རྩོམ་པ་པོ། བསྟན་འཛིན་པདྨ།
རྩོམ་ཁུངས། བོད་ཀྱི་དུས་བབ།
ང་ཚོ་བོད་མིའི་ཁྲོད་དུ་སོ་སོའི་རྒྱལ་ཁབ་དང་མི་རིགས་ལ་བརྩེ་བ་དང་ཤ་ཞེན་མེད་མཁན་ཧ་ལམ་དཀོན་པོ་རེད། དེའི་དཔང་རྟགས་ནི་བོད་ཕྱི་ནང་དུ་བོད་བསྟན་པ་ཆབ་སྲིད་དང་འབྲེལ་བའི་བརྗེད་མི་སྲིད་པའི་མིག་མཐོང་ལག་ཟིན་གྱི་གནས་ཚུལ་མང་དག་བྱུང་དང་འབྱུང་བཞིན་ཡོད། ལྷག་པར་དུ་བོད་ནང་དུ་བོད་མི་ཡོད་དོ་ཅོག་གིས་སོ་སོའི་རྒྱལ་ཁབ་དང་མི་རིགས་ཀྱི་ཆེད་དུ་ཆོད་སེམས་བརྟན་པོས་དཀའ་ལས་རྒྱག་བཞིན་ཡོད་པ་དང་། བཙན་བྱོལ་དུ་བོད་མི་མང་དག་གིས་སོ་སོའི་འཇོན་ནུས་ལ་དཔག་པའི་གང་ཡོང་ཅི་ཡོང་བྱེད་བཞིན་ཡོད། འོན་ཀྱང་ཉེ་བའི་ཆར་ནས་ང་ཚོ་རང་དབང་ལུང་པའི་ནང་ཡོད་མཁན་འགའ་ཤས་ཀྱིས་ངའི་འདོད་པ་དང་དགའ་མོས། མདུན་ལམ་དང་དུས་ཚོད། མི་ཚེ་དང་ནང་མི། སྟབས་བདེ་དང་དུས་ཁོམ། ཐོབ་ཐང་དང་ཁེ་ཕན་ལ་སོགས་གལ་ཆེ་ཡིན་པའི་སློབ་གསོ་དང་མིག་དཔེ་མཐོང་རྒྱུ་ཡོད་སྟབས། རྒྱལ་ཁབ་དང་མི་རིགས་ཀྱི་རྩ་དོན་ཐོག་བསམ་བློ་ཡོད་པ་བཞིན་ཁ་ནས་ལབ་མཁན་མང་དག་ཡོད་ཀྱང་། དེ་དག་ལག་བསྟར་བྱེད་དུས་ང་དང་ངའི་གནད་དོན་གཙོ་བཟུང་གིས་རྒྱལ་ཁབ་དང་མི་རིགས་ཀྱི་གནད་དོན་རང་བཞིན་གྱིས་རྗེས་ལ་འཇོག་གི་ཡོད།
གལ་ཏེ་རྒྱལ་ཁབ་དང་མི་རིགས་ཀྱི་གནད་དོན་འདི་དག་ཡང་ནས་ཡང་དུ་ང་དང་ངའི་གནད་དོན་གྱི་རྗེས་ལ་བཞག་ཚེ། རིམ་པས་ངན་པ་ལངས་ཤོར་དུ་ཕྱིན་ནས་ཉིན་མཚན་དུས་དྲུག་རྫོགས་རྒྱུ་མེད་པའི་ང་དང་ངའི་གནད་དོན་ཐོག་ཉིན་ཞག་ནས་བདུན་ཕྲག་དང་། བདུན་ཕྲག་ནས་ཟླ་བ། ཟླ་བ་ནས་ལོ། ལོ་ནས་ལོ་བྱས་ནས་མཐར་མི་ཚེ་གང་པོ་ང་དང་ངའི་གནད་དོན་ཐོག་བསྐྱལ་ནས། མི་ཚེ་རྫོགས་མཚམས་སུ་སླེབས་དུས་ཕྱིར་བལྟས་གཅིག་སློག་དུས་འགྱོད་པས་མིག་གཉིས་མཆི་མས་ཁེངས་ནས་ལུས་པ་མ་གཏོགས་བྱེད་ཐབས་གང་ཡང་མེད། དེ་དུས་ཕྱིས་དྲགས་ཚར་བ་རེད། ང་ཚོ་ཚང་མ་འཆི་རྒྱུ་ཡིན་པ་ངེས་པ་རེད། ག་དུས་འཆི་ངེས་པ་མེད། སང་གནངས་ཀྱང་འཆི་སྲིད་པ་རེད། དེ་འདྲ་སོང་ཙང་ང་དང་ངའི་གནད་དོན་འདི་ཚོའི་ཆེད་དུ་མི་ཚེ་གང་པོ་བཏང་ན་ཧ་ཅང་ཕངས་པོ་དང་ཐབས་སྐྱོ་པོ་རེད། མི་ཚེ་རིང་ཐུང་ག་ཚོད་ཡོད་ཀྱང་བོད་རྒྱལ་ཁབ་དང་མི་རིགས་ཀྱི་ཆེད་དུ་བསམ་བློ་བཏང་ནས་དེ་དག་གི་ཐོག་མི་ཚེ་སྐྱེལ་ཐུབ་ན་འདི་ལས་ལྷག་པའི་མི་ཚེ་དོན་དང་ལྡན་པ་མེད། དེ་ཡིན་ཅིག་སེམས་ལ་ཞོག་ཨང་།
དེ་འདྲ་སོང་ཙང་ཚེ་མཇུག་འགྱོད་པ་མེད་པ་ཡོང་སླད་ཨ་མས་སྔོན་ལ་བཤད་པའི་སྙིང་གཏམ་ནང་བདེ་སྐྱིད་ཀྱི་ལྡེ་མིག་ཟེར་བ་དེ། ཚེ་འདིའི་བདེ་སྐྱིད་ཀྱི་ལྡེ་མིག་ཙམ་མ་ཟད། ཚེ་མཇུག་འགྱོད་པ་མེད་པའི་ཐོག་ནས་ཚེ་ཕྱི་མར་འགྲོ་ཐུབ་པའི་ལྡེ་མིག་ཀྱང་ཡིན་པས། རང་མི་རིགས་ཀྱི་སྐད་དང་ཡི་གེ་མཐིལ་ཕྱིན་ཤེས་པར་བྱེད་རྒྱུ་དུས་རྒྱུན་དུ་ཁ་ན་ན་ཤོད་ཀྱི་ཡོད་པ་བཞིན་དེ་རིང་སླར་ཡང་འདིར་དྲན་སྐུལ་བྱེད་ཀྱི་ཡོད། དེ་ལྟར་བྱེད་ཚེ་སྐད་ཡིག་འདིའི་ནང་དུ་ཡོད་པའི་རླབས་ཆེ་བའི་རིག་གཞུང་ཕྱུག་པོ་དང་གཏིང་ཟབ་པོ་འདི་དག་སོ་སོས་མིག་གིས་གསལ་ལྷམ་མེར་མཐོང་ནས་ངོ་འཕྲོད་ཐུབ་པ་དང་། དེ་དག་ཡང་ཡང་བསམ་བློ་བཏང་ནས་བོད་ཀྱི་རིག་གཞུང་ནི་ང་ཚོ་བོད་མི་ཙམ་མིན་པར་འཛམ་གླིང་ཡོངས་ལ་ཕན་ཐོགས་ཆེན་པོ་ཡོད་པ་མ་ཟད། ད་ལྟའི་དུས་སུ་ཤིན་ཏུ་དགོས་མཁོ་ཆེ་བ་ཡིན་པ་རིམ་པས་ངེས་ཤེས་རྙེད་ཐུབ་པ་དང་། དེའི་རྐྱེན་གྱིས་སོ་སོའི་རིག་གཞུང་ལ་ཨ་ཕའི་ཕོར་པར་གཙང་ཞེན་མིན་པར་ཞེ་ཐག་པ་ནས་དོན་དམ་གྱི་སྤོབས་པ་སྐྱེས་པ་མ་ཟད། རང་མི་རིགས་ཀྱི་ལྟ་བ་དང་སྤོབས་པ་སླེབས་ངེས་རེད། དེས་སོ་སོའི་རྒྱལ་ཁབ་དང་མི་རིགས་ལ་བརྩེ་དུང་དང་འགན་ཁུར་ཤུགས་དྲག་ངང་གིས་སྐྱེ་ངེས་ཡིན་པ། དེ་ནི་འགྱུར་བ་མེད་པའི་རྒྱལ་གཅེས་རིང་ལུགས་ཀྱི་ས་བོན་ནམ་རྨང་གཞི་གཙོ་བོ་དེ་ཡིན།
འདི་ལོའི་ཟླ་ ༤ ནང་དྷ་སར་རྟེན་གཞི་བྱས་པའི་ཏུ་ཤི་ཏཱ་སྒོམ་སྒྲུབ་ལྟེ་གནས་ཁང་དུ་དགེ་བཤེས་ལྷག་རྡོར་ལགས་ནས་དབུ་མ་རིན་ཆེན་ཕྲེང་བའི་ཐོག་བདུན་ཕྲག་གཅིག་རིང་ཆོས་འགྲེལ་གནང་དུས། དེ་གའི་འབྲེལ་ཡོད་ལས་བྱེད་ཀྱིས་དེར་སློབ་གཉེར་བ་བརྒྱད་ཅུ་ལྷག་ཙམ་ཡོད་པ་གསུངས་སོང་བས། དེའི་ནང་བོད་པ་འཆི་མེད་ཁྱེད་གཅིག་པུ་ཡིན་ཡང་། ཁྱེད་ལ་སོ་སོའི་རིག་གཞུང་ལ་སྤོབས་པ་སྐྱེས་ཡོད་པ་མ་ཟད། ནང་ཆོས་འཛིན་གྲྭ་འདི་ལྟ་བུ་ལ་བོད་པའི་གཞོན་སྐྱེས་མང་ཙམ་ཡོད་ན་དགེ་མཚན་ཆེན་པོ་མཐོང་བ་ང་ལ་བཤད་སོང་བ་དེ་དངོས་འབྲེལ་རེད། ཕྱི་རྒྱལ་བ་འདི་ཚོ་ས་ཐག་རིང་པོ་ནས་དུས་ཚོད་དང་འགྲོ་སོང་མང་པོ་བཏང་ནས་འདིར་ནང་ཆོས་སྦྱོང་དུ་ཡོང་གི་ཡོད་ཀྱང་། ང་ཚོ་བོད་པ་འདི་འདྲའི་ཐོག་སློབ་གཉེར་བྱེད་མཁན་ཉུང་ཤས་ཡིན་པ་ཕངས་པོ་དང་བློ་ཕམ་གྱི་གནས་རེད།
སོ་སོའི་རིག་གཞུང་གི་རིན་ཐང་ཤེས་དུས་དེ་ནས་རིམ་པས་སོ་སོའི་རླབས་ཆེ་བའི་རིག་གཞུང་དང་དེ་དག་གི་རྟེན་གཞི་བོད་ཀྱི་སྐད་ཡིག་གི་ད་ལྟའི་གནས་སྟངས་བོད་ཕྱི་ནང་གཉིས་ཀར་ཛ་དྲག་པོ་ཆགས་ཀྱི་ཡོད་པ་ཤེས་དུས། འདི་དག་ཉམས་པ་སླར་གསོ་དང་མི་ཉམས་རྒྱུན་འཛིན་གྱི་ལས་ལ་མ་བསྐུལ་དང་བླངས་ཀྱི་ཐོག་ནས་འཇུག་ངེས་རེད། དེ་དུས་སོ་སོའི་རྒྱལ་ཁབ་དང་མི་རིགས་ཀྱི་ཆེད་དུ་བློས་བཏང་ག་རེ་ཡིན་ཡང་བྱེད་ཐུབ་མཁན་ཞིག་ཆགས་ཀྱི་རེད། མཐའ་ན་རང་གི་གཅེས་པའི་སྲོག་ཀྱང་བློས་བཏང་བྱེད་ཐུབ་ཀྱི་ཡོད། འོན་ཀྱང་མི་ལུས་རྩ་ཆེན་པོ་རིན་ཐང་བྲལ་བ་ཡིན་ཙང་སེམས་ཤུགས་རི་ལྟ་བུ་འདི་འཁྱེར་ནས་སོ་སོ་སོན་པོར་བསྡད་ནས་ཉིན་མཚན་ཀུན་ཏུ་བོད་སྤྱི་པའི་དོན་དུ་ལྷག་བསམ་རྣམ་དག་གིས་འབད་བརྩོན་བྱས་ན་དགེ་མཚན་ཆེ་བ་ཡོད། ངེད་ཕ་མ་གཉིས་དེ་སྔ་སོ་སོའི་རྒྱལ་ཁབ་དང་མི་རིགས་ཀྱི་ངོ་བོ་སྲུང་སྐྱོབ་དང་། སོ་སོའི་གཅེས་ཕྲུག་ཚོའི་མི་ཚེ་བདེ་སྐྱིད་ལྡན་པ་ཡོང་སླད། ཁྱེད་གསུམ་གྱི་མི་ཚེ་དབྱངས་གསལ་སོ་བཞི་དང་ཁ་མ་བྲལ་བ་ཡོང་རྒྱུར་འབད་བརྩོན་བྱས་དང་བྱེད་བཞིན་ཡོད་ཀྱང་། རྒྱ་དམར་གཞུང་གིས་བོད་ནང་དུ་སྲིད་བྱུས་ངན་པ་ལག་ལེན་བསྟར་འགོ་བཙུགས་ནས་བཟུང་། ང་ཚོ་རང་དབང་ལུང་པར་ཡོད་པའི་བོད་མི་མི་རེ་ངོ་རེ་ནས་འགན་ཁུར་ཆེ་ཙམ་འཁྱེར་དགོས་པའི་ཚོར་ཤུགས་ཆེན་པོ་ངང་གིས་སྐྱེས་པར་བརྟེན། ཁྱེད་གསུམ་གི་སློབ་སྦྱོང་གང་ལེགས་བྱས་རྗེས་གང་མགྱོགས་གཉེན་སྒྲིག་གིས་ཕྲུ་གུ་བོད་པ་གཙང་མ་གང་མང་སྐྱེ་དགོས་པ་དང་། དེ་ཡང་ངེད་ཕ་མ་གཉིས་གཟུགས་པོ་བདེ་ཐང་ཡོད་པའི་སྐབས་སུ་སྐྱེ་ཐུབ་དགོས་པ་ཡང་ནས་ཡང་དུ་ལབ་ཀྱི་ཡོད་པ་དེ་དངོས་འབྲེལ་རང་ཡིན། རྒྱ་ནག་གཞུང་གིས་ང་ཚོ་བོད་མི་རྩ་བརླག་གཏོང་བའི་ངན་བྱུས་ཇི་ལྟར་སྤེལ་ཀྱང་། ང་བོད་མཐོང་མི་མྱོང་བའི་བོད་པའི་བུད་མེད་ཞིག་གིས་སོ་སོའི་ཕྲུ་གུ་ཙམ་མ་ཟད། སོ་སོའི་ཚ་བོ་ཚ་མོ་རྣམས་ཀྱང་བོད་མི་གཤའ་མ་ཞིག་བཟོ་རྒྱུའི་ཁས་ལེན་དམ་བཅའ་འཇོག་རྒྱུ་ཡིན། དེ་འདྲ་སོང་ཙང་ཨ་མའི་དམ་བཅའ་འདི་འགྲུབ་པར་ཁྱེད་གསུམ་ནས་རྒྱབ་སྐྱོར་བྱེད་པའི་རེ་བ་ཡོད།
རྒྱལ་གཅེས་རིང་ལུགས་ཀྱི་བསམ་བློ་རྩོལ་མེད་ཡོང་ཐབས་བྲལ་བས། དུས་རྒྱུན་དུ་རང་མི་རིགས་ཀྱི་རིག་གཞུང་དང་། བོད་ཀྱི་ལོ་རྒྱུས་ཤེས་དགོས། ཁྱེད་གསུམ་གྱི་པ་ལགས་བོད་ནས་ཕེབས་པ་ཡིན་ཙང་། ཁོང་གིས་དུས་རྒྱུན་དུ་སོ་སོའི་ཕ་ཡུལ་གྱི་ཡུལ་ལྗོངས་བཀོད་པ་ནས། རི་དང་མཚོ། ཟས་རིགས་དང་ཡུལ་མི། ནང་མི་སྤུན་མཆེད་སོགས་ཀྱི་སྐོར་གང་དྲན་པ་གསུངས་དང་གསུང་བཞིན་ཡོད་སྟབས། ད་ལྟའི་ཆར་ཁྱེད་ཚོ་གསུམ་བོད་དང་ཕྱི་རྒྱལ་གཉིས་ནས་བོད་ལ་འགྲོ་འདོད་མང་བ་ཡོད་པ་ཨ་མས་ཡིད་ཆེས་བྱེད་ཀྱི་ཡོད། དེ་ཁྱེད་གསུམ་གྱི་རྒྱལ་ཞེན་གྱི་ས་བོན་རེད། གསུང་ཆོས་དང་གསུམ་བཅུའི་དུས་དྲན་ལྟ་བུ་བོད་ཀྱི་ཆོས་དང་ཆབ་སྲིད། རིག་གཞུང་དང་སྤྱི་ཚོགས་བཅས་ཀྱི་མཛད་སྒོ་དང་། ལས་འགུལ། དུས་སྟོན། འདུ་འཛོམས་སོགས་གང་ཡིན་ཡང་ཁྱེད་གསུམ་ཆུང་བྱིས་པའི་དུས་ནས་ཕ་མས་འཁྲིད་ཀྱི་ཡོད་པ་དེས་ཁྱེད་གསུམ་གྱི་རྒྱལ་ཞེན་གྱི་ས་བོན་ལ་མཐུན་འགྱུར་སྦྱོར་གྱི་ཡོད། ད་བར་དུ་ཁྱེད་གསུམ་བོད་ཀྱི་སྐད་ཡིག་ལ་དགའ་ཞེན་ཆེན་པོ་ཡོད་པ་དེའང་ཁྱེད་གསུམ་གྱི་རྒྱལ་ཞེན་གྱི་ས་བོན་རེད། ཁྱེད་གསུམ་བོད་ཀྱི་རོལ་དབྱངས་དང་གཞས་ཞབས་བྲོ་སོགས་ལ་དགའ་པོ་ཡོད་པ་དེའང་རྒྱལ་ཞེན་གྱི་ས་བོན་རེད།
བོད་མི་རིགས་ཀྱི་རིག་གཞུང་གཞི་ལ་བཞག་པའི་ཐོག་ནས་འཛམ་གླིང་ལ་ཞབས་འདེགས་རྒྱ་ཆེན་པོ་བྱེད་ཐུབ་པའི་སྤོབས་པ་ཆུང་དུས་ནས་སྐྱེད་སྲིང་བྱེད་རྒྱུ་དེའང་ཧ་ཅང་གལ་ཆེན་པོ་ཡིན་པར་བརྟེན། ངེད་ཕ་མ་གཉིས་ནས་ཁྱེད་གསུམ་ལ་བོད་ཡིག་ཟུར་དུ་སློབ་ཁྲིད་བྱེད་རྒྱུའི་དུས་ཚོད་གཏོང་མི་ཐུབ་ཀྱང་། དུས་དང་རྣམ་པ་ཀུན་ཏུ་ཟ་ཞོར་སྡོད་ཞོར་འགྲོ་ཞོར་སོགས་ལ་བོད་ཀྱི་སྐད་ཡིག་དང་རིག་གཞུང་གི་རིན་ཐང་ངོ་སྤྲོད་བྱེད་ཀྱི་ཡོད་པ་དེ་རེད། བོད་ཀྱི་སྐད་ཡིག་གིས་ང་ཚོ་བོད་པའི་བསམ་བློ་གཏོང་སྟངས་ལའང་ཤུགས་རྐྱེན་ཆེན་པོ་སྤྲོད་ཀྱི་ཡོད་པ་མངོན་གསལ་རེད། བོད་ཀྱི་སྐད་ཡིག་གི་ནང་ལྟ་གྲུབ་དང་ཆོས་ཕྱོགས་ཀྱི་ནང་དོན་ཞིབ་ཞིང་ཕྲ་བ་ཡོད་པ་དེ་དག་སྐད་ཡིག་གཞན་གྱི་ནང་དུ་ཆ་ཚང་ལ་ལས་སླ་པོའི་ངང་སྒྱུར་ཐུབ་ཀྱི་མེད། དེ་འདྲ་སོང་ཙང་བོད་ཀྱི་སྐད་ཡིག་དང་རིག་གཞུང་ནི་བོད་པའི་ཆེད་དུ་སྒྱུ་རྩལ་ཙམ་མིན་པར་རྒྱལ་གཅེས་རིང་ལུགས་ངོ་མའི་གཞི་རྟེན་རེད།
བོད་ཀྱི་ཐུན་མོང་མ་ཡིན་པའི་རིག་གཞུང་ནི་འགྲོ་བ་མིའི་རིན་ཐང་དང་སྦྲེལ་ཡོད་པ་དེས་རང་བཞིན་གྱིས་བྱམས་སྙིང་རྗེ་ལྡན་པའི་རྒྱལ་ཞེན་སྐྲུན་པ་དང་། དེ་བཞིན་གསོ་སྐྱོང་བྱེད་ཀྱི་ཡོད་པའི་ཚོར་སྣང་ཡོང་གི་འདུག བོད་ཀྱི་རིག་གཞུང་གི་ཉིང་ཁུ་ནི་སྲོག་ཆགས་གཞན་ཚང་མ་ལ་ཕན་སེམས་དང་། སྙིང་རྗེ། གུས་ཞབས་བྱེད་པ་ཡིན། ང་ཚོའི་བོད་ཕྲུག་ཚོ་བོད་ཀྱི་རིག་གཞུང་གི་བསམ་བློའི་འདུ་ཤེས་འདི་ལྟ་བུའི་མཉམ་དུ་གསོ་སྐྱོང་བྱེད་ཚེ། ཁོ་ཚོའི་རྒྱལ་ཞེན་དེས་སོ་སོའི་རྒྱལ་ཁབ་དང་མི་རིགས་ཙམ་མ་ཟད། མི་གཞན་ཡང་སྲུང་སྐྱོབ་དང་ཡར་རྒྱས་གཏོང་རྒྱུའི་ཐོག་ལ་སེམས་ཤུགས་སླེབས་པ་མ་གཏོགས། མི་གཞན་ལ་གནོད་པ་སྐྱེལ་རྒྱུར་དྲན་གྱི་མ་རེད་བསམ་གྱི་འདུག དེ་བཞིན་ལྷ་མོའི་འཁྲབ་གཞུང་དང་། སྲོལ་རྒྱུན་གཞས་དང་ཞབས་བྲོ། རོལ་དབྱངས་སོགས་ཀྱིས་ཕྲུ་གུ་ཚོར་སོ་སོའི་རིག་གཞུང་དང་འབྲེལ་བའི་ཐོག་ནས་ལུས་ཀྱི་དགའ་སྤྲོའི་རྣམ་འགྱུར་མཚོན་ཐུབ་ཀྱི་ཡོད་ལ། སྒྱུ་རྩལ་འདི་ཚོས་བོད་མི་རྒན་གཞོན་བར་གསུམ་ཡོངས་རྫོགས་ལ་ལུས་ཀྱི་རྣམ་འགྱུར་གྱི་ཐོག་ནས་ཐུན་མོང་མ་ཡིན་པའི་རིག་གཞུང་གི་དགའ་སྤོབས་དང་ཚོར་སྣང་སྟོན་རྒྱུར་ཕན་ཐོགས་ཆེན་པོ་ཡོད་སྙམ།
གོང་སྨོས་ཐབས་ལམ་ཁག་གིས་རྒྱལ་གཅེས་རིང་ལུགས་ཀྱི་བསམ་བློ་རྒྱུན་བསྲིངས་ནས་གསོ་སྐྱོང་བྱེད་ཀྱི་ཡོད་པ་ལྟར། ཆུང་བྱིས་པའི་དུས་ནས་མ་འཆི་བར་དུ་སྤྱི་ཚོགས་ཞབས་ཞུའི་ལས་རིགས་ཆེ་ཕྲ་ཆུང་གསུམ་ལ་མཉམ་ཞུགས་བྱེད་རྒྱུ་དེ་གལ་འགངས་ཤིན་ཏུ་ཆེན་པོ་ཡིན་པར་ངོས་འཛིན་བྱེད་ཀྱི་ཡོད། ཨ་མ་རང་ཉིད་ཀྱི་དྲིན་ཅན་ཨ་མ་ཀུན་དགའ་དབང་མོའི་མིག་དཔེ་བཟང་པོས་སོ་སོ་རང་ཉིད་ལ་དགའ་ཚོར་ཆེན་པོ་སྤྲོད་ཀྱི་ཡོད་སྟབས། ཆུང་བྱིས་པའི་དུས་ནས་བཟུང་སྤྱི་ཚོགས་ཞབས་ཞུའི་རིགས་བྱེད་རྒྱུར་ཧ་ཅང་དགའ་པོ་ཡོད། སློབ་གྲྭའི་ཁོར་ཡུག་གཙང་བཟོ་དང་། མེ་ཏོག་འདེབས་འཛུགས། འཛིན་གྲྭའི་རྒན་བདག ཁང་ཚན་རྒན་བདག སློབ་ཕྲུག་ཆུང་བར་བྱམས་སྐྱོང་སོགས་དང་། མཐོ་སློབ་སྐབས་སུ་ས་གནས་གཞོན་ནུ་ལྷན་ཚོགས་ཀྱི་དྲུང་ཆེ། མཐོ་སློབ་ཐོན་རྗེས་མོན་གྷོ་རྙིང་དགོན་དུ་དང་བླངས་དགེ་རྒན་ཞབས་ཞུ། དགེ་རྒན་ཡིན་སྐབས་དང་བླངས་ཀྱིས་ཚོགས་ཆུང་གསར་འཛུགས་དང་དེའི་ལས་གཞི་ཁག་ལག་བསྟར། ཕ་མ་ཡིན་སྐབས་བུ་བཅོལ་ཁང་དང་སློབ་གྲྭ་སོ་སོར་དང་བླངས་ཞབས་ཞུ་ཁག་དང་། ལྷག་པར་དུ་ཕྱི་ལོ་ ༢༠༡༦ དང་ ༢༠༡༧ ལོ་གཉིས་རིང་མེས་དབོན་གཙུག་ལག་དཔེ་སྟོན་སློབ་གྲྭའི་དགེ་རྒན་ཕ་མའི་ཚོགས་ཆུང་གི་འགན་ཁུར་ཞུ་སྐབས། སོ་སོ་རང་ཉིད་སྲི་ཞུ་བའི་འགན་ཁུར་ཐོག འཆི་མེད་ཁྱེད་རང་ལོ་བརྒྱད་དང་དགུ། ཀུན་བཟང་ཁྱེད་ལོ་དྲུག་དང་བདུན། ལྷ་སྒྲོན་ཁྱེད་ཨ་མའི་མངལ་ནང་དང་མ་འབྱར། དེའི་ཐོག་ཨ་མའི་གྲོགས་མོའི་བུ་མོ་མཁྱེན་སྤྱོད་ལོ་ལྔ་ཡིན་པ་བཅས་ཕྲུ་གུ་མང་དག་ལྟ་སྐྱོང་བྱེད་རྒྱུའི་ལས་འགན་ཡོད་ཀྱང་། ཚོགས་ཆུང་གི་ལས་འགན་མཐའ་དག་དགའ་སྤྲོ་ལྡན་པའི་ཐོག་ནས་ལྷག་བསམ་རྣམ་དག་གིས་ཞུས་པས་དགེ་ལས་ཕ་མ་ཚོས་ཧ་ཅང་དགའ་པོ་གནང་སོང་ལ། འདས་པའི་ལོ་བཅུའི་རིང་ལོ་དེ་གཉིས་ཀྱི་སྤྱི་ཚོགས་ཞབས་ཞུའི་ཐོག་བསམ་བློ་འཁོར་དུས་རང་བཞིན་གྱིས་དགའ་སྤོབས་དང་འདོད་བློ་ཁེངས་པའི་ཚོར་སྣང་ཡང་ཡང་ཡོང་གི་འདུག་པས། ལོ་དེ་གཉིས་ཀྱི་ཞབས་ཞུའི་རྐྱེན་པས་འདས་པའི་ལོ་བཅུའི་ནང་མུ་མཐུད་བདེ་སྐྱིད་ཡོང་དུས་སྤྱི་ཚོགས་ཞབས་ཞུའི་ཕན་ཐོགས་ཆེ་ཤོས་སུ་ལ་བྱུང་འདུག་ལབ་ན། སོ་སོ་རང་ཉིད་ལ་བྱུང་འདུག་པས། དེ་ནི་སྤྱི་ཚོགས་ཞབས་ཞུའི་རིན་ཐང་བྲལ་བའི་ཕན་ཡོན་རེད་འདུག
སློབ་ཕྲུག་ཡིན་པའི་སྐབས་སུ་སློབ་སྦྱོང་ཡག་པོ་བྱེད་རྒྱུ་དེ་དོར་དུ་མེད་པའི་ལས་འགན་དང་པོ་དེ་ཡིན་ཡང་། ཞོར་དུ་དུས་ཚོད་ནམ་བྱུང་ལ་སློབ་གྲྭའི་ནང་སྤྱི་ཚོགས་ཞབས་ཞུ་ཆེ་ཆུང་སྣ་ཚོགས་ཀྱི་གོ་སྐབས་ཡོད་སྟབས་ངེས་པར་དུ་དང་བླངས་ཀྱིས་མཉམ་ཞུགས་བྱེད་དགོས་པ་དང་། དེ་བཞིན་ཆེན་པོ་ཆགས་རྗེས་ལས་ཡུལ་གང་དུ་ལས་ཀ་བྱེད་སྐབས་ལས་ཀའི་དུས་ཡུན་རིང་ལྷག་བསམ་རྣམ་དག་གིས་བྱེད་རྒྱུ་དེ་དོར་དུ་མེད་པའི་ལས་འགན་རེད། ལས་ཡུན་དུས་ཚོད་མིན་པའི་སྐབས་སུ་སྤྱི་ཚོགས་ཞབས་ཞུ་ཆེ་ཕྲ་ཆུང་གསུམ་ག་ཚོད་ཞུ་ཐུབ་པ་དེ་དག་སོ་སོར་ཡོད་པའི་རྒྱལ་ཞེན་གྱི་ས་བོན་མུ་མཐུད་གསོ་སྐྱོང་བྱེད་རྒྱུའི་གོ་སྐབས་ཡིན།
མཐའ་དོན། སྤྱི་པའི་ལས་དོན་སྒྲུབ་པའི་སྐབས་སུ་དགའ་མོས་དང་རྒྱབ་སྐྱོར་བྱེད་མཁན་མང་དག་ཡོད་ཀྱང་ཚང་མས་དགའ་པོ་དང་རྒྱབ་སྐྱོར་ཡོད་པ་ཁྱབ་ཀྱི་མེད། དེ་ལས་ལྡོག་སྟེ་འགའ་ཤས་མ་དགའ་མཁན་ཡང་ཡོང་སྲིད། སེམས་ཤུགས་གཅོག་མཁན་ཡང་ཡོང་སྲིད། འོན་ཀྱང་རང་ཉིད་ཀྱི་ཀུན་སློང་གཙང་མ་དང་། སོ་སོའི་རྒྱལ་ཁབ་དང་མི་རིགས་ལ་བཅངས་པའི་ལྷད་མེད་ཀྱི་བརྩེ་དུང་ཟབ་མོའི་ཐོག་ནས་མུ་མཐུད་ཤར་སྐྱོད་བྱེད་དགོས་པ་ལས་སེམས་ཤུགས་ཆག་ནས་སྡོད་མི་རུང་། རང་ཉིད་འཚོ་སའི་ཁོར་ཡུག་གི་ནང་རྒྱབ་སྐྱོར་ལས་འགོག་རྐྱེན་ཤུགས་ཆེ་བ་ཡོང་དུས་༸གོང་ས་༸སྐྱབས་མགོན་ཆེན་པོ་མཆོག་གི་ཞལ་རས་དང་བཀའ་སློབ་ཡིད་ལ་དྲན་དང་། དེ་ནས་བོད་ནང་གི་བོད་རིགས་སྤུན་ཟླ་ཚོ་ལན་གཅིག་དྲན་དང་། དེ་ནས་ལུང་དང་རིགས་པའི་ཐོག་ནས་རང་གི་ཉམས་རྒུད་འགྲོ་ཉེན་གྱི་རྒྱལ་ཞེན་གྱི་ས་བོན་ཡར་བླངས་ནས་བོད་སྤྱི་པའི་དོན་དུ་མུ་མཐུད་ཤར་སྐྱོད་བྱེད་ཐུབ་པ་དགོས། སུ་ལའང་སྡང་སེམས་དང་འཁོན་འཛིན་མེད་པའི་ཐོག་ནས་སེམས་པ་བཟང་པོའི་ཐོག་ནས་སོ་སོའི་གཞུང་དང་མི་མང་ལ་སྙིང་ཐག་པ་ནས་བརྩེ་བ་དང་ཞབས་འདེགས་ཞུས་ན། སོ་སོའི་རྒྱལ་ཁབ་ལ་དགའ་ཞེན་ཡོད་པའི་མཚོན་རྟགས་ཡིན་པས། སོ་སོའི་མ་འོངས་པའི་གཅེས་ཕྲུག་རྣམས་དང་ཚ་བོ་ཚ་མོ་རྣམས་ལའང་འདི་ལྟ་བུའི་རྒྱལ་ཞེན་སྐྲུན་པར་འབད་བརྩོན་བྱེད་རོགས།། །།
