སྤྱིར་ཕོ་མོ་གཉིས་ཀྱི་ནུས་པ་གཅིག་མཚུངས་རེད་དམ་ཟེར་ན་མ་རེད། ཕོ་མོ་གཉིས་ལ་ཁྱད་པར་མང་པོ་ཞིག་ཡོད་པ་ངོས་ལེན་བྱེད་ཀྱིན་ཡོད། འོན་ཀྱང། སྤྱི་ཚོགས་ཀྱིས་བཟོས་བཞག་པའི་ཁྱད་པར་དང༌། ལམ་ལུགས་ཀྱིས་བཟོས་བཞག་པའི་ཁྱད་པར། ལྟ་བ་ཡིས་བཟོས་བཞག་པའི་ཁྱད་པར་མང་དག་ཅིག་ཡོད། དེ་དག་ལ་ངེས་པར་དུ་འགྱུར་བ་གཏོང་དགོས་ལ། འགྱུར་བ་གཏོང་ཐུབ་པ་ཞིག་ཀྱང་རེད་བསམ་ཡོད་ཟེར།
དེ་རིང་སྔ་དྲོའི་ཆུ་ཚོད་ ༩ ཐོག་ངྷ་སྟེང་བོད་ཕྲུག་ཁྱིམ་སྡེའི་བདེ་སྐྱིད་ཚེ་རིང་ཚོགས་ཁང་དུ་ཉིན་ལྔའི་རིང་གི་བོད་ཀྱི་བུད་མེད་ལྷན་ཚོགས་ཀྱི་ཚོགས་ཆེན་ཐེངས་ ༩ དེ་གཟབ་རྒྱས་ངང་ཚོགས་མགོ་བརྩམས་ཡོད་པ་དང༌། ཚོགས་འདུའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཞོན་རྒྱ་རུ་སྒྲོལ་མ་དང་བཀའ་ཟུར་རིན་ཆེན་མཁའ་མགྲོ། དེ་མིན་གྱི་སྤྱི་འཐུས་ཁག་ཅིག་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་བཅས་ཕེབས་འདུག མཛད་སྒོ་དབུ་འཛུགས་སྐབས་སྐུ་མགྲོན་གཙོ་བོ་རྣམ་པས་བུད་མེད་ལྷན་ཚོགས་ཀྱིས་འདོན་སྤེལ་བྱས་པའི་དཔེ་དེབ་དང་འོད་སྡེར་ཁག་ཅིག་དབུ་འབྱེད་དང། སྒྲོལ་མ་དུས་དེབ་སྟེང་གི་རྩོམ་ཡིག་ལེགས་ཐོན་ལ་བྱ་དགའ། དེ་བཞིན་ ༢༠༠༦ ནས་ད་བར་ལས་འགུལ་ཤུགས་ཆེས་སྤེལ་བའི་ས་གནས་ཁག་ཅིག་ལ་བྱ་དགའ་གསོལ་རས་བཅས་བསྩལ་ཡོད། བོད་ཀྱི་བུད་མེད་ལྷན་ཚོགས་ཀྱི་ཚོགས་ཆེན་ཐེངས་ ༩ སྟེང་གི་གྲོས་གཞི་གལ་ཆེན་ཁག་ནི། དབུས་དང་ས་གནས་ཁག་གི་ལས་སྡོམ་རྩིས་ཁྲ་སྙན་སྒྲོན་དང་འགན་འཛིན་ལྷན་ཚོགས་ཐེངས་དགུ་བའི་གྲོས་ཆོད་ཁག་ལ་བསྐྱར་ཞིབ། རྩ་དོན་སྒྲུབ་ཕྱོགས་དང་སྤྱི་ཚོགས་ཞབས་ཞུའི་ལས་དོན། དེ་བཞིན། སྐབས་དགུ་བའི་བོད་ཀྱི་བུད་མེད་ལྷན་ཚོགས་ཀྱི་སྤྱི་ཁྱབ་དབུས་རྒྱན་ལས་གསར་འདེམས་བྱ་ཕྱོགས་བཅས་ཡིན་འདུག
སྐབས་དེར་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བུ་མོ་ཚེ་རིང་ལགས་ཀྱིས་ད་བར་གྱི་དབུས་བོད་ཀྱི་བུད་མེད་ལྷན་ཚོགས་ཀྱི་ལས་དོན་ཁག་ཅིག་ངོ་སྤྲོད་གནང་དོན། ད་ལྟའི་ཆར་བོད་ཀྱི་བུད་མེད་ལྷན་ཚོགས་ཀྱིས་དམངས་གཙོའི་འགྲོ་ལུགས་ཚད་དང་ལྡན་པ་ལག་ལེན་འཁེལ་བའི་ཐོག ལོ་ལྟར་མང་མོས་ཐོག་ནས་རྒྱལ་ཁབ་དང་མི་རིགས་ཀྱི་ཆད་དུ་གང་ཞིག་གནང་དགོས་ཀྱང། གྲོས་བསྡུར་ལྷུག་པོ་གནང་སྟེ་གྲོས་ཆོད་བཞག་ཅིང། གྲོས་ཆོད་དེའང་ལག་ལེན་དུ་འཁེལ་ཐུབ་པ་བྱེད་ཀྱིན་ཡོད། ལྷག་པར་དུ་རྒྱལ་སྤྱིའི་སྡིངས་ཆ་ཁག་ཏུ་གང་ཐུབ་ཅི་ཐུབ་ཀྱིས་ཆ་ཤས་ལེན་གྱིན་ཡོད། མཉམ་འབྲེལ་རྒྱལ་ཚོགས་ཀྱི་ཚོགས་ཆུང་ཁག་གི་ཚོགས་འདུ་ཁ་ཤས་ལ་བཅར་ཏེ། བོད་ཀྱི་བུད་མེད་དང་བོད་ནང་གི་གནས་སྟངས། བོད་མི་མང་པོ་རྒྱ་གཞུང་གི་སྡུག་སྦྱོང་མནར་གཅོད་འོག་རྐྱེན་ལམ་དུ་འགྲོ་བཞིན་ཡོད་པ་སོགས་ངོ་སྤྲོད་བྱས་ཡོད། འདི་དག་དབུས་རྒྱུན་ལས་གཅིག་པུ་མ་ཡིན་པར་བུད་མེད་ལྷན་ཚོགས་ཀྱི་ཚོགས་མི་ཚང་མས་ཧུར་བརྩོན་བྱས་པའི་གྲུབ་འབྲས་རེད།
དེ་བཞིན། བོད་ཀྱི་བུད་མེད་ལྷན་ཚོགས་ནི་བུད་མེད་ཀྱི་ཚོགས་པ་ཞིག་ཡིན་སྟབས། བཙན་བྱོལ་ནང་གི་བུད་མེད་ཚོའི་ནུས་པ་གོང་མཐོར་གཏོང་རྒྱུ་དང། ཕན་ཚུན་ལ་རྒྱབ་སྐྱོར་ཞུ་རྒྱུ་བཅས་ལ་༢༠༠༤ ནས་གཞི་རུམ་སློབ་གྲྭ་དང་མཐོ་སློབ། བཙུན་མ་བཅས་ལ་ཟབ་སྦྱོང་སྤྲད་དེ་མ་འོངས་པར་རྒྱལ་ཁབ་དང་མི་རིགས་ཀྱི་དོན་དུ་འགན་འཁྱེར་དགོས་པའི་ལམ་སྟོན་བྱེད་ཀྱིན་ཡོད། ཟབ་སྦྱོང་དེ་དག་མུ་མཐུད་རྒྱུན་འཁྱོངས་བྱ་འཆར་ཡོད། ༢༠༠༧ ནས་ང་ཚོས་མཐོ་སློབ་ཁག་ཏུ་ཕོ་མོའི་ཁྱད་ཆོས་ཟེར་བའི་ཟབ་སྦྱོང་ཞིག་མགོ་འཛུགས་བྱས་པ་ཡིན། འོན་ཀྱང། སྤྱི་ཚོགས་ནང་གི་མི་མང་པོའི་བསམ་བློའི་ནང༌། ནུབ་ཕྱོགས་ཀྱི་ལྟ་གྲུབ། བུད་མེད་ཀྱི་ཐོབ་ཐང་ཟེར་བའི་གོམས་གཤིས་སྡུག་ཅག་ཅིག་བོད་པའི་སྤྱི་ཚོགས་ནང་འཁྱེར་ཡོང་གིན་འདུག་བསམས་ཀྱིན་ཡོད། དེ་འདྲ་རྩ་བ་ནས་མ་རེད། སྤྱིར་ཕོ་མོ་གཉིས་ཀྱི་ནུས་པ་གཅིག་མཚུངས་རེད་དམ་ཟེར་ན་མ་རེད། ཕོ་མོ་གཉིས་ལ་ཁྱད་པར་མང་པོ་ཞིག་ཡོད་པ་ངོས་ལེན་བྱེད་ཀྱིན་ཡོད། འོན་ཀྱང། སྤྱི་ཚོགས་ཀྱིས་བཟོས་བཞག་པའི་ཁྱད་པར་དང༌། ལམ་ལུགས་ཀྱིས་བཟོས་བཞག་པའི་ཁྱད་པར། ལྟ་བ་ཡིས་བཟོས་བཞག་པའི་ཁྱད་པར་མང་དག་ཅིག་ཡོད། དེ་དག་ལ་ངེས་པར་དུ་འགྱུར་བ་གཏོང་དགོས་ལ། འགྱུར་བ་གཏོང་ཐུབ་པ་ཞིག་ཀྱང་རེད་བསམ་ཡོད། ཅེས་གསུངས་སོང།
དེ་རྗེས་བཀའ་ཟུར་རིན་ཆེན་མཁའ་འགྲོ་མཆོག་ནས་བཀའ་སློབ་གནང་དོན། བོད་ཀྱི་བུད་མེད་ལྷན་ཚོགས་ཀྱི་ངོས་ནས་སོ་སོའི་རྒྱལ་ཁབ་དང་མི་རིགས། ཆོས་དང་རིག་གཞུང་ཐད་ལས་དོན་གལ་ཆེན་ བསྒྲུབ་ཐུབ་ཡོད་ན་སྤོབས་པ་བྱེད་ཆོག་པ་ཞིག་ཆགས་ཡོད། ད་ལྟའི་དུས་ཚོས་འདིར་ང་ཚོ་ལྷོད་ལྷོད་བྱས་ཏེ། ཚང་མ་འགྲིག་ཡོད་སྙམ་སྟེ་འདུག་ཚད་རྩ་བ་ནས་མ་རེད། སྤྱི་ཚོགས་ནང་གང་ཞིག་འགྲིག་མེད་ན་དེ་ལ་ང་སྒེར་ངོས་ནས་ནུས་པ་ག་རེ་འདོན་ཐུབ་ཀྱིན་འདུག དེ་ལ་བསམ་བློ་གཏོང་བའི་དུས་ཚོད་རེད། དེར་བརྟེན། འདིར་ཕེབས་པའི་བུད་མེད་ཡོངས་ནས་རྒྱལ་ཁབ་དང་མི་རིགས་ཀྱི་དོན་དུ་དཀའ་ལས་རྒྱག་རྒྱུའི་དུས་ཚོད་རེད་ལ། ལྷག་པར་དུ་ཆིག་སྒྲིལ་གྱི་དོན་དུ་ག་རེ་གནང་དགོས་ཀྱིན་འདུག་དེ་ལ་བསམ་བློ་གཏོང་དགོས། ཆིག་སྒྲིལ་དེ་བོད་རྒྱལ་ཁབ་ཀྱི་ལས་དོན་གལ་ཆེན་ཆགས་ཡོད། དེ་བཞིན་བོད་མིའི་ཆོས་དང་རིག་གཞུང་ལ་སློབ་སྦྱོང་དགོས་ལ། ལྷག་པར་དུ་གཞོན་སྐྱེས་ཚོས་རིགས་གཅིག་རྐང་འཛིན་ཐོག་སློབ་སྦྱོང་གནང་དགོས། དེ་དང་མཉམ་དུ་ཡ་རབ་བཟང་སྤྱོད་དུས་ནམ་ཡང་འདོར་མི་རུང། ཅེས་གསུངས་སོང།
མཇུག་མཐར་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་གིས་སྔར་ལོའི་བོད་ནང་གི་ཛ་དྲག་སྐབས་བཙན་བྱོལ་བོད་མིའི་གཞུང་འབྲེལ་མིན་པའི་ཚོགས་པ་ཁག་གིས་གདོང་སེམས་མཉམ་སྐྱེད་ཀྱི་ལས་འགུལ་ཤུགས་ཆེན་སྤེལ་བར་བསྔགས་བརྗོད་དང་སྦྲགས། ད་དུང་བོད་ནང་ཛ་དྲག་གི་གནས་སྟངས་བསྡད་ཡོད་སྟབས། མུ་མཐུད་རིག་པ་བསྒྲིམས་ཏེ་ལས་དོན་འབད་སྒྲུབ་བྱ་རྒྱུ་གལ་ཆེན་ཡིན་སྐོར་སོགས་གསུངས་སོང།
