ད་ཉིན་གསུམ་བཅུའི་དུས་དྲན་དང༌། རང་རེ་བོད་མི་བཙན་བྱོལ་བ་རྣམས་རང་ཡུལ་བཞག་སྟེ་ཕྱི་རྒྱལ་ས་ཐོག་ཏུ་འབྱོར་ནས་མི་ལོ་ཉེར་ལྔ་སོང་བའི་དུས་ཚིགས་ཆེན་མོ་ཞིག་གི་དུས་དྲན་ཡང་ཆབས་ཅིག་ཏུ་འཁེལ་བའི་སྐབས་འདིར། ངས་གཞིས་བྱེས་བོད་མི་རྣམས་ལ་མཛའ་བརྩེའི་ལྷག་བསམ་བཅོས་མིན་གྱི་འཚམས་འདྲི་བྱེད་པ་དང་ཆབས་ཅིག བསྟན་སྲིད་མི་རིགས་སྤྱི་དོན་དུ་ལུས་སྲོག་ཡལ་བར་དོར་བའི་རང་རིགས་རྣམས་ཀྱི་ཆེད་བསླུ་མེད་མཆོག་གསུམ་རྒྱ་མཚོར་གདུང་ཤུགས་དྲག་པོས་གསོལ་འདེབས་ཞུ་རྒྱུ་ཡིན།
ང་ཚོ་ཕྱི་རྒྱལ་ས་ཐོག་ཏུ་འབྱོར་ནས་མི་ལོ་ཉེར་ལྔ་སོང་བའི་དུས་རིང་གི་གནས་ཚུལ་ལ་ཕྱི་མིག་ཅིག་བལྟས་ན། ང་ཚོ་བོད་མི་བཙན་བྱོལ་བ་སྟོང་ཕྲག་བརྒྱ་ལྷག་ཙམ་ཡོད་པ་འདི་དག་རྒྱལ་སྤྱིའི་ནང་གི་བཙན་བྱོལ་བ་གཞན་དག་གི་གྲངས་འབོར་དང་བསྡུར་ན། ང་ཚོའི་མི་གྲངས་མང་པོ་མིན་ཡང༌། བོད་མི་རྣམས་གཙོ་བོའི་གནས་ཡུལ་རྒྱ་གར་མི་གྲངས་དུང་ཕྱུར་མང་པོའི་ཁྲོད་དུ་ཁ་འཐོར་བྱེ་མ་ཆུ་སིམ་ལྟ་བུར་སོང་བ་མ་ཡིན་པར། བོད་མི་སྟོང་ཕྲག་འགའ་ཤས་སྡེ་ཁག་སྡེ་ཁག་ཏུ་བྱས་ནས་སྒྲིག་འཛུགས་གོང་བུའི་རྣམ་པ་གཅིག་གྱུར་དུ་གནས་ཡོད་པ་དང༌། དེ་ཡང་བོད་མི་ཕལ་མོ་ཆེ་རྒྱ་གར་དང༌། བལ་འབྲུག་ནང་སོ་ནམ་ཞིང་ལས་ལ་བརྟེན་ནས་གཞིས་ཆགས་བྱས། གང་འཚམས་ཤིག་ནི་ལག་ཤེས་ལས་རིགས་སྣ་ཚོགས་དང་ཚོང་འཁོས་ལ་བརྟེན་ནས་གནས་ཡོད།
དེ་མིན་ཕྱི་རྒྱལ་ཡུལ་ཁག་སུམ་ཅུའི་ནང་བོད་མི་སྟོང་ཕྲག་གཉིས་གསུམ་བར་ཡུལ་མི་སྤྱི་མཚུངས་ཀྱི་འཚོ་ཐབས་ལ་སྤྱོད་བཞིན་དུ་ཡོད། བུ་ཕྲུག་གཞོན་སྐྱེས་རྣམས་ལ་བོད་ཡིག་གཙོ་གྱུར་མི་རིགས་རང་ཉིད་ཀྱི་རིག་གཞུང་རྣམས་སློབ་སྦྱོང་སྤྲོད་པ་དང་ཆབས་ཅིག དེང་དུས་རིག་གསར་གྱི་ཤེས་ཡོན་ཁག་ཀྱང་སློབ་སྦྱོངས་སྤྲད་ནས་ད་ཆ་བོད་རིགས་ན་གཞོན་ཁག་གཅིག་རྒྱལ་སྤྱིའི་ནང་དེང་རབས་ཡར་ཐོན་ཅན་གྱི་མི་རིགས་ན་གཞོན་གཞན་དག་དང་ཤེས་ཡོན་གནས་ཚད་འདྲ་མཉམ་གྱི་གདན་གྲལ་འཛིན་ཐུབ་པ་བྱུང་ཡོད། ལྷག་པར་དུ་ཆོས་དང་རིག་གཞུང་གི་ཆ་ནས་བཤད་ན། མི་ལོ་སྟོང་ཕྲག་གོང་དུས་རྒྱ་གར་ནས་བོད་དུ་དར་བའི་སྟོན་པ་སངས་རྒྱས་ཀྱི་ཆོས་ཚུལ་ཐེག་པ་ཆེ་ཆུང་སྔགས་བཅས་ཆ་ཚང་བ་དང༌། དེ་དང་འབྲེལ་བའི་རིག་གཞུང་བཟང་པོ་རྣམས་ལ་མི་རབས་ནས་མི་རབས་སྦྲེལ་ཏེ་སློབ་གཉེར་དང༌། ཉམས་ལེན། བདག་གཅེས་བྱས་ཏེ་བོད་ནང་ཉར་ཚགས་བྱས་ཡོད་པ་རྣམས་བར་ལམ་ཉམས་ཆག་གཏོར་བརླག་སྔར་མི་གྲགས་པ་བྱུང་ན་ཡང༌། ང་ཚོ་བོད་ཀྱི་ཕྱི་རོལ་དུ་སླེབས་པ་ཚོས་འབད་རྩོལ་དོན་གཉེར་ཆེན་པོས་རྒྱལ་བའི་བཀའ་དགོངས་འགྲེལ་དང་བཅས་པའི་གསུང་རབ་གང་ན་ཅི་བཞུགས་གསོག་སྒྲུབ་དང་དཔར་བསྐྲུན་བདག་གཉེར། སློབ་སྦྱོང་ཉམས་ལེན་བྱེད་སའི་བསྟི་གནས་བཤད་གྲྭ་སྒྲུབ་གྲྭ་ཁག་མང་གསར་འཛུགས། དེ་དག་གི་ནང་ན་གཞོན་དོན་གཉེར་ཅན་རྣམས་ལ་མདོ་སྔགས་ཆོས་བརྒྱུད་རིག་གཞུང་དང་བཅས་པ་སློབ་འཁྲིད་འཆད་སྤེལ་བྱས་ཏེ་ད་ཆ་ྋརྒྱལ་བའི་བསྟན་པ་ས་སྟེང་འདིར་མི་ནུབ་རྒྱུན་སྐྱོང་ཐུབ་ངེས་ཀྱི་གཞི་རྩ་བརྟན་པོ་ཚུགས་ཡོད་པས་མ་ཚད། སྔར་ཕན་ནང་ཆོས་མ་དར་བའི་འཛམ་གླིང་ཡུལ་ཁག་མང་པོའི་ནང་དུ་ཡང་སངས་རྒྱས་ཀྱི་ཆོས་ཚུལ་སློབ་གཉེར་བྱེད་སའི་བསྟི་གནས་བརྒྱ་ཕྲག་བརྒལ་བ་ཚུགས་ཏེ་འཛམ་གླིང་ཡར་ཐོན་ཤེས་ལྡན་གཟུར་གནས་མི་རིགས་མང་པོས་དོན་གཉེར་སྦྱངས་བརྩོན་ཉམས་ལེན་རྒྱ་ཆེར་བྱེད་བཞིན་པ་རེད།
དེ་བཞིན་བོད་མིའི་རང་དབང་འཐབ་རྩོད་ཀྱི་རྩ་དོན་ལ་མཚོན་ན་འཛམ་གླིང་མཉམ་འབྲེལ་རྒྱལ་ཚོགས་སུ་ཞུ་འབོད་སྔ་ཕྱིར་བྱས་ཏེ་རྒྱལ་ཚོགས་ནང་བོད་དོན་སྐོར་གྲོས་ཆོད་ཐེངས་གསུམ་བཞག་ཡོད་པ་དང༌། དེ་འབྲེལ་བོད་མི་རིགས་དང༌། དེའི་སྐད་ཡིག གོམས་གཤིས། ཆོས་དང་རིག་གཞུང༌། ཆབ་སྲིད་དཔལ་འབྱོར་གྱི་གནས་སྟངས་སོགས་སྒོ་ཀུན་ནས་རྒྱ་མི་རིགས་ལས་ཤིན་ཏུ་ཐ་དད་ཡིན་པ་དང༌། བོད་ནི་མི་ལོ་སྟོང་ཕྲག་བརྒལ་བའི་རྒྱལ་རབས་ལོ་རྒྱུས་ཁུངས་དག་ཡོད་པའི་རང་བཙན་གྱི་རྒྱལ་ཁབ་ཅིག་ཡིན་པའི་གནས་ལུགས་ད་ཆ་འཛམ་གླིང་ཁྱོན་གྱི་རྒྱ་ཆེའི་མི་མང་ནས་ཤེས་རྟོགས་ཇེ་གསལ་དང༌། དྲང་བདེན་ལ་རྒྱབ་སྐྱོར་དགའ་ཞེན་ཇེ་ཆེར་འགྲོ་བཞིན་པ་རེད།
གོང་དུ་རགས་ཙམ་སྨོས་པའི་ལས་དོན་དེ་དག་འགྲུབ་པའི་ཆ་རྐྱེན་གཙོ་བོ་ནི། རྒྱ་གར་གཞུང་དང༌། མི་མང་ནས་ཧིན་བོད་དབར་མི་ལོ་སྟོང་ཕྲག་བརྒལ་བའི་དུས་རིང་ནས་ཆོས་དང་རིག་གཞུང་གི་འབྲེལ་བ་ཆེས་ཟབ་མོ་ཡོད་པའི་ལར་རྒྱ་ཕྱི་ཐག་མ་བོར་བར་ལྷག་བསམ་ཆེན་པོའི་རོགས་རམ་རྒྱ་ཆེ་གནང་བ་དང༌། དེ་བཞིན་དུ་རྒྱལ་སྤྱིའི་ནང་གི་རོགས་རམ་ཚོགས་པ་ཁག བྱམས་སེམས་ཅན་གྱི་སྒེར་མི་མང་པོ། ཞི་བདེ་དྲང་བདེན་ལ་དགའ་བའི་རྒྱལ་ཁབ་དང༌། སྲིད་དོན་མཁས་པ་ཁག་བཅས་ནས་འགྲོ་བ་མིའི་རིགས་གཅིག་གྱུར་གྱི་འདུ་ཤེས་དང༌། མི་དང་མིའི་དབར་བྱམས་བརྩེའི་འདུ་ཤེས་ཀྱིས་དྲངས་པའི་རོགས་རམ་སློབ་སྟོན་གནང་བའི་བཀྲིན་ལས་བྱུངབ་ཡིན་ན། ད་རེས་ལོ་ཉེར་ལྔའི་དུས་ཚིགས་ཀྱི་སྐབས་འདིར། ང་ཚོར་རོགས་རམ་གནང་མཁན་གོང་གསལ་རྣམས་ཀྱི་བཀྲིན་རྗེས་སུ་དྲན་པའི་སྒོ་ནས་ངས་གཞིས་བྱེས་བོད་རྒྱ་ཆེའི་མི་མང་གི་ཚབ་བྱས་ཏེ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། དུས་རབས་ཉི་ཤུ་པ་འདིའི་ནང་ང་ཚོ་བོད་མི་རིགས་ཀྱི་ལོ་རྒྱུས་ཐོག་བྱུང་མ་མྱོང་བའི་དཀའ་སྡུག་ཚད་མེད་པ་ཞིག་མྱོང་དགོས་བྱུང་བའི་དུས་སྐབས་འདིར། རྒྱ་གར་གཞུང་གིས་མཚོན་འཛམ་གླིང་ཁྱོན་གྱི་རྒྱ་ཆེའི་མི་མང་ནས་ང་ཚོར་ཤ་ཚའི་རྒྱབ་སྐྱོར་རོགས་རམ་འདི་ལྟ་བུ་གནང་བ་ནི་འཛམ་གླིང་གི་རྒྱལ་རབས་ལོ་རྒྱུས་སུ་འཁོད་དེ་ཡུན་ནས་ཡུན་དུ་མ་བརྗེད་མི་ནུབ་པར་གནས་རྒྱུ་རེད།
ཡར་རྒྱས་ཆེ་ཆུང་དང༌། དཔལ་འབྱོར་བཟང་ཞན་ལ་མ་ལྟོས་པར་འཛམ་གླིང་འདིའི་སྟེང་གི་རྒྱལ་ཁབ་རྣམས་དང༌། ཡུལ་སྡེ་ཕན་ཚུན། གྲོང་པ་ཁྱིམ་མཚེས། མདོར་ན་ལས་གྲྭའམ། ཁྱིམ་ཚང་གཅིག་གི་ནང་མི་ཚུན་ཆད། མིའི་རིགས་ཐམས་ཅད་ཕན་ཚུན་གཅིག་ལ་གཅིག་བརྟེན་གྱི་སྒོ་ནས་འཚོ་ཞིང་གནས་དགོས་པ་དང༌། ཐམས་ཅད་ཀྱང་བདེ་བ་འདོད་ཅིང་སྡུག་བསྔལ་མི་འདོད་པའི་བསམ་ཚུལ་གཅིག་གྱུར་ཡིན་པ་བཅས་ཤེས་རྟོགས་གསལ་པོ་ཐུབ་པ་བྱས་ཏེ། མི་དང་མིའི་བར་ལ་ཕན་ཚུན་བྱམས་པ་དང་བརྩེ་བའི་བསམ་ཚུལ་འཛིན་པ་དང༌། དྲང་བདེན་རྩ་བར་བཟུང་བའི་ཉན་ཤེས་གོ་ཤེས་བཅས་བྱས་ན། ཆེ་ས་རྒྱལ་སྤྱིའི་ནང་གི་དཀའ་རྙོག་ནས། ཆུང་ས་ཁྱིམ་ཚང་གཅིག་ནང་གི་དཀའ་རྙོག་ཐམས་ཅད་ངང་གིས་སེལ་ཏེ་གཞི་ནས་མིརྣམས་ཞི་བདེ་བག་ཕེབས་སུ་གནས་ཐུབ་པའི་རེ་བ་ཡོད། ངང་ཚུལ་དེ་ལས་ལྡོག་སྟེ་རང་རྒྱལ་གཞན་ཕམ་དང༌། མཐོ་གནོན་ཕྲག་དོག་ཁོ་ནའི་འདོད་ཚུལ་བཟུང་ན། འཛམ་གླིང་སྤྱི་དང་བྱེ་བྲག་ཚང་མར་ཞི་བདེ་བག་ཕེབས་ནམ་ཡང་འབྱུང་མི་ཐུབ་པས། མི་དང་མིའི་བར་ཕན་ཚུན་བྱམས་བརྩེའི་འབྲེལ་བ་དམ་ཟབ་བྱེད་རྒྱུ་དེ་མིའི་རིགས་སྤྱིའི་བདེ་རྩར་ཧ་ཅང་དགོས་གལ་ཆེན་པོར་མཐོང་གི་འདུག
ཉེ་བའི་ལོ་བཞི་ལྔ་ཚུན་བོད་ནང་གི་གནས་སྟངས་བརྗོད་ན། བར་ལམ་མི་ལོ་ཉི་ཤུ་ཙམ་གྱི་རིང་ནག་མེད་བོད་མི་མང་པོ་བཙོན་འཇུག་བྱས་པ་ཕལ་མོ་ཆེ་གློད་བཀྲོལ་བཏང་བ་དང༌། བོད་ཕྱི་ནང་དབར་འགྲིམས་འགྲུལ་འགྲོ་འོང་གི་གོ་སྐབས་བྱུང་ནས་མ་ཤི་གསོན་བྲལ་དུ་གྱུར་པའི་ཕ་མ་བུ་ཕྲུག་གཉེན་གྲོགས་སོགས་ཐུག་འཕྲད་ཐུབ་པ། སོ་ནམ་འབྲོག་ལས་ཀྱི་འགན་གཙང་ཁྱིམ་དུད་སོ་སོར་སྤྲད་པའི་ཐོག ཞོར་ལས་ཐོན་སྐྱེད་དང༌། ཉོ་ཚོང་ཐབས་ཤེས་བྱེད་རྒྱུའི་གོ་སྐབས་སྤྲད་པ་ལ་བརྟེན་ནས། ལྷ་ས་གཙོ་གྱུར་ཡུལ་གྲོང་འགའ་ཤས་ལ་མང་ཚོགས་ཀྱི་ཟས་གོས་གནས་སྟངས་ཅུང་ཟད་དྲག་ཏུ་ཕྱིན་པ༑ བར་ལམ་བོད་ཡིག་གི་བརྡ་དག་ཡོངས་རྫོགས་བདལ་བཤིགས་བཏང་བ་སླར་གསོའི་ཐོག བོད་ཡིག་གི་རྩོམ་བྲིས་རིགས་དཔར་བསྐྲུན་བྱེད་པ། མཚམས་ཚིགས་མེད་པའི་ངལ་རྩོལ་ལ་འར་འདེད་ཉུང་དུ་སོང་ནས་མང་ཚོགས་ལ་དབུགས་ངལ་གསོ་བའི་གོ་སྐབས་ཕྲན་བུ་ཐོབ་པ་བཅས་བྱུང་ཡོད། གཏོར་བཤིགས་བཏང་བའི་དགོན་པ་འགའ་ཤས་ཉམས་གསོ་བྱས་ཏེ་ཆོས་དད་རང་མོས་ཡིན་ཞེས་འུར་སྒྲོག་བྱེད་བཞིན་དུ་ཡོད་ཀྱང༌། དགོན་པའི་ནང་གྲྭ་པ་རྒྱུན་སྡོད་ཐོག་ཆོས་ཀྱི་འཆད་ཉན་དང༌། སློབ་སྦྱོངས་ཉམས་ལེན་བྱེད་པ་ལ་འགོག་རྐྱེན་སྣ་མང་གནས་བཞིན་པ་རེད།
དེ་བཞིན་དུ་བོད་ཡིག་གི་གནས་ཚུལ་ལ་མཚོན་ན། བོད་ཡིག་ཐོག་སྤྱིར་བཏང་སྒྲུང་གཏམ་ལོ་རྒྱུས་འདྲ་རྩོམ་བྲིས་དཔར་བསྐྲུན་བྱེད་པ་ཙམ་ལས། བོད་ཡིག་གིས་བོད་མིའི་ཆབ་སྲིད་དཔལ་འབྱོར་སོགས་ཡུལ་ལུང་འཛིན་སྐྱོང་གི་ལས་དོན་བྱེད་པའི་གོ་སྐབས་ད་དུང་མ་ཐོབ་པར་སྐད་ཡིག་གཞན་ཞིག་བེད་སྤྱོད་བྱེད་བཞིན་པ་རེད། གནས་ཚུལ་དེ་དག་གིས་བོད་ཡུལ་གྱི་སྲིད་དབང་བོད་ཡིག་མི་ཤེས་མཁན་གྱི་མི་རིགས་གཞན་ཞིག་གིས་འཛིན་གྱི་ཡོད་པའི་རྟགས་མཚན་གསལ་པོར་བསྟན་གྱི་ཡོད་པས་མ་ཚད། ཆོས་དད་རང་མོས་ཟེར་བ་དང༌། མི་རིགས་རང་སྐྱོང་ཟེར་བའི་སྐད་ཆ་འདྲ་ཆགས་པོ་དེ་ཚོ་དངོས་དོན་ཐོག་མིང་ཚིག་སྐམ་པོ་ཞིག་རང་ཡིན་པ་གསལ་པོར་མཚོན་པ་རེད།
ད་དུང་ཉེ་བའི་ཆར་གནས་ཚུལ་གཞན་ཞིག་ལྷགས་པ་ནི། ཉེས་དོན་ཉེས་གསོག་གི་བྱ་སྤྱོད་ལ་བརྡུང་བརྡེག་ནན་པོ་གཏོང་དགོས་ཞེས་ནག་ཉེས་ཡོད་མེད་སྣ་ཚོགས་པའི་མི་སྟོང་ཕྲག་མང་པོ་འཛིན་བཟུང་བཙོན་འཇུག་བྱེད་པ་དང༌། སྡུག་སྦྱོང་ངལ་རྩོལ་དུ་གཏོང་བ། ངོ་ལྐོག་ཅི་རིགས་ཀྱི་སྒོ་ནས་དམར་གསོད་གཏོང་བའི་ལས་འགུལ་གདུག་རྩུབ་ཅན་ཞིག་བསླངས་པ་དེས་མི་རྣམས་སླར་ཡང་བློ་བག་མི་ཕེབས་པར་དངངས་སྐྲག་ཆེན་པོའི་འོག་གནས་དགོས་པ་ཞིག་ཆགས་པ་རེད། ལག་ཏུ་མཚོན་ཆ་ཡོད་པའི་བློ་བཤེད་ཀྱིས་མིའི་ལུས་སྲོག་ལ་ཕངས་མེད་ལག་རྩེད་བྱེད་པའི་གདུག་རྩུབ་ཀྱི་སྤྱོད་ཚུལ་དེས་མིའི་བློ་སེམས་དབང་བསྒྱུར་མི་ཐུབ་ལ། མི་དང་མིའི་དབར་མཛའ་མཐུན་མཉམ་འགྲོགས་ཡོང་བ་ལ་ཡང་ཕན་ཐོགས་འབྱུང་མི་ཐུབ། ད་ལྟ་ཕན་བོད་མི་དམག་ཐོག་བསད་པ་དང༌། ཁྲིམས་ཐོག་བསད་པ། ལྟོགས་ཤིར་བཏང་བ། སྡུག་ཤིར་བཏང་བ། སྡུག་སྦྱོངས་མ་བཟོད་པར་རང་སྲོག་བཅད་པ་བཅས་བསྡོམས་ན་མི་གྲངས་འབུམ་ཕྲག་བཅུ་ཙམ་ཟིན་ཡོད་ཀྱང༌། དེས་ཕན་ཐོགས་གང་བྱུང་སོང་ངམ།
མི་རྣམས་ལ་མེད་དུ་མི་རུང་བའི་འཚོ་ཐབས་འགྲིགས་ངེས་ཡོང་བ་དང༌། ཤེས་ཡོན་སློབ་གཉེར་འདོད་ཁེངས་བྱེད་ཐུབ་པ༑ རང་རང་གི་བསམ་འདུན་སྒྲུབ་པའི་གོ་སྐབས་བཅས་བྱུང་ན། རིམ་པས་ཕན་ཚུན་གཅིག་ཡིད་གཅིག་ཆེས་དང༌། ཕན་ཚུན་མཛའ་མཐུན་མཉམ་འགྲོགས་ཐུབ་པ་ཞིག་འབྱུང་ངེས། གལ་ཏེ་ཡུལ་ནང་ལྟ་སྤྱོད་མི་མཐུན་པའི་མི་ཡོད་ན་དེ་གྲས་ཡུལ་ནས་ཕྱིར་འབུད་བྱས་པས་མི་འགྲིགས་པ་གང་ཡོད་དམ། གང་ལྟར་ཡང་གཞིས་བྱེས་བོད་མི་རྣམས་ནས་ཅལ་འདྲོགས་དང༌། འཇིགས་ཞུམ་སྤངས་ཏེ་དངོས་ཡོད་གནས་ཚུལ་ངོ་མར་ཞིབ་བརྟག་ཐོག རྒྱལ་སྤྱིའི་ནང་གི་མི་རིགས་གཞན་དག་དང་འདྲ་བར་ང་ཚོ་བོད་མི་རིགས་ལ་འོས་བབས་ཐོབ་ཐང་ཡོད་ངེས་བོད་ཡུལ་བོད་མིས་འཛིན་སྐྱོང་ཅི་བདེར་བྱེད་པའི་ཁེ་དབང་སླར་གསོའི་དོན་དུ་ལྷག་བསམ་འབད་བརྩོན་ཆེ་བསྐྱེད་བྱེད་དགོས། འཇིག་རྟེན་ཀུན་ཏུ་ནད་མུག་འཁྲུག་རྩོད་སོགས་མི་མཐུན་རྒྱུ་ཚོགས་ཅི་མཆིས་ཞི་ནས། འགྲོ་རྣམས་མཛའ་མཐུན་ཞི་བདེའི་དཔལ་ལ་སྤྱོད་པའི་སྨོན་འདུན་བཅས།། །།
