རྫི་མ་བཟོས་ཏེ་སྐད་གྲགས་ཆགས།

ཧྥེ་རོ་ཛ་ཨ་ཛི་ཛི་ཞེས་པའི་བུ་མོ་ཞིག་གིས་སྤྱི་ཚོགས་དྲ་ལམ་ནས་རྫི་མ་བཟོ་ཁུལ་གྱིས་རྒྱ་ནག་གཞུང་གིས་ཤིན་ཅང་ཡུ་གུར་མི་རིགས་ལ་དྲག་གནོན་དམ་དྲག་བྱེད་བཞིན་པར་སྐྱོན་བརྗོད་བྱས།

དེ་རིང་བྷི་བྷི་སི་གསར་ཁང་གིས་སྤེལ་བའི་གནས་ཚུལ་ལྟར་ན། ཉེ་ཆར་ཨ་རི་ནས་ཡིན་པའི་གཞོན་ནུ་མ་ཧྥེ་རོ་ཛ་ཨ་ཛི་ཛི་ (Feroza Aziz)ཞེས་པ་ཞིག་གིས། རྒྱ་ནག་གི་བརྙན་ཐུང་བརྒྱུད་སྤེལ་ས་ཊིག་ཊོག་ (TikTok) སྤྱི་ཚོགས་དྲ་ལམ་དུ། རྒྱ་ནག་གཞུང་གིས་ཤིན་ཅང་ཁུལ་དུ་ཉེས་མེད་ཁ་ཆེ་མི་རིགས་རྣམས་བཀག་སྐྱིལ་ཁང་དུ་བཅུག་སྟེ་ཁོ་ཚོའི་ཆོས་ལུགས་བརྗེ་བསྒྱུར་དང་། ཕ་མ་དང་ཁ་ཁ་ཕྱེས་བ། བཙན་གཡེམ་དང་དམར་གསོད་གཏོང་བ་སོགས་རྒྱ་གཞུང་གིས་ཁུལ་དེའི་ཁ་ཆེའི་མི་རིགས་ལ་དྲག་གནོན་བྱེད་ཀྱི་ཡོད་སྐོར་བརྗོད་པའི་བརྙན་ཐུང་ཞིག་སྤེལ་བ་དེར། ད་བར་མི་གྲངས་ས་ཡ་ ༡།༤ ལྷག་གིས་བལྟས་ཡོད་པ་མ་ཟད། མི་གྲངས་འབུམ་ ༥ ལྷག་གིས་དགའ་རྟགས་དང་། མི་གྲངས་ ༦༠༢༨ ལྷག་གིས་མཆན་བཀོད་དེ་གྲགས་འགུལ་ཆེན་པོར་གྱུར་འདུག

ཟླ་འདིའི་ཕྱི་ཚེས་ ༢༣ ཉིན་སྤེལ་བའི་བརྙན་ཐུང་དེའི་ནང་བུད་མེད་དེས། ཐོག་མར་བུད་མེད་རྣམས་ཀྱི་རྫི་མ་རིང་དུ་གཏོང་ཐབས་སྐོར་ནས་བཤད་ཁུལ་བྱས་རྗེས། བརྙན་ཐུང་ལྟ་མཁན་རྣམས་ཀྱིས་རང་གི་ཁ་པར་ནང་ཞུགས་ཏེ་ད་ལྟ་རྒྱ་ནག་ནང་ག་རེ་འབྱུང་བཞིན་པ་དེར་བལྟ་དགོས་པ་དང་། རྒྱ་ནག་གིས་བཀག་སྐྱིལ་ཁང་ཆེད་འཛུགས་ཀྱིས་ཉེས་མེད་ཁ་ཆེ་མི་རིགས་རྣམས་བཙོན་འཇུག་བྱེད་ཀྱི་ཡོད་པ་དང་། ཁོ་ཚོ་ནང་མི་ཕན་ཚུན་ཁ་བྲལ་ཏུ་འཇུག་གི་ཡོད་པ་མ་ཟད། བཙན་འཁྲིད་དང་དམར་གསོད། བཙན་གཡེམ། དེ་བཞིན་ཁོ་ཚོར་བཙན་གྱིས་ཕག་ཤ་བཟའ། ཆང་རག་འཐུང་དུ་འཇུག་གི་ཡོད་པ་མ་ཟད། རང་གི་ཆོས་ལུགས་བརྗེ་རུ་འཇུག་གི་ཡོད་པ་དང་། གལ་ཏེ་དེ་ལྟར་མ་བྱས་ཚེ་དམར་གསོད་གཏོང་ངེས་ཡིན་པའི་སྡིགས་ར་བསྐུལ་གྱི་ཡོད་པ་སོགས་ནི་ཇེའུ་མི་རིགས་ཀྱི་དམར་གསོད་ཆེན་མོ་ལྟ་བུ་ཞིག་ཡིན་ཡང་། སུས་ཀྱང་དེའི་སྐོར་གླེང་སློང་བྱེད་ཀྱི་མེད་སྐོར་བརྗོད་ཡོད་འདུག

ཁོང་མོས་བརྙན་ཐུང་དེ་བརྒྱུད་སྤེལ་ཟིན་རྗེས་རང་གི་ཊི་ཝི་ཊར་དྲ་ལམ་དུ། ཊིག་ཊོག་ནང་བརྙན་ཐུང་གསར་པ་སྤེལ་ཐུབ་ཀྱི་མེད་སྐོར་བརྗོད་འདུག ཡིན་ན་ཡང་། ཊིག་ཊོག་བཟོ་སྐྲུན་ཁང་གི་མགྲིན་ཚབ་པ་ཞིག་གིས་བྷི་བྷི་སི་གསར་ཁང་ལ། བཟོ་སྐྲུན་ཁང་གིས་ཆབ་སྲིད་ཀྱི་གནད་དོན་དང་འབྲེལ་ནས་ཊིག་ཊོག་ནང་སྤེལ་བའི་གནས་ཚུལ་ཁག་ལ་དོ་དམ་བྱེད་ཀྱི་མེད་སྐོར་དང་། ཁོང་མོའི་ཁ་བྱང་གསར་པ་དང་རྫི་མའི་སྐོར་གྱི་བརྙན་ཐུང་ཚུད་པའི་བརྙན་ཐུང་ཚང་མར་འགྱུར་བ་གང་ཡང་ཐེབས་མེད་པར་མུ་མཐུད་ལྟ་མཁན་འབྱོར་གྱི་ཡོད་སྐོར་བརྗོད་འདུག འོན་ཀྱང་ཟླ་འདིའི་ཕྱི་ཚེས་ ༡༥ ཉིན་བཟོ་སྐྲུན་ཁང་དེས་ཁོང་མོས་སྤེལ་བའི་འབྲེལ་མེད་ཀྱི་བརྙན་ཐུང་ཞིག་འཇིགས་སྐུལ་དྲག་སྤྱོད་དང་འབྲེལ་བའི་སྒྲིག་གཞི་དང་འགལ་ཡོད་སྐོར་བརྗོད་དེ། ཁོང་མོའི་ཊིག་ཊོག་གི་ཁ་བྱང་ཞིག་གཏན་ཏུ་བཀག་ཡོད་འདུག མགྲིན་ཚབ་པ་དེས། སྤྱིར་རྒྱ་ནག་ནང་བཀོལ་སྤྱོད་བྱེད་བཞིན་པའི་ཊིག་ཊོག་གི་གཉེན་ཆས་ཕྱི་མོ་ཏའོ་ཡིན་ (Douyin) ནང་རྒྱ་ནག་ལ་སྐྱོན་བརྗོད་རིགས་ཀྱི་བརྙན་ཐུང་གནས་ཚུལ་བཀག་སྡོམ་བྱེད་ཀྱི་ཡོད་ཀྱང་། རྒྱལ་ཕྱིར་སྤྱོད་བཞིན་པའི་ཊིག་ཊོག་ནང་དེ་ལྟར་བྱེད་ཀྱི་མེད་སྐོར་ཡང་བརྗོད་འདུག

བརྙན་ཐུང་དེའི་རྗེས་སུ་ཧྥེ་རོ་ཛ་ཨ་ཛི་ཛི་ཡིས་རང་གི་ཊིག་ཊོག་དྲ་ལམ་དུ་བསྟུད་མར་བརྙན་ཐུང་གཉིས་སྤེལ་ཏེ། བརྙན་ཐུང་ཐོག་མའི་ནང་རྫི་མའི་སྐོར་ནས་བཤད་དགོས་དོན་དེ་བརྙན་ཐུང་དེ་ཉིད་བཀག་སྡོམ་མི་བྱ་བའི་ཆེད་དུ་ཡིན་པ་དང་། མི་མང་གི་གོ་རྟོགས་སྤེལ་རྒྱུར་དེས་ཁྱད་པར་ཆེན་པོ་བཟོ་ཡི་ཡོད་པ་དང་། མི་རབས་སྔ་མ་རྣམས་ལ་ད་ལྟའི་མི་རབས་ཚོར་ཡོད་པའི་འཕྲུལ་རིག་གི་སྟོབས་ཤུགས་མེད་སྟབས། ང་ཚོས་འཛམ་གླིང་གི་མི་གྲངས་ས་ཡ་མང་པོར་སྙོབ་ཐུབ་པ་མ་ཟད། དབང་ཚད་ཡོད་པའི་མི་སྣ་དེ་དག་ལ་སྙོབ་ཐུབ་ཀྱི་ཡོད་པ། ལོ་ཆེ་ཆུང་གི་ཁྱད་པར་མེད་པར་ང་ཚོའི་འབོད་སྒྲས་འགྱུར་བ་ཆེན་པོ་གཏོང་ཐུབ། ཅེས་སོགས་བརྗོད་འདུག

བརྙན་ཐུང་མཐའ་མའི་ནང་། ཤིན་ཅང་ཡུ་གུར་མི་རིགས་ཀྱི་དཀའ་ངལ་ཙམ་དུ་མ་ཟད། ཁོ་ལིམ་བྷི་ཡའི་ནང་དུ་གཞུང་གིས་དམར་གསོད་གཏོང་བཞིན་པ་དང་། ཝེ་ནེ་ཛུ་ལའི་མི་མང་གི་དཀའ་རྙོག ཨབ་གྷན་ནང་དུ་འབར་རྫས་གཡུག་བཞིན་པ། ཨ་རིའི་ནང་རྒྱལ་ཞེན་རིང་ལུགས་ཀྱི་རྐྱེན་པས་ཕ་མ་དང་བུ་ཕྲུག་ཁ་ཁར་འབྱེད་བཞིན་པ། རྒྱ་ནག་གཞུང་གིས་ཡེ་ཤུ་བ་རྣམས་གསོད་བཞིན་པ་སོགས་ཀྱི་གནད་དོན་རིགས་ལ་ཡང་གོ་རྟོགས་སྤེལ་དགོས་སྐོར་བཤད་ཡོད་འདུག

འདས་པའི་བདུན་ཕྲག་གཅིག་ནང་ཤིན་ཅང་ཁུལ་གྱི་བཀག་སྐྱིལ་ཁང་སྐོར་གྱི་རྒྱ་ནག་གཞུང་གི་གསང་བའི་ཡིག་ཆ་ཕོན་ཆེན་ཕྱི་ལ་ཤོར་ཡོད། དེ་ཡང་ཟླ་འདིའི་ཕྱི་ཚེས་ ༡༦ ཉིན་ཨ་རིར་རྟེན་གཞི་བྱས་པའི་ནིའུ་ཡོག་དུས་བབ་གསར་ཁང་ལ་རྒྱ་ནག་གཞུང་གིས་ཤིན་ཅང་ཁུལ་དུ་ཆེད་འཛུགས་བྱས་པའི་བཀག་སྐྱིལ་ཁང་དང་། དེ་དང་འབྲེལ་བའི་ཆེས་མཐོའི་དཔོན་རིགས་ཁག་གི་གཏམ་བཤད་དང་བཀའ་ཁྱབ་སོགས་ཚུད་པའི་ཁྱོན་ཤོག་གྲངས་ ༤༠༣ ཅན་གྱི་གསང་བའི་ཡིག་ཆ་ ༢༤ ལག་སོན་བྱུང་ཡོད་པ་དང་། དེ་བཞིན་ཟླ་འདིའི་ཕྱི་ཚེས་ ༢༤ ཉིན་ཨ་རིའི་རྒྱལ་ས་ཝ་ཤིན་ཊོན་དུ་རྟེན་གཞི་བྱས་པའི་རྒྱལ་སྤྱིའི་རྟོག་ཞིབ་གསར་འགྱུར་མཐུན་ཚོགས་ལ་རྒྱ་ནག་གཞུང་གིས་བཀག་སྐྱིལ་ཁང་དེ་དག་ཇི་ལྟར་དོ་དམ་སྟངས་འཛིན་བྱེད་ཚུལ་སྐོར་གྱི་ཡིག་ཆ་ཞིག་ལག་སོན་བྱུང་བ་མ་ཟད། ཚོགས་པའི་ཁོངས་སུ་ཡོད་པའི་གསར་ཁང་དག་གི་གསར་འགོད་པ་ ༧༥ དང་། ཚོགས་སྡེ་གཞན་ ༡༧ བཅས་ཀྱིས་ཞིབ་འཇུག་བྱས་པ་བརྒྱུད། ལག་སོན་བྱུང་བའི་ཡིག་ཆ་དེ་དག་དངོས་བདེན་ཡིན་པ་ཁུངས་སྐྱེལ་བྱས་ཡོད་འདུག

ཟླ་འདིའི་ཕྱི་ཚེས་ ༢༥ ཉིན་བྷི་བྷི་སི་གསར་ཁང་གི་གསར་འགོད་པ་ཞིག་གིས་དབྱིན་ཡུལ་དུ་ཡོད་པའི་རྒྱ་ནག་གི་གཞུང་ཚབ་པ་ལིའུ་ཤིའོ་མིང་ (Liu Xiaoming) ལ་བཀག་སྐྱིལ་ཁང་དང་ཡིག་ཆ་དེ་དག་སྐོར་འདྲི་སྐབས། དེ་དག་ནི་སྦྱོང་བརྡར་ཁང་ཡིན་པ་ལས་བཀག་སྐྱིལ་ཁང་མིན་སྐོར་དང་། ཡིག་ཆ་དེ་དག་རྫུན་བཟོ་ཡིན་པ་དང་དངོས་བདེན་མ་ཡིན་པའི་གནས་ཚུལ་ལ་ཉན་རྒྱུ་མེད་སྐོར་བརྗོད་ཡོད་འདུག གང་ལྟར་ད་ཐེངས་ལག་སོན་བྱུང་བའི་ཡིག་ཆ་དེ་དག་གིས། རྒྱ་ནག་གཞུང་གིས་ཤིན་ཅང་ཁུལ་དུ་ཡུ་གུར་གཙོས་པའི་ཁ་ཆེ་མི་རིགས་ཀྱི་བསམ་བློར་བཅོས་བསྒྱུར་གཏོང་ཆེད། འཛམ་གླིང་དམག་ཆེན་གཉིས་པའི་རྗེས་ཀྱི་བཀག་སྐྱིལ་ཁང་ཆེ་ཤོས་དེ་བཙུགས་ཡོད་པ་ར་འཕྲོད་བྱུང་ཡོད་པར་བཤད།

གསར་འགོད་པ། པ་སངས་ཚེ་རིང་།

བསྐྱར་བཅོས།: ༢༠༡༩/༡༡/༢༧

Leave a Reply