༢༠༡༧/༠༢/༡༦

Leave a Reply

20 thoughts on “ང་བཀའ་ཁྲིའི་འོས་གཞིར་འདུག་རྒྱུ་ཡིན།

  1. སྔོན་རབ་ནས་མི་དམངས་ཀྱི་མདུན་དུ་ཁྱེད་ཀྱིས་སྐྱོང་བ་ཐུགས་རྗེ་ཆེ་ད་ནི་བཞུགས་རོགས་གནང་།།

  2. ད་ཐེངས་བཀའ་ཁྲིའི་འོས་གཞིར་ལང་མཁན་རྣམས་ནི། ཁ་ཅིག་རང་ཉིད་བཀའ་ཁྲིར་ཆགས་པའི་དམིགས་ཡུལ་ཡོད། ཁ་ཅིག་རང་ཉིད་ཀྱི་མིང་སྤྱི་ཚོགས་ཁྲོད་དུ་ཁྱབ་པར་དམིགས་ཡོད། ཁ་ཅིག་གཞན་ལ་གནོད་ཤུགས་སྤྲོད་ཆེད་རེད། འོན་ཀྱང་དེ་དག་སུ་ཡང་མང་གཙོའི་སྒྲོམ་གཞི་ལས་བརྒལ་འདུག་བརྗོད་མི་འདུག རྒྱལ་སྤྱིའི་འགྱུར་འགྲོས་དང་རྒྱ་ནག་གི་ཆབ་སྲིད་བོད་གཞིས་བྱེས་གཉིས་ཀྱི་གནས་སྟངས་དང་བཀའ་ཁྲིའི་འོས་གཞིར་བཞེངས་མཁན་རྣམས་ཀྱི་ཤེས་ཡོན་སོགས་གནས་ཚད་གང་ལ་བསམ་གཞིག་བྱས་ཀྱང་༢༠༡༡ལོའི་བཀའ་ཁྲིར་མཁས་དབང་བློ་བཟང་སེང་གེ་འོས་ཤོས་སུ་མཐོང་། མ་ཚད་བཙན་བྱོལ་སྤྱི་ཚོགས་ཀྱི་མི་མང་ཡོངས་ལ་རང་དབང་ཐོག་ནས་འོས་བླུགས་རྒྱུ་བྱུང་ན་བློ་བཟང་སེང་གེ་ལ་འོས་ཐོབ་རྒྱུ་རེད། འོན་ཏང་སྐུ་དྲག་རིང་ལུགས་ཀྱི་མི་སྣ་མང་པོས་ཆབ་སྲིད་དང་དཔལ་འབྱོར། ཆོལ་ཁ་དང་ལུང་ཚན་སོགས་ཅི་རིགས་ཀྱི་སྒོ་ནས་མི་མང་ལ་གནོད་ཤུགས་དང་བསླུ་བྲིད་མང་པོས་སྒོ་ནས་མི་མང་པོ་ཞིག་ལ་ཡང་དག་པའི་མང་གཙོའི་འཚོ་བ་རང་དབང་དུ་ལོངས་སྤྱོད་བྱེད་པ་ལ་བར་ཆད་ཆེན་པོ་བྱེད་ཀྱི་ཡོད། དེས་ན་སྒེར་སོ་སོས་རང་ཉིད་ཀྱི་འོས་ཤོག་རང་ཉིད་ལ་དབང་འདུག་དང་ཡང་ན་གཞན་དབང་དུ་འགྱུར་འདུག་ལེགས་པར་བརྟགས་ནས་མང་གཙོའི་ཁེ་དབང་གཞན་འོག་ཏུ་མ་སོང་བར་རང་ཉིད་ཀྱི་རྣམ་དཔྱོད་བེད་སྤྱོད་བཏང་ནས་རང་དབང་དུ་ལོངས་སྤྱོད་པར་ཞུ།

  3. བསམ་གླིང་ཚེ་རིང་ལྷ་མོ།

    དྲ་གྲོགས་ལྷན་རྒྱས། ང་ཚོའི་སྤྲི་འཐུས་ལྷན་རྒྱས་ལ་གཟིགས་དང། ཁ་སྔོན་ནས་བཅའ་ཁྲིམས་ལ་བཟོ་བཅོས་རྒྱག་རྒྱུ་མེད་པར་མང་མོས་བྱུང་བ་རེད་གསུངས་སོ། ད་ཡང་བཅའ་ཁྲིམས་ལ་བཟོ་བཅོས་རྒྱག་རྒྱུ་དེ་གྲོས་ཚོགས་ནང་འཁྱེར་རྒྱུར་ཐག་བཅད་པ་རེད་གསུངས་སོ། ངའི་ལྟ་སྟངས་བྱས་ན་ཁ་སྔོན་རང་ཉིད་ཀྱི་ཕྱོགས་གཏོགས་དང་ཡང་ན་རང་ཉིད་བཀའ་ཁྲིར་ཐོབ་ཀྱི་རེད་སྙམ་པ་དང་ཡང་ཉེ་འཆར་བཀའ་ཁྲིའི་འོས་གཞིར་ལྟ་དུས་རང་གི་ཕྱོགས་གཏོགས་ལ་བཀའ་ཁྲི་ཕར་ཟད་རང་ཉིད་ལ་བཀའ་བློན་ཞིག་བྱེད་པའི་སྒོ་སྐབས་མེད་པ་མཐོང་དུས་གཞི་ནས་བཅའ་ཁྲིམས་ལ་བཟོ་བཅོས་རྒྱག་རྒྱུར་མོས་མཐུན་བྱུང་བ་རེད། ང་ཚོའི་སྤྱི་འཐུས་ཚོའི་ལྗིད་ཚད་གང་ཙམ་ཞིག་འདུག།། ཁོང་ཚོ་དངོས་འབྲེལ་ཆབ་སྲིད་ཀྱི་རྔོན་པ་རང་རེད།

  4. སྟོང་སྐོར་ཐུབ་བསྟན།

    བཀའ་ཟུར་བཀྲ་ཤིས་དབང་འདུས་ལགས་བཀའ་ཁྲིའི་འོས་གཞིར་འདུག་རྒྱུ་ཡིན་ཟེར་བ་དང་དྲང་གཏམ་གསུངས་འདུག་པས་གུས་བཀུར་ཞུ་བཞིན་ཡོད། མ་ཚད་ཁྱེད་ཀྱི་བློ་དཀར་སེམས་དཀར་དང་ལྷག་གསམ་རྣམ་དག་ཐོག་ནས་བོད་སྤྱི་པའི་ལས་དོན་བྱེད་ཡོད་པའི་རྗེས་སུ་ཡིད་རང་ཡོད།