འཁྲུངས་སྐར་ཉིན་བོད་ནང་དམ་དྲག

འདི་ལོའི་༧གོང་ས་མཆོག་གི་འཁྲུངས་སྐར་ཉིན་རྒྱ་གཞུང་གིས་བོད་མི་ཚོར་རྒྱུན་སྲོལ་ལྟར་བསང་གཏོང་བ་དང་སྤྲོ་སྐྱིད་གཏོང་བ་སོགས་བྱེད་བཅུག་མེད་པ་མ་ཟད། བོད་མི་འདུས་སྡོད་ཀྱི་ས་ཆ་ཚང་མར་སྔར་ལས་དམ་དྲག་ཆེན་པོ་བྱས་ཡོད་འདུག
༧གོང་ས་མཆོག་གི་འཁྲུངས་སྐར་ཉིན་རྒྱ་ནག་གིས་བོད་མི་འདུས་སྡོད་ཀྱི་གྲོང་ཁྲེར་དང་གྲོང་བརྡལ་ཡོངས་སུ་སྔར་ལས་དམ་དྲག་བྱེད་ཤུགས་ཆེ་རུ་བཏང་བ་དང་། དྲག་ཆས་དམག་མི་དང་ཉེན་རྟོག་པ་འབོར་ཆེན་བཀྲམས་ཏེ་འགོག་སྡོམ་ནན་མོ་བྱས་པ་མ་ཟད། དཀར་མཛེས་བྲག་འགོ་རྫོང་སོགས་ས་གནས་ཁ་ཤས་སུ་ཟ་ཁང་དང་། ཚོང་ཁང་། མགྲོན་ཁང་སོགས་སྒོ་ཕྱེ་མི་ཆོག་པ་དང་། མི་མང་འདུ་འཛོམས་མི་ཆོག་པ། རྒྱུན་སྲོལ་ལྟར་བསང་གསོལ་བྱེད་མི་ཆོག་པའི་བཀའ་རྒྱ་བཏང་ཡོད་འདུག ཉིན་དེར་བྲག་འགོ་རྫོང་དུ་ཕྱི་རྒྱལ་ཡུལ་སྐོར་བ་གཉིས་ལྟ་སྐོར་དུ་ཡོང་བར་ཉེན་རྟོག་པས་རྒྱལ་སྒོ་ནས་བཀག་འགོག་གིས་ཕྱིར་འབུད་བྱས་ཡོད་འདུག་ལ། གནས་ཚུལ་དེར་ཞིབ་འཇུག་བྱེད་མཁན་གྱི་ཉེན་རྟོག་པ་དང་དམག་མིས་གྲྭ་པ་ཞིག་ལ་དགོན་པའི་ནང་ཆང་རག་བཏུང་སྟེ་ར་བཟི་ཡོད་སྐོར་ཉེས་འཛུགས་ཀྱིས་རྡུང་རྡེག་བཏང་ཡོད་འདུག