ད་ལྟའི་དུས་འདིར་ང་ཚོ་གཞན་ཡུལ་དུ་ཡོད་ཀྱང་ནམ་ཞིག་ག་ང་ཚོ་ཕྱིར་རང་ཡུལ་ཏུ་ལོག་རྒྱུ་ཡིན་ལ། ང་ཚོས་བོད་ཀྱི་རྒྱལ་དར་བོད་རང་གི་ས་ཐོག་ཏུ་སྒྲེང་འཛུགས་བྱ་རྒྱུ་ཡིན་ཟེར།
ཕྱིར་རང་ཡུལ་དུ་ལོག་པ་ཞེས་པའི་ལས་འགུལ་ཐེངས་གཉིས་པའི་གོམ་བགྲོད་པ་རྣམས་ཕྱི་ཚེས་ ༢༡ ཉིན་རྒྱ་གར་དང་བོད་ཀྱི་ས་མཚམས་ནས་རྒྱ་གར་མཐའ་སྲུང་དམག་མིས་འཛིན་བཟུང་གིས་ཉིན་གྲངས་གསུམ་རིང་བཀག་ཉར་བྱས་རྗེས་ཕྱིར་བཞུགས་སྒར་དུ་འབྱོར་ཡོད་པ་དང༌། དེ་རིང་ཞོགས་པའི་ཆུ་ཚོད་ ༩ དང་ཕྱེད་ཀའི་སྟེང་བཞུགས་སྒར་ཀིརྟི་བྱེས་པ་གྲྭ་ཚང་གི་དཔེ་མཛོད་ཁང་དུ་གོམ་བགྲོད་པ་ཚོ་དངོས་སུ་ཕེབས་ཏེ་གསར་འགོད་གསལ་བསྒྲགས་གནང་སོང། སྐབས་དེར་བླ་མ་ཤིང་བཟའ་རིན་པོ་ཆེས་གསུངས་དོན། ང་ཚོའི་བོད་ནང་ལོག་པའི་ལས་འགུལ་འདི་ ༢༠༠༨ ལོར་ཐོག་མར་མགོ་བརྩམས་པ་དང༌། སྐབས་དེར་མི་ ༥༩ ལྷག་གི་ཞི་བའི་གོམ་བགྲོད་བྱས་ཏེ་བོད་ཀྱི་ས་མཚམས་དང་ཀེ་ལོ་མིས་ཊར་ ༢༧ ཡོད་པའི་མཚམས་སུ་སླེབས་སྐབས་རྒྱ་གར་དམག་མིས་འཇུས་པ་རེད། དེ་ལྟར་ཡང༌། ང་ཚོས་དམ་བཅའ་བརྟན་པོ་སྙིང་ལ་བཅངས་ཏེ་ཟླ་འདིའི་ཚེས་ ༡༠ ཉིན་གདན་ས་གསུམ་གྱི་གྲྭ་བ་ཁོ་ནར་གོ་སྒྲིག་བྱས་ཏེ་གྲྭ་ས་ནས་ཐོན་ཡོང་བ་ཡིན་ལ། ཕྱི་ཚེས་ ༡༤ ཉིན་རྒྱལ་ས་ལྡི་ལི་ནས་མུ་མཐུད་བོད་ནང་ལོག་པའི་ལས་འགུལ་གཉིས་པ་མགོ་བཙུགས་ཏེ་གོམ་བགྲོད་བྱས་ཤིང། ཕྱི་ཚེས་ ༡༦ ཉིན་ལམ་ཁ་ཡོངས་སུ་གངས་བརྒྱབས་ཡོད་སྟབས་ལས་འགུལ་བ་ཚོ་རྐང་ཐང་ལ་འགྲོ་དགོས་བྱུང་བ་དང༌། ཉིན་གྲངས་བདུན་ལྷག་གོམ་བགྲོད་བྱས་ཏེ་ཕྱི་ཚེས་ ༢༡ ཉིན་སུམ་མདོ་ཞེས་པའི་ས་མཚམས་སུ་སླེབས་མ་ཐག་རྒྱ་གར་དམག་མིས་འཇུས་ཏེ་ཕྱིར་ལོག་དགོས་བྱུང་ཡོད། ང་ཚོས་ཞེ་བོ་སྒྲུབ་ཡོད་པ་དང་འཇོན་ཡོད་ཅེས་གསར་འགོད་གསལ་བསྒྲགས་བསྐྱངས་པ་མིན་པར་རྒྱ་ཆེའི་མི་དམངས་ལ་དགོངས་དག་ཞུ་ཆེད་འདི་ལྟར་གསར་འགོད་གསལ་བསྒྲགས་བསྐྱངས་པ་ཡིན་ལ། ཐེངས་འདིའི་གོམ་བགྲོད་ཀྱི་དམིགས་ཡུལ་མ་འགྲུབ་པས་ང་ཚོར་བློ་ཕམ་ཆེན་པོ་བྱུང་ཡོད། ཅེས་དང༌། ཡང་ཐེངས་འདིའི་གོམ་བགྲོད་གསང་བ་བྱས་པའི་ཐད་ལ་གསུངས་དོན། ཁོང་གིས། ད་ལྟའི་ཆར་ང་ཚོའི་འཐབ་རྩོད་དེ་རྒྱལ་ཁབ་གཉིས་ཀྱི་བར་མཚམས་ཀྱི་འཐབ་རྩོད་ཞིག་ཆགས་ཡོད་སྟབས། ལས་འགུལ་གང་ཞིག་ཡིན་ཡང་མགོ་བརྩམས་མ་ཐག་ནས་བཟུང་ང་ཚོར་དཀའ་ངལ་གང་མང་ཞིག་འཕྲད་ཡོང་གི་ཡོད་པས་ང་ཚོས་གསང་བ་བྱས་དགོས་བྱུང་བ་རེད། ཐེངས་འདིའི་ལས་འགུལ་ལ་གྲུབ་འབྲས་མ་བྱུང་ཡང༌། སྔོན་མ་ནས་ང་ཚོས་ནམ་ཞིག་བོད་ཀྱི་ས་མཚམས་སུ་རྒྱལ་དར་སྒྲེང་འཛུགས་བྱ་རྒྱུའི་དམ་བཅའ་བཞག་ཡོད་ལ། ད་ལྟ་ཡང་ང་ཚོའི་དམ་བཅའ་ལ་འགྱུར་བ་མེད། ཐེངས་འདིའི་ང་ཚོའི་འཐབ་རྩོད་དེ་ཕྱོགས་གཅིག་ནས་ཕམ་ཁ་ཞིག་རེད་ལ། ཕྱོགས་གཞན་ཞིག་ནས་ང་ཚོའི་རྒྱལ་ཁ་ཅིག་ལ་ངོས་འཛིན་བྱེད་བཞིན་ཡོད། ཅེས་གསུངས་བྱུང། དེ་བཞིན་གོམ་བགྲོད་པ་གྲྭ་བློ་བཟང་སྦྱིན་པ་ལགས་དང་གྲྭ་བློ་བཟང་བསྟན་དར་ལགས་རྣམ་གཉིས་ཀྱིས། གོམ་བགྲོད་ཀྱི་བརྒྱུད་རིམ་ངོ་སྤྲོད་དང་འབྲེལ་གསུངས་དོན། ང་ཚོར་ལམ་ཁྲིད་པ་དང་ས་ཕྱོགས་རྒྱུས་མངའ་ཡོད་མཁན་གྱི་མི་གཅིག་མེད་ཀྱང་དཀའ་ངལ་གང་མང་ལ་གདོང་ལེན་བྱས་ཏེ་ཆོད་སེམས་བརྟན་པོས་ཉིན་གྲངས་བདུན་ལ་གོམ་བགྲོད་བྱས་ཀྱང་ལམ་འགྲོ་མ་རྒྱུགས་པས་ཕྱིར་ལོག་དགོས་བྱུང་བ་རེད། ཡིན་ཡང། ཐེངས་འདིར་ང་ཚོས་རྒྱ་གར་དང་བོད་ཀྱི་རྒྱལ་དར་གཉིས་ཁུར་ཡོད་ལ། ས་མཚམས་རྒྱ་གར་དམག་མིས་ང་ཚོར་རྒྱ་མིའི་ས་མཚམས་ཡིན་ཚུལ་བརྗོད་པར། ང་ཚོས་ས་མཚམས་དེ་རྒྱ་གར་དང་རྒྱ་མི་གཉིས་ཀྱི་ས་མཚམས་མིན་པར་བོད་དང་རྒྱ་གར་གཉིས་ཀྱི་ས་མཚམས་ཡིན་ཚུལ་གསལ་བོར་ར་སྤྲོད་བྱས་པ་ཡིན་ལ། འཛིན་བཟུང་བྱས་རྗེས་རྒྱལ་མཚམས་ནས་༧གོང་ས་མཆོག་བོད་ལ་གདན་འདྲེན་ཞུ་དགོས། བོད་ལ་འགྲོ་བ་མིའི་ཐོབ་ཐང་དང་རང་དབང་དགོས། པཎ་ཆེན་ཆུང་སྲིད་རིན་པོ་ཆེ་གློད་གྲོལ་བྱ་དགོས་ཞེས་སྐད་འབོད་བྱས་རྗེས་གོམ་བགྲོད་མཚམས་འཇོག་བྱ་དགོས་བྱུང༌། ཐེངས་འདིར་ང་ཚོ་མི་རེ་རེའི་ངོས་ནས་ནུས་པ་གང་ཡོད་བཏོན་ཏེ་གོམ་བགྲོད་དུ་ཆས་པ་ཡིན་སྟབས་མ་འོངས་པར་རེ་སྐུལ་གང་ཡང་མེད། ཡིན་ཡང༌། རྒྱ་མིའི་གཞུང་ལ་འབོད་སྐུལ་ཞུ་རྒྱུ་ཞིག་ལ། ད་ལྟའི་དུས་འདིར་ང་ཚོ་གཞན་ཡུལ་དུ་ཡོད་ཀྱང་ནམ་ཞིག་ང་ཚོ་ཕྱིར་རང་ཡུལ་ཏུ་ལོག་རྒྱུ་ཡིན་ལ། ང་ཚོས་བོད་ཀྱི་རྒྱལ་དར་བོད་རང་གི་ས་ཐོག་ཏུ་སྒྲེང་འཛུགས་བྱ་རྒྱུ་ཡིན། ཅེས་དང་། ༧གོང་ས་སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་རྒྱུ་དང་། པཎ་ཆེན་ཆུང་སྲིད་གཙོས་ཆབ་སྲིད་བཙོན་པ་ཡོངས་གློད་གྲོལ་གཏོང་དགོས། ཞེས་བརྗོད་བྱུང།
དཔའ་ངར་ཞུམ་མེད་ཀྱི་ཕོ་རྒོད་དེ་ཚོ་ངོ་མ་ཡག་སོང་ང།་
ཞུམ་མེད་ཀྱི་སྙིང་སྟོབས་རྒྱལ་གྱུར་ཅིག