གྲོས་ཚོགས་ཀྱི་ཕྱོགས་ཁག་དང་མི་མང་གི་བློ་ཕམ།

དར་ཐང་བ་ཨོ་རྒྱན་བཀྲ་ཤིས།

རྒྱུ་མཚན་ཤོད་པ་དང། བགྲོ་གླེང་བྱེད་པ། ཁོག་རྒྱན་ཡངས་པོ་དང་བཟོད་བསྲན་ཐོག་ནས་བསམ་བློ་མ་མཐུན་པ་ཁས་ལེན་བྱེད་ཐུབ་པ་བཅས་མང་གཙོའི་མཚན་ཉིད་གལ་གནད་ཆེ་བ་ཁག་ཡིན་པས་བརྩི་སྲུང་བྱེད་དགོས། ཞེས་སྤྱི་འཐུས་ལྷན་ཚོགས་ཀྱིས་མང་གཙོའི་དུས་དྲན་ཐེངས་ཞེ་དགུ་བའི་ཐོག་ལ་གསུང་བཤད་གནང་ཡོད་པ་རེད། གཏམ་བཤད་འདིའི་མདངས་མ་ཉམས་ཤིང་དྲོད་མ་ཡལ་གོང་ལ་ང་ཚོས་བཀུར་བར་འོས་པའི་གྲོས་ཚོགས། བོད་ཕྱི་ནང་གཉིས་ཀྱི་འཐུས་མི་ཡིན་ཟེར་མཁན་རྣམས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་རའི་ནང་ནས་རང་ཉིད་ཀྱི་གཏམ་བཤད་ཙམ་གྱི་འགན་ཡང་མི་ཁུར་བར་རྒྱུ་མཚན་མི་བཤད་པ་དང། བགྲོ་གླེང་མི་བྱེད། ཁོག་རྒྱ་མི་ཡངས་བ། བཟོད་བསྲན་མི་བྱེད་པ། བསམ་བློ་མ་མཐུན་པ་ཁས་ལེན་མི་བྱེད་པ་བཅས་ཀྱིས་རང་ཉིད་ཀྱི་གཏམ་བཤད་དེའང་རྡོག་རོལ་དུ་གཏོང་བ་འདི་ཇི་ལྟར་འགྲེལ་བཤད་བྱེད་དགོས་པ་དང་ཡང་ན་ཇི་ལྟར་བསམ་བློ་གཏོང་དགོས་པ་ཞིག་རེད། ང་ཚོའི་གྲོས་ཚོགས་ཀྱི་འཐུས་མི་རྣམས་ཀྱིས་རྒྱུ་མཚན་མི་བཤད་པར་ཕན་ཚུན་བར་སྡིགས་ར་དང་ཚིག་མཚོན། མཚང་འབྱིན་བྱེད་པ། བགྲོ་གླེང་མི་བྱེད་པར་ང་རྒྱལ་དང་ཁོང་ཁྲོས་གྲོས་ཚོགས་བཅད་ནས་ཕྱིར་ཐོན་པ་སོགས་ཀྱིས་གྲོས་ཚོགས་ཀྱི་གྲུབ་ཆ་མ་ཚང་བས་གྲོས་ཚོགས་འཚོགས་མ་ཐུབ་པ་དང་ཐ་ན་སྐབས་བཅུ་བཞི་བའི་ཚོགས་དུས་བརྒྱད་པ་མཇུག་སྡོམ་ཡང་བྱ་མ་ཐུབ་པ། ཁོག་རྒྱ་ཡངས་བོ་དང་བཟོད་བསྲན་མི་བྱེད་པར་གཞན་ཕྱོགས་ལ་ཁྲོ་ཞིང་སྡང་བ། བསམ་བློ་མ་མཐུན་པ་ཁས་ལེན་མི་བྱེད་པར་ཕྱོགས་ཁག་དང་དཔུང་སྒྲིག་བྱས་པ་སོགས་དགྲ་དགའ་གཉེན་སྡུག་གི་བྱ་སྤྱོད་དེ་དག་ནི་རྒྱ་ཆེའི་མི་མང་གི་བློ་ཕམ་བྱེད་དགོས་པ་ཞིག་རེད། སྐབས་བཅུ་བཞི་བའི་ཚོགས་དུས་བརྒྱད་པའི་སྐབས་ལ་གྲོས་ཚོགས་ཀྱི་འཐུས་མི་རྣམས་ཀྱིས་གནས་ཚུལ་དང་གནད་དོན་ཆུང་ཆུང་ཞིག་གི་སྒང་ནས་༸གོང་ས་མཆོག་གི་ཐུགས་རེ་དང་། གཞིས་བྱེས་མི་མང་གི་རེ་བ། རང་ཉིད་ཀྱི་གནས་བབས། སྐད་ཆ་བཤད་སའི་སྡིངས་ཆ་སོགས་སྣང་མེད་དུ་གཡུག་ནས་ཕྱོགས་རིས་དང་འཐེན་ཁྱེར། ཚིག་མཚོན་དང་མཚང་འབྱིན། ཕྱོགས་ཁག་དང་དཔུང་བཤིབས་བྱས་ནས་ནོར་འཁྲུལ་གཅིག་གི་རྗེས་ནས་གཅིག་བཟོས་ཏེ་སྤྱི་ཚོགས་འདིའི་ནང་ལ་ཤུགས་རྐྱེན་ངན་པ་ཚབས་ཆེན་བཟོས་ཡོད་ནའང། ང་ཚོའི་གྲོས་ཚོགས་ཀྱི་འཐུས་མི་རྣམས་ཀྱིས་ད་དུང་ཇི་མི་སྙམ་པར་ག་རེ་བྱེད་དགོས་ན་བྱེད་ཀྱི་ཡིན། ག་རེ་ཡིན་ནའང་འབྱུང་སྲིད་པ་རེད་ཅེས་ཐེ་ཚོམ་དང་འཚབ་ཚོམ་མེད་པར་ངར་རྒྱལ་དང་སྤོབས་པས་ངང་ནས་བརྗོད་ཡོད། འདི་ནི་ང་ཚོ་ཆོལ་གསུམ་ཕུ་ནུ་ཚོའི་སྙིང་ལ་རྨ་ཁ་བཟོ་བའི་དུག་མདའ་དང་། མཐུན་སྒྲིལ་ལག་སྡང་གཏོར་བའི་འགད་རྫས་ཤིག་ཡིན་པ་ལས་ཕ་མ་བསད་ཅིང་ཕ་ས་འཕྲོག་མཁན་གྱི་དགྲ་བོ་རྒྱ་དམར་ལ་བརྗོད་པ་མ་ཡིན་ལ།རང་མི་རིགས་དང་རྩ་དོན་གྱི་ཆེད་དུ་མ་ཡིན་པར། ་གྲོས་ཚོགས་ཀྱི་འཐུས་མི་རྣམས་ཀྱིས་མི་རིགས་ནང་ཁུལ་དང། བོད་པ་ནང་ཁུལ་ཕུ་ནུ་ནང་ཁུལ་ལ་འཛིན་པའི་རྣམ་འགྱུར་དང་སྐད་ཆ་རེད། འདིས་ང་ཚོའི་འཐུས་མིི་རྣམས་ཀྱིས་རྩ་དོན་ལ་འགན་ཁུར་དང། སྤྱི་ཚོགས་ལ་འགན་ཁུར། མཐུན་སྒྲིལ་ལ་འགན་ཁུར། མི་རིགས་དང་རིགས་གནས་ལ་འགན་ཁུར་གྱི་བསམ་བློ་མེད་པ་མཚོན་ལ།ཚུལ་འཆོས་ཀྱིས་བཏུམས་པའི་ང་ཚོའི་འཐུས་མི་དག་གི་སྤུས་ཀ་དང། སྤྱི་ཚོགས་འདིའི་མང་གཙོའི་ཚད་གཞི་ཡང་ན་སྤྱི་ཚོགས་ཀྱི་སྤུས་ཀ་སོགས་ཀྱང་གསལ་བོར་མཚོན་པ་རེད། སྐབས་བཅུ་བཞི་བའི་གྲོས་ཚོགས་ཚོགས་དུས་གཉིས་པའི་སྐབས་ལ༸གོང་ས་མཆོག་གིས་གྲོས་ཚོགས་ལ་གསུངས་འཕྲིན་བསྩལ་བའི་ནང་ལ་གྲོས་ཚོགས་ཀྱི་འཐུས་མི་རྣམས་ཀྱིས་རྟོན་བཞི་འཇུག་ལྡོག་མ་ནོར་བ་བྱེད་དགོས་པའི་བཀའ་སློབ་ལམ་སྟོན་གནང་བའི་སྐབས་གྲོས་ཚོགས་ཀྱི་འཐུས་མི་མང་པོ་ཞིག་གིས་རྟོན་བཞི་འཇུག་ལྡོག་གི་ནང་དོན་མ་ཤེས་པར་བཀའ་བློན་ཁྲི་བའི་འགྲེལ་བཤད་བྱས་དུས་གཞི་ནས་ཤེས་རྟོགས་བྱུང་བ་རེད་ཟེར། འོན་ཀྱང་ང་ཚོའི་གྲོས་ཚོགས་ཀྱི་འཐུས་མི་མང་པོ་ཞིག་གིས་ད་དུང་རྟོན་བཞི་འཇུག་ལྡོག་གི་ནང་དོན་མ་ཤེས་པ་ཡིན་ནམ།མི་ཤེས་ཁུལ་བྱེད་པ་ཡིན། ཡང་ན་ཤེས་འདོད་མེད་པ་ཡིན།་གང་ལྟར་འཐུས་མི་མང་པོ་ཞིག་གིས་དུས་རྒྱུན་ཆོས་ལ་མི་རྟོན་གང་ཟག་ལ་རྟོན་པ།དོན་ལ་མི་རྟོན་ཚིག་ལ་རྟོན་པ་སོགས་རྟོན་བཞི་འཇུག་ལྡོག་འདི་ལོག་པར་སྤྱོད་བཞིན་ཡོད། གལ་ཏེ་གྲོས་ཚོགས་ཀྱི་འཐུས་མི་རྣམས་ཀྱིས་༸གོང་ས་མཆོག་གིས་ལམ་སྟོན་གནང་བ་དེ་དུས་རྒྱུན་ཉམས་ལེན་དང་ལག་བསྟར་བྱེད་ཀྱི་ཡོད་ན་ཐེངས་འདིའི་སྤྱི་འཐུས་སྒེར་གྱི་གྲོས་འཆར་དེའང་རྒྱུན་ལྡན་གྱི་གྲོས་འཆར་བཞིན་འགྲོ་བ་ལས་རྩོད་རྙོག་ཅན་དུ་གྱུར་དགོས་པའི་གནད་དོན་གང་ཡང་ཡོད་པ་མ་རེད། འོན་ཀྱང་འཐུས་མི་མང་པོ་ཞིག་གིས་གྲོས་འཆར་གྱི་ནང་དོན་དང་ངོ་བོ། དགོས་དམིགས་སོགས་ལ་མ་བལྟས་པར་གྲོས་འཆར་འདོན་མཁན་དང། རྒྱབ་སྐྱོར་བྱེད་མཁན་ལ་བལྟས་ནས་དགག་པ་བརྒྱབ་པ། གྲོས་འཆར་གྱི་ནང་དོན་ལ་བགྲོ་གླེང་མ་བྱས་པར་ཆོལ་ཁོངས་དང་གང་ཟག་སྒེར་གྱི་རྙོག་དྲ་སོགས་གླེང་སློང་བྱས་པ།བདེན་པ་དང་གནས་ལུགས་ལ་རྒྱབ་སྐྱོར་མ་བྱས་པར་ཕྱོགས་གཏོགས་ཙམ་གྱི་སྐད་ཆའི་རྗེས་སུ་འབྲང་བ་སོགས་ཀྱིས་གྲོས་འཆར་དེ་རྩོད་ཉོག་ཅན་དུ་གྱུར་བ་རེད་སྙམ། འོན་ཀྱང་གནས་སྟངས་དང་གནད་འགག་གང་གི་སྐབས་ལའང་༸གོང་ས་མཆོག་གི་གསུངས་འཕྲིན་རྟོན་བཞི་འཇུག་ལྡོག་མ་ནོར་བ་གནང་དགོས་པའི་འཀའ་སློབ་དེ་གྲོས་ཚོགས་ཀྱི་ཡིག་ཉོབ་ནང་ལྷག་འདུག་པ་ལས་དེ་ཉམས་ལེན་དང་ལག་བསྟར་བྱེད་མཁན་མེད་པ་ནི་ཇི་འདྲིའིི་ཡིད་ཕངས་བ་དང་ངོ་གནོངས་དགོས་པ་ཞིག་རེད་ཨང།