སྟོང་ལ་ཉེ་བའི་རི་སྐྱེས་སྲོག་ཆགས་གླང་ཆེན།

གངས་དཀར་ཏི་སི་ཁོར་ཡུག་གོ་རྟོགས་ལས་འགུལ་ཁང་གིས་འདི་ག་གསར་ཁང་ལ་གནས་ཚུལ་མཁོ་སྤྲོད་གནང་བ་ལྟར་ན། ཨེ་ཤ་ཡའི་གླང་ཆེན་ནི་སྟོང་ལ་ཉེ་བའི་རི་སྐྱེས་སྲོག་ཆགས་ཤིག་ཡིན་པ་དང་། ཁོ་ནི་རྒྱ་མཚོའི་ངོས་ནས་མཐོ་ཚད་ལ་མི་ཊར་ ༣༦༠༠ ཙམ་གྱི་རི་འདབས་སོགས་སུ་གནས་སྡོད་བྱེད་ཅིང་། ཟས་སུ་རྩྭ་དང་ཤིང་ལོ་ཟ་བཞིན་ཡོད། གླང་ཆེན་ཞིག་གིས་ཆ་སྙོམ་ཉིན་གཅིག་ལ་རྩྭ་སྤྱི་རྒྱ་ ༡༥༠ ཙམ་ཟ་ཐུབ་ཀྱི་ཡོད་པས་གཟུགས་པོའི་ལྗི་ཚད་ལ་སྤྱི་རྒྱ་ ༥༤༠ ཙམ་ཡོད། བདག་ཏུ་མ་བཟུང་བའི་གླང་ཆེན་གྱི་ཚེ་ཚད་ལོ་ ༦༠ ཡིན་ཡང་མིས་གསོ་སྐྱོང་བྱས་པའི་གླང་ཆེན་གྱི་ཚེ་ཚད་དེ་ལས་རིང་བ་དང་། ཁོ་ལ་མིང་གཞན་ཞིག་ཡོད་པ་ནི་ནགས་ཚུལ་གསོ་སྐྱོང་བ་ཞེས་འབོད་སྲོལ་ཡོད་ཅིང་། དེི་ནི་གླང་ཆེན་གྱི་ལྕི་བས་ས་བཅུད་བཟང་དུ་བཏང་ནས་རྩྭ་དང་རྩི་ཤིང་རིགས་མང་པོ་གསར་སྐྱེ་ཐུབ་ཀྱིན་ཡོད་པས་ཡིན་འདུག
རྒྱ་གར་ནང་ཕྱི་ལོ་ ༡༨༧༩ ལོ་ནས་བཟུང་གླང་ཆེན་སྲུང་སྐྱོབ་ཀྱི་ཁྲིམས་གཞི་གཏན་འབེབས་བྱས་ཡོད་ཅིང་། ཁྲིམས་ཡིག་དེའི་ནང་དུ་གླང་ཆེན་གྱིས་མི་ཡི་ཚེ་སྲོག་ལ་གནོད་འཚེ་བྱུང་བའི་སྐབས་སུ་མ་གཏོགས་གླང་ཆེན་གསོད་འཛིན་མི་ཆོག་པ་ཁྲིམས་ཐོག་ནས་གཏན་འབེབས་བྱས་ཡོད།
བོད་དུ་གླང་ཆེན་མཐོང་རྒྱུ་མེད་རུང་བོད་མིའི་འདུ་ཤེས་འཛིན་སྟངས་ཀྱི་ཐོག་ནས་རྒྱལ་སྲིད་སྣ་བདུན་གྱི་ནང་དུ་གླང་པོ་རིན་པོ་ཆེ་དང་། མཐུན་པ་སྤུན་བཞིའི་ནང་གླང་པོ་ཆེ། དེ་བཞིན་སངས་རྒྱས་སྐུ་འཁྲུངས་པའི་མཛད་སྒོའི་སྐབས་སུ་གླང་ཆེན་མཆེ་བ་དྲུག་ལྡན་དུ་བརྫུས་ནས་ཡུམ་གྱི་ལྷུམས་སུ་ཞུགས་པ་སོགས་མདོར་ན་གླང་ཆེན་ནི་བཀྲ་ཤེས་པའི་མཚོན་རྟགས་དང་རིན་པོ་ཆེའི་གྲས་སུ་བརྩི་སྲོལ་ཡོད།
སྔོན་དུས་སུ་རྒྱ་གར་དང་བལ་ཡུལ། འབྲུག ཝེ་ཏེ་ནམ། སི་རི་ལངྐ་། རྒྱ་ནག ཨ་ཧྥེ་རི་ཀ་སོགས་ཀྱི་ནང་དུ་གླང་ཆེན་གྱི་གྲངས་འབོར་ཧ་ཅང་མང་ནའང་། དེང་སྐབས་འཛམ་གླིང་གི་མི་འབོར་ཇེ་མང་ནས་ཇེ་མང་དུ་ཕྱིན་པར་བརྟེན་ནགས་ཚལ་གཅོད་འབྲེག་དང་ས་ཞིང་གསར་སྤོ། འཛུགས་སྐྲུན་ལས་རིགས་སོགས་ཀྱིས་རྐྱེན་པས་གླང་ཆེན་གྱི་རང་བྱང་འཚོ་སྡོད་གནས་ཡུལ་ལ་གཏོར་སྐྱོན་ཤུགས་ཆེན་ཕོག་ཡོད་པ་མ་ཟད། རྒྱ་གར་གྱིས་གཙོས་ཡུལ་གྲུ་མང་བོར་རྒྱུ་དངོས་མ་གཏོགས་བསམ་རྒྱུ་མེད་མཁན་ཚོས་གླང་ཆེན་ལྐོག་རྔོན་གྱིས་མཆེ་བ་དང་རུས་པ་སོགས་ནག་ཚོང་རྒྱག་བཞིན་པར་བརྟེན་གླང་ཆེན་གྱི་གྲངས་འབོར་ཇེ་ཉུང་དུ་སོང་སྟེ། ད་ལྟ་སྟོང་ལ་ཉེ་བའི་རི་སྐྱེས་སྲོག་ཆགས་ཀྱི་གྲས་སུ་གྱུར་ཡོད་ཅིང་། བོད་མི་ཚོས་དངོས་སུ་གླང་ཆེན་ལྐོག་རྔོན་བྱེད་ཀྱིན་མེད་རུང་བ་སོའི་ཕྲེང་བ་དང་། ལག་གདུབ། ཊ་མ་རི་སོགས་ལ་དགའ་ཞེན་ཆེན་པོ་བྱེད་པ་དེས་གླང་ཆེན་ལྐོག་རྔོན་གྱི་གྲངས་ཇེ་མང་དུ་འགྲོ་བར་ཤུགས་རྐྱེན་ཐེབས་བཞིན་ཡོད་པས། བོད་མི་ཚོས་བ་སོའི་དངོས་རྫས་རྣམས་བེད་སྤྱོད་མཚམས་འཇོག་གནང་དགོས་པའི་འབོད་སྐུལ་གནང་གིན་ཡོད་འདུག
དེ་བཞིན་ངག་དབང་རབ་རྒྱལ་ལགས་ཀྱིས་བརྩམས་པའི་དེབ་སྐྱེ་ཁམས་ཁོར་ཡུག་ལ་སྲུང་སྐྱོབ་སྐོར་གྱི་གནའ་དེང་གི་ཤེས་བྱ་དང་། རྒྱལ་སྤྱིའི་སྟོངས་ལ་ཉེ་བའི་རི་སྐྱེས་སྲོག་ཆགས་ངོ་སྤྲོད་ཅེས་པའི་ནང་། ཨེ་ཤ་ཡའི་ནང་གླེང་ཆེན་བཞི་ཁྲི་ཙམ་ཡོད་པ་དང་། དེའི་ནང་ནས་གྲངས་འབོར་ཕྱེད་ཙམ་རྒྱ་གར་ནང་ཡོད། ལྷོ་ཨ་ཧྥི་རི་ཁའི་ནང་གྲངས་འབོར་ཉིས་འབུམ་ལྔ་ཁྲི་ཙམ་ཡོད་པར་བཤད། གླང་ཆེན་མང་ཆེ་བ་མཆེ་བའི་ཆེད་དུ་རྔོན་རྒྱག་པ་དང་ལྐོག་གསོད་བྱེད་ཀྱི་ཡོད། ལྷག་པར་དུ་བོད་པས་གླང་ཆེན་གྱི་མཆེ་བས་བཟོས་པའི་ཕྲེང་བ་དང་། ཐེབ་སྐོར། ལག་གདུབ་སོགས་རྒྱན་ཆས་རིགས་དང་། མཆོད་ཆས་ཊ་མ་རུ་སོགས་ཉོ་སྲོལ་ཡོད་པ་དང་། དེའི་རིགས་ནི་རིན་ཐང་ཡང་ཆེ། འདས་པའི་ལོ་ ༢༠ ལྷག་ནང་རྒྱ་གར་ནང་གླང་ཆེན་མཆེ་བ་ནག་ཚོང་བྱེད་མཁན་ལག་ནས་མཆེ་བ་ ༡༠༠ ལྷག་བླངས་པ་དང་། བོད་པ་འགའ་ཤས་རྡོར་གདན་དང་ཝ་ར་ཎ་སི་སོགས་ནས་བ་སོའི་ཕྲེང་བ་སོགས་གླང་ཆེན་མཆེ་བའི་རྒྱན་ཆའི་རིགས་ཉོས་ཏེ་ཕྱིར་བོད་དུ་ལོག་སྐབས་བལ་ཡུལ་དང་རྒྱ་གར་ཉེན་རྟོག་པས་འཛིན་བཟུང་བཀག་ཉར་བྱས་པ་སོགས་བྱུང་ཡོད། ཨེ་ཤ་ཡའི་གླང་ཆེན་ནི་རྒྱལ་སྤྱའི་སྟོང་ལ་ཉེ་བའི་རི་སྐྱེས་སྲོག་ཆགས་དང་སྐྱེ་དངོས་ཉོ་ཚོང་གི་ཁྲིམས་ཡིག་ནང་ཚུད་ཡོད་སྐོར་འཁོད་ཡོད།