ལྕམ་ཁི་ལིན་ཊོན་མཆོག་ཁ་དན་ཚིག་ལ་གནས་མ་སོང་།

ཨ་རིའི་རྒྱལ་དོན་དྲུང་ཆེ་ལྕམ་ཁི་ལིན་ཊོན་གྱིས་ཚེས་ ༢༢ ཉིན་རྒྱ་ནག་གི་དབང་འཛིན་པ་ཚོ་དང་མཉམ་དུ་འགྲོ་བ་མིའི་ཐོབ་ཐང་གི་གནད་དོན་སྣང་མེད་བཏང་སྟེ། འཛམ་གླིང་ཚོང་རྭའི་ཉམས་རྒུད་དང་རྒྱལ་སྤྱིའི་ལས་དོན་གཞན་རྣམས་གཙིགས་ཆེ་དང་གཙོ་བོར་བཟུང་ཡོད་པ་རེད།

ལྕམ་ཁི་ལིན་ཊོན་གྱིས། ཨ་རིའི་གཞུང་ནས་རྒྱ་ནག་དང་མཉམ་དུ་འགྲོ་བ་མིའི་ཐོབ་ཐང་དང༌། བོད་དང་ཐའེ་ཝན་གྱི་གནད་དོན་དང་འབྲེལ་བའི་བཀའ་མོལ་མུ་མཐུད་ནས་འབྱུང་གི་རེད། ཡིན་ན་ཡང་གནད་དོན་འདི་དག་གིས་འཛམ་གླིང་ཚོང་རྭའི་ཉམས་རྒུད་དང་སའི་གོ་ལའི་གནམ་གཤིས་འགྱུར་ལྡོག  བདེ་འཇགས་ཀྱི་ཉེན་ཁ་སོགས་ལ་ཐེ་བྱུས་བྱ་ཐུབ་གི་མ་རེད། ཅེས་དང་། ཨ་རྒྱ་གཉིས་ནི་འགྲོ་བ་མིའི་ཐོབ་ཐང་གི་གནད་དོན་ཐད་ལྟ་ཚུལ་མི་མཐུན་པ་ཡོད་པའི་ཐོག་ལ་ལྟ་ཚུལ་མཐུན་གི་རེད་ཅེས་གསར་འགོད་ལྷན་ཚོགས་ཤིག་གི་ཐོག་གསུངས་ཡོད་འདུག 

ཚེས་ ༢༡ ཉིན་ཁོང་རྒྱ་ནག་སྲིད་འཛིན་ཧུའུ་ཅིན་ཐའོ་དང་མཇལ་འཕྲད་གནང་ཡོད་ལ། རྒྱལ་ཁབ་གཉིས་བར་གྱི་འབྱུང་འགྱུར་མཉམ་ལས་སོགས་ཀྱི་ཐད་བཀའ་མོལ་བྱུང་ཡོད་འདུག ཁི་ལིན་ཊོན་གྱིས། གཙོ་བོ་དེ་ཨ་རྒྱ་གཉིས་ཀྱི་བར་མཉམ་ལས་གྱི་འབྲེལ་བ་ཡིད་རྟོན་རུང་བ་དགོས་ཞེས་གསར་འགོད་པར་བརྗོད་ཡོད་པ་རེད། ཉིན་འདིའི་སྔ་དྲོ་ལྕམ་ཁི་ལིན་ཊོན་ལགས་རྒྱ་ནག་གི་སྲིད་བློན་ཝན་ཅ་པའོ་དང་མཇལ་འཕྲད་གནང་སྟེ། ཨ་རི་སྲིད་གཞུང་གསར་བའི་དམིགས་ཡུལ་དང༌། འཛམ་གླིང་ཚོང་རྭ་དང་གནམ་གཤིས་ཚ་དྲོད་ཀྱི་གནས་སྟངས་སོགས་ལ་གླེང་མོལ་བྱུང་ཡོད་འདུག་ལ། ཉིན་འདིར་རྒྱ་ནག་ཕྱི་སྲིད་བློན་ཆེན་ཡཱང་ཅེ་ཁྲི་དང་མཇལ་འཕྲད་གནང་སྐབས། རྒྱལ་ཁབ་འདི་གཉིས་བར་གྱི་བརྗོད་གཞི་རྙིང་བ་འགྲོ་བ་མིའི་ཐོབ་ཐང་གི་སྐོར་ལ་འབྱུང་འགྱུར་གྱི་འབྲེལ་མོལ་བར་ནས་གླེང་སློང་ཡོང་བའི་གྲོས་འཆམ་བྱུང་ཡོད་འདུག ཕྱི་སྲིད་བློན་ཆེན་ཡཱང་ཅེ་ཁྲིན་གྱིས། རྒྱལ་ཁབ་གཉིས་བར་གྱི་གཞི་རྩའི་འབྲེལ་ལམ་དང་གྲོས་གཞི་ལ་བརྩི་བཀུར་གྱིས། རྒྱ་ནག་གི་ངོས་ནས་འབྱུང་འགྱུར་ཨ་རིའི་གཞུང་དང་མཉམ་དུ་འགྲོ་བ་མིའི་ཐོབ་ཐང་གི་སྐོར་ལ་འབྲེལ་མོལ་བྱ་རྒྱུ་ཡིན་ཞེས་ཞིན་ཧྭ་གསར་འགྱུར་ཁང་ལ་བརྗོད་ཡོད་འདུག

ལྕམ་ཁི་ལིན་ཊོན་ཕེབས་པའི་རྐྱེན་གྱིས་ང་རང་ཁང་བ་ཞིག་གི་ནང་དུ་བཀག་བྱུང༌། ཞེས་རྒྱ་ནག་ནང་ཁུལ་གྱི་རང་དབང་འཐབ་རྩོད་པ་ཧུའུ་ཅ་ཡི་བཟའ་ཟླ་ཙེན་ཅེན་ཡན་གྱིས་འཕྲིན་ཡིག་བརྒྱུད་བཤད་ཡོད་འདུག་ལ། རྒྱ་ནག་གི་ཕྱི་ནང་ཀུན་དུ་ཡོད་པའི་མི་རྣམས་ཀྱིས་རྒྱ་ནག་ནང་ཁུལ་གྱི་དངོས་ཡོད་འགྲོ་བ་མིའི་ཐོབ་ཐང་ལ་རྒྱུས་ལོན་བྱ་དགོས་པ་ཧ་ཅང་གལ་ཆེན་དུ་ཆགས་ཡོད་ཅེས་ཀྱང་བཤད་ཡོད་འདུག དེ་བཞིན་རྒྱ་ནག་གི་རང་དབང་འཐབ་རྩོད་པའི་ཚོགས་པ་ཚོས། ལྕམ་ཁི་ལིན་ཊོན་རྒྱ་ནག་ལ་གཟིགས་སྐོར་དུ་ཕེབས་སྐབས་ང་ཚོ་རང་དབང་གིས་འགྲོ་བསྐྱོད་བྱ་ཆོག་གི་མ་རེད་ཅེས་བཤད་ཡོད་པ་དང༌། རང་དབང་དང་ཐོབ་ཐང་འཐབ་རྩོད་པ་འགའ་པེ་ཅིན་ཕྱི་ལོག་གི་མགྲོན་ཁང་ནང་དུ་བཀག་ཉར་བྱས་ཡོད་པའི་གནས་ཚུལ་ཡང་སྤེལ་འདུག  དེའི་ནང་གི་མི་མང་པོ་ཞིག་ནི་རྒྱ་ནག་གི་རྩ་ཁྲིམས་ ༠༨ ནང་དུ་མིང་རྟགས་འགོད་མཁན་ཡིན་པ་དང༌། རྒྱ་ནག་གི་རྩ་ཁྲིམས་ ༠༨ ནི་རྒྱ་ནག་སྐམ་ས་ཆེན་མོར་ཡོད་པའི་ཤེས་ཡོན་པ་དག་གིས་རྒྱ་ནག་ལ་གཞི་རྩའི་བཅོས་བསྒྱུར་དོན་ཚན་ ༡༩ ཡོད་པའི་རྩ་འཛིན་ཡིག་ཆ་ཞིག་ཡིན།

ལྕམ་ཁི་ལོན་ཊོན་གྱིས་ལོ་སྔོན་མར་པེ་ཅིན་དུ་རྒྱལ་སྤྱིའི་ཨོ་ལིམ་པིག་རྩེད་འགྲན་མཛད་སྒོ་འཚོགས་སྐབས་སུ། སྲིད་འཛིན་བྷུ་ཤུ་མཛད་སྒོར་ཞུགས་པར་ངོ་རྒོལ་གནང་ཡོད་ལ།  ༡༩༩༥ ལོར་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་སྐྱོན་བརྗོད་ཀྱི་གཏམ་བཤད་ཀྱང་གནང་ཡོད་པ་རེད། ཡིན་ན་ཡང་དོན་དངོས་ལ་འཇུག་སྐབས་ལྕམ་ཁི་ལོན་ཊོན་ཕྱི་བཤོལ་གནང་འདུག་ཚུལ་རྒྱལ་སྤྱིའི་གསར་ལམ་ཁག་ཏུ་ཚོགས་པ་མང་པོས་སྐྱོན་བརྗོད་བྱེད་བཞིན་ཡོད། རྒྱལ་སྤྱིའི་ཉེས་ཡངས་ཚོགས་པ་སོགས་འགྲོ་བ་མིའི་ཐོབ་ཐང་གི་ཐད་འཐབ་རྩོད་དང་ཕྱག་ལས་གནང་མཁན་ཚོགས་སྡེ་ཁག་ནི་ཐེངས་འདིར་ཧ་ལས་པ་དང་བློ་ཕམ་དུ་བཅུག་ཡོད་པ་རེད། རྒྱལ་སྤྱིའི་ཉེས་ཡངས་ཚོགས་པས། ཨ་རི་ནི་རྒྱ་ནག་དང་ཁ་གཏད་དུ་ལངས་ནས་འགྲོ་བ་མིའི་ཐོབ་ཐང་གི་གནད་དོན་གླེང་ཐུབ་མཁན་གཅིག་པུ་དེ་ཆགས་ཡོད་ལ། ལྕམ་ཁི་ལིན་ཊོན་གྱི་གཟིགས་སྐོར་ནི་རྒྱ་ནག་གི་མགོ་ཁྲིད་ཚོའི་ལོ་རེའི་དྲན་གསོའི་བྱེད་སྒོའི་གནད་འགག་ཆེ་བའི་དུས་སྐབས་ཤིག་ཡིན། ཅེས་དང༌། ཡང་འགྲོ་བ་མིའི་ཐོབ་ཐང་ལྟ་རྟོག་ཚོགས་པའི་ཚོགས་གཙོས་ཀྱང༌། ཆེས་གལ་ཆེ་བ་ནི་མི་མང་དང༌། བཟོ་བ། ཤེས་ཡོན་པ་སོགས་ཀྱིས་ཨ་རི་གཞུང་གིས་འགྲོ་བ་མིའི་ཐོབ་ཐང་གི་གནད་དོན་གཙིགས་ཆེར་འཛིན་བཞིན་པའི་ཁ་ཕྱོགས་ལ་རེ་ལྟོས་དང་རྣ་བས་ཉན་ནས་བསྡད་ཡོད་པ་དེ་རེད། ཅེས་ལྕམ་ཁི་ལིན་ཊོན་གྱིས་ཨ་རིའི་མི་མང་གི་བསམ་ཚུལ་དང་རེ་ལྟོས་ལ་ཁ་ཡ་མ་བྱས་པའི་ཐད་སྐྱོན་བརྗོད་གནང་ཡོད་པ་རེད། དེ་བཞིན་གཞུང་འབྲེལ་མ་ཡིན་པའི་ཚོགས་པ་ཚོས་ལྕམ་ཁི་ལིན་ཊོན་གྱིས་རྒྱ་ནག་ལ་བརྡ་ལན་གསར་བ་ཞིག་དང་རྒྱ་ནག་གི་མགོ་ཁྲིད་ཚོ་ལ་རེ་བ་གསར་བ་ཞིག་སྦྱིན་པ་རེད་ཅེས་ཀྱང་བཤད་ཡོད་འདུག

ཐེངས་འདིའི་གཟིགས་སྐོར་ནི་ལྕམ་ཁི་ལིན་ཊོན་མཆོག་ལས་གནས་གསར་བར་ཕེབས་པ་ནས་གཞུང་འབྲེལ་གཟིགས་སྐོར་ཐོག་མ་དེ་ཡིན་ལ། རྒྱལ་སྤྱིའི་མི་མང་ནི་ཁོང་གིས་གསུངས་མྱོང་བའི་འགྲེོ་བ་མིའི་ཐོབ་ཐང་སྐོར་གྱི་གཏམ་བཤད་ཀྱིས་ཡིད་དབང་འཕྲོག་མྱོང་བས། ལྕམ་ཁི་ལིན་ཊོན་ལགས་ནས་རྒྱ་ནག་གི་མགོ་ཁྲིད་ཚོ་ལ་འགྲོ་བ་མིའི་ཐོབ་ཐང་གི་གནད་དོན་སྐོར་ལ་འབོད་སྐུལ་དང་གླེང་སློང་ཡོང་རྒྱུའི་རེ་བ་བཅོལ་ཡོད་པ་དང༌། གཟིགས་སྐོར་ལ་མ་ཕེབས་པའི་སྔོན་དུ་རྒྱལ་སྤྱིའི་སྟེང་གི་གཞུང་འབྲེལ་མ་ཡིན་པའི་ཚོགས་པ་ཁག་བདུན་གྱིས་ཞུ་ཡིག་ཅིག་ཕུལ་ཏེ། ཐེངས་འདིའི་གཟིགས་སྐོར་གྱི་དམིགས་ཡུལ་དེ་འགྲོ་བ་མིའི་ཐོབ་ཐང་ཡིན་དགོས་པར་བཤད་ཡོད་པ་རེད་ལ། ཞུ་འཕྲིན་དེའི་ནང་བཀོད་དོན། ཨ་རིའི་རྒྱ་ནག་གི་ལས་དོན་ནི་རྒྱ་ཆེན་པོ་རེད། ཡིན་ཡང་ངེད་ཅག་གི་ཡིད་ཆེས་ནི་དཔལ་འབྱོར་དང་བདེ་སྲུང་། རྒྱལ་འབྲེལ་བཅས་ཀྱི་ཡར་རྒྱས་ནི་འགྲོ་བ་མིའི་ཐོབ་ཐང་ལ་ཡོངས་ཁྱབ་རང་བཞིན་དང་སྟོབས་ཤུགས་ཡོངས་སུ་བཀོལ་ཏེ་སྲུང་སྐྱོབ་བྱེད་པ་བརྒྱུད་སྐུལ་འདེད་བྱེད་ཐུབ་པར་འདོད་ཅེས་དང་། ཡི་གེ་དེའི་ནང་དུ་སྔོན་ཆད་ལྕམ་ཁི་ལིན་ཊོན་ཁོང་གིས་འགྲོ་བ་མིའི་ཐོབ་ཐང་ཐད་བཤད་པའི་བསམ་ཚུལ་རིགས་ཀྱང་གསལ་འདེབས་ཀྱི་ཚུལ་དུ་བཀོད་ཡོད་ལ། ལྕམ་ཁི་ལིན་ཊོན་གྱིས་འགྲོ་བ་མིའི་ཐོབ་ཐང་ཐད་ནན་བཤད་གནང་དོན། མི་སེར་རྣམས་རང་རང་གི་སྙིང་ཉེ་བ་དག་གི་འཁྲིས་ནས་ཁྲིད་ཕྱིན་དེ་བཙོན་དུ་འཇུག་པ་དང་མནར་གཅོད་མ་གཏོང་རོགས། ཁོང་ཚོས་ཞི་བའི་སྒོ་ནས་རང་རང་གི་བློ་དང་བསམ་ཚུལ་བཏོན་པར་རྐྱེན་བྱས་ཏེ་ཁོང་ཚོའི་ཆེ་མཐོང་དང་སྨྲ་བརྗོད་རང་དབང་མ་འཕྲོག་རོགས་ཞེས་གསུངས་ཡོད་པ་རེད།