པེ་ཅིན་སྦྲགས་སྲིད་སློབ་གྲྭ་ཆེན་མོའི་འགན་ལེན་ཁག་ཁུར་གནང་ཐོག་རྒྱ་ནག་ནང་ཁྲིམས་ལུགས་ཐོག་འགྲོ་བ་མིའི་ཐོབ་ཐང་རྩོད་ལེན་གྱི་སྣེ་ཁྲིད་གནང་མཁན་ཁྲིམས་རྩོད་པ་ཞིས་ཀྲི་ཡུང་ཕྱི་ཟླ་ ༨ པའི་ཚེས་ ༢༣ ཉིན་རྒྱ་ནག་གཞུང་གིས་དོ་དམ་བཀག་ཉར་འོག་ནས་གློད་གྲོལ་བཏང་ཡོད་འདུག ཡིན་ནའང་། ད་དུང་དུས་བཅད་མེད་པར་འདྲི་བརྩད་དང་། ཉེན་རྟོག་པའི་བཀའ་འཁྲོལ་མེད་པར་རང་དབང་སྒོས་པེ་ཅིན་གྲོང་ཁྱེར་གྱི་ཕྱི་ལོག་སུ་འགྲོ་བསྐྱོད་མི་ཆོག་པའི་ལྟ་རྟོག་བཀག་རྒྱའི་འོག་ཡོད་པ་མ་ཟད། ” ཀོང་མེན” ཁྲིམས་རྩོད་ཚོགས་པའི་རྩ་འཛུགས་དེར་རྒྱ་ནག་གཞུང་གིས་དཔྱ་ཁྲལ་དུས་ཐོག་ཏུ་འཇལ་མེད་པའི་ནག་ཉེས་བཙུགས་ཏེ་བསྐྱར་དུ་ཁྲིམས་བཤེར་བྱ་སྲིད་པའི་ངོས་འཛིན་བྱེད་ཀྱིན་འདུག
རང་ལོ་ ༣༦ ལ་སོན་པའི་ཁྲིམས་རྩོད་པ་ཞུས་ཀྲི་ཡུང་ནི་རྒྱ་ནག་སྦྲགས་སྲིད་སློབ་གྲྭ་ཆེན་མོའི་ཁྲིམས་ལུགས་རིག་པའི་འཆད་ཁྲིད་དགེ་རྒན་ཡིན་ལ། ཕྱི་ལོ་ ༢༠༠༣ ལོར་ཁོང་དང་། རྒྱ་ནག་ཁྲིམས་སྲིད་སློབ་ཆེན་ཁྲིམས་ལུགས་སློབ་གླིང་གི་དགེ་རྒན་ཐིན་པེའོ་དང་། ཧྭ་ཏུང་ཁྲིམས་སྲིད་སློབ་གྲྭ་ཆེན་མོའི་དགེ་རྒན་ཆེན་མོ་བ་ཡུས་ཅང་གསུམ་གྱིས་སྣེ་ཁྲིད་འོག་ཁྲིམས་རྩོད་པ་དང་ཆེད་མཁས་པ་མང་པོ་མཉམ་འབྲེལ་གྱིས་འགྲོ་བ་མིའི་ཐོབ་ཐང་ཁྲིམས་བཤེར་ཚོགས་པ་ “ཀོང་མེན” གསར་འཛུགས་གནང་སྟེ་མི་དམངས་ཀྱི་ཁང་ཁྱིམ་དང་ས་ཞིང་བཙན་འཕྲོག་དང་། ལས་བཟོ་བའི་ཀུན་གསབ་ཡམ་འཕྲོག གང་བྱུང་དུ་ཆབ་སྲིད་ཀྱི་ནག་ཉེས་བཙུགས་པ་བཅས་ཀྱི་གྱོད་དོན་རྣམས་ཁྲིམས་ལུགས་ཀྱི་ཐོག་ནས་དག་སེལ་དང་ཐོབ་ཐང་རྩོད་ལེན་བྱེད་བྱས་པ་དང་། དེ་བཞིན་ན་ནིང་ཕྲུ་གུའི་འོ་ཙམ་ནང་དུག་རྫས་བསྲེས་ཏེ་ཕྲུ་གུ་རྐྱེན་ལམ་དུ་ཕྱིན་པའི་གྱོད་དོན་ཁྲིམས་གཏུགས་དང་། གཞན་ཡང་། ད་ལོར་ཁྲིམས་རྩོད་པ་ཚོགས་པ་དེའི་ངོས་ནས་བོད་ནང་རྒྱ་ནག་གཞུང་གིས་འཛིན་པའི་སྲིད་ཇུས་ཐད་སྐྱོན་བརྗོད་ཀྱི་གསལ་བསྒྲགས་འགྲེམས་སྤེལ་གནང་བཅས་ལ་བརྟེན་ནས། ཕྱི་ཟླ་ ༧ པའི་ཚེས་ ༡༧ ཉིན་པེ་ཅིང་ཉེན་རྟོག་པ་ཀུང་མེང་ཁྲིམས་རྩོད་ཚོགས་པའི་ཡན་ལག་ལས་ཁུངས་ཀུང་མེང་ཁྲིམས་མཐུན་ཞིབ་འཇུག་ལྟེ་གནས་ཁང་དུ་སོང་སྟེ་ཡིག་ཆ་སྔོག་བཤེར་རྒྱབ་པ་དང་ཀམ་པུ་ཊར་སོགས་ཅ་དངོས་རྣམས་གཞུང་བཞེས་བཏང་བ་མ་ཟད་ལྟེ་གནས་ཁང་དེ་སྒོ་བརྒྱབ་པ་དང་། ཕྱི་ཟླ་ ༧ པའི་ཚེས་ ༢༩ ཉིན་ཉེན་རྟོག་པས་ཀུང་མེང་ཁྲིམས་མཐུན་ཚོགས་པ་དེས་དཔྱ་ཁྲལ་སྦས་སྐུང་བྱས་པའི་ནག་ཉེས་བཙུགས་ཏེ། ཞུས་ཀྲི་ཡུང་རང་ཁྱིམ་ནས་བཙན་ཁྲིད་ཀྱིས་མི་སུ་གཅིག་དང་འབྲེལ་གཏུགས་བྱེད་དུ་མ་བཅུགས་པར་ད་བར་གཟའ་འཁོར་གསུམ་རིང་བཀག་ཉར་བྱས་རྗེས། ཟླ་འདིའི་ཚེས་ ༢༣ ཉིན་གློད་བཀྲོལ་བཏང་ཡོད་པ་དང་། ཉིན་དེར་ཁོང་གིས་ཨེ་ཤ་རླུང་འཕྲིན་ཁང་གི་གསར་འགོད་པའི་བཅར་འདྲི་བརྒྱུད་ཁོང་ལ་རྒྱབ་སྐྱོར་དང་སྐུལ་འདེད་གནང་མཁན་གྱི་མི་མང་ཡོངས་ལ་ཐུགས་རྗེ་ཆེ་བཀའ་དྲིན་ཡང་ཞུས་ཡོད་རེད།
ཁྲིམས་རྩོད་པ་ལིས་ཞུང་པེན་གྱིས་BBCགསར་ཁང་དུ་བརྗོད་དོན། ང་རང་ཀོང་མེན་གྱི་ཁྲལ་དངུལ་གྱོན་དོན་གྱི་འགན་ལེན་ཁྲིམས་རྩོད་པ་ཡིན་པའི་རྐྱེན་གྱིས། འབྲེལ་ཡོད་ལས་ཁུངས་རེ་ཟུང་ནས་ཀོང་མེན་གྱི་གྱོད་དོན་དང་འབྲེལ་བ་གཅོད་དགོས་པའི་ཉེན་བརྡ་དང་འཇིགས་སྐུལ་གཏོང་གིན་འདུག འདི་ལྟའི་ཁྲིམས་ལུགས་རྡོག་རལ་གྱི་བྱ་སྤྱོད་ལ་ཧ་ཅང་བློ་ཕམ་བྱུང་ཞེས་དང་། ཁྲལ་བསྡུ་ལས་ཁུངས་དང་མི་སེར་གྱི་ཁྲལ་དངུལ་རྩོད་རྙོག དེ་བཞིན་དངུལ་གྲངས་འབོར་ཆེན་གྱི་ཆད་གཅོད་བཅས་ལ་ཁུངས་རྩ་གསལ་བོ་མེད་པར་མ་ཟད། ཀོང་མེན་ལ་ཁྲལ་བསྡུ་ལས་ཁུངས་ཀྱིས་ཁྲལ་འབབ་ཀྱི་ལྡབ་ལྔའི་ཆད་གཅོད་བཅད་རྗེས། གྱོད་དོན་དེ་མ་ཐག་ཁྲིམས་འཛིན་ལས་ཁུངས་སུ་སྤྲད་པ་དང་། ཞིས་ཀྲི་ཡོན་འཇུ་བཟུང་བཀག་ཉར་བྱས་པ་བཅས་ནི་མ་གཞི་ནས་ཁྲིམས་འགལ་གྱི་བྱ་སྤྱོད་ཅིག་རེད་ཅེས་བརྗོད་ཡོད།
དབྱེ་ཞིབ་པ་དག་གིས་རྒྱ་ནག་གཞུང་གིས་ཞིས་ཀྲི་ཡུང་གློད་བཀྲོད་གཏོང་དོན་ནི་སྤྱི་ཚོགས་ཁྲོད་ཀྱི་ཚོགས་པ་འདྲ་མིན་དང་། ཤེས་ལྡན་པ། དེ་བཞིན་དྲ་ལམ་ཁག་གི་གླེང་སློང་གི་གནོན་ཤུགས་མ་ཐེག་པ་ཞིག་ཡིན་ཚུལ་བརྗོད་ཡོད་ལ། ཞིས་ཀྲི་ཡོན་གློད་བཀྲོལ་ཡོང་ཆེད་པེ་ཅིན་གྱི་ཤེས་ལྡན་པའི་ཁྲོད་ཤུགས་རྐྱེན་དང་སྙན་གྲགས་ཆེ་བའི་ཁྲིམས་ལུགས་རིག་པ་བ་ཅང་ཕེན་དང་། དཔལ་འབྱོར་རིག་པ་བ་མའོ་ཡིས་ཧྲི། རྩོམ་པ་པོ་ཀྲང་ཡིས་ཧི། འགྲོ་བ་མིའི་ཐོབ་ཐང་རྩོམས་ཁྲིད་པ་ཀྲང་ཟི་ཀྲུ། སྤྱི་ཚོགས་རིག་པའི་ཆེད་མཁས་པ་ཆན་ལིས་ཆོན། དེ་བཞིན་སྙན་གྲགས་ཅན་གྱི་རྩོམ་སྒྲིག་པ་ཞིས་ཡུས་ནོང་ཙི་བཅས་ཀྱིས་མཉམ་འབྲེལ་ཐོག་ཕྱི་ཟླ་ ༨ པའི་ཚེས་༡༩ ཉིན་དྲ་ཐོག་དུ་ << སྲིད་གཞུང་གིས་ཀོང་མེན་གྱོད་དོན་ཐག་གཅོད་ལེགས་པོ་བྱེད་པར་རེ་སྐུལ >> ཞེས་པའི་སྤྱི་བསྒྲགས་ཤིག་སྤེལ་ཏེ་ཞིས་ཀྲུ་ཡོན་གློད་བཀྲོལ་ཡོང་བར་འབོད་སྐུལ་བྱས་པ་དང་། ཕྱི་ཚེས་ ༢༢ ཉིན་ཞང་ཀང་དུ་ཞིས་ཀྲི་ཡུང་གློད་བཀྲོད་ཆེད་དྲ་ཐོག་ཐད་གཏོང་གླེང་མོལ་ཚོགས་འདུ་ཞིག་བསྡུས་ཏེ་ཞང་ཀང་མི་དམངས་གཙོས་པའི་རྒྱ་ནག་སྐམ་སའི་མི་དམངས་རྣམས་ལ་བརྒྱུད་སྒྲོགས་བྱས་ཤིང་། དྲ་གྲོགས་རྣམས་ཀྱིས་དྲ་བའི་བརྒྱུད་ལམ་འདྲ་མིན་སྣ་ཚོགས་སྤྱད་དེ་ཞིས་ཀྲི་ཡུང་གློད་བཀྲོད་ཡོང་ཆེད་འབོད་སྐུལ་གྱི་ལས་འགུལ་སྤེལ་གཞི་རྒྱ་ཆེ་བ་ཞིག་ཀྱང་སྤེལ་ཡོད་པ་རེད།
ཁ་ཉིན་ཕྱི་ཚེས་ ༢༡ ཉིན་ཨ་རིའི་རྒྱ་ནག་གི་གཞུང་ཚབ་ཆེན་མོ་སྐུ་ཞབས་ རྗོན་ ཧུན་ཙི་མན་ ལགས་པེ་ཅིན་དུ་འབྱོར་ཞིང་། གཟའ་ཉི་མའི་ཉིན་རྒྱ་ནག་གིས་འགྲོ་བ་མིའི་ཐོབ་ཐང་གི་ལས་འགུལ་བ་མི་གསུམ་གློད་ཡོད་ལ། འདི་ནི་ཨོ་བྷ་མ་ཡི་སྐུ་ཚབ་དོན་གཅོད་ལ་དགའ་བསུ་ཞུ་སྟངས་ཤིག་མཚོན་ཡོད་པར་བཤད། ཡིན་ཡང་འདི་ནི་རྣམ་འགྱུར་ཙམ་མ་གཏོགས་པེ་ཅིན་གྱི་སེམས་བསམ་པའི་ནང་གི་འགྱུར་ཕྱོགས་ཀྱི་བརྡ་ལན་ཅི་ཡང་མིན།
སྐུ་ཞབས་རྗོན་ ཧུན་ཙི་མན་ ལགས་པེ་ཅིན་ལ་འབྱོར་བའི་ཕྱི་ཉིན་དེར། ཁོང་གི་ལས་འགན་གཙོ་བོ་ནི་མངའ་ཁུལ་འདི་དང་འཛམ་གླིང་དཔལ་འབྱོར་ཡར་རྒྱས་གཏོང་ཕྱོགས་སུ་གཞི་རིམ་གྱི་ཇུས་འགོད་འདིང་བར་རོགས་རམ་བྱ་རྒྱུ་དེ་ཡིན་པར་གསུངས། ཡིན་ཡང་ཁོང་གིས་སྐབས་དེར་འགྲོ་བ་མིའི་ཐོབ་ཐང་གི་སྐོར་ཅི་ཡང་གསུང་མེད།
ཁོང་པེ་ཅིན་དུ་འབྱོར་རྗེས་ཀྱི་བདུན་ཕྲག་དང་པོ་སྟེ། ཕྱི་ཚེས་ ༢༤ ཉིན་ནས་ཡུ་གུར་གྱི་བཙོན་པ་ ༢༠༠ ལྷག་ལ་ཁྲིམས་བཤེར་བྱེད་མགོ་བཙུགས་ཡོད།