ཨོ་བྷ་མ། མ་ཁིན། ཁོང་གཉིས་ཀྱི་བོད།

༧གོང་ས་མཆོག་གིས་ཉིན་འདི་དག་རིང་ཝིན་སི་ཁོན་དུ་མཛད་འཕྲིན་སྐྱོང་བཞིན་པའི་སྐབས་འདིར་ཝིན་སི་ཁོན་ནང་གི་ཉིན་རེའི་གསར་འཕྲིན་དྲ་རྒྱ་རྒྱལ་སའི་དུས་བབ་ཅེས་པའི་རྩོམ་སྒྲིག་ལས་རོགས་རྗོན་ནེ་ཁོན་ཞུ་བས་ཕྱི་ཟླ་ ༡༡ པའི་ནང་འདེམ་རྒྱུའི་ཨ་རིའི་སྲིད་འཛིན་འོས་གཞི་ཨོ་བྷ་མ་དང་མ་ཁིན་གཉིས་ཀྱིས་བོད་དོན་ལ་ལྟ་སྟངས་སྐོར་ལ་འདི་ལྟར་རྩོམ་ཡིག་ཅིག་བྲིས་འདུག

བོད་ནང་གི་ངོ་རྒོལ་གྱི་སྟེང་རྒྱ་ནག་གིས་དྲག་པོའི་རྒོལ་དྲུང་བྱེད་ཀྱིན་པ་དང་འབར་མ་དང་སུ་ཌན་གྱི་ཡ་ང་བའི་སྲིད་དབང་སྒེར་འཛིན་པ་དག་ལ་རྒྱ་ནག་གིས་རྒྱབ་སྐྱོར་བྱེད་ཀྱིན་པར་མ་ལྟོས་པར། སྲིད་འཛིན་བྷུ་ཤུས་ཁོང་ཉིད་ཟླ་བ་རྗེས་མའི་པེ་ཅིན་གྱི་ཨོ་ལིམ་རྩེད་འགྲན་མཛད་སྒོར་ཞུགས་རྒྱུ་ཡིན་ཚུལ་གསལ་བསྒྲགས་བྱས་པ་རེད།

དེའི་ལན་དུ། བྷ་རག་ ཨོ་བྷ་མ་ ཡིས་རང་ཉིད་ནི་ཁོང་གིས་ཚབ་བྱེད་སའི་མི་དེ་དང་མི་འདྲ་བར་བསྟན།

གལ་སྲིད་ཁོང་ཉིད་སྲིད་འཛིན་ཡིན་ན་ཨོ་ལིམ་པིག་མཛད་སྒོར་ཕེབས་ཏེ་རྒྱ་ནག་གི་ཉེ་ཆར་གྱི་བྱེད་སྟངས་རིགས་ཁྲིམས་མཐུན་ཡིན་པར་སྟོན་གི་ཡིན་ནམ་ཞེས་དྲིས་སྐབས། ཨོ་བྷ་མས་བཤད་དོན། ཡར་རྒྱས་ཀྱི་རྣམ་པ་མ་མཐོང་བ་དང་། ཏཱ་ལའི་བླ་མའི་ཕྱོགས་ནས་ཀྱང་ཡར་རྒྱས་ཀྱི་རྣམ་པ་མཐོང་གི་མེད་པ་ཡིན་ན་ང་ནི་འགྲོ་ས་མ་རེད། ཟེར།

འདི་ནི་ཨོ་བྷ་མ་ཡིས་བོད་དོན་དང་བདུན་ཕྲག་འདིའི་ནང་ཨ་རིའི་ཝིན་སི་ཁོན་དུ་བཞུགས་པའི་ཏཱ་ལའི་བླ་མའི་ཐོག་ལ་སྐད་ཆ་བཤད་པ་ཐེངས་དང་པོ་མིན།

ཕྱི་ཟླ་ ༣ པའི་ནང་ཕྱི་སྲིད་ཀྱི་གནད་དོན་ཐད་སྐད་ཆ་བཤད་སྐབས། གྲོས་ཚོགས་གོང་མའི་ཕྱི་འབྲེལ་ཚོགས་ཆུང་གི་ཚོགས་མི་ཡིན་པ་ཨོ་བྷ་མ་ཡིས་བཤད་དོན། འགྲོ་བ་མིའི་ཐོབ་ཐང་ནི་ངེས་པར་དུ་ཨ་རིའི་ལས་དོན་ལྟེ་བ་དེ་ཡིན་དགོས་ཟེར། ཁོང་གིས་གསལ་བོར་བསྒྲགས་དོན། ང་ཚོས་བོད་མི་རིགས་ཀྱི་ཆོས་དད་རང་དབང་དང་འགྲོ་བ་མིའི་ཐོབ་ཐང་སྐོར་གླེང་སྟེ་ད་ལྟ་མགོ་འཛུགས་ཆོག་གི་རེད། ཟེར།

སྐབས་མཚམས་དེ་འདྲ་ཞིག་ལ་ཨོ་བྷ་མ་ཡིས་གསལ་བསྒྲགས་སྤེལ་དོན། གལ་སྲིད་བོད་མི་རིགས་ནི་རྒྱ་ནག་གི་མི་རིགས་ལྷག་འཕྲོས་རྣམས་དང་མཉམ་དུ་འཆམ་མཐུན་གྱིས་འདུག་དགོས་ན། ཁོང་ཚོའི་ཆོས་ལུགས་དང་རིག་གཞུང་ལ་ངེས་པར་དུ་བརྩི་བཀུར་དང་སྲུང་སྐྱོབ་བྱེད་དགོས། བོད་ཀྱིས་ཚད་མཐོ་ཞིང་མིང་དོན་མཚུངས་པའི་རང་སྐྱོང་གི་གནས་བབ་དེ་ལོངས་སུ་སྤྱོད་དགོས་པ་རེད། ཟེར།

རྒྱ་ནག་གི་འགྲོ་བ་མིའི་ཐོབ་ཐང་བརྡལ་བཤིག་གི་ཐད་ནས་བཤད་ན། མ་ཁིན་གྱི་ཚོར་བ་ནི་བྷུ་ཤུ་ལས་རྣོ་བ་ནི་དོགས་པ་བྱེད་མི་དགོས་པ་ཞིག་རེད། ལོ་འདིའི་དཔྱིད་དུས་སུ། རྒྱ་ནག་གིས་བོད་ནང་གི་ངོ་རྒོལ་གནོན་པ་དེ་དྲག་པོའི་ངོ་བོར་འཕེལ་སྐབས། ཨ་རེ་ཛོ་ཎི་ནས་ཕེབས་པའི་འཐུས་མི་འདིས་ཁྱད་དུ་འཕགས་པའི་གསལ་བསྒྲགས་ཤིག་སྤེལ་བ་རེད།

ཁོང་གིས། བོད་མི་ཚོས་རང་གི་དད་འདུན་ཉམས་ལེན་དང་རིག་གཞུང་དང་ཁྱད་ནོར་དག་གཅེས་འཛིན་བྱེད་པའི་རེ་བ་ཁོ་ན་འདོན་པ་དེར་རྒྱ་ནག་གི་མགོ་ཁྲིད་ཚོས་དྲག་པོའི་རྒོལ་རྡུང་བྱེད་པ་དང་མུ་མཐུད་ནས་བཙན་གནོན་བྱེད་ཀྱིན་པའི་ཐད་ང་རང་གི་ངོས་ནས་མཐའ་གཅིག་ཏུ་ངོ་རྒོལ་ཡོད། ངས་ཏཱ་ལའི་བླ་མ་མཆོག་ལ་གཟབ་ནན་གྱིས་ཉན་པ་ཡིན་ལ། ཁོང་ནི་ཞི་བདེའི་སྐྱེས་བུ་ཞིག་དང་བོད་མི་རིགས་ཀྱི་རེ་བ་དང་སེམས་ཀྱི་མངོན་འདོད་ཀྱི་ཚབ་མཚོན་ཡིན་པའི་ངེས་ཤེས་རྙེད། ངས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབུ་ཁྲིད་དག་གིས་བོད་ལ་ཚད་མཐོའི་རང་སྐྱོང་གི་ཐོབ་ཐང་སྤྲོད་ཆེད་༧གོང་ས་ཏཱ་ལའི་བླ་མ་མཆོག་དང་མཉམ་དུ་དོན་ཕན་ཡོད་པའི་ཞི་མོལ་བྱས་པ་བརྒྱུད་བོད་ནང་གི་དཀའ་རྙོག་གི་རྩ་བ་གང་ཡིན་གསལ་བོ་བཤད་པའི་འབོད་སྐུལ་ཞུ་གི་ཡོད། ཅེས་གསུངས་ཡོད།

སྐབས་དེར། མ་ཁིན་གྱིས་པེ་ཅིན་གྱི་སྲིད་བྱུས་ལ་ངོ་རྒོལ་བྱེད་པ་མཚོན་ཆེད་དུ་ཁོང་ཉིད་ཀྱང་ཨོ་ལིམ་པིག་མཛད་སྒོར་མི་ཞུགས་པའི་བསམ་ཚུལ་བཏོན་ཡོད།

དེ་ལྟར་ཡང་། ཉེ་བའི་ཟླ་ཤས་རིང་ནས། རྒྱལ་སྤྱིའི་ལས་དོན་ལ་ཐུག་དུས་མ་ཁིན་གྱིས་ཨོ་བྷ་མ་ཡིས་རྒྱལ་ཁབ་ཀྱི་འབྲེལ་བ་དང་འགྲོ་བ་མིའི་ཐོབ་ཐང་ལ་ལྟ་སྟངས་ཐད་སྐྱོན་བརྗོད་བྱེད་པ་ཤུགས་ཆེ་རུ་ཕྱིན་ཡོད་པ་རེད། བྷུ་ཤུས་ཁོང་ཉིད་ཨོ་ལིམ་པིག་མཛད་སྒོར་བཅར་རྒྱུ་ཡིན་སྐོར་གསལ་བསྒྲགས་སྤེལ་སྐབས། མ་ཁིན་གྱིས་གཞུང་འབྲེལ་གྱི་ཐོག་ནས་ཐག་གཅོད་འདི་ལ་སྐྱོན་བརྗོད་བྱས་མེད།

ཡིན་ནའང་ཨོ་བྷ་མ་ནི་འགྲོ་བ་མིའི་ཐོབ་ཐང་གི་ཐོག་འཐམ་ནས་བསྡད་ཡོད་ལ། མ་ཁིན་གྱི་འདས་པའི་སྐད་ཆ་དེ་དག་གིས་བསྟན་པ་ནི། རྒྱ་ནག་གིས་བོད་ཀྱི་ཐོག་ལས་ཀ་བྱེད་སྟངས་དེ་ནི་བྷུ་ཤུ་དང་ཁི་ལིན་ཊོན་གྱི་སྲིད་འཛིན་ལས་འཁུར་སྐབས་ར་འཕྲོད་བྱུང་བ་ལས་ཀྱང་མངོན་གསལ་དུ་གྱུར་བའི་གནས་སྟངས་དེར་གོ་རྟོགས་ཐུབ་པ་དེ་ཡིན།

འདི་ལྟར། བྷུ་ཤུ་ཨོ་ལིམ་པིག་མཛད་སྒོ་ལ་ཞུགས་རྒྱུའི་ཐག་གཅོད་འདི་ནི་བློ་ཕམ་དང་གནོང་འགྱོད་གཉིས་ཀ་ཡིན་ནའང་། ༢༠༠༨ ལོ་ནི་ད་དུང་ཡང་ཨ་མི་རི་ཀ་འདི་ནོར་འཛོལ་གྱི་གྲིབ་ནག་འོག་ནས་ཆས་ཏེ་དོན་དམ་གྱིས་འགྲོ་བ་མིའི་ཐོབ་ཐང་ལ་ཁག་འཁུར་བྱེད་པའི་ཉི་འོད་ཀྱི་ཕྱོགས་སུ་འགྲོ་བའི་ལོ་དེ་ཡིན།