ཡར་རྒྱས་ཀྱི་རྩེ་མོར་སོན་པའི་རེ་བ་དང་ཡིད་ཆེས་ཞུ་གི་ཡོད།

བོད་ཀྱི་དུས་བབ་རྩོམ་སྒྲིག་པ་ལྷན་རྒྱས་ལ། 
དུས་བབ་གསར་ཤོག་འགྲེམས་སྤེལ་གྱིས་བགྲང་བྱ་བཅུ་་འཁོར་བའི་དུས་དྲན་སྲུང་བརྩི་གནང་བཞིན་པར་རྩོམ་སྒྲིག་པ་ལས་ཟུར་ལས་བྱེད་བཅས་ཡོངས་ལ་འཚམས་འདྲི་ཞུརྒྱུ་ཡིན།  ཕྲན་འདས་པའི་ལོ་བཅུའི་རིང་གསར་ཤོག་ལྟ་ཀློག་བྱེད་ཁོངས་སུ་ཡོད་ཉིང་དེ་དོན་ངོས་འཛིན་གནང་རྒྱུ་ཡིན་ལུགས་དང༌།  དེའི་རིང་གི་ཉམས་མྱོང་དང་མ་འོངས་པར་ཡར་རྒྱས་གཏོང་ཕྱོགས་རྩོམ་འཕྲིན་ཐུང་ངུ་ཞིག་དགོས་པ་ཡིག་ངག་གཉིས་ནས་ཕེབས་པས།  རྩ་བའི་གསར་ཤོག་ཏུ་བཤམས་པའི་བརྗོད་བྱ་བརྗོད་བྱེད་གང་ཞིག་ལའང་གཞུང་མང་དང་སྤྱི་ཚོགས།   རྒྱལ་སྤྱི་བཅསཔའི་གནས་ཚུལ་རེག་ཐབས་བྱེད་པ་མ་གཏོགས། རན་དང་མ་རན།  མཐོ་དང་དམའ་སོགས་གང་ཡང་བརྗོད་པར་སྤྲོ་བའི་བསམ་པ་མེད་ཁར།
གསར་འགོད་རང་དབང་ལ་དོ་ཕོག་འགྲོ་ཉེན་དང་ཐེ་བྱུས་ལ་སེམས་ཏེ་ད་བར་ངལ་བའང་མ་བླངས།  ད་རེས་འདིར་སྐུལ་ངོར་མ་བཅོས་སྨྱུག་རྩེར་བཙན་པོས་ལེན་པ་ཡིན། ༡༽  གནས་ཚུལ་མཁོ་སྤྲོད་ལ་ཡི་རངས་བསྔགས་བརྗོད་ཞུ་འོས་ཀྱི་རང་བཞིན་འདུག་ལ།  མཇུག་སྐྱོང་དང་ཡར་རྒྱས་ཀྱི་རྩེ་མོར་སོན་པའི་རེ་བ་དང་ཡིད་ཆེས་ཞུ་གི་ཡོད།  ༢༽ གསར་འགོད་ལ་ཉེ་འགྱངས།  གྲོགས་དང་གྲོགས་མིན།  ཕྱོགས་དང་ཕྱོགས་མིན།  གཞན་བསྟུན་སོགས་རང་ཚུགས་སུ་མི་གནས་པའི་རྐྱེན་ཅི་ཡང་མེད་པར་དངོས་བྱུང་དངོས་བདེན་གྱི་གནས་ཚུལ་བདེན་པ་བདེན་སར་འཁྱོལ་བ་ལ་བག་ཚ་མེད་པར་མཁོ་གཏོར་བྱེད་པ་དེ་གསར་འགོད་ཀྱི་རང་དབང་ངོ་མ་ཡིན་པ་མ་གཏོགས་འཚང་དང་འཛུལ་ཞུགས་ལྟ་བུའི་གནས་སྐབས་ཙམ་དང༌།  གསར་ཤོག་བྲིན་པ་གཙོར་དམིགས་ཀྱིས་ཀློག་པ་པོ་ཁམས་ལ་ལྟོས་པའི་གནས་ཚུལ་འཚོལ་གཏོང་བྱེད་རྐྱང་བྱེད་པ་ནི་གསར་འགོད་ཀྱི་འགན་དང་རང་དབང་ཡང་དག་ཨེ་ཡིན་སྙམ་དུ་སེམས་ཏེ།  དེ་འདྲའི་མྱོང་ཚོར་སྟེར་བའི་སྐབས་ཀྱང་བྱུང་བས་ན་མ་འོངས་པར་ཡར་སྐྱེད་ཡོང་བའི་རེ་བ་ཡོད།  ༣༽ དོན་གཞན་ཞིག་ཞུ་རྒྱུར་བོད་ཀྱི་གསར་འགོད་པ་ཡིན་པས་ཤོར་མའི་གསར་འགོད་པ་ཡིན་པ་ནས་གཡོལ་ཐབས་མེད།  དེས་ན་གསར་འགོད་སྤྱིའི་རང་དབང་དང་ལས་འགན་ལས་གཞན་དབང་ལུང་པའི་གསར་འགོད་པ་ལ་མེད་པའི་གཞུང་དང་མང་ཚོགས།  མང་ཚོགས་དང་མང་ཚོགས་བཅས་པར་འཁུར་ཞིང་སྒྲུབ་དགོས་པ་ལྕི་མོ་ཞིག་ཀྱང་ཡོད་པ་དུས་ནམ་ཡང་བརྗེད་མི་ཉན་པའི་གསལ་འདེབས་ཤིག་མངགས་ཉོ་བ་ཐུབ་བསྟན་ལུང་རིགས་ཀྱིས་ ༢༡༣༤མགོ་ཟླའི་དམར་ཕྱོགས་རྒྱལ་བ་གཉིས་པ། ཕྱི་ལོ་གསར་པའི་ཟླ ༡ཚེས ༡༡ལ།