ཨོ་གླིང་གྲོས་ཚོགས་འཐུས་མི་གཉིས་རྒྱ་ནག་ནང་འགྲོ་བར་གཞུང་འབྲེལ་བཀག་འགོག་བྱས།

ཨོ་གླིང་གི་སྲིད་དོན་ཚོགས་པ་ཁག་གི་གྲོས་ཚོགས་འཐུས་མི་ཚོས་རྒྱ་ནག་གཞུང་ནས་གཞུང་འབྲེལ་མི་སྣ་གཉིས་བཀག་འགོག་བྱས་པར་སྐྱོན་བརྗོད་བྱེད་བཞིན་འདུགརྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་ཨོ་སི་ཊོ་ལི་ཡའི་གྲོས་ཚོགས་འཐུས་མི་ཨན་ཌི་རའོ་(Andrew Hastie)ལགས་དང་ཇེམ་སི་པི་ཊར་སན་(James Paterson)ལགས་གཉིས་ནས། རྒྱ་ནག་གིས་ཨོ་གླིང་ནང་ཐེ་གཏོགས་དང་རྒྱ་ནག་ནང་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པ་སོགས་ཀྱི་སྐོར་ལ་སྐྱོན་བརྗོད་བྱས་པའི་ངོས་འཛིན་འོག ཟླ་རྗེས་མར་རྒྱ་ནག་ནང་སྐོར་བསྐྱོད་བྱེད་འཆར་ཡོད་པ་བཀག་འགོག་བྱས་ཡོད་པ་མ་ཟད། ཨོ་སི་ཊོ་ལི་ཡའི་ནང་ཡོད་པའི་རྒྱ་ནག་གཞུང་ཚབ་ཁང་གིས། གྲོས་ཚོགས་འཐུས་མི་གཉིས་ནས་དེ་སྔོན་བཤད་པའི་སྐད་ཆ་དག་ཕྱིར་འཐེན་དང་རྒྱ་ནག་གཞུང་ལ་དགོངས་དག་ཞུ་དགོས་སྐོར་བརྗོད་ཡོད་པ་རེད།

ཐོངས་མཆན་བཀག་འགོག་བྱས་པའི་གྲོས་ཚོགས་འཐུས་མི་གཉིས་ནས། ང་ཚོས་གསལ་པོ་བཤད་རྒྱུ་ཞིག་ལ་དགོངས་དག་རྩ་བ་ཉིད་ནས་ཞུ་རྒྱུ་མིན། ང་ཚོ་ཨོ་སི་ཊོ་ལི་ཡའི་མི་མང་གི་ཚབ་ཏུ་ལངས་ཏེ། རྒྱལ་ཁབ་འདིའི་བདག་དབང་དང་རིན་ཐང་། དེ་བཞིན། མངོན་འདོད་བཅས་ཀྱི་སླད་ནམ་ཡང་དགོངས་དག་ཞུ་རྒྱུ་མིན། ཞེས་བརྗོད་ཡོད་པ་དང་། ཐེངས་འདིའི་ཨོ་སི་ཊོ་ལི་ཡའི་གནད་ཡོད་མི་སྣ་གཞུང་འབྲེལ་བཀག་འགོག་བྱས་པའི་ཐད། ཨོ་གླིང་གི་ཕྱོགས་གཉིས་ཀྱི་སྲིད་དོན་ཚོགས་པ་ཁག་གི་གྲོས་ཚོགས་འཐུས་མི་ཚོས་རྒྱ་ནག་གཞུང་ལ་སྐྱོན་བརྗོད་དང་འབྲེལ། གྲོས་ཚོགས་འཐུས་མི་གཉིས་ལ་རྒྱབ་སྐྱོར་བྱེད་བཞིན་ཡོད་པ་རེད།

ངལ་རྩོལ་ཚོགས་པའི་ཕྱི་སྲིད་མགྲིན་ཚབ་མ་པན་ནེ་ཝོན་(Penny Wong)ལགས་ཀྱིས། ང་ཚོ་དམངས་གཙོའི་རྒྱལ་ཁབ་ཅིག་ཡིན་པས། སྨྲ་བརྗོད་རང་དབང་དང་། གུ་ཡངས་གྲོས་མོལ། དེ་བཞིན། བསམ་ཚུལ་བརྗེ་རེས་བྱེད་རྒྱུ་སོགས་ནི་ང་ཚོ་སུ་ཡིན་པ་དེ་ཡིན། ངས་ཨོ་སི་ཊོ་ལི་ཡ་དང་འབྲེལ་བ་ཡོད་པའི་རྒྱལ་ཁབ་ཁག་གིས། གནད་དོན་འདི་དག་ཨོ་གླིང་ལྷན་དུ་འབྲེལ་འདྲིས་བྱེད་སྐབས་དང་ལེན་བྱེད་ཐུབ་པའི་རེ་བ་ཡོད། ཅེས་བརྗོད་ཡོད་པ་དང་། གྲོས་ཚོགས་འཐུས་མི་ཌི་ནཱ་ཊི་ལེ་(Di Natale)ལགས་ཀྱིས། ང་ཚོའི་ཚོང་འབྲེལ་ཆེ་ཤོས་ཀྱི་རྒྱལ་ཁབ་ཅིག་གིས་གཞུང་འབྲེལ་མི་སྣ་རྒྱལ་ཁབ་དེའི་ནང་འགྲོ་རྒྱུ་བཀག་འགོག་བྱས་པ་དེས་བློ་ཕམ་བཅུག་སོང་། ང་ཚོས་རྒྱ་ནག་ནང་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པའི་གནས་སྟངས་བཤད་པ་ཙམ་གྱིས། མ་འོངས་པར་གཞུང་འབྲེལ་མི་སྣ་རྒྱ་ནག་ནང་སྐོར་བསྐྱོད་བྱེད་རྒྱུ་བཀག་འགོག་མི་བྱེད་པའི་རེ་བ་ཡོད། གལ་སྲིད་བཀག་འགོག་བྱས་པ་ཡིན་ན། ང་ཚོས་པེ་ཅིན་གྱིས་རྒྱ་ནག་མི་མང་ཐོག་སྲིད་དབང་སྒེར་གཅོད་བྱེད་བཞིན་ཡོད་པའི་གནས་སྟངས་མཐོང་རྒྱུ་ཇེ་ཉུང་དུ་འགྲོ་ཡི་ཡོད། ཅེས་བརྗོད་ཡོད་པ་རེད།

ཨོ་གླིང་རྒྱ་ནག་གཞུང་ཚབ་ཁང་གི་མགྲིན་ཚབ་པས། ང་ཚོས་རྒྱ་ནག་ལ་གཞི་མེད་སྐྱོན་བརྗོད་བྱེད་མཁན་ཚོ་རྒྱ་ནག་ནང་ཡོང་བར་དགའ་བསུ་བྱེད་ཀྱི་མེད། འབྲེལ་ཡོད་ངོས་ནས་རང་ཉིད་ཀྱི་ནོར་འཁྲུལ་ནོར་བཅོས་དང་དགོངས་དག་ཞུས་ཏེ། རྒྱ་ནག་གི་ལམ་ལུགས་དང་རྒྱ་ནག་མི་མང་གི་འཕེལ་རྒྱས་ལ་གུས་བརྩི་བྱས་ཚེ། གྲོས་མོལ་དང་མཉམ་འབྲེལ་གྱི་སྒོ་ག་དུས་ཡིན་ཡང་ཕྱེས་ནས་ཡོད། ཅེས་བརྗོད་ཡོད་པ་དང་། ཟླ་རྗེས་མའི་སྐོར་བསྐྱོད་ནང་ཨོ་གླིང་གི་གྲོས་ཚོགས་འཐུས་མི་གསུམ་རྒྱ་ནག་ནང་འགྲོ་འཆར་ཡོད་པའི་ཁྲོད། གྲོས་ཚོགས་འཐུས་མི་མཱ་ཊི་གེ་ཧོ་(Matt Keogh)ལགས་སུ་ཐོངས་མཆན་སྤྲད་ཡོད་འདུག

ད་རེས་གྲོས་ཚོགས་འཐུས་མི་གཉིས་ཀྱི་ཐོངས་མཆན་བཀག་འགོག་བྱེད་དོན་ནི། འདི་ལོའི་ཕྱི་ཟླ་ ༨ ནང་གྲོས་ཚོགས་འཐུས་མི་ཨན་ཌི་རའོ་ལགས་ཀྱིས། ཨོ་གླིང་གི་གྲོང་ཁྱེར་སིད་ནེའི་(Sydney Morning Herald)གསར་འགྱུར་དྲ་ཚིགས་སྟེང་བསམ་ཚུལ་རྩོམ་ཡིག་ཅིག་སྤེལ་ཏེ། རྒྱ་ནག་གིས་ཨོ་གླིང་ནང་ཐེ་གཏོགས་བྱེད་བཞིན་ཡོད་སྟབས། ཨོ་གླིང་གིས་རྒྱལ་ཁབ་ཀྱི་མ་འོངས་པ་དང་འབྲེལ། རྒྱ་གར་ཞི་བདེ་རྒྱ་མཚོའི་ནང་གི་རྩོད་རྙོག་གཙོས་པའི་ས་མཚམས་དང་ཆུ་མཚམས་སོགས་སྲུང་སྐྱོབ་བྱེད་རྒྱུ་གལ་ཆེན་ཡིན་སྐོར་བྲིས་ཡོད་པ་དང་། གྲོས་ཚོགས་འཐུས་མི་ཇེམ་སི་པི་ཊར་སན་ལགས་ཀྱིས། ཟླ་འདིའི་ཕྱི་ཚེས་  ༡༤ ཉིན་ཧོང་ཀོང་གི་ཞི་རྒོལ་ལས་འགུལ་དང་འབྲེལ་རྒྱ་ནག་གཞུང་ལ་སྐྱོན་བརྗོད་བྱས་པ་སོགས་ལས་བྱུང་བ་ཞིག་ཡིན་པ་རེད་ལ། འདི་ལོར་ཨོ་སི་ཊོ་ལི་ཡ་གཞུང་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་པའི་སྐོར་དང་། དམིགས་བསལ་རྒྱ་ནག་ནས་ཤིན་ཅང་ཁུལ་དུ་བཀག་སྐྱིལ་ཁང་ཆེད་འཛུགས་ཀྱིས་ཡུ་གུར་མི་མང་བཙོན་འཇུག་བྱེད་ཀྱི་ཡོད་པ་སོགས་ཀྱི་སྐོར་ལ་སྐྱོན་བརྗོད་བསྟུན་མ་བྱས་ཡོད་འདུག

གསར་འགོད་པ། སྐལ་བཟང་སྦྱིན་པ།

 

 

 

 

 

 

 

བསྐྱར་བཅོས།: ༢༠༡༩/༡༡/༡༨

Leave a Reply