སྲིད་དབང་སྒེར་འཛིན་པས་མང་གཙོ་གླེང་བར་ལྟ་བ་ཞེས་པའི་དཔེ་དེབ་འདི་ནི། སྤྱི་ལོ་ ༢༠༠༩ ལོའི་ཟླ་ ༤ བར་བཞུགས་སྒར་ངྷ་རམ་ས་ལའི་ཤེས་བྱ་ཀུན་འདུས་རྩོམ་སྒྲིག་ལྟེ་གནས་ནས་དཔར་སྐྲུན་དང་འགྲེམ་སྤེལ་བྱས་ཡོད། དཔེ་དེབ་འདིར་གཙོ་བོ་དཔྱད་རྩོམ་དང་དགག་སྒྲུབ་རྩོམ་ཡིག་ཁག་ཅིག་བསྡུ་སྒྲིག་བྱས་ཡོད་པ་དང་། སྡོམ་པའི་ཤོག་ངོས་ ༡༡༨ དང་རྩོམ་ཡིག་ ༤ ཙམ་བདམས་བཀོད་བྱས་ཡོད། དཔེ་དེབ་འདིར་བསྡུས་པའི་རྩོམ་ཡིག་དག་ནི། ལོ་སྔ་ཕྱིར་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ་༧གོང་ས་མཆོག་ལ་མཚན་སྨོད་དང་འཁྱོག་བཤད། དེ་བཞིན། བཙན་བྱོལ་བོད་གཞུང་དམངས་གཉིས་ལ་ཉེས་འཛུགས་དང་སྐྱོན་བརྗོད་འདྲ་མིན་བྱས་པ་དག་ལ། རྒྱུ་མཚན་དང་གནས་ལུགས་ཀྱིས་དངོས་ཡོད་གནས་ཚུལ་ར་སྤྲོད་བྱས་ཡོད།
དཔེ་དེབ་འདིར་རྩོམ་པ་པོ་བཀྲ་ཤིས་ཟླ་བ་ལགས་ཀྱིས་༼ལུག་མགོ་བཀལ་ནས་ཁྱི་ཤ་འཚོང་བ་༽ཞེས་པའི་རྩོམ་ཡིག་གི་ཀླད་ཀྱི་གཏམ་དུ་བཀོད་དོན། རྒྱ་ནག་གཞུང་གིས་བོད་ཐོག་ཏུ་འཛིན་པའི་བཅོས་མའི་སྲིད་ཇུས་རྫུན་རྐུབ་བརྡོལ་ནས་གཅིག་ཐོག་གཉིས་བརྩེགས་ཕམ་ཉེས་རིམ་པར་བྱུང་བ་དང་། ༸གོང་ས་སྐྱབས་མགོན་ཆེན་པོ་མཆོག་གི་གནམ་མཁར་མི་ཤོང་བའི་རླབས་ཆེན་ཆོས་སྲིད་ཀྱི་མཛད་འཕྲིན་ཁག་དབྱར་གྱི་ཆུ་གཏེར་རྒྱས་པ་ལྟར་གོང་ནས་གོང་དུ་འཕེལ་ཞིང། བོད་དོན་རྒྱལ་སྤྱི་ཅན་ལ་ཁ་ཕྱོགས་པའི་རླབས་ཆེན་བྱ་བཞག་ལ་འཕུར་མཆོང་རང་བཞིན་གྱི་གྲུབ་འབྲས་གཡུར་དུ་ཟ་བ་ཐོབ་པ། བོད་མིའི་རང་དབང་འཐབ་བརྩོད་ལ་ལོ་རྒྱུས་རང་བཞིན་གྱི་འགག་གྲོལ་གསར་བ་བྱུང་བ་དང་བཅས་ཀྱིས་རྒྱ་གཞུང་གི་འབྲེལ་ཡོད་ལས་ཁུངས་ཁག་དང་དཔོན་རིགས་རུ་ཚོགས་རྣམས་འཇིགས་སྣང་ཚད་མེད་ཚད་མེད་སྐྱེས་པ་དང་། གནས་ལུགས་ཀྱི་རྒྱབ་བརྟེན་མེད་པའི་གནས་སྟངས་དེ་འདྲའི་སྐབས་ལ། ག་དུས་ཡིན་རུང་གང་བྱེད་འདི་བྱེད་མེད་པར་གྱུར་པར་བརྟེན། མཐར་ཁོང་ཚོས་རང་གི་གཤམ་འོག་ཏུ་ཡོད་པའི་མི་རྣམས་ལ་བཙན་བཏང་ནས་མི་བདེན་རྫུན་སྒྲིག་གི་རྩོམ་འཆལ་འབྲི་རུ་འཇུག་གིན་ཡོད་ཅིང་། རྩོམ་འཆལ་ནང་ཐོག་མཐའ་བར་གསུམ་དུ་༧གོང་ས་མཆོག་དང་ཁོང་གིས་དབུ་ཁྲིད་གནང་བའི་བཙན་བྱོལ་བོད་གཞུང་ནི། རྦད་དེ་སྲིད་དབང་སྒེར་སྤྱོད་ཀྱི་ལམ་ལུགས་ཡིན་པ་རྩལ་བཏོན་བྱས་ཏེ། ཕམ་ཁ་བརྒྱ་ཕྲག་ཕྱིན་པའི་རེ་བ་དེ་སླར་ཡང་སྒྲུབ་ཨེ་ཐུབ་སྙམ་པའི་སྟོང་བསམ་ཞིག་བཅངས་ཡོད། ཅེས་བརྗོད་འདུག
ལན་འདེབས་ཀྱི་རྩོམ་ཡིག་ཁག་ནི། སྤྱི་ལོ་ ༢༠༠༨ ལོའི་ཟླ་ ༡༢ པའི་ཚེས་ ༡༨ ཉིན་ཀྲུང་གོའི་བོད་ལྗོངས་དྲ་བ་ཞེས་པའི་ཐོག་ཏཱ་ལའི་རུ་ཚོགས་ཀྱི་ཆོས་སྲིད་ཟུང་འབྲེལ་གྱི་སྲིད་དབང་སྒེར་གཅོད་ཀྱི་ངོ་བོར་ལྟ་བ། ཞེས་པར་ངྷ་རམ་ས་ལའི་རྩོམ་པ་པོ་ཟླ་བ་བཀྲ་ཤིས་ལགས་ཀྱིས་དཔྱད་བརྗོད། ༼ ལུག་མགོ་བཀལ་ནས་ཁྱི་ཤ་འཚོང་བ ༽ ཞེས་པ་དང་། ངྷ་སའི་རྩོམ་པ་པོ་བཀྲ་ཤིས་དོན་འགྲུབ་ལགས་ཀྱིས། བོད་ལྗོངས་ཉིན་རེ་ཚགས་པར་སྟེང་གི་ཡེ་རྡོར་ཟེར་བའི་འཁྱོག་བརྗོད་ལ་དཔྱད་གཏམ་སྤེལ་བ། ༼ སྲིད་དབང་སྒེར་འཛིན་པས་མང་གཙོ་གླེང་བར་ལྟ་བ༽ ཞེས་པ། དེ་བཞིན། སྔར་ལོའི་ཟླ་ ༡༢ ཚེས་ ༡༢ ཉིན་ཡེ་རྡོར་ཟེར་བས་པེ་ཅིན་ཞིན་ཧཱ་གསར་འགྱུར་སྟེང་འཁྱོག་བཤད་བྱས་པར། ངྷ་རམ་ས་ལའི་རྩོམ་པ་པོ་ཁྲི་ཀའི་མཁྱེན་རབ་ལགས་ཀྱིས་༼ ཡེ་རྡོར་མིང་ཅན་གྱི་འཁྱོག་བཤད་ལ་གསལ་བཤད ༽ ཅེས་པ། ཀྲུང་གོའི་བོད་ཀྱི་གསར་འགྱུར་དྲ་བ་ཟེར་བའི་ཚགས་པར་སྟེང་གི་ཡེ་རྡོར་གྱི་དཔྱད་གཏམ། ཏཱ་ལའི་རུ་ཚོགས་ཀྱི་ཆོས་སྲིད་ཟུང་འབྲེལ་གྱི་སྲིད་དབང་སྒེར་གཅོད་ཀྱི་ངོ་བོར་ལྟ་བ། ཞེས་པའི་རྩོམ་ཡིག་དེར་ངྷ་རམ་ས་ལའི་རྩོམ་པ་པོ་ཁྱུང་སྲས་རྒྱ་རིགས་ཐར་ལགས་ཀྱིས་བྲིས་པའི་༼ སྲིད་དབང་སྒེར་གཅོད་ཀྱི་ངོ་བོ་དངོས་མ་འཚོལ་བ་ ༽ ཞེས་བ་བཅས་བསྡུས་བཀོད་ཡོད།
ཁྱུང་སྲས་རྒྱ་རིག་ཐར་ལ་ཐུགས་རྗེ་ཆེ་ཞུ་རྒྱུ་ཡིན།ཁྱེད་ཀྱིས་བྲིས་པའི་སྲིད་དབང་སྒེར་གཅོད་ཀྱི་ངོ་བོ་དངོས་མ་འཚོལ་བ་ཞེས་པ་ཚར་གསུམ་ཞིབ་ཏུ་བཀླགས་པ་ཡིན།ཧ་ལས་པའི་ཡག་པོ་མཐོང་སོང༌།
དེབ་འདི་མགོ་ནས་མཇུག་བར་དུ་བཀླགས་པ་ཡིན། དཔེ་ཡག་པོ་འདུག་གང་ལྟར་ལན་ཕོག་ཀྱང་རུང་མ་ཕོག་རུང་ཁོང་རྣམ་པས་འདི་ལྟར་བྱས་པ་ཙམ་གྱིས་གཟི་བརྗིད་རེད། རྩོམ་པ་པོ་དང། ལོ་རྒྱུས་མཁས་དབང་རྣམས་ཀྱིས་འདི་ལྟ་བུ་མང་ཙམ་འབྲི་རོགས་གནང་ན་ད་གཟོད་རྒྱ་དམར་གྱི་ལྐོག་གཡོ་ངན་གསུམ་གྱིས་བསྐྲུན་པའི་དཔེ་ཚོགས་རྣམས་ཀྱིས་དུས་ནམ་ཡང་བདེན་ཁ་ཞིག་སྟེར་མི་ཐུབ།
ལས་གཞི་འདི་འདྲ་སྤེལ་བར་དགའ་བསུ་ཡོད། ཡི་རངས་ཡོད། བསྔགས་བརྗོད་ཡོད། དྲང་པོར་བཤད་ན། ལས་ཀ་འདི་རིགས་བཙན་བྱོལ་ཤེས་ཡོན་པ་ཚོས་གླེང་ཤེས་ཀི་མེད་པའམ། ལས་འདུན་མེད་པའི་གྲས་ཀྱང་རེད་སྙམ།
དངོས་ནས་དགའ་བསུ་ཡོད། ཤེས་བྱ་ཀུན་འདུས་ཚང་གི་རྩོམ་སྒྲིག་པ་ཡོངས་ལ་ཐུགས་རྗེ་ཆེ་ཞུ།