མི་རིགས་ཀྱི་དཔལ་འབྱོར་གོང་སྤེལ་ཐད་ཆ་ཤས་མང་ཙམ་ལེན་རྒྱུའི་རེ་བ་ཡོད།

རྟེན་འབྲེལ་དང་རེ་སྐུལ།
    འདས་པའི་ལོ་བཅུའི་རིང༌།   བོད་ཀྱི་དུས་བབ་ཀྱི་འབྲེལ་ཡོད་དབུ་ལས་ལྷན་རྒྱས་ནས་ལྷག་བསམ་དང་མཁྱེན་རྩལ་ཆེན་པོས་ཚགས་པར་འདི་རྒྱུན་མུར་འདོན་སྤེལ་གནང་སྟེ། རང་རིགས་རྒྱ་ཆེའི་མི་མང་ལ་གནས་ཚུལ་ཁྱབ་བསྒྲགས་དང༌།  བསམ་བློའི་གོ་རྟོགས་གོང་སྤེལ།  དེ་བཞིན་ཆབ་སྲིད་དང་སྤྱི་ཚོགས་ཀྱི་ཁྱབ་ཁོངས་སུ་ལེགས་སྤེལ་ཉེས་འགོག་གང་ལེགས་གནང་བར་བརྟེན།  དེ་རིང་བོད་ཀྱི་དུས་བབ་དབུ་བརྙེས་ནས་ལོ་བཅུ་འཁོར་བའི་དུས་དྲན་ཐོག་ངས་བོད་ཀྱི་ཚོང་བའི་ལྷན་ཚོགས་ཀྱི་རྒྱུན་ལས་དང་གངས་ལྗོངས་འགྲིམ་འགྲུལ་ལས་ཁང་གི་ཚབ་བྱས་ནས་ལྷག་བསམ་ཟོལ་མེད་ཀྱིས་རྟེན་འབྲེལ་ཞུ་རྒྱུ་ཡིན།
    དེ་དང་ཆབས་ཅིག་མ་འོངས་པར་བོད་ཀྱི་དུས་བབ་ཀྱི་སྔར་ལས་ལྷག་པའི་སྒོ་ནས་རང་དབང་གི་བརྒྱུད་ལམ་ནུས་ལྡན་ཞིག་བྱས་ཏེ་རང་རིགས་མང་ཚོགས་ལ་ཞབས་འདེགས་བསྒྲུབ་རྒྱུ་སྤྱི་དང༌།  ལྷག་པར་དུ་ང་རང་ཚོང་ལས་གཉེར་མཁན་ཞིག་གི་ངོས་ནས་ཚགས་པར་འདིས་རང་མི་རིགས་ཀྱི་དཔལ་འབྱོར་གོང་སྤེལ་གཏོང་རྒྱུའི་ཐད་ཆ་ཤས་མང་ཙམ་ལེན་རྒྱུའི་རེ་འདུན་འདོན་གི་ཡོད།  གང་ཡིན་ཞེ་ན། དེང་གི་འཁྲུག་ཆ་དོད་པའི་འཛམ་གླིང་འདིའི་ནང་དཔལ་འབྱོར་གྱི་སྟོབས་ཤུགས་ཀྱིས་ཆབ་སྲིད་སོགས་ཐམས་ཅད་ཁ་ལོ་བསྒྱུར་གྱིན་ཡོད་པར་སོང༌།  རང་མི་རིགས་ཀྱིས་ཀྱང་དཔལ་འབྱོར་ཐད་རང་རྐང་པའི་ཐོག་ལངས་ཐུབ་པ་ཞིག་བྱེད་རྒྱུ་ནི་ཆེས་འགག་རྩའི་དོན་ཆེན་ཞིག་ཡིན་ནའང༌།  གནས་སྟངས་དང་གོམས་གཤིས་ཀྱི་དབང་གིས་མིག་སྔའི་བོད་ཕྱི་ནང་གི་དཔལ་འབྱོར་གནས་བབ་ནི་ཧ་ཅང་རྗེས་ལུས་སུ་ཐེབས་ཡོད་པ་མཐོང་ཐོས་མངོན་གསལ་རེད། དེ་བས་རང་རིགས་མང་ཚོགས་ལ་མ་མཐར་ཡང་རང་ཁ་རང་གསོའི་ཆེད་ཚོང་ལས་སོགས་འུག་པ་ལུང་པ་འབྱོར་འདུ་འགོད་ཀྱི་སྐུལ་སློང་དང་གོ་རྟོགས་བསྐྲུན་རྒྱུའི་ཆེད་དུ་ཚགས་པར་འདིས་དཔལ་འབྱོར་སྐོར་གྱི་གནས་ཚུལ་དང་བསམ་ཚུལ་སོགས་མང་ཙམ་འགོད་གནང་ཡོང་བ་མཁྱེན། མཇུག་ཏུ་ལྷན་རྒྱས་ལ་བཀྲ་ཤིས་བདེ་ལེགས་ཀྱི་སྨོན་འདུན་དང་བཅས།  བོད་ཀྱི་ཚོང་པའི་ལྷན་ཚོགས་ཀྱི་རྒྱུན་ལས་དང༌། གངས་ལྗོངས་འགྲིམ་འགྲུལ་ལས་ཁང་གི་འགན་འཛིན་ཕྲན་ཟླ་བ་རིན་ཆེན་ནས་ཕྱི་ལོ་༢༠༠༧ཟླ༡ཚེས་༡༥ཉིན་ཕུལ