ངེས་པ་དོན་གྱིས་བླ་མའི་མཛད་པ་སྐྱོང་གི་འདུག

ང་ཚོའི་ཚོགས་པ་འདི་ད་ལྟའི་ཆར་གཞོན་སྐྱེས་ལྟ་བུ་ཆགས་བསྡད་ཡོད། ལོ་ལྔ་བ་གཞི་ནས་འགྲོ་བཞིན་པ་རེད། ལོ་བཞིའི་ནང་དུ་གྲུབ་འབྲས་ཐོན་རྒྱུར་དཀའ་ངལ་ཁག་པོ་རེད། ཡིན་ནའང་། ཕྲུ་གུ་གསུམ་བཞི་ཞིག་ད་ལོར་བོད་ཁྱིམ་སློབ་གྲྭའི་ཡིག་རྒྱུགས་མཉམ་དུ་འགྲོ་ཐུབ་རྒྱུར་འབད་བརྩོན་བྱེད་ཀྱིན་ཡོད།

ཕྱི་ཚེས་ ༢༩ ཉིན་གྱི་གནམ་གཤིས་དེ་ཙམ་བཟང་རྒྱུ་མེད་ནའང་། ཆར་བ་ཟམ་ཟིམ་ཞིག་ལས་འབབ་ཀྱིན་མེད་སྟབས་ཞོགས་པའི་ཆུ་ཚོད་ ༩ དང་སྐར་མ་ ༣༠ ཙམ་ལ་ང་སྦེལ་ཀོབ་ནས་ཕན་བདེ་དགའ་ཚལ་གླིང་དུ་གསར་འགོད་དུ་བསྐྱོད། མའེ་སོར་དུ་འགྲོ་བའི་གཞུང་ལམ་ཆེན་མོའི་ལམ་ཟུར་དུ་ཆགས་པའི་ཕན་བདེ་དགའ་ཚལ་གླིང་སྨུག་སྤྲིན་བན་བུན་ཞིག་གིས་བཏུམ་འདུག་ལ། ང་ས་དེར་འབྱོར་བ་དང་ཆར་བའང་སྔར་ལས་འབབ་ཤུགས་ཆེ་རུ་ཕྱིན་སོང་། ལྗང་མདོག་གིས་བརྒྱན་པའི་དགའ་ཚལ་གླིང་གི་ཁོ་ར་ཁོར་ཡུག་ནི་མཛེས་ཤིང་ཡུལ་དུ་འོངས་པ་ཞིག་ཡིན་པ་མ་ཟད། གཞི་ཁྱོན་ལ་ས་ཆ་ཨེ་ཀ་བཞི་ལྷག་ཙམ་ཡོད་པའི་ཁོར་ཡུག་ཀུན་ཏུ་ཤོག་སྙིགས་དང་མི་གཙང་བའི་རིགས་སྣ་གཅིག་ཀྱང་མཐོང་རྒྱུ་མེད་པར། ལས་བྱེད་རྣམས་ཀྱིས་ཕྱི་གཙང་ནང་མཛེས་ཤིག་ཏུ་བསྐྲུན་འདུག་ལ། སྣང་ཚུལ་དེ་ནི་དངོས་གནས་ཡིད་དབང་འཕྲོག་པ་ཞིག་རེད།
སྔོན་ནས་དུས་བཅད་བྱས་པ་ལྟར་ངས་ཁུ་བུད་རིན་པོ་ཆེ་མཆོག་ལ་དགའ་ཚལ་གླིང་གི་སྐོར་བཅར་འདྲི་བྱས་ཤིང་། ཁོང་གིས་ཚོགས་པ་འདི་ཐོག་མར་འཛུགས་དགོས་པའི་དམིགས་ཡུལ་དང་དེའི་རྗེས་དངོས་སུ་དབུ་འཛུགས་གནང་སྐབས་༧གོང་ས་མཆོག་གིས་ཕན་བདེ་དགའ་ཚལ་གླིང་ཞེས་མཚན་གནང་བ། དེ་བཞིན་ད་བར་སློབ་ཕྲུག་ག་ཚོད་ལ་བདག་སྐྱོང་གནང་བ་སོགས་ཀྱི་སྐོར་རེ་རེ་བཞིན་ཞིབ་འགྲེལ་མཛད་ཅིང་། མཐར་ཁོང་གིས་ང་ཁྲིད་ནས་ཉལ་ཁང་དང་འཛིན་ཁང་སོགས་སུ་ལྟ་སྐོར་དུ་བསྐྱོད།

ངས་ཉལ་ཁང་དང་འཛིན་ཁང་སོགས་ཁང་མིག་རེ་རེ་བཞིན་ཉུལ་ཏེ་ཞིབ་ལྟ་བྱས་ཤིང་། ཕྲུ་གུ་ཚོའི་ཆེད་དུ་བསྒྲིགས་པའི་ཉལ་ཁང་ཁག་གི་ནང་ཆས་རྣམས་ནི་དེང་རབས་ཀྱི་ཐོན་རྫས་གསར་བའི་རིགས་དང་བཀོལ་སྤྱོད་བདེ་བ། སྤུས་ཧ་ཅང་དག་པའི་རིགས་ཡིན་པ་མ་ཟད། ཕྲུ་གུ་དབང་བོར་ཚབས་ཆེའི་ནད་སྐྱོན་མེད་རིགས་ལ་དམིགས་བསལ་གྱིས་ཉལ་ཁང་དང་ནང་ཆས་ཆ་ཚང་གོ་སྒྲིག་ཞུས་ཡོད་འདུག དེ་བཞིན་འཛིན་ཁང་དུ་བསྐྱོད་དེ་སློབ་ཕྲུག་ཚོར་ལྟ་སྐབས་རིན་པོ་ཆེ་ཁོང་གིས་སློབ་ཕྲུག་རེ་རེའི་གནས་སྟངས་སྐོར་ནས་ལུས་ཚོར་ཉམས་པ་དང་སེམས་ཚོར་བརླགས་པ། ངག་ལྐུག་པ་སོགས་ཀྱི་གནས་ཚུལ་ཞིབ་འགྲེལ་མཛད་པ་མ་ཟད། ཁོང་ཚོ་རེ་རེ་བཞིན་སྨན་བཅོས་དང་སློབ་སྦྱོང་གང་འདྲ་གནང་གི་ཡོད་མེད་སོགས་ཀྱང་ཞིབ་འགྲེལ་མཛད། ངེད་གཉིས་འཛིན་ཁང་ཞིག་ཏུ་བསྐྱོད་སྐབས་དེ་རུ་སློབ་ཕྲུག་བདུན་བརྒྱད་ཅིག་ལ་དགེ་རྒན་དང་མ་ཚབ་གསུམ་བཞི་ཞིག་གིས་བདག་སྐྱོང་གནང་གི་འདུག་ཅིང་། དེ་དག་ནི་ལུས་སེམས་ཀྱི་དབང་བོ་གང་རུང་ལ་ཚབས་ཆེའི་ནད་སྐྱོན་ཡོད་པའི་གྲས་ཀྱང་ཡིན་འདུག གློ་བུར་དུ་རང་ལོ་ ༢༥ སླེབས་ནའང་གཟུགས་པོའི་རིང་ཚད་བྱིས་པ་ལོ་ལྔ་དྲུག་ཅིག་གི་ཚད་ལས་མེད་པ་དང་། ཕར་བལྟས་ཚོད་དུའང་བྱིས་པ་ལོ་ལྔ་དྲུག་ཅན་ཞིག་ལོས་ཡིན་བསམ་བསམ་ཞིག་གིས་སྐད་བརྒྱབས་སོང་ལ། རིན་པོ་ཆེ་དང་ངེད་གཉིས་ཀྱི་གམ་དུ་ཡོང་ནས་ཅི་ཞིག་འཆད་ཀྱིན་ཡང་ནས་ཡང་དུ་སྐད་བརྒྱབས་པས། ང་ལ་སྙིང་རྗེ་བའི་ཚོར་བ་ཞིག་བསྐྱེད་བྱུང་ལ་དེ་དང་ལྷན་དུ་འདི་ལྟ་བུའི་སློབ་ཕྲུག་མང་བོ་ཞིག་ལ་བདག་སྐྱོང་གནང་རྒྱུ་ནི་གཏན་ནས་ལས་སླ་བོ་ཞིག་མིན་པའང་རྟོགས། རིན་པོ་ཆེ་ཁོང་གཙོས་དེར་ཡོད་ཀྱི་ལས་བྱེད་རྣམས་ཀྱིས་རླབས་ཆེ་བའི་ཕྱག་ལས་གནང་སྟངས་དེ་ནི་དངོས་གནས་གཞི་བརྗིད་ལྡན་ལ་ཕན་རླབས་ཆེན་པོ་ཞིག་རེད།

ངས་རིན་པོ་ཆེ་ཁོང་ལ་ཚོགས་པ་འདི་ལྟ་བུ་ཞིག་འཛུགས་རྒྱུའི་དགོངས་ཚུལ་ཇི་ལྟར་བྱུང་མིན་སྐོར་བཅར་འདྲི་ཞུས་པར་ཁོང་གིས་གསུངས་དོན། ང་རང་ལོ་གཞོན་སྐབས་ནས་སྤྱི་ཚོགས་ལ་ཞབས་འདེགས་ཞུ་རྒྱུའི་འདོད་པ་ཡོད་པ་དང་། བརྒྱད་ཅུ་གྱ་གྲངས་ནས་གཞིས་ཆགས་ནང་ལ་དབང་བོ་སྐྱོན་ཅན་གྱི་ཕྲུ་གུ་ཚོར་དམིགས་བསལ་གྱིས་ལྟ་སྐྱོང་བྱེད་མཁན་མེད་པའི་ཚོར་བ་ཤུགས་ཆེར་བསླེབས་སོང་། དེ་རྗེས་ ༡༩༩༢ དང་ ༩༣ ཙམ་ལ་བསམ་བློའི་འཆར་གཞི་བསྒྲིགས་པ་ཡིན་མོད། སྐབས་དེར་ང་རང་ཉིད་ཀྱིས་བསླབ་པ་སློབ་གཉེར་བྱས་བསྡད་ཡོད་སྟབས་དེ་ཙམ་ཞིག་ཤུགས་རྒྱག་ཐུབ་མ་སོང་། ༡༩༩༧ ལོར་ངས་དགེ་བཤེས་བཏང་བ་དང་། ༡༩༩༨ ལོ་ནས་ལས་ཀའི་འཆར་གཞི་བསྒྲིགས་པ་དང་དངོས་སུ་ལས་ཀ་མགོ་འཛུགས་ལྟ་བུ་བྱས་པ་ཡིན། ཡར་མར་སྐད་ཆ་དྲིས་པ་དང་འཆར་གཞི་བསྒྲིགས་པ་རྣམས་གང་འཚམ་ལེགས་འགྲུབ་བྱུང་རྗེས་༧གོང་ས་མཆོག་ལ་གཟིམ་ཆུང་མཇལ་ཁ་ཞུས་ཏེ་སྤྱན་འབུལ་ཞུས་པ་ཡིན་ལ། ཁོང་གིས་ཕན་བདེ་དགའ་ཚལ་གླིང་ཞེས་མཚན་གསོལ་གནང་སོང་། ངས་དང་བོ་དེབ་སྐྱེལ་བྱེད་དུས་ནས་ KARUNA HOME ཞེས་བཏགས་ཡོད་ལ་དེ་ནི་ལེགས་སྦྱར་གྱི་སྐད་དུ་སྙིང་རྗེ་ཟེར་གྱིན་ཡོད་པ་རེད། དེ་བཞིན་ང་རང་ཁུ་བུད་རིན་པོ་ཆེའི་སྐུ་ཕྲེང་དྲུག་པ་རེད་ལ། སྐུ་ཕྲེང་ལྔ་བ་ཁོང་སེ་ར་བྱེས་ལ་དགེ་བཤེས་བཏང་བ་དང་ཁོང་སྨན་ལ་མཁས་པ་ཡོད་འདུག བོད་ལ་དུས་འགྱུར་མ་བྱུང་གོང་ཁོང་རྫ་ཆུ་ཁར་མར་ཕེབས་ཏེ། དབང་བོ་སྐྱོན་ཅན་ ༤༠ ཙམ་ལ་གཟིགས་སྐྱོང་གནང་འདུག་མོད། ༡༩༥༩ ལོར་བོད་ལ་དུས་འགྱུར་བྱུང་སྐབས་ཁོང་གིས་སློབ་ཕྲུག་དེ་དག་ཚུར་རྒྱ་གར་དུ་ཁྲིད་ཡོང་བའི་ཐབས་ཤེས་གནང་འདུག་ཀྱང་། ལམ་བར་དུ་རྒྱ་ལག་ཏུ་ཤོར་ཏེ་ཁོང་བཙོན་དུ་བཅུགས་པ་དང་ཕྲུ་གུ་དེ་ཚོ་ཕལ་ཆེ་བ་བཙོན་ཁང་ནང་གྲོངས་ཡོད་འདུག སྐུ་ཐོག་གོང་མས་མཛད་འཕྲིན་སྐྱོང་སྟངས་དེས་ང་ལའང་ཆུང་དུས་ནས་དེའི་སྟེང་ལ་འགྲོ་རྒྱུར་དམིགས་འདུན་བསླེབས་སོང་ཞེས་གསུངས།

ཕན་བདེ་དགའ་ཚལ་གླིང་ནི་ ༢༠༠༤ ལོར་ཕྲུ་གུ་བདུན་དང་ལས་བྱེད་ལྔ་བཅས་སློབ་གྲྭ་དངོས་སུ་དབུ་བརྙེས་པ་ནས་ད་བར་ལོ་རེ་བཞིན་སློབ་ཕྲུག་བཞི་ལྔ་རེ་ལྔ་བླངས་ཏེ། ད་ལྟ་ཕྲུ་གུ་ ༢༦ ཙམ་ཡོད་པ་དང་། མ་འོངས་པར་ཕྲུ་གུ་ ༤༠ ནས་ ༥༠ བར་ཉར་རྒྱུའི་ཐུགས་འདུན་ཡོད་འདུག ཡིན་ནའང་། རིན་པོ་ཆེ་ཁོང་གིས་གལ་སྲིད་ཕྲུ་གུ་ ༥༠ ལས་བརྒལ་ན་བདག་སྐྱོང་བྱ་རྒྱུར་དཀའ་ངལ་འཕྲད་རྒྱུ་ཡིན་པ་དང་། ལྷག་པར་དུ་དམིགས་བསལ་ལྟ་སྐྱོང་དགོས་པའི་ཕྲུ་གུ་རིགས་ཡིན་སྟབས། ད་ལྟ་ནས་མ་ཚབ་བདུན་དང་དགེ་རྒན་ལྔ། ལུས་རྩལ་སློབ་མཁན་བཞི། ཡིག་ཚང་དུ་ལས་ཀ་བྱེད་མཁན་གཉིས། ཞལ་ལག་བཟོ་མཁན་དང་གཙང་སྦྲ་བྱེད་མཁན་སོགས་བསྡོམས་ནས་ལས་བྱེད་ ༢༧ ཙམ་ཡོད་པས། ཕྲུ་གུ་མང་དུ་ཕྱིན་ན་འཛིན་སྐྱོང་དང་ལས་བྱེད། མ་ཚབ་གང་ཅིའི་ཐད་ནས་དཀའ་ངལ་འཕྲད་སྲིད་པས་ཕྲུ་གུ་ ༥༠ ལས་མང་བ་ཉར་རྒྱུ་མིན་ཞེས་གསུངས་སོང་།

ད་ཡོད་ཀྱི་ཉལ་ཁང་ཆེན་མོ་གཉིས་ཡོད་པའི་ནང་འདི་ལོའི་ཟླ་ ༩ པའི་ནང་ཕྲུ་གུ་བཞི་ལྔ་ཙམ་སླེབས་རྗེས་ཉལ་ཁང་ཁེངས་འགྲོ་གི་ཡོད་འདུག་ལ། ༢༠༡༠ ལོར་མུ་མཐུད་ཕྲུ་གུ་འཕར་སྣོན་བྱ་རྒྱུར་ཉལ་ཁང་དགོས་སྟབས་ད་ལྟ་ནས་ཉལ་ཁང་གསར་རྒྱག་གི་ལས་གཞི་མགོ་འཛུགས་གནང་འདུག

དེ་བཞིན་རིན་པོ་ཆེ་ཁོང་གིས་འཛིན་སྐྱོང་སྐོར་གནས་གསུངས་དོན། ཚོགས་པའི་འཛིན་སྐྱོང་གི་ཐད་ནས་ད་ལྟའི་ཆར་ལོ་རེར་ཧིན་སྒོར་འབུམ་ ༣༠ ཙམ་གྱི་འགྲོ་སོང་འགྲོ་བཞིན་ཡོད་ལ། བརྒྱ་ཆའི་དགུ་བཅུ་ཕྱི་རྒྱལ་རོགས་ཚོགས་ཁག་ནས་ཡོང་གི་ཡོད་པ་ལས། གཞན་ང་ཚོའི་བོད་མི་ནང་ཁུལ་ནས་ཞལ་འདེབས་འབུལ་མཁན་ཉུང་ཉུང་རེད། དེར་བརྟེན་མ་འོངས་པར་ཚོགས་པ་རང་ཉིད་ཀྱི་རྐང་བའི་སྒང་ལངས་ཐུབ་ཆེད་ཤིང་སྡོང་འདེབས་འཛུགས་དང་ཚོང་ཁང་། བ་ཕྱུགས་ཁང་སོགས་འཛུགས་རྒྱུར་ལས་འཆར་མང་བོ་ཞིག་སྒྲིག་བཞིན་པ་ཡིན་ཞེས་དང་ཡང་ཁོང་གིས་ཕྲུ་གུ་ལེན་སྟངས་སྐོར་ནས་གསུངས་དོན། ཐོག་མར་སློབ་གྲྭ་མགོ་འཛུགས་བྱེད་སྐབས་འཕྲོད་བསྟེན་ལས་ཁུངས་ནས་ལྷོ་ཕྱོགས་གཞིས་ཆགས་ཁག་ལྔའི་ཕྲུ་གུ་དབང་བོ་སྐྱོན་ཅན་རྣམས་ཀྱི་མིང་ཐོ་ཞིག་བླངས་པ་གཞིར་བཟུང་། ང་དང་ཨེ་ཊ་ལི་ནས་ཕེབས་པའི་ཕྲུ་གུའི་དམིགས་བསལ་ཨེམ་རྗེ་ཞིག་དང་ངེད་གཉིས་དངོས་སུ་ཕར་མི་ཚང་རེ་རེའི་སྒོ་འགྲམ་དུ་བསྐྱོད་དེ། ཕྲུ་གུའི་ནད་གཞི་ག་རེ་ཡིན་པ་དང་། ཉར་ན་ཕན་ཐོགས་ཡོད་མེད་སོགས་ལ་བརྟག་རྗེས་ཕྲུ་གུ་བདུན་བླངས། དེའི་རྗེས་རིམ་པས་ཚོགས་པའི་གནས་སྟངས་ཇེ་རྒྱས་ཇེ་ལེགས་སུ་སོང་བ་དང་བསྟུན་ཕྲུ་གུ་ཉར་རོགས་ལབ་མཁན་མང་བོ་ཡོད་པ་མ་ཟད། དེང་སྐབས་སྒུག་ཐོའི་ནང་དུ་མང་བོ་ཞིག་འཚང་ཁ་བརྒྱབས་བསྡད་ཡོད། དེ་མིན་ལོ་ ༣༠ བརྒལ་རིགས་ལ་སློབ་སྦྱོང་སྤྲོད་རྒྱུ་དང་བཅོས་ཐུབ་ཀྱི་མེད་སྟབས་ཉར་གྱིན་མེད་ལ། ལོ་ཆུང་ཆུང་ཡིན་ན་སློབ་སྦྱོང་སྤྲོད་པ་དང་ལུས་རྩལ་སློབ་པ། གོམ་པ་རྒྱག་མི་ཐུབ་མཁན་ལ་གོམ་པ་རྒྱག་འཇུག་པ་སོགས་ཀྱི་སློབ་སྦྱོང་སྤྲོད་ཐུབ་ཀྱིན་ཡོད་ལ། ༧གོང་ས་མཆོག་གིས་ཕྲུ་གུ་དེ་ཚོར་སོ་སོའི་དབང་བོ་ལ་དཔག་པའི་སློབ་སྦྱོང་སྤྲོད་དགོས་པའི་བཀའ་གནང་ཡོད།

ཕྲུ་གུ་དེ་ཚོ་ལེན་སྐབས་ཆ་རྐྱེན་དང་བོར་མི་ཚང་སྐྱོ་བོར་ལྟ་གི་ཡོད་ལ། སློབ་ཕྲུག་རང་ཉིད་ཀྱང་ལོ་ཆུང་ཆུང་དང་ཚོགས་པའི་ནང་བླངས་པ་ཡིན་ན་སློབ་སྦྱོང་སྤྲོད་ཐུབ་པ་དང་ནང་མིར་ཡང་གུ་ཡངས་པོ་ཡོང་ཕྱིར་ལེན་གི་ཡོད། གཉིས་པ། ཕ་མ་ལོ་གཞོན་ལྟ་བུ་ཡིན་ན་ཕ་མ་རང་ཉིད་མི་ཚེའི་ནང་རང་གི་རྐང་བའི་ཐོག་ལངས་རྒྱུར་སློབ་ཕྲུག་དེ་ལྟ་བུ་ཞིག་ཡོད་ན་ལངས་མི་ཐུབ་པའི་དཀའ་ངལ་ཡོད་སྟབས། ཕ་མ་རང་ཉིད་སོ་སོའི་རྐང་བའི་སྒང་ལངས་ཐུབ་རྒྱུར་དམིགས་བསལ་གྱི་གནད་འགག་ཅིག་མཐོང་གི་འདུག གསུམ་པ། ད་ལྟའི་ཆར་རྒྱ་གར་ཡུལ་མིའི་ཕྲུ་གུ་གཉིས་དང་ལ་དྭགས་ཀྱི་ཕྲུ་གུ་གཅིག་བཅས་རྒྱ་གར་མི་སེར་རང་བྱས་ན་ཕྲུ་གུ་གསུམ་ཡོད། དེ་ནི་ས་གནས་ཀྱི་མཐུན་འབྲེལ་དང་རྒྱ་གར་དཔོན་རིགས་དེ་འདྲ་འདིར་ལྟ་སྐོར་ལ་ཕེབས་སྐབས་ཡུལ་མིའི་ཕྲུ་གུ་ཉར་ཡོད་མེད་སྐད་ཆ་འདྲི་གི་འདུག དེ་བཞིན་ཕྱི་རྒྱལ་གྱི་རོགས་ཚོགས་ཁག་གིས་ཀྱང་དབང་བོ་སྐྱོན་ཅན་ལ་མི་རིགས་ཀྱི་དབྱེ་བ་མེད་པའི་ཐོག་ནས་བདག་རྒྱག་དགོས་པ་རེད་ཟེར་གྱི་ཡོད་པས་རེད།

དེ་མིན་ཁོང་ལ་ད་ལྟའི་བར་སློབ་ཕྲུག་དེ་ཚོར་བདག་སྐྱོང་གནང་སྟེ། ཁོང་ཚོའི་ནང་དབང་བོ་གཅིག་ལ་སྐྱོན་ཡོད་ནའང་། དབང་བོ་གཞན་གྱི་ཐོག་སློབ་སྦྱོང་ཐོན་པའམ་ཡང་ལས་ཀ་བྱེད་ཐུབ་པ་དང་གྲུབ་འབྲས་ཐོན་པ་ཡོད་མེད་སྐོར་དྲིས་པར་ཁོང་གིས་གསུངས་དོན། ང་ཚོའི་ཚོགས་པ་འདི་ཉིད་ད་ལྟའི་ཆར་གཞོན་སྐྱེས་ལྟ་བུ་ཆགས་བསྡད་ཡོད། ལོ་ལྔ་བ་གཞི་ནས་འགྲོ་བཞིན་པ་རེད། ལོ་བཞིའི་ནང་དུ་གྲུབ་འབྲས་ཐོན་རྒྱུར་དཀའ་ངལ་ཁག་པོ་རེད། ཡིན་ནའང་། ཕྲུ་གུ་གསུམ་བཞི་ཞིག་ད་ལོར་བོད་ཁྱིམ་སློབ་གྲྭའི་ཡིག་རྒྱུགས་མཉམ་དུ་འགྲོ་ཐུབ་རྒྱུར་འབད་བརྩོན་བྱེད་ཀྱིན་ཡོད། སློབ་ཕྲུག་དེ་ཚོར་འདི་ནས་སློབ་སྦྱོང་སྤྲད་ན་མ་གཏོགས་ཀླད་པ་རྗེས་ལུས་ཐེབས་པའམ་འཐོམ་བསྡད་པའི་རིགས་དེ་འདྲ་ཡིན་སྟབས། ནམ་རྒྱུན་ལྟར་སློབ་ཕྲུག་སྤྱི་བྱིངས་མཉམ་དུ་སློབ་སྦྱོང་བསླབ་ན་ཁོང་ཚོས་གཅིག་ཀྱང་གོ་ཐུབ་གི་མེད་པས། ངེས་པར་སློབ་ཕྲུག་རེ་རེ་བཞིན་དགེ་རྒན་གཅིག་གིས་གདོང་དང་གདོང་བསྟན་ནས་བསླབ་དགོས་པ་རེད། སྔོན་མ་སློབ་གྲྭར་བསྐྱོད་སྐབས་འཛིན་གྲྭ་དང་བོའི་སྐབས་སུ་ཡིག་རྒྱུགས་ཐེབས་ཆག་ཅིག་འཕྲོད་པ་དང་གཉིས་པའི་སྐབས་སུ་ལོ་གསུམ་རིང་ཡིག་རྒྱུགས་མ་འཕྲོད་པ་མ་ཟད། ཡིག་རྒྱུགས་སྐབས་དྲི་ཤོག་སྟོང་བར་ལུས་ཏེ་གང་ཡང་འབྲི་མི་ཐུབ་མཁན་གྱི་བུ་མོ་ཞིག་གིས་དེང་སྐབས་སློབ་སྦྱོང་ཡག་པོ་ཆགས་ཡོད་ལ། ད་ལོར་བོད་ཁྱིམ་གྱི་ཡིག་རྒྱུགས་ནང་དུ་འགྲོ་ཐུབ་པའི་རེ་བ་བྱེད་ཀྱིན་ཡོད།

དེ་བཞིན་སློབ་ཕྲུག་གོམ་པ་རྒྱག་མ་ཐུབ་མཁན་གཉིས་གསུམ་ཞིག་གིས་དེང་སྐབས་གོམ་པ་རྒྱག་ཐུབ་ཀྱི་ཡོད་ལ། རིགས་ཁག་ཅིག་ལུས་རྩལ་དང་སྨན་བཅོས་བྱས་ཏེ་དབང་བོ་སྡུག་ཏུ་མི་འགྲོ་བའི་ཐབས་ཤེས་བྱེད་ཐུབ་ཀྱིན་ཡོད་ནའང་། དྲགས་སྐྱེད་ཡོང་རྒྱུའི་རེ་བ་མེད་པ་དེ་འདྲ་རེད། ཅེས་སོགས་གསུངས་ཡོད།

མཐར་ཁོང་གིས་བཙན་བྱོལ་བོད་གཞུང་གིས་བཙན་བྱོལ་ནང་དབང་པོ་སྐྱོན་ཅན་བརྒྱ་ཆ་གཅིག་ཡོད་ཅེས་བཀའ་གནང་གི་འདུག གལ་སྲིད་དེ་ལྟར་ཡིན་ན་བོད་མི་སྐྱབས་བཅོལ་བ་འབུམ་གཅིག་དང་ཁྲི་གསུམ་བཞི་ཡོད་དབང་དུ་བཏང་ན། དབང་བོ་སྐྱོན་ཅན་ཆིག་སྟོང་བཞི་བརྒྱ་ཙམ་ཞིག་ཆགས་ཀྱིན་འདུག ཡིན་ནའང་། སྙིང་སྟོབས་གླིང་དང་མངོན་དགའ་སློབ་གྲྭ། ཕན་བདེ་དགའ་ཚལ་བཅས་གསུམ་ཆ་བསྡོམས་ནའང་བརྒྱ་དང་ཉི་ཤུ་སུམ་ཅུ་ཙམ་མ་གཏོགས་སླེབས་ཀྱིན་ཡོད་པ་མ་རེད། ལྷག་མ་ཆིག་སྟོང་ཉིས་བརྒྱ་སུམ་བརྒྱ་ནང་དུ་བསྡད་ཡོད་པ་རེད། ཅེས་ཕངས་སེམས་ཀྱིས་གསུངས་སོ། །