རྒྱ་ནག་གཞུང་གིས་ཧོང་ཀོང་དང་ཨོ་མིན་གཉིས་མེས་རྒྱལ་ལ་མཐུད་པའི་ཆེད་དུ་སྤྱི་ལེ་ ༥༥ ཡོད་པའི་འཛམ་གླིང་གི་མཚོ་ཐོག་ཟམ་པ་རིང་ཤོས་སྒོ་འབྱེད་བྱས་ཡོད་ཟེར།
དེ་རིང་ཕྱི་ཚེས་ ༢༣ ཉིན་རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གྱིས་གནས་ཚུལ་སྤེལ་བ་ལྟར་ན། རྒྱ་ནག་གི་སྲིད་འཛིན་ཞི་ཅིན་ཕིན་གྱི་འཆར་གཞི་ལྟར་ཧོང་ཀོང་དང་ཨོ་མིན་(Macau)གཉིས་རྒྱ་ནག་སྐམ་ས་ཆེན་མོར་་མཐུད་ཆེད། སྤྱི་ལེ་ ༥༥ ལྷག་ཡོད་པའི་འཛམ་གླིང་གི་མཚོ་ཐོག་ཟམ་པ་རིང་ཤོས་ཧོང་ཀོང་ཀྲུ་ཧའེ་ཨོ་མིན་ཟམ་ཆེན་(Hong Kong-Zhuhai-Macau Bridge)ཞེས་པ་སྒོ་འབྱེད་བྱས་ཡོད་པ་དང་། མི་མང་པོས་ཟམ་ཆེན་དེ་ཧོང་ཀོང་རྒྱ་ནག་སྐམ་ས་ཆེན་མོར་ཟླ་སྒྲིལ་གཏོང་བའི་ཆབ་སྲིད་ཀྱི་ལས་འགུལ་ཞིག་ཡིན་པར་ངོས་འཛིན་བྱེད་ཀྱི་ཡོད་འདུག
རྒྱ་ནག་གི་ས་གནས་དཔལ་འབྱོར་ཟླ་སྒྲིལ་འགན་འཛིན་ཧཱན་གྱིས་མཚོ་ཐོག་ཟམ་ཆེན་དེས་ཧོང་ཀོང་དང་ཨོ་མིན་གཉིས་ཀྱི་དཔལ་འབྱོར་འཕེལ་རྒྱས་ལ་ཡར་སྐུལ་བྱེད་ཐུབ་པ་ཙམ་མ་ཟད། ཧོང་ཀོང་དང་ཨོ་མིན་གཉིས་རྒྱ་ནག་སྐམ་ས་ཆེན་མོར་ཟླ་སྒྲིལ་གཏོང་བར་མཐུན་རྐྱེན་བསྐྲུན་ཐུབ་ཡོད་སྐོར་བརྗོད་འདུག
རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གྱི་གནས་ཚུལ་ལྟར་ན། མཚོ་ཐོག་ཟམ་ཆེན་དེ་འཛུགས་བསྐྲུན་སྐབས་ཁྱོན་ལས་མི་ ༡༨ ལྷག་རྐྱེན་ལམ་དུ་ཤོར་ཡོད་པ་དང་། ལས་མི་ ༦༠༠ ལས་མང་བར་རྨས་སྐྱོན་ཕོག་ཡོད་སྟབས། ཟམ་ཆེན་དེར་རྔུལ་ཁྲག་གི་ལས་གཞི་དང་གླང་ཆེན་དཀར་པོ་ཞེས་པའི་མིང་བཏགས་ཡོད་པ་དང་། རྒྱལ་སྤྱིའི་གཅན་གཟན་ཐེབས་རྩ་ཚོགས་པ་(World Wildlife Fund)དང་། ཧོང་ཀོང་ཌོལ་ཧྥིན་སྲུང་སྐྱོབ་ཚོགས་པ་(Hong Kong Dolphin Conservation Society)ཚུད་པའི་རྒྱལ་སྤྱིའི་ཁོར་ཡུག་སྲུང་སྐྱོབ་ཚོགས་པ་མང་པོས་ཟམ་ཆེན་འཛུགས་བསྐྲུན་གྱིས་མཚོའི་རང་བྱུང་ཁོར་ཡུག་ལ་དོ་ཕོག་འགྲོ་ཡི་ཡོད་པ་དང་། སྟོངས་ཉེན་ཆེ་བའི་རྒྱ་ནག་ཌོལ་ཕིན་དཀར་པོ་དང་ཉ་རིགས་འཕེལ་ཁ་ལ་གནོད་འཚེ་ཤུགས་ཆེན་ཐེབས་ཀྱི་ཡོད་པའི་སྐྱོན་བརྗོད་བྱེད་ཀྱི་ཡོད་འདུག
གཞན་འདི་ལོའི་ཕྱི་ཟླ་ ༥ ཚེས་ ༡༦ ཉིན་སི་ཨན་ཨན་(CNN)གྱིས་སྤེལ་བའི་གནས་ཚུལ་ནང་། ཧོང་ཀོང་གི་ཆེས་མཐོའི་རང་སྐྱོང་ལ་རྒྱབ་སྐྱོར་བྱེད་མཁན་ཁྲིམས་བཟོ་བ་ཁ་ལོ་ཌི་ཡ་མཱོ་(Claudia Mo)ལགས་ཀྱིས། ཟམ་ཆེན་དེ་བེད་སྤྱོད་མེད་པ་ཞིག་ཡིན་པ་དང་། ང་ཚོར་རྒྱ་ནག་སྐམ་ས་ཆེན་མོ་དང་མཐུད་ཆེད་གནམ་གྲུ་དང་གཞུང་ལམ། མཚོ་ལམ་ཡོད་པས་ལས་འཆར་དེ་དགོས་མེད་ཀྱི་ཆབ་སྲིད་ཀྱི་གཡོ་བྱུས་ཤིག་ཡིན་སྐོར་བརྗོད་འདུག
ཕྱི་ལོ་ ༢༠༡༤ ལོར་ཧོང་ཀོང་དུ་དམངས་གཙོའི་ཡར་ལངས་བྱུང་བ་ནས་བཟུང་རྒྱ་ནག་སྐམ་ས་ཆེན་མོས་ཧོང་ཀོང་གི་ནང་སྲིད་དང་དཔལ་འབྱོར་སོགས་ལ་ཐེ་བྱུས་དང་དམ་དྲག་ཤུགས་ཆེར་བྱེད་བཞིན་ཡོད་སྟབས། མི་མང་པོས་ཟམ་ཆེན་དེ་ཡང་ལས་གཞི་དེའི་ཆ་ཤས་ཤིག་ཏུ་ངོས་འཛིན་བྱེད་ཀྱི་ཡོད་འདུག
ཧོང་ཀོང་ཀྲུ་ཧའེ་ཨོ་མིན་ཟམ་ཆེན་(Hong Kong-Zhuhai-Macau Bridge)ཟེར་བ་དེ་ཕྱི་ལོ་ ༢༠༠༩ ལོར་ཁྱོན་ཨ་སྒོར་ཐེར་འབུམ་ ༧།༥༦ ལྷག་གི་འགྲོ་གྲོན་འོག་འཛུགས་བསྐྲུན་མགོ་འཛུགས་ཀྱིས་ཐོག་མའི་འཆར་གཞི་ལས་ལོ་གཉིས་ཙམ་རྗེས་ལུས་ཐེབས་ཡོད་པ་དང་། བཟོ་བསྐྲུན་ཁྱད་ནུས་ཐད་ཚད་རིམ་ ༨ ས་འགུལ་དང་མཚོ་རླུང་དྲག་པོ། དེ་བཞིན་འཁོར་རིགས་ཆེན་པོའི་བརྡབ་གསིག་ལས་གཡོལ་ཐུབ་ཀྱི་ཡོད་པ་དང་། ཟམ་ཆེན་དེ་འཛམ་གླིང་གི་མཚོ་ཐོག་ཟམ་ཆེན་རིང་ཤོས་དང་། སྤྱིར་བཏང་ཟམ་ཆེན་རིང་ཤོས་ཨང་ ༦ པ་དེ་ཡིན་པ་དང་། འཛམ་གླིང་གི་སྐད་གྲགས་ཡོད་པའི་ཟམ་ཆེན་རིང་ཤོས་ཏན་ཡང་ཁུན་ཧྲན་ཟམ་ཆེན་(Danyang-Kunshan Grand Bridge)ཚུད་པའི་རྒྱ་ནག་གི་ཟམ་ཆེན་དྲུག་འཛམ་གླིང་གི་ཟམ་ཆེན་རིང་ཤོས་བཅུའི་ནང་སླེབས་ཀྱི་ཡོད་འདུག
པ་སངས་ཚེ་རིང་།
