ར་ཤི་ཡ་དང་ཨ་རིའི་འགལ་ཟླ།

ར་ཤི་ཡའི་སྲིད་འཛིན་གསར་པ་ཌ་མི་ཊི་རི་ ཨེ་ མེད་ཝེ་ཌེ་ཧྥུ་ཡིས་གསར་འགོད་པར་བརྗོད་དོན། དོན་དངོས་ཐོག་འ་ཆད་འུ་ཐུག་གི་ཨ་རི་ལྟ་བུས་རྒྱལ་ཁབ་གཞན་རྣམས་ལ་ལས་དོན་སྒྲུབ་ཕྱོགས་ཀྱི་བཀའ་སློབ་གནང་རྒྱུའི་འོས་ཡོད་པ་མ་རེད་ཟེར།
ཨ་རིའི་གཞུང་གིས་ར་ཤི་ཡའི་དམངས་གཙོ་དང་འགྲོ་བ་མིའི་ཐོབ་ཐང་གི་གནས་སྟངས་སྐྱོ་བོ་ཡིན་པའི་སྐྱོན་བརྗོད་བྱས་ཡོད་པ་དང་། ཨ་རིའི་སྲིད་འཛིན་གྱི་འོས་གཞི་རྗོན་མ་ཁིན་གྱིས་ཐ་ན་ར་ཤི་ཡའི་འགྲོ་བ་མིའི་ཐོབ་ཐང་གི་གནས་བབ་ཐབས་རྡུགས་ཀྱི་ངོ་བོར་ལྷག་ཡོད་སྟབས། ཉིན་ཤས་རྗེས་ཉི་ཧོང་དུ་འཚོགས་འཆར་གྱི་རྒྱལ་ཁབ་ ༨ ཀྱི་ཚོགས་ཆེན་སྟེང་འགོག་དགོས་པའི་འབོད་སྐུལ་ཡང་ཞུས་ཡོད་པ་རེད། ར་ཤི་ཡའི་སྲིད་འཛིན་གྱིས་བརྗོད་དོན། བསྐྱར་དུ་གསོན་པའི་ར་ཤི་ཡར་མཚོན་ན་འཛམ་གླིང་གི་དཔལ་འབྱོར་གྱི་མ་ལག་ཁྲོད་འགན་ཆེན་པོ་ཞིག་ལེན་རྒྱུའི་ཐོབ་ཐང་ཡོད་པ་རེད། འདི་ཨ་རི་གཅིག་པུས་ཁ་ལོ་བསྒྱུར་བསྡད་ན་འགྲིག་གི་མ་རེད་ཅེས་དང་། དམངས་གཙོའི་གནད་དོན་ནི་རྒྱལ་ཁབ་ ༨ ཀྱི་ཚོགས་ཆེན་དེར་འབྲེལ་བ་མི་འདུག ཕྱོགས་གཞན་ནས་བཤད་ན། ཚོགས་ཐོག་དེར་ཞུགས་ཆོག་དང་མི་ཆོག་གི་ཐད་ནས་ཨ་རི་ལ་གནད་དོན་མང་བ་ཡོད་པ་རེད་ཅེས་ལན་འདེབས་བྱས་ཡོད་པ་རེད། ཁོང་གིས་མུ་མཐུད་ནས་བརྗོད་དོན། རྒྱལ་ཁབ་བརྒྱད་གནས་པ་དེ་ནི་གཞན་ཞིག་དེ་ལ་དགའ་དང་མི་དགའ་ལ་བརྟེན་ཡོད་པ་མ་རེད། ཁོའི་དམིགས་ཡུལ་གཞིགས་བཟུང་། ཁོང་ཚོ་ནི་འཛམ་གླིང་གི་དཔལ་འབྱོར་ཆེ་ཤོས་དག་རེད་ལ། རྒྱལ་ཁབ་ཀྱི་ཕྱི་འབྲེལ་སྲིད་བྱུས་ཀྱི་ཐོག་ནས་བཤད་ནའང་། གནད་འགག་གི་རྩེད་མོ་རྩེས་མཁན་དག་རེད། སུ་ཞིག་གིས་འདི་དག་གི་གང་རུང་ལ་འགོག་སྡོམ་བྱེད་རྩིས་བྱས་ཚེ་འཛམ་གླིང་གི་གོ་རིམ་ཡོངས་རྫོགས་འཐོར་འགྲོ་གི་རེད་ཅེས་བརྗོད་ཡོད་པ་རེད།
ར་ཤི་ཡའི་སྲིད་འཛིན་གྱིས་ཕྱི་ཚེས་ ༡ ཉིན་སྟེ། ཨ་རིའི་ནོར་སྲིད་དྲུང་ཆེ་ར་ཤི་ཡར་ཕེབས་ཏེ། ར་ཤི་ཡས་ཨ་རིའི་ནང་མ་འཛུགས་བྱེད་དགོས་སྐོར་འབོད་སྐུལ་ཞུས་པའི་ཕྱི་ཉིན་དེར་གསར་འགོད་པ་སྐོར་ཞིག་ལ་བརྗོད་ཡོད་པ་རེད། ཨ་རིའི་ནོར་སྲིད་དྲུང་ཆེ་ར་ཤི་ཡར་ཡོང་བ་དེ་ནི་སྔོན་མ་ར་ཤི་ཡའི་དཔལ་འབྱོར་ཉམས་ཤིང་རྒྱལ་ཁབ་དེས་ནུབ་ཕྱོགས་ཀྱི་རོགས་དངུལ་མི་སློང་ཐབས་མེད་དུ་གྱུར་རྗེས་ནས་ལོ་བཅུ་ཕྲག་གཅིག་ཏག་ཏག་འགོར་ཡོད་པ་རེད།
ར་ཤི་ཡའི་སྲིད་འཛིན་གྱིས་མུ་མཐུད་ནས་བརྗོད་དོན། གལ་སྲིད་ཨ་རི་དོན་དག་མང་པོ་ཞིག་གི་ཐོག་ནས་རྒྱལ་འདོད་ན། ཨ་རི་སྲིག་གཞུང་གང་ཡིན་ནའང་ཁོང་ཚོའི་དཔལ་འབྱོར་གྱི་ཉམས་ཉེས་ཆེན་པོ་དེ་ལས་ཐར་དགོས་པ་མ་ཟད། རྒྱལ་ཁབ་ཕྱི་ནང་གང་དུའང་དངོས་ཡོད་ལ་འཚམ་པའི་སྲིད་བྱུས་ཤིག་འདིང་དགོས་པ་རེད། ཅེས་དང་། འཛམ་གླིང་གི་དཔལ་འབྱོར་དང་མ་དངུལ་གྱི་ཉས་ཉེས་ལ་བལྟས་ན། རྒྱལ་སྤྱིའི་དབུ་ཁྲིད་དག་གིས་འཛམ་གླིང་ཁྱོན་ཡོངས་ཀྱི་དཔལ་འབྱོར་འཛུགས་སྐྲུན་གྱི་གནས་སྟངས་འདིར་བསྐྱར་ཞིབ་ཅིག་བྱེད་རན་འདུག་ཅེས་བརྗོད་ཡོད་ལ། ཁོང་གིས་དམིགས་བཀར་གྱིས་བཤད་མེད་ནའང་། གོ་བརྡ་སྤྲོད་ས་ནི། ཨ་རིའི་ཤུགས་རྐྱེན་འདི་རྒྱ་ཆུང་དུ་གཏོང་རྒྱུ་ཡིན་ཚུལ་འདུག་ལ། ཁོང་གིས་བརྗོད་དོན། དཔལ་འབྱོར་ངེས་པར་དུ་ཡར་རྒྱས་ལ་གཏོང་དགོས་པར་འདུག དུས་ཐོག་དང་བསྟུན་དགོས་པར་འདུག ཉེན་ཁ་ལས་སྲུང་སྐྱོབ་ནན་མོ་བྱེད་དགོས་ཀྱི་འདུག འདི་རྒྱལ་ཁབ་ཀྱི་ཞེན་ཁོག་དང་དངུལ་ལོ་དང་དཔལ་འབྱོར་གྱི་ཞེན་ཁོག་གི་དབང་དུ་མ་གྱུར་བ་ཞིག་དགོས་ཀྱི་འདུག རྒྱལ་ཁབ་གཞན་པ་དག་ལ་ལུགས་མཐུན་གྱིས་བསྟུན་དགོས་ཀྱི་འདུག འདི་ནི་ར་འཕྲོད་གསལ་བོ་རེད། འདི་རྒྱལ་ཁབ་གཅིག་དང་དངུལ་ལོ་གཅིག་ལ་ཁ་སྐོར་ནས་ལས་ན་འགྲིག་གི་མི་འདུག་ཅེས་སོགས་བརྗོད་ཡོད་པ་རེད།