དང་བོ་ཡིད་འཕྲོག་ལྷ་མཛེས་མི་ཡི་སྲས།།
བར་དུ་སེམས་གྲོགས་སྙིང་གི་མཛའ་ན་མོ།།
ཐ་མར་ཆོ་འཕྲུལ་རྒོད་པའི་སྲིན་མོ་མ།།
འདྲིས་ཤིང་གཤིབ་ཚེ་སྙིང་གི་ནད་རོ་མ།།
ཐག་ཉེ་སླེབས་དུས་མིག་གི་དཔྱིད་དུ་ཡག།
ལུས་པོ་སྤྱར་ན་འཁྲིག་པའི་བདེ་སྟེར་མ།།
རྒྱང་དུ་བྱིན་ཚེ་ཆལ་མོ་ལུས་བཙོང་མ།།
སེམས་ཀྱི་གསང་གྲོགས་མི་ཉན་གོ་རྒས་མ།།
ཁ་ནས་གླེང་བྱ་བརྩེ་དུང་དྲོན་མོ་ཡིན།།
སེམས་ཀྱི་འཁྱེར་གསོ་རླུང་གི་སྤུན་དང་མཚུངས།།
གཟུགས་ཀྱི་ལང་ཚོ་མེ་ཏོག་ལས་ཀྱང་མཚར།།
ཡིན་ཡང་ཚེ་གཅིག་གྲོགས་མེད་ལོངས་ཤོར་མ།།
ངོ་དགའ་ཅན་ལ་སེམས་ཀྱི་གྲོགས་དུ་བསམ།།
དངས་པ་ཅན་ལ་བསླུ་བའི་མི་རུ་འཁྲུལ།།
དཀར་ནག་གོ་ལྡོག་ཅན་གྱི་ལས་ངན་མ།།
ཐང་བུ་མང་བོའི་བསྐོར་བའི་གནོད་སྤྱིན་མ།།
རྩུབ་མོ་ཚིག་ལ་བྱང་བས་ཁ་མཁས་མ།།
ལས་དབང་སྒོར་ལ་བརྗེ་བའི་ཁྲེལ་མེད་མ།།
མི་གཤིས་རང་ཚུགས་བོར་བའི་ལས་མེད་མ།།
སེམས་ནས་གང་ཤར་ཁ་ནས་འདྲེན་མཁས་མ།།
སྐྱིད་ཅིག་མ་གཏོགས་སྡུག་བསྔལ་མི་བཟོད་མ།།
ཕྱུག་བདག་མ་གཏོགས་མི་མཐོང་སྒོ་ཉུལ་མ།།
རང་ཤེད་མ་གཏོགས་མེད་པའི་ལྟས་ངན་མ།།
ཐ་མར་མི་གྲལ་མི་ཚུད་ཁྱི་མོ་མ།།
ཆུང་དུས་ཕ་མའི་སེམས་ཁམས་དཀྲུགས་མཁན་མ།།
གཞོན་དུས་གཡོ་སྒྱུ་ཅན་གྱི་སྨད་ཚོང་མ།།
རྒས་པའི་ཉིན་མོ་གྲོགས་མེད་གཅེར་བུ་མ།།
འཆི་ཡང་མྱི་ཁའི་ཁྲོད་ཀྱི་གདོན་མོ་མ།།
ལས་ངན་ནང་གི་ལྟས་ངན་སྙིང་རྗེའི་ཡུལ།།
མི་ཡི་བུ་མོ་ལས་ངན་བསྐོར་ཞིག་གི།
ཚེ་ཡི་འགྲུལ་བཞུད་ཐུང་ཐུང་ནང་གི་བསྐོར།།
དེ་རིང་བདག་གི་སྨྱུག་རྩེར་དབང་མེད་སླེབས།།
མི་ཡི་བུ་མོ་ཚང་མ་འདི་འདྲ་མིན།།
བུད་མེད་ལས་ངན་བཅོས་མེད་འགའ་རེ་ཡི།།
སྤྱོད་པ་ཇི་བཞིན་ཡི་གེར་ཕབ་པ་འདི།།
བུད་མེད་ཚང་མར་བྲིས་མིན་འཐོལ་ལོ་གཤེགས།།
༡།༤།༠༩རྫུན་གྱི་ཉིན་མོ་རུ་འབོད་པ་ཡིན་སྟབས།ངས་ཀྱང་རྫུན་ལུགས་ཀྱི་རྩོམ་ཡིག་ཞིག་བྲིས་པ་ཡིན་ལ།འདི་འདྲ་བའི་བུད་མེད་ལས་ངན་དང་བཅོས་ཐབས་མེད་པར་རང་གི་ཚེ་ཡི་ལོང་སྤྱོད་དང་ཚེ་གྲོགས་སོགས་བརྟན་པོ་ཞིག་མེད་པར་འཆི་ཁར་འགྱོད་པ་དང་བཅས་དང་ཤི་མཁན་མི་ཉུང་བའི་བུད་མེད་དག་གི་ཆེད་དུ་བྲིས་པ་ཡིན།
