རྒྱ་གར་ནང་འགྲིམ་འགྲུལ་སྒྲིག་ཁྲིམས་གསར་པ་ཞིག་ལག་བསྟར་བྱེད་ཀྱི་འདུག

ཟླ་རྗེས་མའི་ནང་ནས་བཟུང་ཧི་མ་ཅལ་ནང་འགྲིམ་འགྲུལ་སྒྲིག་ཁྲིམས་གསར་པ་དེ་ལག་བསྟར་གནང་འཆར་འདུག

ཟླ་འདིའི་ཟླ་མགོ་ཙམ་ནས་བཟུང་རྒྱ་གར་དབུས་གཞུང་གིས། རྒྱ་གར་ནང་ལོ་རེར་འགྲིམ་འགྲུལ་དོན་རྐྱེན་མང་པོ་ཡོང་གི་ཡོད་པའི་དཀའ་རྙོག་སེལ་སླད། འགྲིམ་འགྲུལ་གྱི་སྒྲིག་ཁྲིམས་དམ་པོ་ཞིག་གསར་དུ་བཟོས་ཡོད་པ་དངོས་སུ་ལག་བསྟར་བྱེད་མགོ་བརྩམས་ཡོད་པ་དང་། དེ་རིང་འདི་གའི་གསར་འགོད་པ་དྷ་རམ་ས་ལའི་ཉེན་རྟོག་ལས་ཁུངས་སུ་ཕྱིན་ཏེ། འགྲིམ་འགྲུལ་གྱི་སྒྲིག་ཁྲིམས་གསར་པ་དེ་ཧི་མ་ཅལ་ནང་ལག་བསྟར་གནང་བཞིན་ཡོད་མེད་དྲིས་ཏེ་རྒྱུས་ལོན་བྱུང་བ་ལྟར་ན། འགྲིམ་འགྲུལ་གྱི་སྒྲིག་ཁྲིམས་གསར་པ་དེ་ཟླ་རྗེས་མ་ནས་ཧི་མ་ཅལ་ནང་དངོས་སུ་ལག་བསྟར་གནང་འཆར་ཡོད་པ་དང་། མི་མང་པོ་ཞིག་གིས་ད་ལྟ་ལག་བསྟར་གནང་བཞིན་ཡོད་པར་དོགས་ནས་གཟབ་གཟབ་བྱེད་ཀྱི་ཡོད་འདུག

གསར་འགོད་པས་ཉེན་རྟོག་སྐོར་སྲུང་བ་ཨཱ་མིཊི་ཀུ་མར་(Amit Kumar)ལགས་སུ་ཧི་མ་ཅལ་ནང་སྒྲིག་ཁྲིམས་གསར་པ་ལག་བསྟར་གནང་ཕྱོགས་སྐོར་དྲིས་པར་ཁོང་གིས། ད་ལྟའི་ཆར་ཧི་མ་ཅལ་མངའ་སྡེའི་ནང་འགྲིམ་འགྲུལ་གྱི་སྒྲིག་ཁྲིམས་གསར་པ་དེར་བསྐྱར་བཅོས་བྱེད་བཞིན་ཡོད་པས་ད་དུང་ལག་བསྟར་བྱས་མེད། འོན་ཀྱང་། ཟླ་གཅིག་གི་རྗེས་ནས་ལག་བསྟར་བྱ་རྒྱུ་ཡིན། སྒྲིག་ཁྲིམས་དེར་བསྐྱར་བཅོས་བྱེད་དགོས་དོན་ནི། ཧི་མ་ཅལ་རི་ངོས་ཀྱི་མངའ་སྡེ་ཞིག་ཡིན་སྟབས། འགྲིམ་འགྲུལ་དོན་རྐྱེན་མང་ཆེ་བའི་བྱུང་སྟངས་ཀྱང་རླངས་འཁོར་རི་ནས་མར་ཟེགས་པ་སོགས་མངའ་སྡེ་གཞན་དང་མི་འདྲ་བའི་རྐྱེན་གྱིས་ཡིན། འོན་ཀྱང་། སྒྲིག་ཁྲིམས་ལ་བསྐྱར་བཅོས་ཟེར་དུས་འགྲིམ་འགྲུལ་སྒྲིག་ཁྲིམས་བརྒལ་བའི་ཉེས་ཆད་དག་ལ་འགྱུར་བ་ཅུང་ཙམ་རེ་མ་གཏོགས་འགྲོ་ཡི་མེད་ལ། དབུས་གཞུང་གི་འགྲིམ་འགྲུལ་སྒྲིག་ཁྲིམས་གསར་པ་གསལ་བསྒྲགས་གནང་རྗེས། དྷ་རམ་ས་ལའི་མི་མང་ལ་གོ་རྟོགས་བྱུང་སྟེ། ད་ལྟའི་ཆར་མི་ཚང་མས་སྦག་སྦག་ཞ་མོ་གྱོན་པ་དང་རླངས་འཁོར་གཏོང་སྐབས་སྲུང་སྐྱོབ་ཐག་པ་བསྡམས་པ་སོགས་བྱེད་ཀྱི་འདུག་པས་ཡག་པོ་བྱུང་འདུག  ཅེས་བརྗོད་བྱུང་།

ཡང་ཁོང་གིས་ངོ་སྤྲོད་གནང་བ་ལྟར་ན། ད་ལྟ་རྒྱ་གར་རྒྱལ་ཡོངས་སུ་མངའ་སྡེ་བཞི་མ་གཏོགས་གྲོང་ཁྱེར་ཁག་དང་མངའ་སྡེ་ཚང་མས་འགྲིམ་འགྲུལ་གྱི་སྒྲིག་ཁྲིམས་གསར་པ་དེ་ལག་བསྟར་བྱེད་བཞིན་ཡོད་པ་དང་། སྒྲིག་ཁྲིམས་དེ་ཇི་བཞིན་ལག་ལེན་བསྟར་མིན་གཙོ་བོ་མངའ་སྡེ་རང་གི་གནས་བབ་ལ་བལྟས་ནས་ཐག་གཅོད་བྱེད་ཆོག་པ་ཞིག་ཡིན་འདུག་ལ། ཧི་མ་ཅལ་གྱི་འགྲིམ་འགྲུལ་སྒྲིག་ཁྲིམས་བསྐྱར་བཅོས་དེ་ཉིན་ཤས་ནང་འགྲུབ་སྲིད་པ་དང་། དབུས་གཞུང་གི་གཏན་འབེབ་ལས་ཅུང་ཙམ་མ་འདྲ་བ་བྱས་ཏེ་ལག་བསྟར་བྱ་རྒྱུ་ཡིན་ཡང་། ཁྱད་པར་ཆེན་པོ་འགྲོ་རྒྱུ་མིན་སྐོར་བརྗོད་བྱུང་།

རྒྱ་གར་དབུས་གཞུང་གི་འགྲིམ་འགྲུལ་གྱི་སྒྲིག་ཁྲིམས་གསར་བའི་ནང་། ར་བཟི་བ་དང་ཐོབ་ཐང་ལག་འཁྱེར་མེད་པར་རླངས་འཁོར་དང་སྦག་སྦག་གཏོང་མཁན་ཚོར་ཉེས་ཆད་ཧིན་སྒོར་ཁྲི་ ༡ དང་། ཁྲིམས་མེད་ལུགས་མེད་ཀྱིས་རྩུབ་སྤྱོད་ཆེ་བའི་རླངས་འཁོར་གཏོང་མཁན་ལ་ཉེས་ཆད་ཧིན་སྒོར་ ༥༠༠༠། དེ་བཞིན། མི་གཉིས་ལས་མང་བས་སྦག་སྦག་གཅིག་ཞོན་པ་དང་། སྦག་སྦག་དང་རླངས་འཁོར་ལ་ལམ་ཁྲལ་མ་སྤྲད་པ་སོགས་ལ་ཧིན་སྒོར་ ༢༠༠༠ རེ་དང་། སྦག་སྦག་ཞོན་སྐབས་ཞ་མོ་གྱོན་མེད་པ་དང་འགྲིམ་འགྲུལ་སྒྲིག་ཁྲིམས་བརྩི་སྲུང་མ་བྱས་ཚེ་ཧིན་སྒོར་ ༡༠༠༠ དང་། རླངས་འཁོར་དང་སྦག་སྦག་གཏོང་ཆོག་པའི་ལག་འཁྱེར་མེད་ཚེ་ཉེས་ཆད་ཧིན་སྒོར་ ༥༠༠༠ བཅས་ཀྱི་ཉེས་ཆད་གཅོད་རྒྱུ་ཡིན་འདུག

གཞན་ཡང་། གསར་འགོད་པས་ལོ་ཚོད་མ་ལོན་པ་དང་སྦག་སྦག་སོགས་རྒྱུག་འགྲན་བྱས་ན་ཉེས་ཆད་ག་རེ་ཡོད་དྲིས་པར་ཁོང་གིས། རླངས་འཁོར་དང་སྦག་སྦག་གཏོང་བར་རང་ལོ་ ༡༨ ཟིན་དགོས་པ་དང་། རླངས་འཁོར་དང་སྦག་སྦག་གི་མགྱོགས་ཚད་ལས་བརྒལ་བའི་འགྲན་བསྡུར་བྱས་ཚེ་ཆད་པ་དང་ལྷན་དུ་ཟླ་གསུམ་བཙོན་འཇུག་བྱ་རྒྱུ་དང་། གལ་སྲིད་ཁྲིམས་འགལ་སྒྲིག་འགལ་བསྐྱར་དུ་བྱུང་ན་ལོ་ཚད་མ་ཟིན་པའི་ཁ་ལོ་བ་དང་། སྦག་སྦག་གི་བདག་པོ་སུ་ཡིན་ན་དེ་ལ་ཧིན་སྒོར་ ༢༥༠༠༠ གི་ཆད་པ་དང་ལོ་གསུམ་རིང་བཙོན་འཇུག་གི་ཁྲིམས་ཆད་འབབ་ཀྱི་ཡོད་པ་རེད། ཅེས་བརྗོད་བྱུང་།

དེ་རིང་རྒྱ་གར་བང་ཆེན་གསར་ཁང་གིས་སྤེལ་བའི་གནས་ཚུལ་ནང་། ད་ལྟ་རྒྱ་གར་དབུས་གཞུང་གི་འགྲིམ་འགྲུལ་གྱི་སྒྲིག་ཁྲིམས་གསར་པ་དེ་ལག་བསྟར་བྱེད་ཀྱི་མེད་པའི་མངའ་སྡེ་བཞི་ནི་མྰ་དྷི་ཡ་(Madhya Pradesh)དང་ར་ཇི་སི་ཐན(Rajasthan)། པན་ཇབ(Punjab)དང་ཊེ་ལན་གྷ་ནཱ(Telangana)་བཅས་ཡིན་པ་དང་།
གཞན་ཡང་རྒྱ་གར་གྱི་མངའ་སྡེ་ཨོ་ཌི་ཤྰ(Odisha)། ཆྰ་ཊི་སི་གྷར(Chhattisgarh)། པོ་ཌོ་ཆི་རེ(Puducherry)། གྷོ་ཇོ་ར་ཊི(Gujarat)། ནུབ་བྷན་གྷལ(West Bengal)བཅས་ཁྱོན་རྒྱ་གར་གྱི་མངའ་སྡེ་ ༥ ཡི་ནང་འགྲིམ་འགྲུལ་སྒྲིག་ཁྲིམས་དེ་བཙན་དྲག་པའི་དཀའ་ངལ་ཡར་ཞུ་བྱས་ཏེ་ཆག་ཡང་གཏོང་གི་ཡོད་བརྗོད་འདུག་ལ། གཞུང་འཛིན་ཚོགས་པའི་ཁ་གཏད་དུ་ལངས་ཡོད་པའི་ཀོང་རི་སི་སྲིད་དོན་ཚོགས་པའི་འཛིན་སྐྱོང་འོག་གི་མངའ་སྡེ་ཁག་ནང་སྒྲིག་ཁྲིམས་གསར་པ་དེ་ལག་བསྟར་བྱེད་པར་མོས་མཐུན་མེད་པའི་དཀའ་རྙོག་ཅིག་ཡོང་གི་ཡོད་འདུག

རྒྱ་གར་འགྲིམ་འགྲུལ་ལྷན་ཁང་གི་སྙན་ཐོ་ལྟར་ན། ཕྱི་ལོ་ ༢༠༡༧ ལོ་ཁོ་ནར་འགྲིམ་འགྲུལ་དོན་རྐྱེན་འབུམ་ ༤ (༤.༦༤ )ལྷག་བྱུང་སྟེ། ཁྱོན་མི་གྲངས་འབུམ་ ༡ (༡.༤༧)ལྷག་རྐྱེན་འདས་སུ་ཕྱིན་ཡོད་པས། འགྲིམ་འགྲུལ་སྒྲིག་ཁྲིམས་གསར་བཟོ་བྱེད་དོན་ནི། རྒྱ་གར་ནང་འགྲིམ་འགྲུལ་དོན་རྐྱེན་ཉུང་དུ་གཏོང་བའི་ཆེད་དུ་དམིགས་པ་ཞིག་ཡིན་འདུག

གསར་འགོད་པ། སྐལ་བཟང་སྦྱིན་པ།

བསྐྱར་བཅོས།: ༢༠༡༩/༠༩/༡༡

Leave a Reply

2 thoughts on “རྒྱ་གར་ནང་འགྲིམ་འགྲུལ་སྒྲིག་ཁྲིམས་གསར་པ་ཞིག་ལག་བསྟར་བྱེད་ཀྱི་འདུག

  1. སྲས་སྐུ་ངོ་།

    ར་བཟི་ནས་རླངས་འཁོར་སྐོར་ན་ཁ་ལོ་བའི་ལག་འཁྱེར་ལོ་གཅིག་ལ་ལེན་རྒྱུ་དང་ཆད་པ་ཧིན་ཁྲི་༡༠༠༠༠
    གང་ལྟར་ཡག་པོ་འདུག སྤྱང་རྒན་ལ་ལ་ཕྱུག་པོ་ཆགས་རྒྱུ་རེད།