ཉེ་སྔོན་སེར་ཤུལ་རྫོང་ཉེན་རྟོག་པས་འཛིན་བཟུང་བྱས་པའི་བོད་རིགས་གཞོན་ནུ་དབང་ཆེན་ལགས་དང་ཁོང་གི་ཨ་ཅག་སྒྲོལ་དཀར་ལགས་གཉིས་ལ་བཙོན་འཇུག་ཁྲིམས་ཐག་བཅད་ཡོད་པ་དང་། དབང་ཆེན་ལགས་ཀྱི་རོགས་པ་གཉིས་ལ་དངུལ་གྱི་ཉེས་ཆད་བཅད་དེ་ཟབ་སྦྱོང་འཛིན་གྲྭར་བཅུག་ཡོད་འདུག
དེ་རིང་ཞོགས་པར་སེར་ཤུལ་རྫོང་མི་མང་ཁྲིམས་ཁང་གིས་སེལ་ཤུལ་རྫོང་ཁོངས་ནས་ཡིན་པའི་བོད་མི་གཞོན་སྐྱེས་དབང་ཆེན་ལགས་ལ་མངོན་གསལ་དོད་པོའི་ཐོག་ནས་རྒྱལ་ཁབ་ཀྱི་ཁྲིམས་ལ་ངོ་རྒོལ་གྱེན་ལངས་རྩ་འཛུགས་དང་སྣེ་འཁྲིད་བྱེད་མཁན་གྱི་ཉེས་མིང་འོག་ལོ་ ༤ དང་ཕྱེད་ཀ་ཡི་ཁྲིམས་ཆད་དང་། ཁོང་གི་ཨ་ཅག་སྒྲོལ་དཀར་ལགས་ལ་ངན་པ་ལག་འབྲེལ་བྱས་ཏེ་རྒྱལ་ཁབ་ཀྱི་རྩ་དོན་དང་། ས་གནས་བདེ་འཇགས་ལ་གནོད་པའི་གསང་བ་ཕྱིར་བསྒྲགས་བྱས་པའི་ཉེས་མིང་འོག་ལོ ༡ དང་ཟླ ༣ གྱི་ཁྲིམས་ཐག་བཅད་ཡོད་པ་མ་ཟད། ད་ལན་གྱི་གནས་ཚུལ་དེ་བརྒྱུད་བསྒྲགས་བྱས་ན་ཉེས་ཆད་ལྕི་མོ་གཅོད་རྒྱུ་ཁག་ཐེག་བྱེད་དུ་བཅུག་ཡོད་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། དབང་ཆེན་གྱི་རོགས་པ་བློ་བཟང་དང་ཡོན་ཏན་གཉིས་སེར་ཤུལ་རྫོང་རྒྱལ་ཁབ་སློབ་གསོ་ཡན་ལག་ལས་ཁུངས་ཟེར་བར་རྩིས་སྤྲོད་བྱས་ཏེ། མི་རེར་རྒྱ་སྒོར ༡༥༠༠༠ རེ་ཡི་ཉེས་ཆད་བཅད་ནས་ཟླ་དྲུག་རིང་རྒྱལ་སྤྱིའི་བདེ་འཇགས་སློབ་གསོ་ཟབ་སྦྱོང་འཛིན་གྲྭ་ཞེས་པར་འགྲོ་དགོས་པ་བཟོས་ཡོད་འདུག་ལ། དབང་ཆེན་ལགས་དང་ཁོང་གི་ཨ་ཅག་ལགས་གཉིས་ལ་ཁྲིམས་ཐག་བཅད་རྗེས་བཙོན་ཁང་གང་དུ་འཁྲིད་ཡོད་མེད་སོགས་གསལ་ཁ་མི་འདུག

ཟླ་འདིའི་ཕྱི་ཚེས་ ༣ ཉིན་གྱི་ཉིན་གུང་ཆུ་ཚོད་ ༡༢ ཐོག་དབང་ཆེན་ལགས་ཀྱི་ཨ་ཅག་སྒྲོན་དཀར་ལགས་སེར་ཤུལ་ཁུལ་(区)ཉེན་རྟོག་ཁང་དུ་འཁྲིད་ཡོད་པ་དང་། འབྲེལ་ཡོད་མི་ཁ་ཤས་ཤིག་སྒྲོན་དཀར་ལགས་དང་མཉམ་དུ་ཕྱིན་དུ་ཡོད་པ་དང་། དེའི་ནང་གི་མི་ཞིག་གིས་བརྗོད་ན། ཉེན་རྟོག་མི་སྣས་སྒྲོན་དཀར་ལགས་ལ་ང་ཚོས་སྤྱི་ཚོགས་བདེ་འཇགས་ཆེད་དུ་རྟོག་ཞིབ་མི་སྣ་གང་སར་བཀྲམ་ཡོད་པས་ཤེས་ཀྱི་མེད་པ་རེད་མ་བསམ། ཁྱེད་རང་གིས་སྐད་ཆ་ག་རེ་བཤད་ཡོད་པ་ང་ཚོས་སྔོན་མ་ནས་ཧ་གོ་གི་ཡོད། དྲང་མོ་བཤད་ན་དགའ་གི་རེད་ཟེར་ནས་སྡིགས་ར་བསྐུལ་ཡོད་པ་དང་། ཁ་སང་ཕྱི་ཚེས་ ༧ ཉིན་གློག་ཆས་རིགས་གང་ཡང་ཁུར་དུ་མ་བཅུག་པར་སེལ་ཤུལ་དོ་དམ་ལས་ཁུངས་སུ་སྐད་བཏང་ཡོད་པ་དང་། དེ་རིང་ཞོགས་པར་ནང་མི་དང་སྤུན་མཆེད་ལྔ་ཡན་ཡོང་མི་ཆོག་པ་མ་ཟད། གློག་རིགས་དང་ཁ་པར་སོགས་རྩ་བ་ནས་ཁུར་མི་ཆོག་པ་དང་། གལ་སྲིད་གནས་ཚུལ་དེ་འདྲ་རིགས་བྱུང་བ་ཡིན་ན་འགན་རང་ཉིད་ནས་ཁུར་དགོས་ལུགས་བརྗོད་ཡོད་འདུག དེ་རིང་ཞོགས་པའི་ཆུ་ཚོད་ ༨ ཡས་མས་སུ་སེར་ཤུལ་ཁུལ་དོ་དམ་ལས་ཁུངས་ནས་ས་གནས་མི་མང་ཁྲིམས་ཁང་དུ་འཁྲིད་དེ། མི་རེ་རེ་བྱས་ནས་ཁ་པར་སོགས་འཁུར་ཡོད་མེད་ཞིབ་བཤེར་ནན་པོ་བྱས་རྗེས་ཁྲིམས་རའི་ནང་འཛུལ་དུ་བཅུག་ཡོད་འདུག

ཉེ་སྔོན་ཕྱི་ཟླ་ ༤ ཚེས་ ༢༩ ཉིན་དབང་ཆེན་ལགས་དང་ཁོང་གི་རོགས་པ་གཉིས་བཅས་རི་མགོར་བསང་གསོལ་དུ་ཕྱིན་སྐབས། ༧པན་ཆེན་ཆུང་སྲིད་རིན་པོ་ཆེ་མཆོག་འཕྲལ་དུ་ཀློད་གྲོལ་གཏོང་དགོས་པ་དང་། ༧རྒྱལ་བ་༧པཎ་ཆེན་རྣམ་གཉིས་བོད་ནང་ཞལ་འཛོམས་ཞུ་དགོས་པའི་སྐད་འབོད་གནང་ཡོད་པ་དང་། སྐབས་དེར་འགྲམ་དུ་ཡོད་པའི་དབྱར་རྩྭ་རྐོ་མཁན་ཚོས་དེ་འདྲ་ཟེར་མི་ཉན་སྐོར་བརྗོད་སྐབས། ད་ལྟ་བར་ཏུ་བོད་མི་ ༡༥༠ ཡས་མས་ཞིག་གིས་རང་ལུས་མེར་བསྲེགས་གནང་ནས་གྲོངས་པ་དེའི་འགན་ང་ཚོ་ཚང་མ་ལ་ཡོད་སྐོར་བརྗོད་ཡོད་པ་དང་། དེ་ནས་བསང་གསོལ་ཚར་ཏེ་མར་རི་འདབས་སུ་བསླེབས་སྐབས་ཉེན་རྟོག་པ་འགའ་ཡོང་སྟེ། ཁོང་དང་རོགས་པ་གཉིས་བཅས་འཛིན་བཟུང་བཙན་འཁྲིད་བྱས་ཡོད་པ་རེད།དབང་ཆེན་ལགས་ཀྱི་ཤུལ་དུ་ཨ་མ་ལགས་དང་སྤུན་མཆེད་བུ་མོ་གཉིས། དེ་བཞིན་སྤུན་མཆེད་བུ་གཅིག་རྒྱ་གར་ལྷོ་ཕྱོགས་སུ་ཡོད་འདུག ཁོང་གི་ཨ་ཅག་སྒྲོན་དཀར་ལགས་མགོ་ལོག་རྨ་སྟོད་རྫོང་ཆུ་སྔོན་ལུང་བ་ནས་ཡིན་པ་དང་། རང་ལོ་ ༡༨ ནས་ཡུལ་ཤུལ་དུ་ལོ་མང་རིང་བསྡད་ཡོད་པ་དང་། རྗེས་སུ་ཁོང་གི་སྤུན་མཆེད་མང་པོ་སེར་ཤུལ་ཁུལ་དུ་ཡོད་སྟབས། དེ་རུ་ཁང་པ་ཉོས་ནས་གཏན་སྡོད་བྱས་ཡོད་འདུག་ལ། མོའི་ཁྱོ་གའི་མིང་ལ་སྐར་ཚེ་ཟེར་བ་དང་། ཁོང་གཉིས་ལ་རང་ལོ་ ༡༦ ཡིན་པའི་བུ་མོ་སྒྲོལ་དཀར་ལྷ་མོ་དང་། རང་ལོ་ ༨ ཡིན་པའི་བུ་མོ་རིན་ཆེན་ལྷ་མོ་ཞེས་པ་ཞིག་ཡོད་འདུག

མཆན། སྤྱིར་བཏང་སྒྲོལ་དཀར་ལགས་དབང་ཆེན་གྱི་པ་ལགས་ཀྱི་སྲིང་མོ་ཡིན་པས་ཨ་ནེ་ཆགས་བསྡད་ཡོད་ཀྱང་། མོ་ཆུང་དུས་ནས་དབང་ཆེན་ཚང་ལ་སྤྲད་དེ། དབང་ཆེན་ཁོང་གཉིས་མཉམ་གཤིབ་བྱས་ནས་འཚར་ལོངས་བྱུང་བར་བརྟེན། དབང་ཆེན་ལགས་ཀྱིས་རྒྱུན་དུ་མོ་ལ་ཨ་ཅག་ཅེས་འབོད་ཀྱི་ཡོད་འདུག

འབྲེལ་ཡོད་གནས་ཚུལ།http://tibettimes.net/2019/04/30/177174/

རྒྱ་གར་ལྷོ་ཕྱོགས་ས་གནས་གསར་འགོད་པ་དོན་འགྲུབ་བཀྲ་ཤིས།