རྒྱལ་སྤྱིའི་མུག་སྐྱོབ་ཀྱི་འབོད་པ།

བདུན་ཕྲག་རྗེས་མའི་ནང་རྒྱལ་ཁབ་བརྒྱད་ཀྱི་དཔལ་འབྱོར་ཚོགས་ཆེན་དེ་ཉི་ཧོང་འཚོགས་རྒྱུ་ཡིན་པ་དང་། འཛམ་གླིང་དངུལ་ཁང་གི་ཚོགས་གཙོ་རོ་བྷེར་ཊི་བྷི་ཛོལ་ལིག་གིས་སྲིད་འཛིན་བྷུ་ཤུ་དང་དབུ་ཁྲིད་གཞན་དག་གི་མཚན་ཐོག་ལ་ཡི་གེ་ཞིག་བཏང་སྟེ། ཟ་མ་དང་སྣུམ་གྱི་རིན་གོང་འཕར་གྱིན་པ་འདིས་འཛམ་གླིང་གི་རྒྱལ་ཁབ་ཉམ་ཐག་དག་ལ་དཀའ་རྙོག་སྤྲོད་ཀྱི་ཡོད་སྟབས། རྒྱལ་ཁབ་དེ་དག་མུག་སྐྱོབ་བྱེད་པ་དང་ལུང་པའི་བརྟན་ལྷིང་གི་ཆེད་དུ་རོགས་དངུལ་གསར་པ་ཞིག་སྤྲོད་རྒྱུའི་འབོད་སྐུལ་ཞུས་ཡོད་པ་རེད།
ཁོང་གིས་ཕྱི་ཚེས་ ༡ གི་དགོང་མོར་དབུ་ཁྲིད་དག་ལ་བཏང་བའི་ཡི་གེའི་ནང་དུ་བཀོད་དོན། ང་ཚོས་མཐོང་གིན་པ་ནི་ཁུ་སིམ་པའི་ཚོ་ཎ་མི་དང་དྲག་ཆར་ཆེན་པོ་སོགས་རང་བྱུང་གི་གནོད་འཚེ་མིན་པར། མིས་བཟོས་པའི་ཆག་འཇིག་ཅིག་རེད་ལ། འདི་ངེས་པར་དུ་མིས་སེལ་དགོས་པ་ཞིག་རེད་ཅེས་བྲིས་ཡོད་པ་རེད། ཁོང་གི་ཡི་གེ་དེའི་ནང་དུ་ཟ་མ་དང་སྣུམ། ཅ་དངོས་དག་གི་གོང་འཕར་གྱིན་པ་འདིའི་ཤུགས་རྐྱེན་སྐོར་ལ་ཉམས་ཞིབ་བྱས་པའི་སྙན་ཐོ་རིང་པོ་ཞིག་ཡོད་པ་ནིའུ་ཡོག་དུས་བབ་གསར་ཁང་ལ་སྤྲད་ཡོད་འདུག
ཉེ་བའི་བདུན་ཕྲག་འགའི་རིང་ཨ་རི་དང་རྒྱལ་ཁབ་གཞན་པ་ཁག་ཅིག་གིས་རྒྱལ་ཁབ་དབུལ་ཤོས་ ༥༠ ནང་དུ་ཟ་མ་སྤྲོད་རྒྱུའ་ཤུགས་སྣོན་བྱས་ཡོད་ལ། འཛམ་གླིང་དངུལ་ཁང་གི་ཚོགས་གཙོ་ལྟར་ན། འཛམ་གླིང་དངུལ་ཁང་དང་། རྒྱལ་སྤྱིའི་མ་དངུལ་ཐེབས་རྩ། འཛམ་གླིང་བཟའ་བཅའི་ལས་འཆར་བཅས་ལ་ཐུང་ཐུང་མྱུར་མྱུར་ལ་ཨ་སྒོར་ཐེར་འབུམ་ ༡༠ དགོས་ཀྱི་ཡོད་སྐོར་ཁོང་གི་ཡི་གེའི་ནང་བྲིས་ཡོད་པ་རེད།
རྒྱལ་སྤྱིའི་མ་དངུལ་ཐེབས་རྩ་ཁང་གིས་ཕྱི་ཚེས་ ༡ ཉིན་ཟུར་དུ་སྙན་ཐོ་གཞན་ཞིག་བཏོན་སྟེ། གལ་སྲིད་སྣུམ་དང་ཟ་མའི་རིན་གོང་འདི་མུར་མཐོན་པོར་བསྡད་ཚེ་ཡར་རྒྱས་འགྲོ་བཞིན་པའི་རྒྱལ་ཁབ་དག་གི་མི་དམངས་དང་དཔལ་འབྱོར་ལ་ཚབས་ཆེའི་ཤུགས་རྐྱེན་ཐེབས་རྒྱུ་ཡིན་ཚུལ་བཀོད་ཡོད་པ་རེད། ཐེབས་རྩ་ཁང་འདིའི་འཛིན་སྐྱོང་འགན་འཛིན་གྱིས་བརྗོད་དོན། ཉམས་ཞིབ་པ་ཚོ་ལྟར་ན། རྒྱལ་ཁབ་ཁག་ཅིག་ནི་དངོས་གནས་ཉེན་ཁའི་སྒོར་བསླེབས་འདུག གལ་སྲིད་ཟ་མའི་རིན་གོང་མུ་མཐུད་འཕར་བ་དང་། སྣུམ་གྱི་རིན་གོང་འདི་ལྟར་རང་འཇགས་བསྡད་ཚེ། སྲིད་གཞུང་འགའ་ཞིག་གིས་རང་གི་མི་དམངས་གསོ་མི་ཐུབ་ལ། འདི་དང་མཉམ་དུ་ཁོང་ཚོའི་དཔལ་འབྱོར་གྱི་འཕེལ་རྒྱས་བརྟན་པོར་འཛིན་ཐུབ་ཀྱི་མི་འདུག་ཅེས་བརྗོད་ཡོད་པ་རེད།
རྒྱལ་ཁབ་བདུན་གྱིས་མ་ལྕོགས་པར་རྒྱལ་སྤྱིའི་མ་དངུལ་ཐེབས་རྩའི་དམིགས་བསལ་ལས་འཆར་བརྒྱུད་དེ་སྐྱེལ་ཀ་ཆེས་དམའ་བའི་རོགས་དངུལ་གཡར་ཡོདའདུག
བྷུར་ཀི་ཎ་ཧྥ་སོ་ཡིས་ཕྱི་ཟླ་དང་པོའི་ནང་རོགས་དངུལ་གཡར་ཡོད་པ་དང་། ཨབ་རི་ཀའི་ཎེ་ཇར་དང་མ་ལེ་གཉིས་དང་། དབུས་ཨེ་ཤ་ཡའི་ཁར་རྫི་སི་ཐན་བཅས་ཀྱིས་ཕྱི་ཟླ་ ༥ པའི་ཟླ་མཇུག་ལ་རོགས་དངུལ་གཡར་ཡོད་ལ། དབུས་ཨབ་རི་ཀའི་སྤྱི་མཐུན་རྒྱལ་ཁབ་བྷེ་ནིན་དང་ཧེ་ཊི་གཉིས་ཀྱིས་ཟླ་སྔོན་མའི་ནང་རོགས་དཉུལ་གུར་ཡོད་པ་རེད།
འཛམ་གླིང་དངུལ་ཁང་གི་ཚོགས་གཙོས་ཡི་གེའི་ནང་བཀོད་དོན། འཛམ་གླིང་གི་རྒྱལ་ཁབ་སྐྱོ་ཤོས་ ༤༡ གི་ནང་ཟས་གོང་འཕར་བ་དང་སྣུམ་རིན་མཐོ་བ། ཅ་དངོས་རིགས་ཀྱི་གོང་ཚད་མཐོ་བ་འདིས་རྒྱལ་ཁབ་དེ་དག་གི་དཔལ་འབྱོར་སྟེང་ལ་བསམ་ཡུལ་ལས་འདས་པའི་ཤུགས་རྐྱེན་ངན་པ་འཇོག་གི་འདུག་ལ། མི་ས་ཡ་མང་པོར་ལྟོགས་སྐོམ་གྱི་མནར་སྡུག་ཕོག་མགོ་བཙུགས་ཡོད་ཟེར།
དེའི་ཁར་རྒྱལ་ཁབ་ཕྱུག་པོ་དག་གིས་བཞག་པའི་ཐེབས་རྩའི་རོགས་དངུལ་དག་ནི་བྱིས་པའི་སློབ་ཡོན་དང་མ་དང་བྱིས་པའི་སྐྱོབ་གསོ། ད་དུང་ལས་མིའི་གླ་ཆ་སོགས་ལ་སྤྲད་ནས་རྫོགས་གྲབས་འདུག་ཟེར་ལ། ཁོང་གིས་རྒྱལ་ཁབ་བརྒྱད་ཀྱི་དཔལ་འབྱོར་ཚོགས་ཆེན་སྟེང་ཁ་ཚ་དགོས་གཏུགས་ཀྱི་གོམ་པ་གསུམ་སྤོ་དགོས་པར་བཤད་ལ། དེ་དག་ནི་རོགས་དངུལ་དགོས་ངེས་ཅན་རིགས་ལ་འདང་ངེས་ཀྱི་རོགས་དངུལ་གཏོང་རྒྱུ་དང་། ས་བོན་རག་ཐབས་ཀྱི་ལས་འཆར་འཛུགས་རྒྱུ། ཨབ་རི་ཀའི་ཞིང་པ་ཆུང་ཆུང་ཚོར་རྫས་ལུད་མཁོ་སྤྲོད་བྱེད་རྒྱུ་བཅས་རེད།
ཕྱི་ཟླ་ ༥ པའི་ནང་དུ་སྲིད་འཛིན་བྷུ་ཤུ་ཡིས་གསལ་བསྒྲགས་བསྐྱངས་དོན། ཨ་རིས་ལོ་འདིར་ཨ་སྒོར་ཐེར་འབུམ་ ༥ བཏང་སྟེ་གོ་ལའི་ལྟོགས་སྐོམ་ལ་གདོང་ལེན་བྱེད་རྒྱུ་ཡིན་ཟེར་ལ། ཕོ་བྲང་དཀར་པོའི་ནང་གི་ལས་བྱེད་ཚོས་བཤད་ན། བདུན་ཕྲག་རྗེས་མའི་ཚོགས་ཆེན་སྟེང་སྲིད་འཛིན་བྷུ་ཤུས་རྒྱལ་ཁབ་གཞན་པ་དག་གིས་རང་རང་གི་སྔོན་མའི་ཁས་ལེན་དང་ལེགས་འགྲུབ་དང་ཁས་ལེན་གསར་པ་ལ་དམ་བཅའ་དགོས་པའི་འབོད་སྐུལ་གནང་རྒྱུ་རེད་ཟེར།