ཨ་རྒྱ་གཉིས་ཀྱི་མདུན་ལྗོངས།

ཨ་རིའི་རྒྱ་ནག་གི་དོན་གཅོད་གསར་པ་སྐུ་ཞབས་ རྗོན་ ཧུན་ཙི་མན་ རྗེ་ཨར་ གྱིས་ཕྱི་ཚེས་ ༢ ཉིན་མངའ་ཁུལ་གྱི་བརྟན་ལྷིང་དང་ཁོར་ཡུག འགྲོ་བ་མིའི་ཐོབ་ཐང་སོགས་ཚུད་པའི་གལ་ཆེའི་གནད་དོན་མང་པོ་ཞིག་ནི་རྒྱལ་ཁབ་གཉིས་ཀྱི་འབྲེལ་མོལ་གྱི་གཞི་རྩ་ཡིན་སྐོར་སོགས་ཨ་རྒྱ་གཉིས་ཀྱི་མཉམ་འབྲེལ་གྱི་རྩ་བའི་དགོངས་ཚུལ་བཏོན་ཡོད་པ་རེད།

སྐུ་ཞབས་ རྗོན་ ཧུན་ཙི་མན་ རྗེ་ཨར་ Jon Huntsman JR གྱིས་རེས་གཟའ་ལྷག་པའི་ཉིན་པེ་ཅིན་གྱི་ཨ་རིའི་གཞུང་ཚབ་ཁང་དུ་གསར་འགོད་རྣམས་ལ་ཐུག་འཕྲད་ཀྱིས་བཤད་དོན། ཁོང་གིས་རྒྱ་ནག་གཞུང་ལ་ཨབ་གྷན་དང་ཨི་རན། པཱ་ཀི་སི་ཐན། བྱང་ཀོ་རི་ཡ་སོགས་ཀྱི་བདེ་སྲུང་གི་གནད་དོན་ཐད་ཕྱག་ལས་གནང་རྒྱུའི་ཕན་ནས། ནམ་ཟླའི་འགྱུར་ལྡོག་དང་ཁོར་ཡུག་གི་གནད་དོན་སོགས་ནི་ཁོང་འདིར་ཕེབས་ཏེ་གྲོས་མོལ་བྱ་རྒྱུའི་ལས་དོན་གལ་ཆེའི་གྲས་ཡིན་ལ། དེའི་རྒྱུ་མཚན་ནི། དེ་རིང་གི་འཛམ་གླིང་འདིར། ང་ཚོ་ཚང་མས་ཆུ་རྒྱུན་གཅིག་དེད་ནས་འགྲོ་གིན་ཡོད་རེད་ཟེར།

རང་ལོ་ ༤༩ ལ་སོན་པའི་སྐུ་ཞབས་ ཧུང་ཙི་མན་ ནི་ཨ་རིའི་ཨུ་ཊ་མངའ་སྡེའི་སྲིད་སྐྱོང་བ་ཟུར་བ་ཡིན་ལ། ཁོང་ཉིད་པེ་ཅིན་དུ་འབྱོར་ཏེ་བཞུགས་ཤག་གྲ་སྒྲིག་ཟིན་པའི་རྗེས་འདིར་པེ་ཅི་གྱི་ཨ་རིའི་གཞུང་ཚབ་ཁང་དུ་གསར་འགོད་པ་རྣམས་ལ་མཇལ་འཕྲད་གནང་ཡོད་པ་རེད།

ཁོང་ཉིད་སྲིད་འཛིན་ཨོ་བྷ་མས་ཨ་རིའི་རྒྱ་ནག་གི་གཞུང་ཚབ་པར་བདམས་ཤིང་ཕྱི་ཟླ་ ༨ པའི་ནང་ཨ་རིའི་གྲོས་ཚོགས་གོང་མས་རྒྱབ་གཉེར་གནང་ཡོད་པ་རེད།

ཁོང་ནི་ཨ་རིའི་སྤྱི་མཐུན་ཚོགས་པའི་གྲགས་ཅན་མི་སྣ་གསར་པ་ཞིག་ལ་ངོས་འཛིན་བྱེད་བཞིན་པ་མ་ཟད། ༢༠༡༢ ལོའི་ཨ་རིའི་སྲིད་འཛིན་གྱི་འོས་གཞིའི་འགྲན་ཞུགས་ཁྲོད་ཞུགས་སྲིད་པའི་རེ་བ་བྱེད་ཀྱིན་ཡོད་ནའང་། ཁོང་གིས་ཐེངས་འདིར་ཨ་རིའི་རྒྱ་ནག་གི་གཞུང་ཚབ་པ་གནང་རྒྱུའི་གོ་སྐབས་འདིར་ངོས་ལེན་གནང་ཡོད་པ་རེད།

ཁོང་ཉིད་པེ་ཅིན་དུ་མངགས་སྐབས། མི་རྣམས་ཀྱིས་ཁོང་གིས་ལས་དོན་མཐའ་འཁྱོལ་བ་ཞིག་བསྒྲུབ་ཐུབ་པའི་རེ་བ་མཐོན་པོ་ཞིག་དང་བཅས་པེ་ཅིན་དུ་འབྱོར་ཡོད། ཁོང་ཉིད་རྒྱ་སྐད་ལའང་བྱང་ཆ་དོད་པོ་ཡོད་མཁན་ཞིག་ཡིན་འདུག

ཁོང་གིས་བཤད་དོན། ཁོང་ཉིད་གཞུང་ཚབ་ཏུ་མངགས་པའི་བདུན་ཕྲག་དང་པོའི་ནང་དུ་སྲིད་འཛིན་ཧུའུ་ཅིན་ཐའོ་དང་། ཕྱི་སྲིད་བློན་ཆེན་ཡང་ཇི་ཁྲི་གཉིས་ལ་ཐུག་ཅིང་། ད་ལྟའི་ཆར་སྲིད་འཛིན་ཨོ་བྷ་མ་མཆོག་ལོ་འདིའི་ལོ་མཇུག་ཏུ་པེ་ཅིན་ལ་ཕེབས་རྒྱུའི་ཐད་གྲ་སྒྲིག་བྱེད་ཀྱིན་ཡོད་པར་བཤད།

ཁོང་ཉིད་རྒྱ་ནག་ལ་རྒྱུས་ལོན་གཏིང་ཟབ་ཅིག་ཡོད་པའི་རྐྱེན་གྱིས་ནུབ་ཕྱོགས་ཀྱི་རྒྱ་ནག་ཉམས་ཞིབ་པ་དང་རྒྱ་ནག་གི་དབྱེ་ཞིབ་པ་མང་པོ་ཞིག་གིས་ཁོང་ལ་གདེང་འཇོག་མཐོན་པོ་ཐོབ་ཡོད་པ་རེད།