ལེ་བྷེ་ནོན་གཞུང་འཛིན་ཚོགས་པས་རྩ་དགོངས་མ་ཞུས་བར་དུ་མི་མང་གིས་ཡུལ་དེའི་དཔལ་འབྱོར་གནས་བབ་ཉམས་རྒུད་དང་ལྐོག་ཟ་རུལ་སུངས་ཀྱི་གནད་དོན་སེལ་ཐབས་ཀྱི་ངོ་རྒོལ་ལས་འགུལ་མཚམས་འཇོག་རྒྱུ་མིན་པའི་རྒོལ་གཏམ་བསྒྲགས། 

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་སྤེལ་བའི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༡༧ ཉིན་དཀྱིལ་ཤར་ལེ་བྷེ་ནོན་( Lebanon)གཞུང་གིས་ཝ་ཙི་ཨེབ་ (Whatsapp) དང་། ངོ་དེབ་ཀྱི་འཕྲིན་དྲ་(Facebook Messenger)། ཀུ་ཤུ་ཁ་པར་གྱི་ཧྥེ་སི་ཊམ་(FaceTime) ལྟ་བུའི་མཉེན་ཆས་བརྒྱུད་མི་མང་གིས་ཁ་པར་གཏོང་བར་ཉིན་རེར་ཁྲལ་ཨ་སྒོར་ ༠།༢༠ འབབ་རྒྱུ་ཡིན་པའི་གསལ་བསྒྲགས་བྱས་པར་བརྟེན། ཡུལ་དེའེི་རྒྱལ་ས་བྷེ་རུ་ཊི་ (Beirut) གཙོས་པའི་གྲོང་ཁྱེར་ཆེ་ཁག་གི་གཞུང་ལམ་ཐོག་མི་མང་སྟོང་ཕྲག་མང་པོ་འདུ་འཛོམས་ཀྱིས། ད་ཐེངས་ཀྱི་ཁྲལ་གསར་སྣོན་གྱི་གནད་དོན་ཙམ་དུ་མ་ཟད། ད་ལྟའི་གཞུང་གིས་ལོ་ངོ་དུ་མའི་རིང་གི་ལེ་བྷེ་ནོན་གྱི་དཔལ་འབྱོར་གནས་བབ་དང་། ལྐོག་ཟ་རུལ་སུངས་ཀྱི་དཀའ་རྙོག་སེལ་ཐབས་ཐད་གང་ཡང་འཇོན་མེད་སྐོར་བརྗོད་དེ། ལེ་བྷེ་ནོན་ནང་དཔལ་འབྱོར་གྱི་བཅོས་བསྒྱུར་ཆེན་པོ་ཞིག་དགོས་ཀྱི་ཡོད་པ་དང་། སྲིད་བློན་སཱཌ་ཧཱ་རི་རི་(Saad Hariri))ཡིས་སྣེ་འཁྲིད་པའི་ད་ལྟའི་གཞུང་འཛིན་ཚོགས་པས་འཕྲལ་དུ་རྩ་དགོངས་ཞུ་དགོས་པ་དང་། གང་མགྱོགས་རྒྱལ་ཡོངས་ནང་བསྐྱར་དུ་འོས་བསྡུ་བྱས་ཏེ་གཞུང་གསར་པ་བསྐོ་བཞག་དགོས་པ་སོགས་ཀྱི་དགོས་འདུན་བཏོན་ཏེ་ངོ་རྒོལ་ལས་འགུལ་མགོ་འཛུགས་བྱས་ཡོད་པ་དང་། ཕྱི་ཚེས་ ༢༡ ནས་བཟུང་གཞུང་རྒོལ་ལས་འགུལ་དེ་རྒྱལ་ཡོངས་རང་བཞིན་ཅན་ཞིག་ཏུ་གྱུར་ཡོད་འདུག་ལ། ཐེངས་འདིའི་གཞུང་རྒོལ་ལས་འགུལ་དེ་འདས་པའི་ལོ་ངོ་ ༡༥ རིང་ཡུལ་དེའི་མང་ཚོགས་རང་བཞིན་གྱི་ལས་འགུལ་ཆེ་ཤོས་ཤིག་ཆགས་ཡོད་འདུག

ཁ་སང་ཡུལ་དེའི་སྲིད་བློན་སཱཌ་ཧཱ་རི་རི་ཡིས་བརྙན་ལམ་བརྒྱུད་ནས་མི་མང་རྣམས་ལ་དཔལ་འབྱོར་བཅོས་བསྒྱུར་དང་འབྲེལ་བའི་གཏམ་བཤད་སྤེལ་སྐབས། དེ་རིང་བློན་ཆེན་ལྷན་ཁང་གིས་ཕྱི་ལོ་ ༢༠༢༠ ལོའི་སྔོན་རྩིས་གཏན་འབེབ་བྱས་ཡོད་པ་མ་ཟད། སྔོན་རྩིས་ནང་ཁྲལ་འབབ་གསར་པ་གང་ཡང་བསྣན་མེད་སྐོར་དང་། དཔལ་འབྱོར་བཅོས་བསྒྱུར་གྱི་ཆ་ཤས་སུ་གྲོས་ཚོགས་འཐུས་མི་ཚུད་པའི་གཞུང་གི་ཆེས་མཐོའི་མགོ་འཁྲིད་རྣམས་ཀྱི་གླ་ཆ་ནས་ཕྱེད་ཀ་བཅག་ཡོད་སྐོར་དང་། ལེ་བྷེ་ནོན་གཞུང་གི་ཐག་གཅོད་དེས་ཞི་རྒོལ་མི་མང་རྣམས་ཀྱི་འདོད་པ་བསྐོང་མི་ཐུབ་ཀྱང་། རང་ཉིད་ལ་བསྐུར་བའི་འགན་འཁྲི་དེ་བསྒྲུབས་ཐུབ་ཡོད་པ་དང་། མི་སུ་ཞིག་གིས་ཀྱང་མི་མང་ལ་འཇིགས་སྐུལ་བྱེད་ཐབས་མེད་པ་མ་ཟད། མི་མང་རྣམས་ཀྱི་ཞི་བའི་རེ་འདུན་དེ་དག་སྲུང་སྐྱོབ་བྱ་རྒྱུ་ནི་གཞུང་གི་འགན་འཁྲི་ཞིག་ཡིན་སྐོར་སོགས་བརྗོད་དེ་མང་ཚོགས་ཀྱི་གཞུང་རྒོལ་ལས་འགུལ་འཇགས་ཐབས་བྱས་ཡོད་ཀྱང་། ཞི་རྒོལ་མི་མང་གིས་གཞུང་གིས་དཔལ་འབྱོར་གྱི་བཅོས་བསྒྱུར་ཆེན་པོ་ཞིག་བྱ་རྒྱུའི་ངོས་ལེན་བྱས་མིན་ལ་མ་ལྟོས་པར། ད་ལྟའི་གཞུང་འཛིན་ཚོགས་པས་རྩ་དགོངས་མ་ཞུས་བར་དུ་ཞི་རྒོལ་ལས་འགུལ་མུ་མཐུད་སྤེལ་རྒྱུ་ཡིན་སྐོར་བསྒྲགས་འདུག

སྤྱིར་ལེ་བྷེ་ནོན་དེ་ཆོས་ལུགས་ཆེ་ཁག་འདྲ་མིན་མཉམ་འདུས་ཀྱི་སྤྱི་ཚོགས་ལས་གྲུབ་པའི་རྒྱལ་ཁབ་ཅིག་ཡིན་པར་བརྟེན། དེ་སྔ་ནས་བཟུང་ལེ་བྷེ་ནོན་ནང་ཆོས་ལུགས་ཕན་ཚུན་བར་རྩོད་རྙོག་མང་པོ་འབྱུང་མུས་ཡིན་ཡང་། ད་ལན་གྱི་གཞུང་རྒོལ་ལས་འགུལ་ནང་ཆོས་ལུགས་འདྲ་མིན་དང་། མི་རབས་རྒན་གཞོན། གཞུང་འབྲེལ་མི་སྣ་དང་མི་མང་དཀྱུས་མ་སོགས་རྒྱབ་ལྗོངས་མི་འདྲ་བའི་མི་རྣམས་གཅིག་ཏུ་འདུས་ཡོད་པ་དང་། ཕྱི་ཚེས་ ༡༧ ཉིན་གྱི་ཉིན་དང་པོའི་གཞུང་རྒོལ་ལས་འགུལ་དེ་ཧ་ཅང་ཞི་ལྷིང་གི་ཐོག་ནས་གྲུབ་ཡོད་ཀྱང་། ཕྱི་ཚེས་ ༡༨ ཉིན་ཉེན་རྟོག་པས་རྒྱལ་ས་བྷེ་རུ་ཊིའི་གཞུང་ལམ་ཐོག་རྔམ་སྟོན་ཁྲོམ་སྐོར་བྱེད་བཞིན་པའི་ལས་འགུལ་བའི་ཐོག་ལ་མིག་ཆུའི་དུག་རླངས་ (Tear Gas) དང་འགྱིག་མདེའུ་ (Rubber Bullet) འཕངས་པ་མ་ཟད། ཁྱོན་ལས་འགུལ་བ་ ༡༠༠ ལྷག་འཛིན་བཟུང་བྱས་པར་བརྟེན། མི་མང་གི་ཞི་རྒོལ་ལས་འགུལ་དེ་ཅུང་ཛ་དྲག་པོ་ལྟ་བུར་གྱུར་ཡོད་པ་མ་ཟད། ད་ལྟའི་ཆར་མི་མང་གིས་རྒྱལ་ཡོངས་འོས་བསྡུ་མ་བྱས་བར་དུ་གཞུང་གི་དབང་ཆ་རྣམས་ཆབ་སྲིད་དང་འབྲེལ་མེད་ཀྱི་ཁྲིམས་ཞིབ་པའི་ལྷན་ཚོགས་ལ་རྩིས་སྤྲོད་དགོས་པའི་རེ་འདུན་སོགས་བཏོན་ཡོད་འདུག

སྤྱིར་ལེ་བྷེ་ནོན་རྒྱལ་ཁབ་ནི་མི་མང་ལ་བུ་ལོན་ཆེས་ཆེ་བའི་རྒྱལ་ཁབ་ཅིག་ཡིན་པ་དང་། ཡུལ་དེའི་མང་ཚོགས་ཀྱི་བུ་ལོན་(Public debt)དེ་ཁྱོན་ཨ་སྒོར་ཐེར་འབུམ་ ༨༦ ལ་ཟིན་ཡོད་པ་དང་།  རྒྱལ་ཁབ་ཀྱི་དཔལ་འབྱོར་གནས་བབ་ཀྱི་ཆ་ནས་ཀྱང་། ཕྱི་ལོ་ ༢༠༡༨ ལོར་ལེ་བྷེ་ནོན་གྱི་ལོ་རེར་རྒྱལ་ཡོངས་ཐོན་སྐྱེད་སྤྱི་འབོར་(GDP) དེ་བརྒྱ་ ༠།༢ ཙམ་ལས་འཕར་མེད་པ་དང་། འཛམ་གླིང་དངུལ་ཁང་གི་ཚོད་དཔག་ལྟར་ན་འདི་ལོའི་རྒྱལ་ཡོངས་ཐོན་སྐྱེད་སྤྱི་འབོར་དེ་བརྒྱ་ཆ་  – ༠།༢ ལ་མར་ཆག་ཡོད་འདུག འདས་ལོར་རྒྱལ་སྤྱིའི་མི་སྒེར་ཚོགས་སྡེ་ཁག་གིས་ལེ་བྷེ་ནོན་གྱི་དཔལ་འབྱོར་ཡར་རྒྱས་ཡོང་ཆེད་ཨ་སྒོར་ཐེར་འབུམ་ ༡༡ ལྷག་ཞལ་འདེབས་སུ་སྦྱིན་པ་ལྟར། གཞུང་ནས་ཀྱང་མང་ཚོགས་ཀྱི་བུ་ལོན་སེལ་ཆེད་དཔལ་འབྱོར་གྱི་བཅོས་བསྒྱུར་གཏོང་རྒྱུ་ཡིན་སྐོར་བསྒྲགས་ཡོད་ཀྱང་། ད་བར་དམིགས་བསལ་འགྱུར་བ་གང་ཡང་ཕྱིན་མེད་པ་རེད་འདུག

གསར་འགོད་པ། པ་སངས་ཚེ་རིང་།