བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༧༢­­­ སྟེང་གི་རྩོམ་སྒྲིག་པའི་གཏམ།

འཛམ་གླིང་ཆུང་དུ་ཕྱིན་འདུག་ཅེས་པའི་སྐད་ཆ་འདི་ནི།  དུས་རབས་ཉེར་གཅིག་པའི་མི་ཀུན་གྱི་ཁ་ནང་ལ་འཕྲེད་དུ་བཟུང་བའི་ཧ་ཅང་དར་སྲོལ་ཆེ་བའི་གཏམ་ཞིག་ཆགས་ཡོད་ལ།  འདིས་ཕྱོགས་ངོས་མང་པོ་ཞིག་ནས་གཅིག་ལ་གཅིག་རྟེན་གྱི་འདུ་ཤེས་ཤུགས་ཆེ་རུ་འགྲོ་བཞིན་པའི་དེང་གི་འཛམ་གླིང་རིལ་མོ་འདིའི་སྤྱི་ཚོགས་ཀྱི་གནས་བབ་གསལ་སྟོན་བྱས་ཡོད། འོན་ཀྱང་། གཅིག་ལ་གཅིག་རྟེན་གྱི་འདུ་ཤེས་དང་གཞན་རྟེན་སྐྱབས་འཚོལ་གྱི་འདུ་ཤེས་གཉིས་ལ་གནམ་སའི་ཧེ་བག་ཡོད་ལ་འཆི་གསོན་གྱི་ཁྱད་པར་ཡོད། 

        འུ་ཅག་འཐབ་རྩོད་བྱེད་མཁན་གྱི་མི་རིགས་ཤིག་ལ་མཚོན་ན། གཅིག་ལ་གཅིག་རྟེན་ནི་དེ་བས་ཀྱང་གལ་ཆེ་བ་སྨྲ་མི་དགོས་པ་ཞིག་རེད། དེར་བརྟེན། འདས་པའི་མི་ལོ་དྲུག་ཅུའི་རིང་འཛམ་གླིང་གི་རྒྱལ་ཁབ་ཆེ་མ་ཆུང་གསུམ་ཡོངས་ལ་ལག་པ་བརྐྱང་དགོས་སར་ལག་བརྡ་དང་ཞུ་བ་འཐེན་དགོས་སར་ཁ་ལྕེ་གཡུགས་པའི་འབྲས་བུར། ད་ལྟའི་ཆར་བོད་ཀྱི་གནད་དོན་ཀྱང་རྒྱལ་སྤྱིའི་སྲིད་དོན་འབྲེལ་བའི་ཐད། ཆབ་སྲིད་པ་རྣམས་ཀྱིས་ཁ་བརྡར་སའི་གླེང་གཞི་སྙིང་རྗེ་བོ་ཞིག་ཏུ་གྱུར་ཡོད་པ་མ་ཟད།  བོད་མི་བཙན་བྱོལ་བ་ནི་སྟོབས་ལྡན་ཚོས་འབྱོར་བའི་སྤྱིན་གནང་སྩོལ་ས་དང་། འབྱོར་མེད་ཚོས་གཏམ་གྱི་སེམས་གསོ་བྱ་ཡུལ་ཞིག་ཏུ་གྱུར་ཡོད། 

        ཉེ་བའི་ལོ་འགའི་སྔོན་ནས་བཟུང་དྷ་སའི་འབྲེལ་ལམ་གྱི་སྒོ་མོ་དེ། ནུབ་ཕྱོགས་སྟོབས་ལྡན་རྒྱལ་ཁབ་ནས་འབོར་མང་པོའི་རྒྱ་ནག་མི་མང་གི་ཕྱོགས་སུ་སྐོར་མགོ་བརྩམས་ཡོད་ལ། དེ་དང་བསྟུན་ནས་བོད་མི་བཙན་བྱོལ་མང་ཚོགས་ཁྲོད་དུའང་། སྐད་འབོད་གང་ཞིག་བྱས་ན་རྒྱ་མི་རིགས་ལ་ཕོག་འགྲོ་བ་དང་། རྣམ་འགྱུར་ཅི་ཞིག་བསྟན་ན་རྒྱ་མི་རིགས་ལ་གནོད་འགྲོ་བའི་སྐད་མགོ་མཐོ་རུ་འགྲོ་བཞིན་ཡོད།  ཡོད་ཚད་རྒྱ་མི་རིགས་ལ་བསྟུན་ན་བོད་ལ་རང་དབང་ཐོབ་ཐུབ་པར་མ་ངེས་མོད། སོ་སོའི་ཁ་གཏད་མི་རིགས་ཀྱི་མདུན་དུ་འགྲེངས་ཏེ། བདེན་པའི་གནས་ལུགས་བཤད་དགོས་རྒྱུ་དེ་ནི། མི་རིགས་ཤིག་གི་རང་དབང་འཐབ་རྩོད་ཀྱི་འཕེལ་རིམ་ཁྲོད་གོམ་ཁ་ཧ་ཅང་གལ་ཆེན་ཞིག་ཆགས་ཡོད།  

        ཡིན་ནའང་། མེད་པོ་རྒྱུ་ལ་དགའ། གཡོག་པོ་ཐོབ་ལ་དགའ་ཞེས་པའི་དཔེ་ལྟར། དེ་དང་བསྟུན་ནས་འུ་ཅག་བཙན་བྱོལ་བ་ཚོའི་བསམ་བློའི་ནང་།  གནའ་བོའི་ལྷ་ལ་སྐྱབས་སུ་འགྲོ་བའི་འདུ་ཤེས་ཏེ་རིམ་གྱིས་སྟོབས་ལྡན་འབྱོར་ལྡན་དག་ལ་སྐྱབས་སུ་འགྲོ་བའི་སེམས་ཁམས་ཤིག་གི་ངོ་བོར་འབུས་ཏེ། མི་སྒེར་དང་ཁྱིམ་ཚང་རེ་རེའི་ཁ་རྒྱབ་ལྟོ་གོས་ནས་མི་ཚེ་མདུན་ལམ་ཡོད་ཚད་གཞན་རྟེན་ཁོ་ན་བྱེད་པ་མ་ཟད། མི་རིགས་ཤིག་གི་འཐབ་རྩོད་དུ་གྱུར་པའི་རང་དབང་དང་ཐོབ་ཐང་རྣམས་ཀྱང་། ཧ་ལམ་འཛམ་གླིང་འདིའི་སྒང་གི་སྟོབས་ལྡན་དང་འབྱོར་ལྡན་རྒྱལ་ཁབ་དག་གིས་མར་གསོལ་རས་སུ་བསྩལ་དགོས་པ་ལྟ་བུའི་སྣང་བ་ཞིག་ཡོང་གི་ཡོད།

        གལ་སྲིད་མི་རིགས་ཤིག་གི་བསམ་བློའི་འདུ་ཤེས་ཀྱི་རིན་ཐང་ལྟ་བ་དེ། གཞན་རྟེན་སྐྱབས་འཚོལ་གྱི་སེམས་ཁམས་ཤིག་གི་འདམ་རྫབ་ཏུ་ཟགས་ཚེ། མི་རིགས་དེ་ནི་ནམ་ཡང་རང་གི་རྐང་ཁར་སོ་སོའི་གཟུགས་གཞི་འདེགས་མི་ཐུབ་པའི་ནད་གཅོང་ཅན་ཞིག་ཏུ་འགྱུར་རྒྱུ་ཡིན་པ་ངེས་གཏན་རེད།  དེར་བརྟེན།  སོ་སོའི་མི་རིགས་ཀྱི་རྣམ་དཔྱོད་དང་བློས་གཏོང་ལ་བརྟེན་ནས།  སོ་སོའི་ལུང་པའི་རང་དབང་དང་ཐོབ་ཐང་རྩོད་ལེན་བྱ་རྒྱུ་དེ་ང་ཚོའི་མཐའ་མཇུག་གི་ལམ་ཁ་གཅིག་པུ་ཡིན་སྟབས།  ད་ནས་བཟུང་འུ་ཅག་བཙན་བྱོལ་བ་དག་གིས་ཀྱང་། གཞན་རྟེན་མ་ཡིན་པར་རང་སྟོབས་ཀྱིས་འཚོ་བའི་བསམ་བློའི་འདུ་ཤེས་ཀྱི་ཕྱོགས་སུ་བསྒྱུར་དགོས། ལྷག་པར་དུ། ཉེ་ཆར་བཙན་བྱོལ་བ་མང་དག་ཅིག་གིས་གཞན་རྟེན་གྱི་རིན་ཐང་ལྟ་བའི་རྨང་གཞིའི་སྟེང་ནས།  བོད་ནང་གི་འཐབ་རྩོད་ཀྱི་ནུས་པ་དང་གྲུབ་འབྲས་ལ་རིན་ཐང་གཅོད་ཀྱིན་པ་དེ་ནི་ཧ་ཅང་འཇིགས་ཡེར་བའི་བྱ་སྤྱོད་ཅིག་རེད།