དེ་རིང་སྔ་དྲོར་བོད་ཀྱི་དཔེ་མཛོད་ཁང་དུ་གདང་ལ་རི་བོ་ཞེས་པའི་འབོལ་རྩོམ་དུས་དེབ་དབུ་འབྱེད་ཐོག ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས་ཀྱིས་བོད་མིའི་སྤྱི་ཚོགས་ཁྲོད་དེབ་ཀློག་གི་གོམས་གཤིས་དཀོན་པོ་ཡིན་པས་དེབ་ཀློག་གི་སྤྲོ་སྣང་སློང་ཐབས་དགོས་རྒྱུ་གལ་ཆེན་ཡིན་སྐོར་གསུངས་སོང།
དེ་རིང་སྔ་དྲོའི་ཆུ་ཚོད་ ༩ ཐོག་གངས་སྐྱིད་བོད་ཀྱི་དཔེ་མཛོད་ཁང་དུ། སྐབས་དང་པོའི་གདང་ལ་རི་བོ་འགྲན་རྩོམ་གཟེངས་བསྟོད་ཀྱི་མཛད་སྒོ་ཚོགས་སོང་དང་། མཛད་སྒོའི་ཐོག་སྐུ་མགྲོན་གཙོ་བོར་ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས་དང་སྐུ་སྒེར་དྲུང་ཆེ་བློ་བཟང་སྦྱིན་པ་ལགས། སྤྱི་འཐུས་རྒྱུན་ལས་གངས་ལྷ་མོ་ལགས། རྩོམ་པ་པོ་རྒན་ལྷ་བཟང་ཚེ་རིང་ལགས། སཱ་ར་མཐོ་སློབ་ཀྱི་སློབ་དཔོན་ཆེན་མོ་སྤྲེལ་ནག་པ་བློ་གྲོས་དཔལ་བཟང་ལགས། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་རྩོམ་སྒྲིག་པ་འཇུ་བསྟན་སྐྱོང་ལགས། དེ་བཞིན་སཱ་ར་མཐོ་སློབ་དང་ནོར་གླིང་མཐོ་སློབ་གཉིས་ཀྱི་དགེ་སློབ་ཁག་ཅིག་དང་། དྷ་ས་ཁུལ་གྱི་གཞོན་སྐྱེས་རྩོམ་པ་པོ་སོགས་མི་གྲངས་ ༡༠༠ མ་ཟིན་ཙམ་འདུ་འཛོམས་གནང་འདུག་པ་དང་། མཛད་སྒོའི་ཐོག་སྐུ་མགྲོན་གཙོ་བོ་ལགས་ཀྱིས་གདང་ལ་རི་བོ་ཞེས་པའི་འབོལ་རྩོམ་དུས་དེབ་དབུ་འབྱེད་གནང་བ་དང་སྦྲགས། ཐེངས་འདིའི་རྩོམ་ཡིག་འགྲན་བསྡུར་ཁྲོད་ཨང་དང་པོ་ཐོབ་མཁན་སེར་བྱེས་གྲྭ་ཚང་གི་རོ་ལངས་ལགས་ལ་ཧིན་སྒོར་ ༡༠༠༠༠ དང་། ཨང་གཉིས་པ་སེར་ཤུལ་རིན་ཆེན་དོན་འགྲུབ་ལགས་དང་སཱ་ར་སློབ་མ་མཐོ་སློབ་ཀྱི་བློ་བཟང་ཆོས་འབྱོར་ལགས་གཉིས་ལ་མི་རེར་ཧིན་སྒོར་ ༧༠༠༠ ། ཨང་གསུམ་པ་སཱ་ར་མཐོ་སློབ་ཀྱི་སློབ་མ་སྙིང་མིག་ལགས་དང་འབྲི་རུ་སྐལ་བཟང་ལགས་གཉིས་ལ་མི་རེར་ཧིན་སྒོར་ ༥༠༠༠ གནང་བ་དང་། དེ་ནས་གདང་ལ་རི་བོ་དུས་དེབ་ནང་བཀོད་པའི་རྩོམ་ཡིག་ཁག་གི་རྩོམ་པ་པོ་རྣམས་ལ་རྩོམ་ཡོན་དུ་ཧིན་སྒོར་ ༡༠༠༠ རེ་བཅས་གནང་དང་འབྲེལ། རྩོམ་པ་པོ་དེ་དག་གིས་སྐར་མ་ ༣ རེའི་ནང་བོད་ཀྱི་རྩོམ་རིག་དང་འབྲེལ་བའི་མྱོང་ཚོར་སྐོར་གཏམ་བཤད་བྱས་སོང་།
མཛད་སྒོའི་ཐོག་རྩོམ་སྒྲིག་པ་འབྲོང་ངུར་བསྟན་འཛིན་ལམ་བཟང་ལགས་ཀྱིས་གདང་ལ་རི་བོ་དཔེ་ཚོགས་ཀྱི་མིང་དང་དགོས་དམིགས་སོགས་ངོ་སྤྲོད་གནང་སྐབས། གདང་ལ་རི་བོ་ཟེར་ན་བོད་ཀྱི་རི་རྒྱུད་ཆེན་པོ་བདུན་གྱི་ཡ་གྱལ་ཞིག་ཡིན་ལ། ང་ཚོས་ཚོགས་པའི་མིང་འདི་ལྟར་བདམས་དགོས་དོན་ནི། བོད་ཀྱི་སྲིད་པའི་གངས་རི་ནི་བོད་མིའི་མེས་པོའི་བླ་གནས་ཡིན་པས། ང་ཚོ་འདི་ལྟར་མི་ཡུལ་དུ་གྱར་ཡོད་ནའང་ཕ་ཡུལ་གྱི་རི་ཆུ་རླུང་གསུམ་བརྗེད་མེད་ལ། བླ་རི་འདིས་མེས་པོ་ཚོའི་བློ་གྲོས་དང་སྙིང་སྟོབས་མཚོན་ཅིང་། ལོ་རྒྱུས་རིང་ཞིང་གཏིང་ཟབ་པའི་རང་རིགས་ཀྱི་སྐད་ཡིག་དང་རིག་གཞུང་སོགས་དྲན་གསོ་སྟེར་བས་ང་ཚོའི་དཔེ་ཚོགས་ཀྱི་མིང་ལ་གདང་ལ་རི་བོ་ཞེས་བཏགས་པ་ཡིན། ཞེས་དང་།
ཡང་ཁོང་གིས། བོད་ཀྱི་ཕྱི་ལོགས་སུ་ཡོད་པའི་བོད་མིའི་ཁྲོད་བོད་ནང་དང་མི་འདྲ་བར་སྐད་ཡིག་ལ་དཀའ་ངལ་ཆེན་པོ་ཞིག་ཡོད་པར་མཐོང་གི་ཡོད། རྒྱ་བལ་འབྲུག་གསུམ་ནང་ལ་མཚོན་ན་བོད་པའི་སྤྱི་ཚོགས་ནང་དུ་དགོན་སྡེ་དང་དམིགས་བསལ་མཐོ་སློབ་ཁ་ཤས་ཕུད་པའི་སློབ་གྲྭ་བྱིངས་ལ་རང་རེའི་སྐད་ཡིག་ལ་འཛིན་པའི་ལྟ་ཚུལ་དང་། སྐད་ཡིག་གི་གནས་ཚད་ཀྱང་ཉེན་ཁ་ཧ་ཅང་ཆེ་བ་ཞིག་ཡིན་པར་མཐོང་ཕྱོགས་ཡོང་གི་འདུག དེར་བརྟེན་ང་ཚོའི་དམིགས་ཡུལ་ཡང་ཉེན་ཁ་འདི་ལས་སྐྱོབ་ཅིང་སྐད་ཡིག་དར་འཕེལ་ཡོང་རྒྱུར་ཤུགས་སྣོན་རྒྱག་རྒྱུ་དང་། རིམ་པ་གཉིས་ཀྱི་ཐོག་ནས་སྤྱི་ཚོགས་འདི་ལ་སྐད་ཡིག་གི་དཀའ་ངལ་མེད་པར་བཟོ་འདོད་པ་དེ་ཡིན། གཅིག་ནས་ཚད་མཐོ་རང་བཞིན་ཅན་གྱི་སྐད་ཡིག་སྟེ། སྒྱུ་རྩལ་རྩོམ་ཡིག་དང་དུས་མཐུན་རྩོམ་པ་པོ་ཚད་ལྡན་གསོ་སྐྱོང་བྱ་ཕྱིར་དེ་རིང་གི་དུས་དེབ་འདི་འདྲ་ཞིག་འདོན་སྤེལ་བྱས་ཏེ། བརྩམས་ཆོས་དང་རྩོམ་པ་པོར་སྤྱི་ཚོགས་ཐོག་རིན་ཐང་མངོན་ཕྱིར་གཟེངས་བསྟོད་དང་རྩོམ་ཡོན་དབུལ་རྒྱུའི་བྱེད་སྒོ་འདི་སྤེལ་བ་ཡིན། དུས་ཐུང་གི་མཛད་སྒོ་འདི་ཡང་གལ་འགང་ཧ་ཅང་ཆེ་བར་མཐོང་བས་སྤྱི་ཚོགས་ནང་བཟང་ཕྱོགས་ཀྱི་འགྱུར་བ་དང་ཤུགས་རྐྱེན་ཡག་པོ་ཞིག་ཐེབས་པའི་རེ་བ་དང་ཡིད་ཆེས་བཅངས་ཡོད། གཉིས་ནས་དམངས་ཁྲོད་ནས་ཁ་ཡོད་ལག་ཡོད་ཀྱི་སྐད་ཡིག་ལ་དོ་སྣང་ཡོང་བ་དང་། འཚོ་བའི་ཁྲོད་ཀྱི་སྐད་ཡིག་སྤྱོད་སྒོ་ཕུན་སུམ་ཚོགས་པ་ཡོང་ཐབས་དང་། རྩོམ་པ་པོ་དང་ཀློག་པ་པོའི་བར་དུ་འབྲེལ་མཐུད་གསེར་ཟམ་ལྟ་བུ་ཞིག་འཛུགས་ཐུབ་པར་རེ་བ་དང་འབད་རྩོན་བྱེད་ཀྱིན་ཡོད། ཕྱོགས་མཚུངས་མ་འོངས་པར་རིམ་པས་བུད་མེད་དང་བྱིས་པའི་རྩོམ་ཡིག་ཡག་པོ་ཡོང་བའི་ཆེད་དུ་དམིགས་བསལ་ལེ་ཚན་ཞིག་གྲ་སྒྲིག་བྱ་རྒྱུའི་འཆར་གཞི་ཡོད། ཅེས་བརྗོད་སོང་།
དེ་རྗེས་འཇུ་བསྟན་སྐྱོང་ལགས་ཀྱིས་བོད་ཕྱི་ནང་གི་རྩོམ་རིག་གཤིབ་བསྡུར་གྱིས་གཏམ་བཤད་གནང་སྐབས། བོད་ཕྱི་ནང་གཉིས་བསྡུར་བ་ཡིན་ན། རྩོམ་རིག་འབྲི་སྤེལ་གྱི་དུས་སྔ་ཕྱི་དང་རྗོད་བྱེད་ཚིག་གི་ཉམས་འགྱུར་སོགས་ཀྱི་ཐད་ཁྱད་པར་ཅུང་ཙམ་ཡོད་ཀྱང་བར་ཐག་ཧ་ཅང་ཆེན་པོ་མིན་ལ། བོད་ཕྱི་ནང་གི་རྩོམ་པ་པོ་ཚོ་ཕན་ཚུན་བསྡུར་བ་ཡིན་ན། རྩོམ་ཡིག་གི་བརྗོད་བྱ་འདེམས་སྟངས་དང་བསམ་བློ་གཏོང་ཕྱོགས་ཐད་བཙན་བྱོལ་ནང་གི་རྩོམ་པ་པོ་ཚོ་ཅུང་ཙམ་ཡག་པོ་ཡོད་པ་དང་། རྩོམ་རིག་གི་གཞུང་ལུགས་སོགས་ཀྱི་ཐོག་ནས་བོད་ནང་གི་རྩོམ་པ་པོ་ཚོ་ཡག་པོ་ཡོད་ལུགས་དང་། ད་ལྟའི་བར་བཙན་བྱོལ་ནང་མིང་ཐོགས་ཚད་ཚང་མ་བརྩིས་པ་ཡིན་ན་དུས་དེབ་ ༡༠༠ ཙམ་བྱུང་ཡོད་པ་དང་། དེ་རིང་དབུ་འབྱེད་བྱས་པའི་གདང་ལ་རི་བོ་དུས་བབ་ནི་ལོ་ན་ཆུང་ཤོས་དེ་ཡིན་པས། བདག་པོ་ཡག་པོ་རྒྱག་དགོས་རྒྱུ་ཧ་ཅང་གལ་ཆེན་པོ་ཡིན་པ་དང་། སྤྱིར་བཏང་མི་རྟག་པ་ཡིན་པས་རིམ་གྱིས་ཤི་འགྲོ་རྒྱུ་ཡིན་ཡང་། ཆུང་དུས་ནས་འཚར་ལོངས་ཡག་པོ་བྱུང་དུ་འཇུག་དགོས་པ་དེ་གདང་ལ་རི་བོ་རྩོམ་སྒྲིག་པ་རྣམས་ཀྱི་ལས་འགན་ཡིན་སྐོར་སོགས་བརྗོད་སོང་།
རྩོམ་པ་པོ་ལྷ་བཟང་ཚེ་རིང་ལགས་ཀྱིས་བོད་ཀྱི་རྩོམ་རིག་གིས་འཛམ་གླིང་ལ་ཤུགས་རྐྱེན་ཅི་ཙམ་ཐེབས་ཀྱི་ཡོད་པའི་སྐོར་ལ། བོད་ནས་ཡོང་མཁན་ཚོ་སོ་སོའི་ཉམས་མྱོང་དངོས་བརྒྱུད་ནས་བོད་ནང་གི་གནས་ཚུལ་མང་པོ་ཤེས་ཀྱི་ཡོད་པས། དེ་ཚོ་རྟོག་དཔྱོད་རྩོམ་ཡིག་གི་ལམ་ནས་རྒྱལ་སྤྱིའི་ཐོག་སྤེལ་ཏེ་བོད་དོན་ལ་དོ་སྣང་ཡོང་བར་ནུས་པ་ཆེན་པོ་འདོན་ཐུབ་ཀྱི་ཡོད་ཀྱང་། རྟོག་དཔྱོད་རྩོམ་ཡིག་གི་ཐད་ནས་ད་ལྟའང་དུས་ཀྱི་དགོས་མཁོ་དང་མཐུན་པའི་ཚད་ལོན་གྱི་མེད་པ་དང་། དེ་བཞིན་ཚིགས་བཅད་སྙན་ངག་ལྟ་བུ་ཡིན་ན། མགོ་མཇུག་བར་གསུམ་གང་ནས་བཀླག་ཀྱང་བརྗོད་བྱའི་དོན་ངེས་ཅན་སྟོན་ཐུབ་པ་དང་། དབྱངས་དང་འགྲོགས་ནས་གཞས་ཚིག་བྱས་པ་ཡིན་ན། མི་ལ་སེམས་འགུལ་ཐེབས་པའི་སྒུལ་ཤུགས་ཆེན་པོ་ཡོད་སྐོར་སོགས་གསུངས་སོང་།
སྤྱི་འཐུས་རྒྱུན་ལས་གངས་ལྷ་མོ་ལགས་ཀྱིས་བོད་ཀྱི་བུད་མེད་རྩོམ་པ་པོ་དང་བརྩམས་ཆོས་ཀྱི་གནས་ཚད་སྐོར་ལ་གཏམ་བཤད་གནང་སྐབས། བོད་ཕྱི་ནང་གཉིས་སུ་བོད་རྒྱ་དབྱིན་གསུམ་གྱི་ཐོག་ནས་བུད་མེད་རྩོམ་པ་པོ་གང་འཚམ་འཚར་ལོངས་བྱུང་བཞིན་ཡོད་པ་དང་། ཁོང་ཚོའི་རྩོམ་ཡིག་གིས་བོད་པའི་སྤྱི་ཚོགས་ཐོག་ཤུགས་རྐྱེན་གང་ལ་གང་འཚམ་ཐེབས་ཡོད་ཀྱང་། བུད་མེད་རྩོམ་པ་པོ་ཚོའི་བརྩམས་ཆོས་ལ་དཔྱད་བརྗོད་སྤེལ་མཁན་ཧ་ཅང་ཉུང་ཉུང་ཡིན་སྐོར་དང་། མི་ཞིག་གི་མི་ཚེའི་ནང་རང་ལོ་ ༢༠ སོན་པའི་བར་སོ་སོའི་མི་ཚེའི་ནང་ངས་འདི་འདྲ་ཞིག་བྱེད་དགོས་བསམ་པ་ཞིག་གཏན་འབེབས་བྱེད་ཐུབ་དགོས་ཀྱི་ཡོད་ཀྱང་། བཙན་བྱོལ་སྤྱི་ཚོགས་ནང་རང་ལོ་བཞི་བཅུ་ལྔ་བཅུ་ལོན་ཚར་ཡང་ད་དུང་ངས་ག་རེ་བྱེད་དགོས་པ་རེད། ང་ག་རེ་བྱེད་མཁན་ཞིག་རེད་ཟེར་ནས་མི་ཚེའི་ཁ་ཕྱོགས་གཏན་འཁེལ་མེད་པ་དེ་སྐྱོན་ཆ་ཆེན་པོ་ཡིན་སྐོར་བརྗོད་སོང་།
མཇུག་ཏུ་ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་སྟེ། དེང་སང་བཙན་བྱོལ་སྤྱི་ཚོགས་ནང་རྩོམ་འབྲི་མཁན་ཇེ་མང་དུ་འགྲོ་བཞིན་ཡོད་པ་དང་། དེ་བཞིན་དཔེ་དེབ་རིགས་འདོན་མཁན་ཡང་གང་ལ་གང་འཚམ་ཡོང་གི་ཡོད་པ་དེ་ཧ་ཅང་ཡག་པོ་ཡིན་ལ། རྩོམ་ཡིག་དང་དེབ་མང་པོ་བཏོན་པ་དང་སྦྲགས། ང་ཚོའི་སྤྱི་ཚོགས་ནང་ལྟ་ཀློག་བྱེད་མཁན་ཅི་ཙམ་ཡོད་མེད་ཐོག་ལའང་དཔྱད་པ་གཏོང་དགོས། བོད་མིའི་སྤྱི་ཚོགས་ཁྲོད་དཔེ་དེབ་ཀློག་མཁན་དཔེ་མི་སྲིད་པའི་དཀོན་པོ་ཡིན་པས་མང་ཁྲོད་དུ། དཔེ་དེབ་ཀློག་པའི་སྤྲོ་སྣང་བསྐྲུན་རྒྱུ་གལ་ཆེན་པོ་ཆགས་ཡོད་སྟབས། ཐོག་མར་རི་མོ་དང་འབྲེལ་བའི་བྱིས་སྒྲུང་དང་མཚར་གཏམ་སོགས་ཀྱི་ལམ་ནས་རིམ་གྱིས་དམངས་ཁྲོད་དུ་དཔེ་དེབ་ཀློག་པའི་གོམས་གཤིས་འཇགས་ཏུ་འཇུག་དགོས། དཔེ་དེབ་ཀློག་པའི་གོམས་གཤིས་མ་འཇགས་པ་ཡིན་ན་རྩོམ་ཡིག་འབྲི་བར་སྤྲོ་སྣང་ཞུགས་ཐབས་མེད་པས། མ་འོངས་པར་རྩོམ་པ་པོ་མང་དུ་གཏོང་བར་ཐོག་མར་དམངས་ཁྲོད་དུ་འབྲི་ཀློག་ལ་སྤྲོ་སྣང་སློང་བའི་ནུས་པ་འདོན་དགོས་སྐོར་སོགས་གསུངས་སོང་།
གསར་འགོད་པ། པདྨ་མཚོ།
དམངས་ཁྲོད་ལ་བོད་པའི་དཔེ་དེབ་ཀློག་མཁན་དཀོན་དུ་དཀོན་དུ་འགྲོ་བཞིན་པ་འདི་ནི་ཧ་ཅང་གི་ཡ་ང་བའི་གནས་སུ་འགྱུར་བཞིན་འདུག ཉེ་ཆར་བོད་པའི་དགོན་སྡེ་ཞིག་ནང་ལ་དཔེ་མཛོད་ཁང་གཅིག་ནང་ལ་ཕྱིན་པ་ཡིན། དེར་ངས་དཔེ་མཛོད་དོ་དམ་པར་དྲིས་པས་ཁོང་གིས་གསུང་དོན། དེབ་ཀློག་མཁན་ཕལ་ཆེར་ཡོད་མ་རེད་གསུངས་བྱུང་། ང་དཔེ་མཛོད་ཁང་དེར་ག་དུས་ཕྱིན་ནས་དཔེ་དེབ་ཀློག་མཁན་ཐེངས་གཅིག་ཀྱང་མཐོང་མ་བྱུང་། དཔེ་མཛོད་དོ་དམ་ཁོང་དཔེ་མཛོད་དོ་དམ་པ་ནས་དཔེ་མཛོད་ཁང་སྲུང་མཁན་ལྟ་བུར་གྱུར་ཉེན་འདུག དེ་འདྲ་ཡིན་དུས་ང་ཚོས་མང་ཚོགས་ནང་ལ་དཔེ་དེབ་ཀློག་པར་སྐུལ་དེད་ཐབས་ལམ་མང་པོས་བྱེད་དགོས། དཔེར་ན་ཆུང་ཚགས་ལ་ང་ཚོས་མཛད་སྒོ་ཁག་ལ་ཚིག་ལྷུག་དང་། ཚིག་བཅད་སྙན་ངག་ཁག་དུས་ཚོད་ངེས་གཏན་གྱིས་སྒྲོག་སྦྱང་རྩོམ་པ་པོ་རང་གིས་བྱེད་དུ་འཇུག་པ་སོགས་དང་། རྩོམ་པ་པོ་ལ་ཆེ་མཐོང་ཆེན་པོ་དགོས་པ་སོགས་ཀྱིས་རྩོམ་པ་པོ་དང་། ཀློག་པ་པོར་དོ་སྣང་ཤུགས་ཆེ་རུ་གཏོང་དགོས་ཤིག་མངོན་བཞིན་འདུག
བོད་ཀྱི་དཔེ་དེབ་ལ་ཀློག་པ་པོའི་སྤྲོ་སྣང་སྐྲུན་པར་ངས་རང་ངོས་ནས་འབད་བརྩོན་བྱེད་བཞིན་ཡོད་པས་མི་རིང་བར་ཀློག་པ་པོར་སྐུར་མོ་འབུལ་རྒྱུའི་རེ་བ་དང་། རྩོལ་བ་བྱོས་བཞིན་ཡོད། འདི་གང་ཡིན་ད་ལྟ་དུས་ལ་མི་འབབ་རྗེས་སུ་མཁྱེན་གྱི་རེད། འདི་བཞིན་དཔེ་དེབ་རྩོམ་པ་པོ་ཚོས་ཡང་རང་རང་གི་འབྲི་རྩལ་ངོམ་རྒྱུ་དང་། གཞན་རྩོམ་ལ་དགག་པ་རྒྱོབ་གང་ཐུབ་ལ་གཅིག་པུ་མ་ཡིན་པར་ཀློག་པ་པོ་ལ་ལེགས་སྐྱེས་དང་། སྐུར་མོ་འབུལ་གང་ཐུབ་ལ་ཡང་དོ་སྣང་དགོས་པ་ཡིན། དགོན་སྡེ་ཁག་དང་། མཐི་སློབ་ཁག་ཕུད་པས་གཞན་སློབ་ཁག་ཚོའི་དབར་ལ་དོ་སྣང་དམན་པོ་ཡོད་པ་དང་། བོད་ཡིག་གི་གནས་ཚད་ཐ་ཞན་དུ་གྱུར་ཡོད་པ་དང་། འགྱུར་གྱི་ཡོད་པའི་རྒྱུ་མཚན་ལ་མནོ་བསམ་མ་བཏང་བར། སྐྱོན་ཆ་མ་ཎི་བཞིན་བཟླས་བརྗོད་བྱས་པས་ཅི་ལ་ཕན།
རང་རེའི་སྤྱི་ཚོགས་འཕྲོད་དགེ་བཤེས་མང་པོ་བར་ལྡིང་ཆགས་རེད།