ཕྱི་ཚེས་ ༢༤ ཉིན་བདེ་སླར་མི་མང་ཚོགས་ཁང་ནང་ལུགས་བདེ་གཉིས་ཀྱི་གཞིས་ལས་ཁང་གི་གོ་སྒྲིག་འོག་མི་མང་ལ་སློབ་ཡོན་ཞུ་ཕྱོགས་དང་འབྲེལ་བའི་ཟབ་སྦྱོང་ཞིག་གནང་ཡོད་ལ། ཉིན་དེར་བཀའ་སློབ་གནང་མཁན་བོད་གཞུང་ཤེས་རིག་ལས་ཁུངས་ཀྱི་དྲུང་འཕར་བཀྲ་ཤིས་སྒྲོལ་མ་ལགས་དང་། དྲུང་གཞོན་འཆི་མེད་ཚེ་རིང་རྣམ་པ་གཉིས་ཡིན། ཟབ་སྦྱོང་གནང་སར་ལུགས་བདེ་གཉིས་ཀྱི་མི་མང་ ༢༠༠ ལྷག་འཛོམས་ཡོད།
འོན་ཀྱང་། ཤེས་རིག་དྲུང་འཕར་བཀྲ་ཤིས་སྒྲོལ་མ་ལགས་ཀྱིས་ཕྱི་ལོ་ ༢༠༠༦ ལོར་ང་ཚོ་འདིར་བཅར་སྐབས་བདེ་སྐྱིད་སླར་གསོའི་མི་མང་གཅིག་པུ་དེ་རིང་གི་གྲངས་ཚད་ལྟ་བུ་ཞིག་འདུག དེ་རིང་ང་ཚོས་བདེ་སྐྱིད་སླར་གསོ་དང་ལུགས་ཟུང་བསམ་འགྲུབ་གླིང་སོ་སོར་ཚོགས་འདུ་གཉིས་སྐོང་མི་དགོས་པར་འདིར་མཉམ་དུ་འཛོམས་དུས་ཀྱང་། མི་མང་གི་གྲངས་ཀ་འདི་ལྟ་བུ་ཞིག་ལས་མི་འདུག ང་ཚོ་ངྷ་སར་ལས་ཀ་མེད་དེ་ས་གནས་སུ་ཡོང་འདོད་ནས་ཡོང་བ་མ་རེད། གོང་རིམ་ནས་བཀའ་ཕེབས་ཏེ། སྔོན་མར་ལམ་སྟོན་མང་བོ་ཞུས་ནའང་། ད་དུང་མི་མང་ནང་སྐད་ཆ་མང་བོ་ལྷག་གི་འདུག མི་མང་ལ་ལམ་སྟོན་བྱེད་དུ་ས་གནས་སུ་འགྲོ་དགོས་ཀྱི་འདུག་གསུངས་སྟབས་ང་ཚོ་ཡོང་བ་ཡིན། ཡང་མིན་ན་དེ་རིང་འཛོམས་མཁན་རྣམས་ཕྲུ་གུ་ཅན་རྐྱང་རྐྱང་ཡིན་ས་རེད། ཡིན་ནའང་། དེ་ལྟར་མ་རེད། མི་མང་ནང་སྐད་ཆ་མང་བོ་ལྷག་གི་ཡོད་སྟབས་མི་མང་འཛོམས་དགོས་པ་རེད། གཅིག་བྱས་ན་བཀའ་བློན་དང་དྲུང་ཆེ་རྣམ་པ་ཞིག་ཕེབས་ན་བཀའ་སློབ་རྒྱས་པ་གནང་གི་ཡོད་པ་དང་། གསན་དགོས་པ་ཞིག་ཡིན་པ་ལས། གཤམ་འོག་གི་ལས་བྱེད་ཅིག་ཕེབས་ན། བཅར་མི་དགོས་པ་དང་གསན་མི་དགོས་པ་ཞིག་ཡིན་ས་རེད་ཅེས་ཚོགས་གཏམ་ཐུང་ངུ་ཞིག་གིས་མགོ་འཛུགས་གནང་སྟེ། ཆུ་ཚོད་ ༡ དང་སྐར་མ་ ༡༡ རིང་བཀའ་སློབ་གནང་ཡོད།
ཁོང་གིས་མུ་མཐུད་གསུང་བཤད་གནང་དོན། སྔོན་མར་ང་ཚོའི་གནས་སྟངས་ཡག་པོ་མེད་ནའང་། ད་ལྟ་འཛིན་རིམ་བཅུ་བ་དང་བཅུ་གཉིས་ཐོན་མཁན་མང་བོ་ཡོད་པ་དང་། དེ་དག་མུ་མཐུད་མཐོ་རིམ་སློབ་གྲྭར་འགྲིམ་དགོས་དུས་ང་ཚོ་ལ་རོགས་དངུལ་མང་བོ་མེད་ནའང་། གང་ཡོད་པ་དེ་ཕྲུ་གུ་བརྒྱ་ཆ་མཐོན་པོ་ཡོད་མཁན་རྣམས་ལ་འབུལ་ཆེད། འདིར་ལམ་སྟོན་བྱེད་དུ་ཡོང་བ་རེད། ཅེས་དང་། འཛིམ་རིམ་བཅུ་གཉིས་རྗེས་ཤེས་རིག་ལས་ཁུངས་ཀྱིས་བརྒྱ་ཆ་མཐོ་བོ་ཡོད་པའི་སློབ་མ་རྣམས་ལ་ཡོངས་ཁྱབ་གསལ་བསྒྲགས་ཇི་ལྟར་གནང་གི་ཡོད་པ་དང་། སྙན་ཞུ་ཇི་ལྟར་འབུལ་དགོས་པ། སྙན་ཞུ་མཉམ་དུ་ཆ་རྐྱེན་གང་དང་གང་ཚང་དགོས་པ། མཐའ་མར་ཕྲུ་གུ་འདེམས་སྒྲུག་ཇི་ལྟར་གནང་གི་ཡོད་མེད། སོགས་རེ་རེ་བཞིན་ངོ་སྤྲོད་གནང་ཡོད།
དེའི་རྗེས་ཤེས་རིག་དྲུང་གཞོན་འཆི་མེད་ཚེ་རིང་ལགས་ཀྱིས་གསུང་བཤད་གནང་དོན། དེང་སྐབས་བོད་གཞུང་ཤེས་རིག་ལས་ཁུངས་སུ་སྲོང་བཙན་སློབ་ཡོན་ཟེར་བ་ཞིག་ཡོད་ཅིང་། དེའི་ནང་དུ་ལོ་རེ་བཞིན་སློབ་ཕྲུག་བཅུ་རེ་འདེམས་ཀྱིན་ཡོད་པ་རེད། དེའི་རིགས་འདེམས་སྟངས་ནི་སྤྱིར་བཏང་སློབ་སྦྱོང་ཡག་པོ་ཡོད་ནའང་། ཡིག་རྒྱུགས་སྐབས་ནད་མནར་གྱི་དབང་གིས་ཡིག་རྒྱུགས་གཏོང་མ་ཐུབ་པ་ལྟ་བུ་དང་། ཡིག་རྒྱུགས་སྐབས་བརྒྱ་ཆ་ཡག་པོ་མ་ལོན་པ་སོགས་ཀྱི་རིགས་གཅིག་དང་། ཡང་རིགས་གཅིག་དུས་རྒྱུན་སློབ་གྲྭར་སྡོད་སྐབས་ཡ་རབས་བཟང་སྤྱོད་ལྡན་པ་དང་། སྤྱི་སེམས་ལྡན་པ། སློབ་གྲོགས་ནང་ཁུལ་དུ་མཐུན་སྒྲིལ་བཟང་བ། སེམས་ཤུགས་ཆེ་བ་བཅས་ཀྱི་རིགས་ཡིན་ན། ཡིག་རྒྱུགས་ཀྱི་བརྒྱ་ཆ་ཡག་པོ་མ་ལོན་ཡང་དེའི་ནང་དུ་ཞུགས་ཆོག་གི་ཡོད། དེ་བཞིན་དྭ་ཕྲུག་དང་ཕྱེད་དྭ་ཕྲུག ཉམ་ཐག་སོགས་ཡིན་ན་འཛུལ་ཆོག་གི་ཡོད་པ་རེད། ཅེས་སྲོང་བཙན་སློབ་ཡོན་སྐོར་འགྲེལ་བརྗོད་གནང་ཡོད་ལ། ཁོང་གིས་མུ་མཐུད་དུ་སྲོང་བཙན་སློབ་ཡོན་ཐོབ་ཆེད་སློབ་ཕྲུག་རང་ངོས་ནས་འགེང་ཤོག་ནང་དགང་དགོས་པ་དང་། ས་གནས་མགོ་འཛིན་ནས་དགང་དགོས་པ། སློབ་སྤྱིས་དགང་དགོས་པ་སོགས་རིགས་འགའ་ཡོད་པ་རེད་ལ། དེ་ནི་སློབ་ཕྲུག་དེའི་དངོས་ཡོད་འཚོ་བའི་ཐོག་གི་དཀའ་ངལ་རིགས་ས་གནས་མགོ་འཛིན་གྱིས་མཁྱེན་གི་ཡོད་ལ། སློབ་ཕྲུག་དེའི་སློབ་སྦྱོང་གནས་སྟངས་དང་ཀུན་སྤྱོད་སོགས་སློབ་སྤྱིས་མཁྱེན་གྱི་ཡོད་སྟབས་ཁོང་རྣམ་པ་གཉིས་ངོས་ནས་ཀྱང་འགེང་ཤོག་དགང་དགོས་པ་རེད། སྤྱིར་ཚོགས་ཆུང་ནས་ཡིག་ཆ་རེ་རེ་བཞིན་ཞིབ་འཇུག་ཡག་པོ་བྱས་ཏེ་ཐག་གཅོད་པ་ལས། སྙན་ཞུ་མཐོང་བ་དང་འདི་ལ་སློབ་ཡོན་འཐོབ་གི་རེད་ཅེས་ཐག་ཆོད་གི་མ་རེད། ཅེས་སོགས་གསུངས་ཡོད།
ཁོང་རྣམ་གཉིས་ནས་ཤེས་རིག་ལས་ཁུངས་ནས་སློབ་ཕྲུག་ཚོའི་སློབ་ཡོན་སུ་ལ་སྤྲོད་ཀྱིན་པ་དང་། སུ་ལ་མ་སྤྲད་པ་སོགས་ཀྱི་ཐད་དོགས་པ་བྱུང་སྐབས་ཁ་པར་གྱི་ལམ་ནས་དོགས་འདྲི་བྱེད་ཆོག་གི་རེད་ལ། ལན་ཡང་རྒྱག་གི་རེད། སློབ་ཡོན་སུ་ལ་ཐོབ་གི་ཡོད་པ་དང་ཇི་ལྟར་ཐོབ་མིན་དེ་ཡིག་ཐོག་ཏུ་གསལ་བོ་ཡོད་པ་རེད་ལ། སློབ་ཕྲུག་འདེམས་སྒྲུག་ཀྱང་སློབ་ཡོན་ཚོགས་ཆུང་བརྒྱུད་ནས་འདེམས་སྒྲུག་བྱེད་ཀྱིན་ཡོད་སྟབས། ངོ་ཆེན་ངོ་མེད་འགྲོ་ས་ཡོད་པ་མ་རེད། དེར་བརྟེན་སེམས་མ་སྐྱིད་པ་བྱས་ནས་སྡོད་དགོས་པ་མ་རེད། དོགས་པ་ཡོད་ན་དོགས་འདྲི་བྱེད་རྐྱང་བྱོས་ཞེས་གསུངས་ཡོད།
ཨ་རིགས་འགྱུར་མེད་ལགས། གསལ་བཤད་གནང་བར་ཐུགས་རྗེ་ཆེ་ཞུ། འོན་ཀྱང་ང་ཚོ་བཙན་བྱོལ་ནང་དུ་འདི་འདྲའི་སྐོང་ཚིག་འབྲི་སྲོལ་ཞིག་གོམས་འདུག་ལ། སྐོང་ཚིག་དེ་ཚོ་ཕྱིས་སུ་འགྲེལ་བཤད་མེད་ན་ཀློག་མཁན་གྱིས་མི་གོ་བ་གོང་གི་འདི་ལྟ་བུ་མང་པོ་འདུག སྐོང་ཚིག་བྲིས་ཀྱང་དོན་གོ་བ་ཞིག་དགོས་རྒྱུ་ལས། གང་འདོད་དུ་སྐོང་བ་ཕྱིས་སུ་འགྲེལ་བཤད་བྱེད་དགོས་པ་འདི་འདྲ་ཕྱིས་སུ་མི་འབྱུང་བར་སྨོན། ཁྱེད་ཀྱིས་འགྲེལ་བཤད་གནང་བར་དངོས་གནས་ཐུགས་རྗེ་ཆེ་ཞུ།
བདེ་སླར་ཞེས་པ་སྦེལ་ཀོབ་ཏུ་གཞིས་ཆགས་གསར་རྙིང་གཉིས་ཡོད་པའི་ནང་གི་གསར་བ་དེ་ཡིན་ལ། བདེ་སྐྱིད་སླར་གསོ་ཞེས་པའི་བསྡུས་ཚིག་ཡིན། གཞིས་ཆགས་རྙིང་བའི་མིང་ལ་ལུགས་ཟུང་བསམ་འགྲུབ་གླིང་ཟེར་ལ། དེ་གཉིས་ཀྱི་མི་མང་ནི་ལུགས་བདེ་གཉིས་ཀྱི་མི་མང་ཡིན།
བདེ་སླར་ཟེར་བའི་ས་ཆ་འདི་གང་ན་ཡོད་པ་རེད། ལུགས་བདེ་གཉིས་ཀྱི་མི་དམངས་སུ་རེད།